Lukasa 2
2
O Yesusu womaboa o Beteleheeme ma kotaka
1-2De ma oraha gea de o Roma ma nyawa yahipareta o Isiraele ma nyawa mata-mataika. Ho abe duru wahikoano o Isiraele ma tonaka ma amokika gea o Roma manga koano abe ai romanga idodutu o Agustusu. Masara o Roma ma nyawa manga koano iwifetongo o Kaisara dika, abe ma titi ma koano abe ka unangohi wokokurutiye. De naga ma koano gea ai duduhunu womatengo ai romanga o Kireniusu abe wahipareta o Siria ma propinsi ma tonaka. De nako o Isiraele ma tonaka ma oraha gea imanoa o Siria ma propinsi ma tonakoka.
De ma dekana ma dekana de o Roma ma popareta yaetongo manga kokawaaha mata-mataika. Ho naa abe ma oraha o Kireniusu wapareta o Isiraele ma tonakoka de ona o Roma ma popareta yomaputuhu la manga kokawaaha yaetongo ma moioli. Ho o Kaisara gea una wahuloko ai popareta ma nyawaika wato, “Kiani nanga kokawaaha hahioriki manga ngoe o tonaka mata-mataika abe ngone hahipareta. Ho manga romanga homoi-homoiika kiani niakokitulihuku la hakokietongo.” Hokogea o koano o Kaisara ai huhuloko ma demo. 3De yahuloko manga kokawaahaika la yokokilio to ona homoi-homoi manga totofora manga kapo-kapongika la genangoka manga romanga yale o popareta.
4De abe o ngo Maria ami darunu o Yusupu, to una ai tofora o koano o Dautu abe una duru ma dodihiraka wahikoano o Isiraele ma nyawa. De o Dautu ai kota gea o Beteleheeme abe imanoa o Yudea ma tonakoka, ho o Yusupoo iwihiromanga o Beteleheeme ma nyawa. Masara o Yusupu ko wogogerokaua o Beteleheemoka masara o Nasarete ma kapongoka abe o Galilea ma tonakoka wogogere. Ho ka de o Kaisara ai huhuloko ma demo iboa de o Yusupu de ngoi darunu o ngo Maria yosobo yoiki daku o Beteleheemiye. 5Genangika yoiki la ka idadi una de o ngo Maria manga romanga ka idadi yatulihi o popareta. De gea o ngo Maria de ami badangoka ami dodubuhoka. 6De ma oraha yogogere o Beteleheemoka gea de ami gahe adonoka ho momagerewoto. 7De ma oraha gea o nyawa ko manga ngoe naga yoboaka o Beteleheemino la manga romanga yatulihi. Ho gea ma titi hiadono o nyawa manga tau-tauoka de ngade-ngade ko iwaka ma ngi la yadioniki manga gogianongoruoka. De gea o Yusupu de o ngo Maria yomanoa o aewani ma ngioka dika. Ho o aewani ma ngioka gea de ami ngofaka o domoro womaboa o nauru. De o ngo Maria mihihawoino de o paka-paka de mikelengauku o aewani ma ngi ma ngo-ngolomoka.
8De o futu gea womaboa de doka o Beteleheeme ma kota ma hoanoka yamuruono naga o domba ma gogoana angamoi manga domba ma duduono yogoana genangoka. 9De ka itodokanino naga nanga Baluhu Wokokurutiye ai malaekata womatengo womahimatoko o domba ma gogoanika gea. De ona duru yahidatararonuku de Ma Jou ai medebini ma dararono ho hiadono duru yohawana. 10Masara ma malaekata gea wahingahu onangika wato, “Ngaro ufa nihawana! Ngohi naa tinidotaka o Abari ma Rorahai abe ahao o nyawa mata-mataika duru yahidogaragoka o Abari ma Rorahaiika gea. 11Abe o futu naa doka o Dautu ai kota ma goronaka de naga o ngofaka womatengo womaboaka abe ma titi winiduhunu ngini. De Una gea ahao winihihohe nia howo-howonino. De ma ngofaka gea nanga Baluhu abe Una gea ti ngini nia koano abe Ma Jou winihibehehongoka. 12De hokonaa ai dodunguu la ka idadi de nia lako niwimake de niwihioriki, ahao doka o kotaka ngini niwimake o aewani ma kurunga ma goronaka duru o aewani ma ngi ma ngo-ngolomoka iwikelengauku. Genangoka ahao niwimake de iwihihawoino de o ngofaka manga paka-paka.”
