Éxodo 5
5
Moiseswan Aarón rey Faraonta rimapayasqankumanta
1Moiseswan Aaronmi Faraonpa qayllanman yaykuspanku nirqaku:
Israelpa yupaychasqan Tayta Diosmi nin: “Llaqtayta kachariy chunniqman rinankupaq, hinaspa fiestata ñoqapaq ruwamunankupaq”, nispa.
2Rey Faraonñataqmi nirqa:
¿Pitaq Tayta Diosqa payta kasuspay Israelpa mirayninkunata kachaykunaypaqqa? Tayta Diostaqa manam reqsinichu, manataqmi Israel miraykunatapas kachariymanchu, nispa.
3Chaymi paykuna nirqaku:
Hebreo runakunapa Diosninmi ñoqaykuman rikuriykuwanku. Chayraykum kimsa punchaw puriyta chunniqman rispa Tayta Diosman sacrificiokunata ofrecespa hatunchamusaqku, mana chayqa ñoqaykumanmi ima peste onqoypas otaq guerrapas chayaramuwanmanku, nispanku.
4Ichaqa Egipto nacionpa reyninmi paykunata nirqa:
Yaw Moisés, Aarón, ¿imanasqataq runakunata chaykunawan atrasankichik? Imam ruwanaykichikman kutispa llamkamuychik, nispa.
5Faraonqa nirqataqmi:
Qamkunapa aylluykichikqa achkallañam. ¿Qamkunañataqchu llamkanankumanta samarachinkichik? nispa.
6Hinaspanmi hina chay punchawllapi, llapa llamkachiqkunatawan capatazkunata kaynata kamachirqa:
7Kunanmantaqa amañam adobeta chutanankupaq pajata qonkichikñachu, kikinkuñam huñukamunqaku. 8Adobetaqa haykatam ruwarqaku chaynallatam ruwachinkichik, amam imaniraqtapas menosyachinkichikchu. Qellakuspam paykunaqa nichkanku: “Diosninchikta hatunchamusunchik animalkunata ofrecespa” nispanku. 9Yanqa rimaykunata ama uyarichkanankupaq as allinniqta llamkachiychik pisipanankukama, nispa.
10Chaymi llamkachiqkunawan capatazkuna lloqsispanku runakunata nirqaku:
Rey Faraonmi kaynata nin: “Pajataqa manañam qosqaykichikñachu. 11Chaynaqa, kikikichikña maymantapas huñukamuychik, llamkaynikichikmi ichaqa mana imayniraqtapas menosyanqachu”, nispa.
12Chaymi Israel runakuna, Egipto nacionpi kayman chayman cheqerispanku, pajapa rantinpi rastrojotaña huñumurqaku. 13Llamkachiqkunañataqmi kaynata hikutarqaku:
Ruwanaykichikta hinallam sapa punchaw ruwankichik, imaynam pajata qosusqaykichikpi hina, nispa.
14Hinaspam Faraonpa llamkachiqninkuna Israelpa mirayninkunamanta kaq capatazkuna churasqankuta kaynata nispa azoterqaku:
¿Imanasqataq adobe chutasqaykichikta mana haypachinkichikchu qaynakuna ruwasqaykichikman, qayna punchawpas nitaq kunan punchawpas? nispa.
15Chaymi Israelpa mirayninmanta kaq capatazkuna Faraonman quejakuq yaykuspanku nirqaku:
¿Imanasqataq serviqnikikunata kayta ruwawankiku? 16Pajata mana qowachkaspankupas “adobeta chutamuychik” nispam hikutawanku, hinaspam serviqnikikunata azotewanku. Chaypaqqa runaykikunam huchayuq, nispa.
17Ichaqa Faraonmi nirqa:
Qella-qellam rikurirunkichik, chayraykum nichkankichik: “Hakuchik Tayta Diosman sacrificiokunata ofrecespa hatunchamusunchik”, nispa. 18¡Pasawaychik kaymanta hinaspa llamkamuychik! Pajataqa manam qosunkichikchu, adobetapas hina ruwanaykichikta hinallam entregankichik, nispa.
19Israelpa mirayninmanta kaq capatazkunam sasachakuypi rikurirurqaku: “Amam menosyachinkichikchu sapa punchaw adobe chutaytaqa” nisqanwan. 20Chaymi Faraonpa ñawpaqninmanta lloqsiramuspanku Moiseswan hinaspa Aaronwan tuparurqaku, paykunam hawapi suyachkarqaku. 21Hinaspankum nirqaku:
Tayta Diosyá juzgaspa castigasunkichik. Qamkunapa hawaykichikmantam Faraonwan runankuna cheqnipakuruwaspanku wañuchiwaykupi richkanku, nispa.
Diosta Moisés mañakusqanmanta
22Tayta Diosta huktawan mañakuspanmi Moisés nirqa:
Señorlláy ¿imanasqataq kay runakunata mana allinta ruwanki? ¿Imapaqtaq kachamuwarqanki? 23Faraonta qampa sutikipi rimapayaq yaykusqaymantam runaykikunata ñakarichichkan. Qamqa manam runaykikunata libraykunkichu, nispa.
Chuya Qellqa - La Biblia en Quechua de Ayacucho - Edición Revisada © Peruvian Bible Society, 2012
