Matthieu 14
14
Eswie mé Yʉánɛs Ndubʉr
1Jɔʼ yaá ó ngóvina Erôd á ka nze jóʼo bé lɨ́ elwib, dumo e Yésʉs yɨ́. 2Nye le osyɛ̂l o mésá bé ó: «Yé ó Yʉánɛs Ndubʉr. Nyɨ́ pah ɨ́ soo! Sá tɨ̂ʼ ó nyé dí e nkul esâ mésimá yɨ́.»
3-4Náǎ yé ó, Erôd á be ó sí dɛ̌n Erodiâd, mʉmá me mɨ́ɔɔ́ wé, Philippe. Yʉánɛs nzě lɛ́ɛ e né ó: «Etié, lé akam ó, go bâʼ Erodiâd!» Erôd ntɔ̂ʼ tyen bʉ̂r, ó bé mɛ́rɨɨ Yʉánɛs. Bê nzě kâʼ nyé nkará mebó mé nʉ̌n, gbáŋɔɔ nyé ɨ́ mbʉʼ. 5Erôd á bɨbe e gwɨ́má ó, nyě jʉ́ ó Yʉánɛs. Sâ gwár, nye á be lɨ́ ekpɛ́ɛ éntumo e bʉ̂r, ebě, bé á lɨláa ó, Yʉánɛs á be ó ngwíha milɔ̌b mé Nzyɛ̌m.
6Damá jóʼo nó, ɨ́ jɔ̌ʼ móhó nzɔ́ɔ ebyɛ́l mé Erôd, wé á pyâl yɨ́, eséhé mé Erodiâd, lé ntɔ̂ʼ bwal ɨ́ duo nzɔ́ɔ, Erôd nzě buú kpɛl nzɔ́ɔ nyé á bwal nyɨ́. 7Erôd nzě kɛʼ nyê, le entaa mínkâl ó, sá yɨ́yɛ̂h nyé ngá gwâm yɨ́, nye ódwe nyé yǎ. 8Eséhe, lê nzě lɛ́ɛ̌ mpʉ nyɔ́ŋ wé á pa tɨ́e nye yɨ́. Nye e né ó: «Gbáʼ mé wâʼ ɨ́ mpyáa, lʉ́ mé Yʉánɛs Ndubʉr; go e dwé mê!»
9Nyʉ̂l mé ngóvina ntɔ̂ʼ tyɛʼ ɨ́ sá éséhé lé, lé á gwâm nye yɨ́. Sâ gwár, nye á ka nzoo lómo ó, bé dwêʼ sile wé waá lʉ́ mé Yʉánɛs. Nye á sâ nó ó, ɨ́ lɔ̌b mínkâl nyé á pa ntaa mí le mimbi mi bʉ̂r bé e boo nɔ́ɔ́, bé á pûhla mebô lɨ́ ede mí. 10Nye nzě lómo mʉ̂r ɨ́ mbɛ̌r mímbʉʼ lɨ́ etó tíʼě Yʉánɛs lʉ̂. 11Bé ntɔ̂ʼ nze e lʉ̂ wé ɨ́ mpyáa, bê nzě dweŋɔɔ mâ mʉmá waá. Nye nzě tó dwe wé nyɔ̌ŋ wé. 12Ompʉ́n mé Yʉánɛs, bê nzě nkɛ́ɛ̌ múú wé, tó dɨlɔɔ wê. Píe tɨ̂, bé ntɔ̂ʼ tó lɛ́ɛ̌ Yésʉs sá yɨ́yɛ̂h yé á syɛ́ɛ yɨ́.
Yésʉs lɨ́ edwe bʉ̂r otɔ́ɔ́sin otɛ̂n mede
13Jɔ̌ʼ Yésʉs á jóʼo mpáŋla nyaá yɨ́, nye ntɔ̂ʼ mɔa tɨ̂, kalwo ɨ́ byɛ̂l, nzě tô ɨ́ mâ lʉ̌n, súm nyé á be nye omér yɨ́. Damá jóʼo nó, ɨ́ jɔʼ bísɔ́má bi bʉ̂r, byé á ka gʉ́a nó yɨ́, byê nzě dua ɨ́ binkana, nzě dúŋɔɔ̌ Yésʉs e mekʉ̌. 14Jɔ̌ʼ Yésʉs á sulo ɨ́ byɛ̂l, bee éntumo e bʉ̂r laá yɨ́, lémé wé kʉ́ nzě jɨ̂ʼ bé nkoó. Nye nzě tiʼ mímbél mímyɛ̂h.
15Mpʉ yé á be, yé mû bíí kʉ̌ʼ yɨ́, ompʉ́n bé ntɔ̂ʼ sîhlě súm nyé á be yɨ́. Bé e né ó: «Yé mû náǎ ó, medwíne mé pum. Wâʼ ntémé, yé ó lʉá. Bwóóláá sɔ́má bʉ̂r yɨ̂, bé nkʉ̂ tô ɨ́ mekwár, tó bwâm méde.» 16Yésʉs nzě lɛ́ɛ e bé ó: «Yé ajɨ ó, bé tôʼ gúmo mpoʼ. Bɨ̌n bʉr o tɨ̂, dwéʼ gá bé mede!» 17Bê nzě lɛ́ɛ e né ó: «Bɨ̌h bé abe e sɔ̂ʼ wâ. Bɨ̌h bé ó njɨ e biblêr bitɛ̂n le osú óbá.» 18Nye ó: «Ntáʼ gá me e byǎ wâ.»
