LUKAS 19

Yeesus ɓɛɛ̀ Zasye

1Yɛ̀ɛ Yeesus à ɗiŋìghà a Zyeriko, à syààghà bàn. 2Fɔɔnnɛ guŋgum adɛŋ ɗii lɛ Zasye ànɛ à ɓaghà rìfòm ɗi ɓɛterì-làmpoŋ̀, 3à kaakààghà bee inɛ lɛ, a ghɛǹ rìkuu ɗi mum ɗi lɛ Yeesus, wɔ̀lɛ à ɓaghà ɓi lɛ à ghɛn nyi lɛ gwìy ì ɓaghà wɔɔ, rì tì lɛ, à ɓaghà kìnuùgh. 4Fɔɔnnɛ à ghɛŋìghà min beèbɛ̀y, à kɛ̀n kì ɓɔɔ̀gh ɓi kìte ki lɛ sìkɔ̀mɔɔr lɛ di fɔɔnnɛ a ghɛǹ Yeesus ànɛ à ghɛ̀ɛ̀sɛ̀ngà kì fyee ɓi jàŋ inɛ̀n. 5Yɛ̀ɛ Yeesus à kpagà a kìte kiǹ zi, nni à ɓegsìghà mis ɓi kìte, à kpaa Zasye lɛ: Zasye, sɛnay fɛ lɛ fyɛ̀ɗ ɓisuulɛ ǹghɛ̀ɛ̀sɛɛ kì kɔ̀rii ɓi naa yɔ̀ɔ̀ gɛɛ̀nɛ. 6Fɔɔnnɛ Zasye à sɛngày lɛ fyɛ̀ɗ, à ghàɓ Yeesus a mɛɛ mii ri kìnyàà. 7Yɛ̀ɛ ɓum ɓɛ ghɛngà fɔlɔɔ, ɓɛ̀sɛ̀ɛ̀ ɓɛ̀cèm ɓɛ tum rìŋwɔ̀ŋwɔ̀ŋì di ɓɛɛ̀ kpaakpaa lɛ: À kɛ̀ɛ kì kɔ̀rii ɓi naa ì kìɓeɓtàg ki mum! 8Fɔɔnnɛ Zasye à pɛ̀sɛ̀ngà aɗyòò, à kpaa Kan lɛ: Kan, ǹɗì ɓiì kàɓi ikum wɛm̀ gàɓ yiɓɛɛ̀, ǹfa gàɓ bog rì ɓɛ̀soghàsogha. I ǹtekà mum dolà bog ɓi kìcòò, ǹɗì nyi ɓiì lèɓi dolà yiniǹ. 9Nni Yeesus à kpaaghà nyi lɛ: Gòri ì ɗiŋii ɓi naa ìnɛ gɛɛ̀nɛ, ɓisuulɛ roànɛ à rì girig dòò yì Abiraham. 10Rì tì lɛ Man à mum à yùghà lɛ, a kaà à ki ghɛɓsi ɓumɓɛ ɓɛ ɓaghà ɓɛ̀ɗimɛn.

Dàɗkì ì tìraŋ̀ ti mɔ̀ɔ̀ni mɛ gol

(Mt. 25:14-30)

11Yɛ̀ɛ ɓum ɓɛ wowòkà ɓìtòkì ɓiì ɓiǹ, nni Yeesus à teetìghà ɓɔ dàɗkì ìdɛŋ ɓisuulɛ, à ɓaghà jàŋbog rì Yorisalɛm, rì tì lɛ ɓum ɓɛ fefèkà lɛ kìlɔ̀ŋ ki Bɛ̀ll ki ghɛɛ̀sɛ̀ngà kì kpaŋì ɓi cààmɛ̀n kɔm̀ kiǹ. 12Nni à kpaaghà min lɛ: Ŋwaàdɛŋ ànɛ à ɓaghà man à ɓɛ̀kemì nnyɛ̀ɛ kɛngà ɓi kìlɔ̀ŋ ki fìràɓ lɛ a ɓɔg yì rìfòm wɔɔ, di a sugtiì min ɓi kìlɔ̀ŋ kii. 13Fɔnnɛ à reŋìghà ɓɛ̀kìì-ɓìsay ɓii ntɛ̀ɗ, à kàɓsì ɓɔ tìraŋ̀ ti gol ǹtɛ̀ɗ, à kpaa ɓɔ lɛ: Rɔ̀ɓina kì kìkii dùne rì mɔ̀ɔ̀ni mɛ, ɓi yaàsi mɔ, à kpaŋ yɛ̀ɛ ǹɗì ɓiì sugtii yi. 14Wɔ̀lɛ yɛ̀ɛ ɓumɓɛ ɓi kìlɔ̀ŋ kii ɓɛ ɓeèɓèèzɛ̀ngà nyi, nni ɓɛ romgà ɓum ɓɛɗɛŋ di nyii mɛ kɛ̀n, lɛ ɓɛɛ kɛǹ kì kpaà wɔɔ lɛ, ɓɔɔ kɔni ɓi lɛ ànɛ̀n a lami ɓɔ.