13Ka de o malaekata wotemo ibooto de ka itodokanino naga o Horogaino ikokiboa o momalaekata duru kohangoe yotuono de iwihigororomino o malaekata wohira gea. De ahao ona mata-mata duru Ma Jou iwihigogiriiri abe yokokinyanyi ato,
14 “Hipuji Ma Jouiye, Una wokokurutiye,
O nyawaika wahidoakoka o dame de ma owa,
Angamoi Ma Jou o Horogaka,
Womalega o nyawauku de duru wadora.”
Hokogea o malaekata ko manga ngoe gea iwihigiriiri ibooto de yokokilio o Horogaiye.
15Ho ka de yolioka o Horogaiye de o domba ma gogoana gea yomahikokagaro ato, “Abeika, hosobo la o ngofaka gea hitutumu doka o Beteleheemoka abe hoka nanga Baluhu wonahingahuoka.”
16Ho gea duru yomataiti yoiki doka o Beteleheemika de genangoka yamake o Yusupu de o ngo Maria de ami ngofaka abe Una naga o aewani ma ngi ma ngo-ngolomoka mikelengauku duru imaketero hoka o malaekata yahingahuokau. 17Ho gea o domba yogoa-goana o ngo Maria ami ngofaka iwimakeoka de yomulaenge yoade-ade abe kangano o malaekata yahingahuoka ato, “Ma Jou ai momalaekata inahingahu abe duru o ngofaka naa nanga koano abe ahao wonahihohe nanga howo-howonino hoka ma dihira Ma Jou wonahibehehongokau.” De genangoka nagaoo o nyawa utu yomatoomuino, ho ona mata-mata yokokiihene o domba ma gogoana manga ade-ade. 18De ona mata-mata ka de yoihene o domba yogoa-goana manga ade-ade gea de duru yokokiheranga. 19Masara o ngo Maria mata-mataika abe idadioka o futu gea de to ona manga ade-ade enangoo duru magogono ami hiningaka de ka ihikaika momahihohininga.
20De o domba yogoa-goana gea yokokilio manga duduonika de duru Ma Jou ai romanga agorakiye abe iwihigogiriiri Unangika. De gea iwihigiriiri mangale duru yosanangi ma titi mata-mataika abe yoihenoka de abe yamakeoka de manga lako. De ona ato, “Igoungu mata-mata gea idadioka duru imaketero hoka o momalaekata inahingahuoka ngoneino.” Hokogea o domba ma gogoana manga higiriiri ma demo.
O Yesusu ai gogilauohi de iwiao Ma Jou ai Tauika
21O ngo Maria ami ngofaka adonoka ai ngumuru ai wange tufange de iwihuna angamoi duru aniiki o Isiraele ma nyawa manga pareta abe ato kiani o ngofaka o nauru manga wange tufange adonoka de yahunaka. De ai dimono iwihiromanga o Yesusu angamoi Ma Jou ko wihidadiuahi o ngo Maria ami pokoroka de ai malaekata wahingahuokau kiani ai romanga o Yesusu.
22-24De ipahaino abe o Yesusu womaboaka ai wange moruata ibooto de o ngo Mariaoo naga manga pareta moioli kiani muna maniiki. Abe o Isiraele ma nyawa naga manga pareta o Musaino abe ma oraha o ngofeka momagerewoto de ma dekanino o wange moruata ibooto de ahao kiani momahuba la momahitunguu abe muna motebinokali. Ho adonoka ami wange moruata gea de muna de o Yusupu yoiki Ma Jou ai Tauika abe naga o Yerusaleeme ma kotaka. De kiani muna momahihuba o namodaara hinooto eko o kuumu-kuumu ma ngofaka hinooto. Ho ami huhuba gea yomahidiai de yoiki daku o Yerusaleemiye. De o Yesusoo iwiao la ka idadi iwihitunguu abe iwitingaka Ma Jouika. Angamoi naga ihitulihukuoka Ma Jou ai Pareta ma bukuoka abe nako o nyawa manga ngofaka o domoro o nauru de gea ai dimono kiani iwitingaka Ma Jouika.
25-26De naga womatengo wogogere o Yerusaleeme ma kotaka ai romanga o Simeono. Una gea duru iwimagawe waniiki Ma Jou ai behehongo mata-mataika de to una ai wowango ma datoro itiai. De Ma Jou o Womaha naga o Simeonoka de ma dihira wihibehehongokau o Simeonika wato, “Ngona ko nohonenguahi de kiani nimakeohi de ani lako o koano gea abe Ma Jou wohibehehongoka.” Ho ka ihikaika o Simeono widodamaa ma koano gea abe o Isiraele ma nyawa manga hininga ma huha wagoraka angamoi ahao ma oraha gea de Una waduhunu manga hohowonino.
