Matthieu 15

Metum bímpám bí óYúden

1Jɔʼ yaá, oFarizyɛ̂n le olɛ̂ʼla o métié bé á duhǒ Yerʉ́zalɛm bá, bê nzě pyâl gúmó Yésʉs á be yɨ́, díŋɔɔ e né ó: 2«Ompʉ́n bô, bé lɨ́ ebene ébaʼle métum bímpám gá bíná, byé á líʼe má ɨ́ yé? Ebě, bé abe lɨ́ ejwɨɨ mébô ɨ́ jɔʼ bé dí ede yɨ́.» 3Yésʉs nzě yala e bé ó: «Bɨ̌n bɨɛ bé lɨ́ ebene ébaʼle métié mé Nzyɛ̌m ɨ́ yé? Bɨ̌n jaá bɨbaʼlě sɔ̂ʼ ó, njɨ metum mɨ́n. 4Ebě, Nzyɛ̌m á lɛ́ɛ ó: “Dwéʼ sʉ́ŋ e nyʉ̌ŋ dúu.” Nye ntémé, nye ó: “Mʉr ngá syɛm sɔ́ŋ nkʉ̂ nyɔ̌ŋ nyá, jala ó jʉ́ŋɔɔ.” 5Tó kœb ó, bɨ̌n bɨɛ̌ lɛ́ɛ́ ó, mʉr nyɨnyɛ̂h óbɛ̌m lɛ́ɛ e sɔ́ŋ e nyɔ̌ŋ ó: “Sá bɨ̂n gwa dí ó, me súʼaa bɨ̌n e yǎ yɨ́, mɨ́ kɛʼ yé Nzyɛ̌m!” Ɨ́ mbeá wɨ́n, waâ sá nó nyá, nyé abe e nkul le ebáʼǎ súʼo sɔ́ŋ e nyɔ̌ŋ e tɨ̂. 6Ɨ́ jɔʼ bɨ́n sá mbi waá yɨ́, bɨ̌n kʉ́ gbah náǎ ó, etié mé Nzyɛ̌m lɨ́ esú lé édû mín mílɛ́ʼlá ó tɨ̂ʼ yɨ́! 7Bɨ̌n baányâ-mikóo bâ! Gʉ́ŋáá gá ó, Ésayie á si kʉ gwa gwîh milɔ̌b mín ɨ́ jɔʼ nyé á lɛ́ɛ ó:

8“Nzyɛ̌m lɛ́ɛ́ ó:

Kúl yɨ̂, yé jaá dwé mé kûm ó, njɨ ɨ́ bikonó bí nǔm kʉ̌l.

Tó kœb ó, milémé myɔ́ɔ́, myé ɨ́ buú cɛra e me.

9Júú bé dí edwe mé yɨ́, yé ó kwahaá tʉ̂toʼó,

ebě, milɛ́ʼlá bé dí edwe bʉ̂r mí,

myé jaá duho ó, njɨ ɨ́ metié me bʉ̂r.”»

Bisá bi dí esámle mʉ̂r ɨ́ míh mé Nzyɛ̌m bí

10Nó ó Yésʉs á jébe entumo e bʉ̂r, nzě lɛ́ɛ e bé ó: «Jóʼláá gâ! Bɨ̌n a kʉ́ gwá mɛ̂r ékǎn lɨ̂ʼ ɨ́ milémé mín. 11Ntʉ̌ sá dí enî mʉ̂r ɨ́ num yɨ́, dí ebɛ̂ʼ páʼ mʉr, bé e Nzyɛ̌m. Mʉr bɔ́ʼá e Nzyɛ̌m ó, ɨ́ lɔ̌b ékǎn e dí eduho nyé ɨ́ num lɨ́.»