15Nni yɛ̀ɛ ŋwaànɛ̀n à sukày di à mɛ ɓɔg yi rìfòm, nni à reŋìghà ɓɛ̀kìì-ɓìsay ɓɛ à faghà mɔ̀ɔ̀ni ɓɛ̀n, lɛ ɓɛɛ resi nyi cɛ kɛɛ̀ki mɔ̀ɔ̀ni mɛ rɔɓkà kì yalì. 16Fɔɔnnɛ roàntonto à yùghày à kpaa nyi lɛ: Tààta, fìraŋ̀ fyɔɔ fi gol fi n-yali tidɛŋ ǹtɛ̀ɗ. 17Rìfòm ɗi kpaa ǹkìì-kìsay anɛ̀n lɛ: Ki rɔɔtɛɛ, ù rì syeesyee à ǹkìì-kìsay, yɛ̀ɛ ù rèsii mɛ̀ lɛ ù rì ǹkìì-kìsay a ǹtyweeyi ɓi ɓɔɔ ɓiɓan ɓɛsàg, ǹɗɛsii wɔ̀ ǹlàmì ànɛ ɓi ɓìlɔ̀ŋ ǹtɛ̀ɗ. 18Nni roàkìɓɛ̀ɛ̀ a yùtìghà, à kpaa nyi lɛ: Tààta, fìraŋ̀ fyɔɔ fi ǹ-yali tìraŋ̀ tidɛŋ titaǹ. 19Fɔɔnnɛ à kpaatìghà roànɛ̀n lɛ: Ǹɗɛsii wɔ̀ ǹlàmì ànɛ ɓi bàn yitaǹ. 20Nni roàdɛŋ à yùtìghà, à kpaa lɛ: Tààta, fìraŋ̀ fyɔɔ fyɛɛ̀ fi, ǹkàgà fyɔ ɓi kìlàà, ǹnyam, 21ɓisuulɛ, ǹɗisìghà wɔ̀, lɛ ù nyɛni lɛɛ̀gwey; ù ti ù tekì com ki ù nɔ̀ŋzii ɓi, ù ki sagi com ki ù ɓɛ̀li ɓi. 22Nni rìfòm ɗiǹ ɗi kpaaghà nyi lɛ: N-yɔm̀ wɔ̀ ɓi rìkpaa ɗyɔ̀ɔ̀; ù rì kìɓeɓtàg ki ǹkìì-kìsay! Ù yighà lɔŋ lɛ mɛ̀ ǹnyɛni lɛɛ̀gwey, lɛ ǹti ǹtekì com ki ǹnɔ̀ŋzii ɓi, ǹki sagi ki m̀ɓɛ̀li ɓi! 23Nni ɓi cɛ nnɛ ù nyamgà ɓi mɔ̀ɔ̀ni mɛ̀m a baŋ̀ lɛ, i ǹsughiì ǹteɗ mɔ wɔɔ lɛ rì ɓìyaàyalì miì? 24Fɔɔnnɛ à kpaaghà ɓumɓɛ ɓɛ ɓaghà wɔɔ lɛ: Ɓàtɛɛna nyi fìraŋ̀ fiǹ, ɓi fa fyɔ rì roànɛ à rì rì tìraŋ̀ ǹtɛ̀ɗ. 25Ɓumɓɛ̀n ɓɛ kpaa nyi lɛ: Tààta ŋwaànɛ u kalag lɛ ti fa, à ti rì tìraŋ̀ ǹtɛ̀ɗ. 26Nyii pɛɛ̀zì ɓɔ lɛ: Ǹkalii mìni lɛ, ŋwaànɛ à rì rì ɓyom innɛ ɓɛ ri ɓiì fatii, roànɛ à rì kɛ̀ɛ̀ com, ɓɛ ri ɓiì ɓàtɛɛ lɛ rì maa gàɓ ànɛ à rì rì nyi miì. 27Ɓi ɓɛg ànɛ a ɓɛ̀bènàbena ɓɛm, ɓɔɔ kɔngà ɓi lɛ ǹlami ɓɔ, nni yùunay fɛ rì ɓɔ, ɓi siì ɓɔ ɓɛ̀ɓoŋ foo ɓi mis mɛ̀m. 28Yɛ̀ɛ Yeesus à kpaaghà fɔlɔɔ, nni à syògà ɓɔ bee lɛ ɓɛɛ ɓɔg a Yorisalɛm.