27De angamoi Ma Jou o Womaha o Simeono wihihira-hira ho unangoo naga o wange gea abe o Yusupu de o ngo Maria yoboa Ma Jou ai Tauino. De gea ona yoboaino la yaniiki manga pareta abe ato manga ngofaka o Yesusu iwitingaka Ma Jouika. 28Ho ka de o Yusupu de o ngo Maria yowohama Ma Jou ai Tau ma loa ma goronaika de naga genangoka o Simeono wabuhukino. Gea wabuhukino de manga ngofaka wile de witotirino de duru wihigiriiri Ma Jou wato,
29 “Ahi Baluhu, naa igoungu Ngona nodiaioka
Abe ma dihira nohihibehehongokau ngohino.
Ho ani gilaongo ngohi naa ahi hininga iuwinoka,
Ho naa ka idadi nohihigunoa la o dunia naa tanoa.
30 Angamoi de ahi lako naa timakeoka naa Una,
Ani Behehongo abe womihihohe mia howo-howonino.
31 O nyawa manga howono ma ngongofi nahidiaioka,
De ka idadi yamake o dunia ma nyawa mata-mata.
32 De o ngofaka naa wodadi o dararono o nyawaika.
Abe ma titi Una wobaluhiyeoka de ahao wahimatoko Ma Jou ai hininga o nyawa mata-mataika.
De gea ngaro ona ko o Isiraele ma nyawaikaua, ma onangikaoo wahitararono.
Igoungu Una naa womaboa o Isiraele ma nyawaino,
De mangale ma titi o nyawa ahao duru iwihoromati Unangika,
Ho o nyawa manga horomati itagioo ngomino,
Abe ngomi midadioka to Ngona ani nyawa, ho manga horomati itagi o Isiraele ma nyawaino naa.”
Hokogea o Simeono ai higiriiri ma demo Ma Jouika.
33De gea o Simeono ai demo yoihene de o Yesusu ai baba de ngoi meme duru yoheranga abe ai demo gea ma dumutu manga ngofakika. 34De ahao o Simeono wagahoko o Yusupu de o ngo Maria Ma Jouiye la wahiowa.
Gea wahiowa ibooto de ahao womihingahu o ngo Mariaika wato, “Abeika notoihene ahi demoino. Angamoi o ngofaka naa Ma Jou wihidadi la wihidingoto o Isiraele ma nyawaika de ai hininga ma dumutu naga hinooto. Abe moi o Isiraele ma nyawa manga ngoeika ahao yamake o bobinaaha. De abe moioli to Una ai nyawa manga ngoe utuika yamake o duduhunu manga boditoino ma titi Una. De Una wodadi o dodunguu abe wonahimatoko ngoneino Ma Jou ai ngekomo. Masara ko manga ngoe ahao yalawana ma dodunguu gea hiadono iwioluku Unangika. 35Ho abe o nyawa utu iwidafongo irahai de utuoli iwioluku Unangika, mangale ma titi manga putuhu gea hiadono ona ma hirete yomahimatoko abe hokokia itagi manga borihiningaka.”
De o Simeono wogila-gila womihingahu munangika wato, “De ahao abe ma oraha ona yodiai itorou ani ngofakika naa de gea ngonaoo namao ani kangela abe imaketero hoka ani hininga atopoko de o humaranga abe ma doto arihononga.” Hokogea o Simeono womihingahu o ngo Mariaika.
36-37De nagali o ngofeka mofao momatengo genangoka ami romanga o ngo Hana abe ami baba o Fanuele. De ona o tau moi o Asere ai totoforauku. De muna gea duru imiperekioka abe ami ngumuru adonoka ami taongo moritufange de iata. Ma dihiraino muna de ami rokata yoilakino manga taongo tumidino dika ma dekana de ahao ami rokata una wohonengoka. Ho muna mofao duru ma dekana de ka ihikaika mogogere Ma Jou ai Tauoka de mitobaleleani Unangika. Abe o futu de o wange ka ihikaika mihigiriiri Ma Jou abe momatobaniata de motobapuaha la ami hininga ma dumutu duru ka Ma Jouika dika. De o ngo Hana gea munangoo Ma Jou womihiakunu la ka idadi mohidemo to Una ai demo-demo.