12Ompʉ́n mé Yésʉs, bê nzě sîhlě súm nyé á be yɨ́. Bé e né ó: «Nzê gʉ́ gʉ́a ó, sá gô lɛ́ɛ́ nɨ̌, yê bé ó ebɔ̌ʼ ɨ́ nkǒ páʼ óFarizyɛ̂n ɛ̌? Lê bé sí bɨma bé ɨ́ miléme.» 13Nye ntɔ̂ʼ yala e bé ó: «Mpeʼ yɨ́yɛ̂h Sɔ́ŋ wǎm dí ɨ́ jʉ́o kʉ́ nyá, á be abe yɨ́, yé ómunɔɔ ti e mikaalé myé mímyɛ̂h. 14Bírɨ́ɨ́ gá bê: bé ó baántím dí elɛ̂ʼle bʉ́ʉ́ báántím nzɨ̌ bá! Ántím ólɛ̂ʼle nyʉ́ʉ́ ántím nzɨ̌ nó, bɨ́bɛ̂h obá, bé ólʉ́ŋa ɨ́ bɨ́.»

15Nó ó Pétrus á nze lwib. Nye e né ó: «Páʼláá bɨ́h kɨkɛnǎ nɨ̌.» 16Yésʉs ntɔ̂ʼ lɛ́ɛ ó: «Nzê bɨ̌n dína ó bigʉʼlʉgʉ́ ɛ̌? 17Nzê bɨ̌n dína wâʼ ó, apǎ gʉ́a, sá mʉ̂r gbá ɨ́ num yɨ́, yé laa ó ɨ́ mo tʉ́ŋlʉ̌, pyâl kʉ̌l, ntɔ̂ʼ kur ɨ́ dih ɛ̌? 18Nó sá dí eduho ɨ́ num yɨ́, duho ó ɨ́ lémé mʉ̂r tʉ́ŋlʉ̌. Sâ yaá ó dí esâ ó, mʉr bɔ́ʼaa e Nzyɛ̌m yɨ́. 19Ebě, bibɨ́bla bíjwɨʼ bíbyɛ̂h, byé duho ó ɨ́ léme. Byé ó dí:

ejwɨ́ɨ́ é bʉ̂r,

medyɛ̂n,

bimolá,

díbe,

eyalǎ lɔ̌b mɨ́ɔɔ́ gǒ mʉr lɨ́ onzyɛ́h ónzyɛ́h,

le melwɨ́ɨ.

20Bisá bîʼ ó dí ebɛ̂ʼ páʼ mʉr, bé e Nzyɛ̌m! Ntʉ̌ lɔ̌b éde apǎ jwɨɨ mébô dí esâ ó, mʉr bɔ́ʼaa e Nzyɛ̌m.»

Búʼó mʉ́má Kanân

21Nó ó Yésʉs á duhǒ sûm yaá, nzě tô ɨ́ mesí mé Tîr e Sidɔ̂n. 22Á dwií tɨ̂ʼ nɛ́ɛ: mʉmá Kanân nzě duho kwár nyaá, nzě bʉ̂ bítím, le elɛ́ɛ e né ó: «Dâ ɔ́, Mwâ mé David ɔ́, jɨ́ʼɨ́ɨ́ mé ekpaa nkóó ɔ̌! Sile wâm, wé ɨ́ bébebébe tyé. Eleme, lé lɨ́ ebuú nzamra wê!» 23Yésʉs á bé ayala e né. Ompʉ́n bé ntɔ̂ʼ sîhlě bǎʼ e Yésʉs. Bé e né ó: «Lɛ́yɨ́ɨ́ nyé ó, nye tôʼ, ebě, nye lɨ́ edû mɨ́ná gá le tím ɨ́ num.» 24Yésʉs nzě yala e bé ó: «Me á jaa lómɔɔ ó, njɨ lɨ́ esú é bínteme bí Ɨ́zraɛ̂l mû sí dîm bí.»

25Mʉmá waá, nye ntɔ̂ʼ bɨʼ mébóó sí lɨ́ edwě Yésʉs kûm. Nye e né ó: «Dâ ɛ̌, kɛmɨɨ mê!» 26Yésʉs ntɔ̂ʼ yala e né ó: «Yé ambɨa ó, mede me jálá le edweŋɔɔ bwân má, mé dwéŋɔɔ bwá bé ómpyê.» 27Mʉmá, nye e né ó: «Dâ ɛ̌, yé ó nó. Damá jóʼo nó, bwá bé ómpyê, bé sá ó de bítwǐʼ méde bi dí ekur sí téble ɨ́ mbɛ̌r me sɔ́ŋ wɔ́ɔ́ bí.» 28Yésʉs ntɔ̂ʼ lɛ́ɛ e mʉmá waá ó: «Mʉmá nyâ, búʼó yô, yé ɨ́ buú bwaʼ! Yé syɛ́yɨɨ go mpʉ gô pa kpɛl yɨ́!» Ɨ́ tyé gwár yaá, sile wé, wé ntɔ̂ʼ tiʼe.