Yeesus à ɗiŋii a Yorisalɛm

(Mt. 21:1-11; Mk. 11:1-11; Zŋ. 12:12-19)

29Yɛ̀ɛ Yeesus à ɓaghà di à mɛ wuɓsɛn ɓilɔ̀ŋ ɓi lɛ, rì Bɛtfazee rì Bɛtanii jàŋbog rì dòn ìnɛ ɓɛ nɗegì lɛ dòn ì ɓɛ̀òlìvyee, nni à romgà ɓɛ̀yilàg ɓii ɓɛɓɛɛ̀, 30à kpaa ɓɔ lɛ: Kɛ̀ɛna ɓi kìlɔ̀ŋ ki ki riì mìni kinii asu, i ɓì kpaŋi wɔɔ, ɓì rì ɓiì tanɛɛ man à jàɗki ànɛ mum à ka ɓokà ɓi miì ǹsuŋɛn, ɓi fumiì nyi ɓi yuis̀ rì nyi. 31I mum à tɔɔgh mìni lɛ ɓisuucɛ nnɛ ɓì fùmii man à jàɗki ànɛ̀n, ɓì ɓàg nyi lɛ: Kan a kɔ̀nkɔn lɛ ti kɛǹ nyi rì yɔ̀.

32Nni ɓumɓɛ Yeesus à romgà ɓɛǹ ɓɛ kɛngà, ɓɛ tanɛ̀n lɛ ɓìɓan ɓi ri lɔŋ yɛ̀ɛ Yeesus à kpaaghà. 33Yɛ̀ɛ ɓɛ fufùmìghà man à jàɗki ànɛ̀n nni ɓumɓɛ ɓɛ ɓaghà rì nyi ɓɛ tɔkà ɓɔ lɛ: Ɓisuucɛ nnɛ ɓi fùfumi man à jàɗki ànɛ̀n? 34Ɓɔɔ ɓaàg lɛ: Kan a kɔ̀ngi lɛ ti kɛǹ nyi rì yɔ̀. 35Fɔɔnnɛ ɓɛ kɛngà Yeesus rì man à jàɗki ànɛ̀n, ɓɛ ghas̀ ɓìlàà miì aɗyòò, ɓɛ ɓɔgsì nyi miì. 36Yɛ̀ɛ Yeesus à kɛ̀nkɛ̀ngà, ɓum ɓɛ ghaghàlà ɓìlàà ɓyaa ɓi bee aɗyòò. 37Yɛ̀ɛ à ɓaghà di à mɛ wuɓsɛn Yorisalɛm, ɓi rìsɛ̀nɛ̀n ɗi dòn ì ɓɛ̀òlìvyee, nnɛ kìnyàà ki ɓangà ɓɛ̀yilàg ɓɛ̀cèm ɓɛ tumɛ̀n rìɓɔgsì ɗi Bɛ̀ll jɛ̀ɛ̀ aɗyòò ǹɗaŋ, ɓisuu dàm yi ɓiɓan yicèm yi ɓɛ ghɛngà. 38Ɓɛ kpaakpàà lɛ: Bɛ̀ll a maŋ rìfòm ɗi ɗi yuu yì ɓi ɗii ɗi Kan, fyòoog à ɓa ɓi ɗyoo ɓi ɗùm, rìkem ɗyɛɛ ki Bɛ̀ll.