38Ho duru ma oraha gea o ngo Hana naga Ma Jou ai Tau ma loaka de ahao munangoli moboaino. Ho ma oraha o Yesusu mimake de munangoo duru motarimakase Ma Jouiye mangale ma titi Ma Jou ai Behehongo wihidingotoka. De ahao muna moade-ade de mahingahu-ngahu o Isiraele ma nyawa mata-mataika genangoka abe onangoo iwingano-nganono manga Koano abe Ma Jou wahibehehongoka la waduhunu onangika. De gea mahingahu onangika ma titi o Yusupu de o ngo Maria manga ngofaka o Yesusu. De ona gea manga hiningaka de yongano-nganono abe manga kota o Yerusaleeme enangoo Una ahao wahihupu o nyawa manga giamino abe yahipareta onangika. Ho ma wangeoka gea de imahikaika de o ngo Hana matobahingahu-ngahu o nyawaika ma titi o Yesusu.
39Ho ipahaino de o Yusupu de o ngo Maria Ma Jou ai Tauoka yodiai ibooto mata-mata gea abe o Isiraele ma nyawa kiani yaniiki abe ma oraha o ngofaka yomaboaka. Ho gea Ma Jou ai Pareta yaniiki ibooto de ahao yolio o Nasarete ma kapongika, abe gea manga kapongo o Galilea ma tonakoka. 40De manga ngofaka o Yesusu wolamoko de ai buturungu ka idogo, de ai hininga aomanga de o sosawaro. De Ma Jou duru widora Unangika hiadono ka ihikaika wihiowa.
O Yesusu de ona yotobadoto-dotoko o Musa ai Paretaino yomakoketemo
41-42De o Yesusu ai dimono o tao-taongiye ona yoiki daku o Yerusaleeme ma kotaiye la yaniiki o Totilakuru ma rame-rame genangoka. De abe ma oraha o Yesusu ai ngumuru adonoka ai taongo ngimoi de hinooto de o Totilakuru ma rame-rame ma oraha adonoka, ho ona yoikoli o Yerusaleemiye la ma moioli yaniiki manga rame-rame gea.
43De o wange muruono ipahaino abe ma rame-rame ibootino, de to Una ai dimono yosobo ato yolio o Nasarete manga kapongika, masara o Yesusu Una ka wogoo-gogerohi o Yerusaleemoka. Masara to Una ai dimono ko iwihiorikua, 44angamoi naga manga gogianongoru ko manga ngoe yomakokiniiki yolio, ho ai dimono ona ato bote manga ngofaka Unangoo naga yomakokiniiki de ai dodiawo. Masara abe ma oraha yofutuoka de ko iwimakeuahi, ona yomulaenge iwilingiri abe ai dodiawoka de manga dutuoka. 45Masara Una ko iwiwa onangoka gea abe yomakutuono yolio manga kapongika, ho ai dimono yogilio o Yerusaleemika la ato iwilingiri genangoka.
46De ona yahinooto duru iwilingiri o kota gea ma amokika hiadono manga wange hangeino, de ahao iwimake Ma Jou ai Tauoka abe wogogeruku manga hidogoronaka abe yotobadoto-dotoko o Musa ai Paretaino. De Una duru wototoihene de wotobaleha onangika abe o dodotoko ma titi muruono naga yomakoketemo. 47De o nyawa abe yoihene to Una ai demoino ona mata-mata duru yokokiheranga ma titi to Una ai sosawaro de ai babaluhu ma demo ona yotobadoto-dotokika.
48De ai dimono ona manga hininga duru ihuhaka, de ngoi meme motemo Unangika mato, “Mia ngofaka, done adodoa ho hokonaa ani datoro nodiaioka ngomino? Angamoi ngohi de ani baba mia hiningaka de duru mihuha ma titi ko minihiorikua ho minilingi-lingiri hokonaa mia dekana!”
49De Una wopaluhu onangika wato, “Ma titi o kia hiadono nihilingiri o ngi-ngi utuika? Mode ko nihiorikua abe Ngohi kiani naga ahi Baba ai ngioka?” 50Masara ai dimono ko yomangaratiiua to Una ai babaluhu ma demo onangika.
51De ahao ona yomakiniiki yolio manga kapongo o Nasaretika de Una ka ihikaika watobahingounu ai dimonika. De to Una ngoi meme muna ami hiningaka de duru mongano-nganono gea mata-mata abe idadioka de Una. 52De ipahaino o Yesusu ai gurutiye ka idogohi de ai sosawaro enangoo ka idogo-dogo. De Ma Jou duru widosanangi Unangika, de o nyawa mata-mata abe iwihioriki onangoo iwisanangi Unangika.
Gereja Firman Allah, Yayasan Misi Masyarakat di Pedalaman
