Éxodo 4
4
1Chaymantam Diosta Moisés nirqa:
Paykuna mana creewaspa, “Tayta Diosqa manam rikurisurqankichu”, nispa mana kasuwaptinkuqa ¿ima nisaqtaq? nispa. 2Chaymi Tayta Dios nirqa:
¿Imataq makikipi kachkan? nispa.
Moisesñataqmi nirqa:
Tawnam, nispa.
3Hinaptinmi Dios kamachirqa:
Pampaman wischuy, nispa.
Pampaman Moisés wischuykuptinmi maqta uruman tikrakururqa, chaymi Moisesñataq ayqekurqa. 4Ichaqa Moisestam Tayta Dios nirqa:
Chupanmanta hapiruy, nispa.
Moisés hapiruptinmi kaqllamanta makinpi tawnayarurqa. Chaymi Tayta Dios nirqa:
5Kay señalwanmi creenqaku ñawpaq taytaykichik Abrahampa, Isaacpa hinaspa Jacobpa Tayta Diosnin qanman rikurisusqaykita. 6Chaymantam Tayta Dios nirqa: Makikita oqllaynikiman hinay, nispa.
Moisés oqllayninman makinta hinaykuspa hurqoykuptinmi makinqa riti hina yuraqllaña lepra onqoywan kachkasqa. 7Hinaptinmi Tayta Dios nirqa:
Makikita huktawan oqllaynikiman hinay, nispa.
Chaymi makinta oqllayninman hinaykuspa hurqoykuptin makinqa cuerpon hina sanoña kachkasqa. 8Tayta Diosqa nirqataqmi:
Sichum punta kaq señalwan mana creespa mana kasususpaykiqa qepa kaq señalwanmi creesunki. 9Chay iskay señalkunata mana creespanku nitaq nisqaykitapas mana kasukuptinkuqa, mayumantam yakuta wisiykunki hinas-pam chaki allpaman talliykunki, hinaptinmi chay yakuqa allpapi yawaryarunqa, nispa.
10Chaymi Tayta Diosta Moisés nirqa:
¡Ay, Señorlláy! Ñawpaqpas kunanpas ñoqaqa mana ancha rimay atiqmi kani, kay serviqnikiqa wata-watata rimaqmi kani, nispan.
11Hinaptinmi Tayta Dios nirqa:
¿Pitaq runaman simita qorqa? ¿Pitaq mana rimaqta, mana uyariqta, qawakuqta hinaspa ñawsata unancharqa? ¿Manachu ñoqa Tayta Dios? 12Chaynaqa, kunan riy, ñoqam rimachiqniki kasaq, ñoqataqmi imam rimanaykitapas yachachisqayki, nispa.
13Chaymi Moisés nirqa:
¡Ay, Señorlláy! Hukta kamachiyqa, ama ñoqatachu, nispa.
14Hinaptinmi Moisespaq Tayta Dios llumpayta piñakuspan nirqa:
Ñoqaqa reqsinim Leví ayllumanta wawqeki Aaronta, paymi rimanqa. Paymi taripamusuchkanki, qawaykususpaykim sonqonpi kusikunqa. 15Qanmi payta rimapayanki, yachachinkitaqmi imam ninantapas; imam rimanaykichiktawan imam ruwanaykichiktaqa ñoqam yachachisqaykichik. 16Paymi qampa rantikipi runakunaman rimapayanqa, qampa rimanaykita hinam rimanqa, qamñataqmi ñoqapa rantiypi kanki. 17Chay tawnata apaspam señalkunata ruwanki, nispa.
Egiptoman Moisespa kutisqanmanta
18Suegron Jetropa wasinman kutiruspanmi Moisés nirqa:
Wawqeykunapa imayna kasqanta yachaqmi Egipto nacionta kutisaq, nispa.
Suegronñataqmi nirqa:
Riruyá, nispa.
19Madián lawpi kachkaptinraqmi Moisesta Tayta Dios nirqa:
Egipto nacionman kutiy, llapallan wañuchiy munasuqnikikunaqa wañurunkuñam, nispa.
20Chaymi Moisesqa warmintawan churinkunata huk asnoman sillaykachispa Egipto nacionman kutikurqa, aparqataqmi Diospa varantapas. 21Chaymantam Moisesta Tayta Dios nirqa:
Egipto nacionman kutispaykiqa amam llapallan milagrokuna ruwachisqaytaqa qonqankichu, Faraonpa qayllanpim ruwanki. Runaykunata mana kacharinanpaqmi sonqonta rumiyarachisaq. 22Faraontam ninki: “Tayta Diosmi kaynata nin: Israelpa mirayninkunaqa piwi churiy hinam. 23#Ex 12.29.Ñam nirqaykiña churiyta kacharinaykipaq chaynapi hatunchawananpaq, mana kachariyta munaptikiqa piwi churikitam wañurachisaq, nispa”.
24Ñan risqanpi, ayllunkunapiwan samana wasipi Moisés kachkaptinmi tuta wañurachinanpaq Tayta Dios rikuriykurqa. 25Chaymi warmin Seforaqa ñawchi rumita hapiykuspan wawanpa qari kayninpa qarachanta kuchururqa, hinaspam Moisespa chakinman tupaykachispan nirqa:
Cheqaptapas qamqa yawarpa chanin qosaymi kanki, nispa.
26Chaynapim Diosqa mana wañurachirqachu. Chay señalraykum Séfora nirqa: “Yawarwan rantisqa qosaymi”, nispa.
27Aarontam Tayta Dios nirqa:
Chunniqman riy Moisesta taripaq, nispa.
Chaymi rispan Diospa orqonpi tupaykurqa hinaspam rimakuykuspan mu-chaykurqa.
28Chaymi Aaronman Moisés willar-qa, rimananpaq hinaspa señalkunata ruwananpaq Tayta Diospa kamachi-musqanta.
29Hinaspam Moiseswan Aarón rispanku Israelpa mirayninkunamanta llapallan ancianokunata huñururqaku. 30Chaymi Aarón paykunaman willarqa Tayta Diospa tukuy ima Moisesman nimusqanta, runakunapa rikusqantataqmi señalkunatapas ruwarqa.
31Chaymi paykunapa nisqanta runakuna creerqaku. Israelpa mirayninkunam paykunaman Tayta Diospa watukusqanta yachaykuspanku, ñakarisqankutapas qawaykusqanta uyariykuspanku kumuykuspa Diosta hatuncharqaku.
Chuya Qellqa - La Biblia en Quechua de Ayacucho - Edición Revisada © Peruvian Bible Society, 2012