19Píe tɨ̂, nye nzě lɛ́ɛ le entumo e bʉ̂r ó, lé díʼee sí ɨ́ dáá. Nye ntɔ̂ʼ nʉa bíblêr bitɛ̂n le osú óbá baá, nzě dwɛ̂ʼ kʉ́, dwě Nzyɛ̌m nzyǒo, nzě pɛ̂ʼ byé bipêh, nzě dwidwe ómpʉ́n bé byǎ. Bé ntɔ̂ʼ kab éntumo e bʉ̂r biblêr byaá. 20Mʉr nyɨnyɛ̂h nzě de, díle, kâr méde. Ompʉ́n bé nzě kaale bímpubuʼó méde, tâŋ mekwám kám e mebá, mɨ́mɛ̂h milwɨ́ŋlá. 21Bʉrʉ̂m bé á de mede bá, bé á be ó, laa ótɔ́ɔ́sin otɛ̂n. Bé á bé aláa bʉ́bá e bwá ó ntwǒm.
Yésʉs lɨ́ etye ɨ́ medíbé kʉ́
(Marc 6.45-52; Yʉánɛs 6.16-21)
22Abea nɛ́ɛ: Yésʉs nzě tíne ómpʉ́n bé ó, bé kpâhwa kalwo ɨ́ byɛ̂l, bé e sámle, tô lɨ́ ebʉ́m é kɔ́m nkɛ́ɛ́. Jɔʼ yaá, nye ólîʼ lɨ́ ebwóolo éntumo e bʉ̂r. 23Jɔʼ nyé á sil ebwóolo bé yɨ́, nye nzě bére lɨ́ ecwɨ̂ʼ kʉ́, lɨ́ etó jɨʼla e Nzyɛ̌m. Mpʉ dʉ́o, lé á be, lé mû sí léŋa yɨ́, nye á ka be gʉ̂ʼ ó, njɨ nye omér. 24Byɛ̂l á be ó, nye mû sí bá buú cɛra le ebʉ̂m. Obóʼó ó mâŋ, wê nzě buú ntɨ̂ʼ byɛ̂l, ebě, pubó yé á duho ó, nko byɛ̂l á be lɨ́ etô yɨ́. 25Á dwií ɨ́ melɔ́ma mé mɛ́n nɛ́ɛ: nye nzě dû bê, le etye ɨ́ medíbé kʉ́. 26Mpʉ ómpʉ́n, bé á bee nye lɨ́ etye ɨ́ medíbé kʉ́ yɨ́, mepɨʼ nzě dîm bé ɨ́ milʉ̂. Bê nzě bil bʉ́á. Bé ó: «Ndîm ó wɨ̂!» Bʉ́ŋɔɔ bítím. 27Tyé e tyé yaá, Yésʉs, nye e bé ó: «Talaa gá miléme. Yé ó me! Ayɨ́ jóʼo gá bʉ́á.»
28Pétrus nzě lɛ́ɛ e né ó: «Dâ ɛ̌, yé bé yé ó go tyeetye nó, jébáá mé ó, me ntâʼ nko gó dí yɨ́, tye kʉ́ medíbé.» 29Yésʉs ntɔ̂ʼ lɛ́ɛ e né ó: «Ntâʼ bé!»
Pétrus ntɔ̂ʼ sulo ɨ́ byɛ̂l, nzě táarě tyen ɨ́ medíbé kʉ́, tô nkǒ Yésʉs á be yɨ́. 30Ejʉ̂ʼra nyé á ba jʉ̂ʼra pubó yɨ́, nye ntɔ̂ʼ bil bʉ́á, nzě táare éjɨ́bla le ebʉ̂ bítím. Nye e né ó: «Dâ ɛ̌, tiʼɨɨ mê!» 31Tyé e tyé yaá, Yésʉs ntɔ̂ʼ syɛ̂m mbô, mɛ̂r nyê. Nye e né ó: «Á twâʼwǒ búʼó yô ɛ̌! Go pa sóŋló ɨ́ yé?» 32Bʉr baá obá, bé ntɔ̂ʼ kalwo ɨ́ byɛ̂l, pubó nzě síe. 33Bʉr o b'á be ɨ́ byɛ̂l bá, bê nzě bɨʼɔɔ mébóó mɔ́ɔ́ sí lɨ́ edwě Yésʉs kûm. Bé e né ó: «Go ó kwahaá Mwân mé Nzyɛ̌m tyeetye!»
34Bé ntɔ̂ʼ sîl éntaa mâŋ, tó pyâl lɨ́ ebʉ́m é sí Genezarɛ̂t. 35Bʉr ó sí yaá nzě dweʼě Yésʉs. Bê nzě tyen bʉ̂r ɨ́ sí yaá yɨ́yɛ̂h lɨ́ etúno ó, nyɨ́ pyâl. Bé ntɔ̂ʼ nze nyé e mimbél mímyɛ̂h. 36Bê nzě jɨʼla e né ó, nye kámaa ó, bé jáa kúna njɨ le empah é kán wé. Mʉr nyɨnyɛ̂h á kúna e né nyá, á si tiʼe.