39Fɔɔnnɛ Ɓɛ̀fàrìzyɛŋ ɓɛdɛŋ ɓɛ ɓɛ ɓaghà ɓi gwìy ì ɓum ìnɛ̀n, ɓɛ kpaaghà Yeesus lɛ: Ǹɗèsàg, simi ɓɛ̀yilàg ɓɔɔ ɓɛɛ maàrɛn. 40Yeesus à ɓàg ɓɔ lɛ: Ǹkpaa mìni lɛ, i ɓɛ maarɛɛ, gɔ̀g yi kpagsɛ̀n.

41Yɛ̀ɛ Yeesus à ɓaghà di à mɛ wuɓsɛn bàn, nni à soɓkà mis ɓi yɔ̀, à tum rìrèn ɓisuu bàn ìnɛ̀n, à kpaa lɛ: 42I wɔ̀ girig wàa rì lɛ ù yi com ki ki ri lɛ ki fa wɔ̀ fyòoog ɓi ŋwos a gɛɛ̀nɛ, nni fe! Com kìn ki ri wɔ̀ kì nyamɛn ɓi lèg ànɛ lɛ kɔ̀ɔ ghɛn kɔ. 43Mɛ̀ru mɛdɛŋ mɛ ri ɓiì ghɛnɛɛ a lɔ̀ŋkɔɔ, mɛ ɓɛ̀bènàbena ɓɔɔ ɓɛ ri wɔ̀ ɓiì cèŋzɛɛ ri gari, ɓɛ ki ghegsag wɔ; ɓɛ ri wɔ̀ ɓiì faà rìbaŋì ɓɛ̀ɓɛg ɓɛ̀cèm. 44Ɓɛ ɓiì ɓùgsii lɛ rì wɔ̀, rì ɓɔn ɓɔɔ, ɓɛ̀ kɛɛ̀ cààti gɔ̀g ìdɛŋ m̀ɓasɛn ɗi yimbog ɓisuulɛ, ù yighà ɓi cààmɛ̀n ki Bɛ̀ll à yùghà wɔ̀ kì ghɛɓsii miì.

Yeesus à nàɓi ɓɛ̀kìì-fyèè ɓi naà-Bɛ̀ll

(Mt. 21:12-17; Mk. 11:15-19; Zŋ. 2:13-22)

45Nni Yeesus à ɗiŋìghà ɓi naà-Bɛ̀ll, à tumɛ̀n rìnàɓ ɗi ɓɛ̀kìì-fyèè, 46à kpaakpàà ɓɔ lɛ: Ki ri kì kànɛn lɛ, naa yɛ̀m ì ri ɓa naà-bɔ̀ŋzɛ̀n. Wɔ̀lɛ mìnii mɛ ghaasi yɔ̀ naa ì ɓɛ̀wiiwìì.

47Yeesus àa nti à rèsàg ɓum ɓìɓan ɓi Bɛ̀ll ɓɛ̀ŋwos ɓɛ̀cèm ɓi naà-Bɛ̀ll. Nni ɓɛ̀pìrɛɛtìrɛ̀ ɓɛgwey, rì ɓɛ̀rèsàg-ɓìdɔ̀gsɛna rì mɛ̀fòm mɛ ɓi kìlɔ̀ŋ ɓɛ kaakààghà bee inɛ ɓɛɛ wey nyi. 48Kìɓan kifog, ɓɛ yighà ɓi lannɛ ɓɛ ri lɛ ɓɛ ki ɓisuulɛ, kìlɔ̀ŋ kìcèm ki ɓaghà mɛ̀reè mɛ̀ ramɛn ɓi ɓìɓan ɓi Yeesus à kpaakpààghà.

Attualmente Selezionati:

LUKAS 19: BAFNT

Evidenziazioni

Copia