Yésʉs lɨ́ etiʼ mímbêl ɨ́ nkpâh mâŋ

29Yésʉs ntɔ̂ʼ duhǒ sûm yaá, nzě tô ɨ́ nkpâh máŋ mé Galilê. Nye ntɔ̂ʼ bére lɨ́ ecwɨ̂ʼ kʉ́, di sí. 30Mentumo me bʉ̂r ɨ́ buo buo, mé ntɔ̂ʼ nzě súm nyé á be yɨ́ le mimbêl ɨ́ buo buo: baá bé á tɨtɨ́a bá, baántím, baá bé á be e bidyɛ̂m, baányâ-emúmó, le myúú mímbêl ɨ́ buo buo. Bʉr, bé á nze le mimbêl myaá bá, bé á susul myé ó, sí mekʉ̌ mé, nye nzě tiʼ myê. 31Bʉr nzě buú kâm lɨ́ ebee báányâ-emúmó mû lɨ́ elwib; baá bé á be e bidyɛ̂m bá, mû mbɨ̂mbɨá; baá bé á be lɨ́ etɨ́a bá, mû lɨ́ etye mbɨ̂mbɨá ntémé; baántím mû lɨ́ ebee. Nó ó bʉ̂r baá bé á nze gúmlo Nzyɛ̌m kúl bʉ̂r o b'Ɨ́zraɛ̂l yɨ́.

Yésʉs lɨ́ edwe bʉ̂r otɔ́ɔ́sin onâ mede

32Yésʉs nzě jébe ómpʉ́n bé, ntɔ̂ʼ lɛ́ɛ e bé ó: «Me lɨ́ ejɨ̂ʼ bʉ̂r bâʼ nkoó, ebě, mɨná gá le onɔ́ɔ́, bɨ́ di mélú mélɛ̂l, bé akǎ be e sá éde. Nó mé akpɛl ó, bé swíʼɨɨ l'ade. Bé ámû jaá tó nkaŋa sí nzɨ́ e nzɨ̌ lɨ́ eguú e nzâ.» 33Ompʉ́n bé, bê nzě dî e né ó: «Á mɨná gá bɨɛ bé ópʉgʉ́ kœ̌b bím méde dwé éntumo e bʉ̂r lɨ̂ʼ wó? Ɨ́ lʉá míná dí wɨ̂?» 34Yésʉs, nye e bé ó: «Bɨ̌n bé e biblêr yáǎ bím?» Bé ntɔ̂ʼ yala ó: «Nzaangbá, kǎ kɛl bwá bé ósû.»

35Nye ntɔ̂ʼ lɛ́ɛ le entumo e bʉ̂r ó, bé díʼee sí lɨ́ bibwǎh. 36Nye ntɔ̂ʼ nʉa bíblêr nzaangbá byaá le bwá bé ósû baá, dwě Nzyɛ̌m nzyǒo, ntɔ̂ʼ pɛ̂ʼ byê, dwe ómpʉ́n, bé ntɔ̂ʼ kab méntumo me bʉ̂r. 37Bʉr bɨ́bɛ̂h, bê nzě de, díle, kâr méde. Bimpubuʼó méde ómpʉ́n bé á kaale bí, lóŋlo mékwám nzaangbá. 38Bʉr, bé á de bá, bé á be ó: bʉrʉ̂m e bʉrʉ̂m, otɔ́ɔ́sin onâ, aláa bʉ́bá le ontwǒm. 39Jɔʼ nyé á sil ebwóolo éntumo e bʉ̂r laá yɨ́, Yésʉs nzě kalwo ɨ́ byɛ̂l, tô sí Magadân.

選択箇所:

Matthieu 15: ozm

ハイライト

コピー