wandījo 46
46
Yakobo kūja Misili
1Na lūūlū ū Isilaeli ūbūūka ū lūgendo lwakwe, nī shikolo shakwe ūshijana pye ī shose. Aho washika Beeli-sheba ūmfunīja shitambo ū Mulungu wa ng'wa ise Isaka. 2Ū Mulungu wiyoolecha ū kūlī Isilaeli mu makanza ga būjikū ūyomba nang'hwe; ūng'witana gīkī, “Yakobo! Yakobo!” Nang'hwe widīka, “Kalame.” 3Ūhaya, “Ū nene nalī Mulungu, Mulungu wa ng'wa so; ūtizoogoha ū kūja ī Misili, nguno nakūkwīta ūbize ihanga itaale ū kwenūko. 4Nakūja hamò nang'ho ī Misili; hanuma nakūkūshosha hangī ū kūūnū, gūzunyage ū gwenūyo. Hama ū Yosefu h'ūyo akūgakundīkīja a miso gako na nkono gwakwe.” 5Hūna ū Yakobo ūbūūka īngile ī Beeli-sheba; a bitūnja ba ng'wa Isilaeli būmūcha ū saabo, ū Yakobo ū mu magogoteeni ayo Falao walī wagatūma kwiza kūmūkīja; būbabūūcha na a baana babo na a bake babo. 6Būjiswaga nī mitugo jabo, nī shikolo shabo īsho baalī bapandīka ū mu Kanaani būshibūūcha; ū Yakobo ūsaamīla Misili hamò na a babyalwa bakwe a bose. 7Ūbajana Misili a bitūnja bakwe na a bashīke bakwe na a bizūkūlū bakwe, pye a babyalwa bakwe.
8Aya h'a mina ga Baisilaeli abo bakasaamīla Misili;
Yakobo nū būbyīle wakwe:
Lubeni myalwa wa kwandya
wa ng'wa Yakobo.
9A bitūnja ba ng'wa Lubeni baalī:
Hanoki, Palu, Heziloni, na Kalīmi.
10A bitūnja ba ng'wa Simioni baalī:
Yemueli, Yamini, Ohadi, Yakini,
Zohaali na Shauli,
Ū ng'wene ū nina walī muna Kanaani.
11A bitūnja ba ng'wa Lawī baalī:
Gelishoni, Kohati, na Melaali.
12A bitūnja ba ng'wa Yuda baalī:
Eeli, Onani, Shela, Pelezi na Zeela,
(gwike a ba Eeli nū Onani baalī
bamala kūcha mu sī ya Kanaani).
A bitūnja ba ng'wa Pelezi baalī:
Hezeloni na Hamuli.
13A bitūnja ba ng'wa Isakaali baalī:
Toola, Pua, Jashubi na Shimuloni.
14A bitūnja ba ng'wa Zabuloni baalī:
Seledi, Eloni na Yahileeli.
15A benaba baalī bitūnja abo Leya akamyalīla Yakobo makanza gene bataalī Padani-alamu; kūleka kūng'wisaaba ū nshīke wakwe ū Dina. Ūbukūmi wabo a bitūnja bose na a bashīke bakwe baalī makūmi adatū na badatū (33).
16A baana ba ng'wa Gadi baalī:
Zefoni, Hagī, Shuni, Esiboni,
Eli, Alodi na Aleli.
17A bitūnja ba ng'wa Asheli baalī:
Imna, Ishiva, Ishivi, Belia,
ilūmbū lyabo walī Seela.
A bitūnja ba ng'wa Belia baalī:
Hebeeli na Melikieli.
18A bitūnja benaba ū Yakobo akabyalīlwa na Zilipa, ūyo Labani akang'winha nshīke wakwe Leya. Abose baalī ikūmi na batandatū (16).
19A bitūnja ba ng'wa Laheli, ū nke wa Yakobo baalī:
Yosefu na Benjamini.
20Ū mu Misili, ū Yosefu akabyalīlwa
bitūnja bakwe ba Manase na Efulaimu,
abo ninaabo walī Asenati nshīke
wa ng'wa Potifela, ngabīji wa Oni.
21A bitūnja ba ng'wa Benjamini baalī:
Bela, Bekeeli, Ashibeli, Geela,
Naamani, Ehi, Loshi, Mupimu,
Hupimu na Alidi.
22A benaba baalī bitūnja ba ng'wa Laheli, abo Yakobo akabyalīlwa;
Abose baalī ikūmi na bane (14).
23Ng'witūnja wa ng'wa Dani walī:
Hushimu.
24A bitūnja ba ng'wa Nafutali baalī:
Yazieli, Guni, Yezeeli, Shilemu.
25A benaba hū baalī bitūnja ba ng'wa Yakobo abo bakabyalwa na Biliha, ūyo Labani akang'winha nshīke wakwe Laheli. A bose baalī mpungatī (7). 26A banhū a bose abo bakaja na Yakobo Misili, abo baalī ba būbyīle wakwe dūhū, kūleka kūbisaaba a bīnga bakwe, baalī banhū makūmi atandatū na batandatū ū wingī wabo. 27Ūlū ūbasanja na a bitūnja abo akabyalīlwa Yosefu mu Misili, a banhū ba mu kaya ya ng'wa Yakobo abo bakaja Misili baalī makūmi mpungatī ū wingī wabo.
Yakobo kūbiza ng'wikaji wa Misili
28Hūna ū Yakobo ūntūma ū Yuda atonge ū kūlī Yosefu akoolekejiwe chiza ī nzīla ya kūja ī Gosheni. 29Ū Yosefu ūsangwa amalīīlile alindanile n'igogoteeni lyakwe, na lūūlū ūja ī Gosheni kūnsūng'wanha ū ise ū Isilaeli. Kūshika dūhū aho walī ū ise, ūng'wibuga ūnkumbatīla, ūlīla ikanza itaale. 30Ū Isilaeli ūng'wīla ū Yosefu gīkī, “Ī haha lūūlū yashila, nūūlū nakacha nigejaga. Nguno nakūbona na miso gane gīkī ng'hana ūtaalī ūlīho ūlī mpanga.” 31Hūna ū Yosefu ūbawīla a baana ba ng'wawe nī kaya ya ng'wa ise gīkī, “Leka naje ū kūlī Falao, nakayombe nang'hwe nang'wīle, ‘Ī kaya ya ng'wa baba, na a baana ba ng'wise, abo baalikalaga mu sī ya Kanaani bizaga kūlī nene. 32A banhū benabo basugi ba mitugo; ū nīmo gwabo kūdīīma. Bajenhanījaga nī mitugo jabo, balī na ng'holo na ng'ombe; pye nī shikolo shabo ī shingī.’ 33Ū Falao ūlū ūng'witana ūmubūja gīkī, ‘Ū nīmo gwing'we ni nīmo kī?’ 34Nshokejagi gīkī, ‘A bise basese bako ū nīmo gwise kūfuma ha būdo gūlī kūdīīma mitugo; hū nīmo gwa bataale bise kūfuma kale.’ Ūlū ng'wīta gīko mukūzunīlījiwa ū kwikala ū mu sī ya Gosheni, nguno ū kū bana Misili būlī ndīīmi adalahilwe gīkī nsoso.”
Sukuma Bible © Bible Society of Tanzania, 2019.
