Marc 16
16
Jésus amakunduga
(Bono na Matt. 28:1–8, Luc 24:1–12, Jean 20:1–10)
1Vamoota nyee edunda aAjuif, Marie môsi Magdala na Salomé, na Marie yeene éaJacques amasômba madi mamôyombo gôékea gôésôga mangô g’ôtô aJésus. 2Nyaa tsono n’ongôngôe wetso vapambôga nyee, agetoe ahmakea na gô ngii. 3Agetoe ane ahmeevôana anguene n’anguene mbe: ?One angatôkandanganédéa étaé évôni éndé v’ombaa apesine éamôdungutu indaa? 4Ivô vamabuéahngô ahmeena te étaé évôni émakandanganédu na va kôbangô ombee angiine. 5Ahmeengéa na gô ngiine éamôdungutu. Wangô ahmeena môma andé ga mônzambu andé digaa géeyo gémôgôô, aata gédénga savee. Agetoe ahmookô mangongo ahmakuadima. 6Mômane amabeenda ahngô mbe: Nôneena gomo. Anye nôbuta Jésus môsi Nazareth, ône akomediôkô va gésumu sowa. Akundugi. Asabadô éva. Bononi. Aanakani tungune égunyiôkô angô. 7Kiakani. Beendani aneengi edi, ti gandé Pierre, mbe: Jésus oobégéyi na gô Galilée. Gône nôngamôena gamabeendangô anye.
8Ageto ahmakusa ahmabusuga pita na gôdagôda na ngiine. Muetso ahmatatéa n’onzenze. Na gomo ômookô ahngô asibeendé môma éne émeenahngô.
Jésus amatsutsuga vandé Marie môsi Magdala
(Bono na Matt. 28:9–10, Jean 20:11–18)
[ 9Vamakunduga Jésus g’ôwa nyaa tsono n’ongôngôe wetso, amapanga étsutsuga vandé Marie môsi Magdala. Marieme mane te ône amabaka na édidi tsambué émakuséda Jésus. 10Marie amakea na gôndé géômbé saJésus gôébeenda ahngô gamatsutsuga Jésus vandé angô. Amadenga akedi na mitéma miditani na ahdéa. 11Vamookôahngô tsangône émaviga na Marie mbe: Neeni Jésus, akundugi g’ôwa, akedi amamôtsuma paga.
Jésus amatsutsuga vandé aneengi abaé
(Bono na Luc 24:13–35)
12Va mbene éne Jésus amatsutsuga wene mônongo gôndé avo abaé ahmakea gô nzéa na gô madeke. 13Ahngô abaé ahmanika na gô mbôka gôénigôa akaô. Ivô akaô ahmahtsuma paga.
Jésus amatsutsuga vandé nzima na môneengi môvo
(Bono na Matt. 28:16–20, Luc 24:36–49, Jean 20:19–23, Mayanzame 1:6–8)
14Na vane Jésus amatsutsuga na gôndé nzima aneengi na môneengi môvo vamadigaahngô gôéaa. Jésus amasemba ahngô gômatsumahngô paga gô disôba yaô. Amoomba éahsemba gômakékôahngô tsangôye yane ahmeena Jésus na amabeenda akaô mbe: Akundugi. 15Jésus amatôma aneengie mbe: Kiakani na gô tsengeye yetso. Ikédakani Tsangô Eami Eamôsôba gô mongome metso. 16One eetsa môtémedi na eetsô bateme, te angô angoobouni. Ivô ône aseetsa môtémedi angeesédu na g’ôwa. 17Menyani mbe ane eetsa Nzambé mitéma miaô ahngayanza émbégéa évôni étubéda ngudi yaNzambé. Embégéa te mbe ahngakuséda édidi ébévani gôndé oma gô inami. Ahngavovo gô yaanga yôgi disiikédu ahngô. 18Okô atsôpa nyogo édôngani na mogo maô asangeendô ébégô. Okô anyua môyobo asangeendô kôbi. Ahngatsakéga mogo maô gôndé abeeyi n’angô angadônga.
Jésus amabata na gôndé Nzambé
(Bono na Luc 24:50–53, Mayanzame 1:9–11)
19Vamamanangô évovo nane, Kumu Jésus amabata na g’ôba gôédigaa gô géeyo gémôgôô saNzambé. 20Aneengie ahmakea tunguye yetso gôéékéda Tsangô Eamôsôba. Kumu Jésus amayanza n’ahngô. Mabégô manyônganéôni masoongôa môma ésupua mamayanzahngô mamatubéda oma mbe meekédume éma ti mapie.]
Alliance Biblique du Gabon (Bible Society in Gabon) 1983
