LUKAS 18

Dàɗkì ì ǹ-yɔ̀mì-ɓìɓan anɛ à ɓaghà rì kìɓeɓtàg ki nɗem

1Yeesus à tekà ɓɔ dàɗkì lɛ a resi ɓɔ lɛ, ɓɛ ghɛɛ̀sɛɛ kì ɓɔ̀ŋzag ɓyààmɛ̀n ɓìcèm, kɛ̀ ɓɛɛ̀ fɔɛy. 2À kpaa ɓɔ lɛ: Ǹ-yɔ̀mì-ɓìɓan adɛŋ yɛɛ ɓaghà ɓi bàn ìdɛŋ; à ɓaghà lɛ, kɛ̀ɛ risi Bɛ̀ll, kɛ̀ɛ kuurag bimiɗ à mum. 3Fɔɔnnɛ ǹkpɔɓ wu giɓ wudɛŋ wu ɓaghà girig ɓi bàn ìnɛn; ǹkpɔɓ wiǹ wunti wu yulàg nyi kì tɔɔ̀gh lɛ, a reǹ kìɓan ki lɛ rì nyi rì bènàbena wiì àdɛŋ. 4Kìɓan ki giɓ anɛ̀n kiǹ ki finɛ̀ngà, ǹ-yɔ̀mì-ɓìɓan anɛ̀n kɛ̀ɛ kɔ̀n lɛ a reǹ kɔ. Fɔɔnnɛ à ki fèkà min ɓi nɗem wii lɛ: Nsoò yɛ̀ɛ mɛ̀ ǹɗì lɛ, kɛ̀ɛ nɗisi Bɛ̀ll, kɛ̀ɛ nkuurag mum, 5yɛ̀ɛ ǹkpɔb wu giɓ wu wɛɛ̀ yeeyeèsì mɛ̀, ǹɗì ɓiì ɓàŋi ki renì kìɓan kii, kɛ̀ɛ̀ fɔlɔɔ wu ɓiì ki kɛ̀nkɛni asu wu weèwèèyì mɛ̀ nto rì kɛɛgh kɛ̀ɛ̀ sugtag. 6Kan à ɓɔ̀ɓtì jɛ̀ɛ̀ lɛ: Wooghna kìɓan ki ǹ-yɔ̀mì-ɓìɓan a kìɓeɓtàg ki nɗem à kpaa! 7Bɛ̀ll à rì nya lɛ à rɔ̀ɓ lɛ à ɓàagh ɓi kiɓan ki ɓum ɓii ɓɛ à ɓɔ̀ngà di ɓɛɛ̀ ɓeeɓeràg nyi yɛ̀ɛ ìru, yɛ̀ɛ ŋwos? À rì nya lɛ à lɛ̀mzì ɓi ɓɛg wàa? 8Ǹkalii mìni lɛ, à ɓiì ɓàagh kiɓan kaa lɛ fyɛ̀ɗ fyɛ̀ɗ. Wɔ̀lɛ yɛ̀ɛ Man à mum à ɓiì yùu, à rì nya ɓiì tanɛɛ righerɛ̀n ɓi ziinɛ?

Dàɗkì ì Fàrìzyɛŋ, rì ǹterì-làmpoŋ̀

9Nni Yeesus à teetìghà dàɗkì ìdɛŋ ɓisuu ɓum ɓɛdɛŋ ɓɛ ɓɛ fefèkà lɛ ɓɔ yɛɛ ri ɓɛ̀saaɗ ɓɛ ɓum ɓi mis mɛ Bɛ̀ll ɓɛ ki sɛɛsɛɛ̀tì ɓɛ̀ro ɓɛm̀bog, à kpaa lɛ: 10Ɓum ɓɛɓɛɛ̀ ɓɛ ɓɔkà kì ɓɔ̀ŋzaagh ɓi naà-Bɛ̀ll. Ɓɛ ɓaghà lɛ, rì Fàrìzyɛŋ, rì ǹterì-làmpoŋ̀. 11Nni Fàrìzyɛŋ à rɛlìghà mɛ̀rey, à ɓɔ̀ɔ̀ɓɔ̀ŋzàg Bɛ̀ll rì ǹɗem, à kakàlì lɛ: Tààta Bɛ̀ll, ǹtògsaagh wɔ̀, ɓisuulɛ, ǹ-yin yɛ̀ɛ ɓum ɓɛm̀bog ɓɛ ɓɛ ri ɓɛ̀wiiwìì, rì ɓɛ̀kìì-kìɓe, rì ɓɛ̀kìì-tìsɔ̀mɔ̀g; nsoò yɛ̀ɛ ǹterì-làmpoŋ̀ ànɛnii. 12Mɛ̀ ǹti ǹcèlàg ɓìɗilàg ɓisuu bɔ̀ŋzɛ̀n, ǹki falag gàɓ ì kìntɛ̀ɗ ìnɛ ɓi ɓyom ɓyɛm̀ ɓìcèm. 13Fɔɔnnɛ ǹterì-làmpoŋ̀ nyii rɛlìghày fìràɓ, kɛ̀ɛ ghɛɛsi lɛ, a ɓegsi mis aɗyòò, kìɓan kifog, à yɛ̀ɛ̀ghyɛ̀gsì ɓyàg ri ǹɗemi-kɛŋɛn di a kpaakpaa lɛ: Tààta Bɛ̀ll, wogha ǹkìì-kìɓe anɛ lɛ mɛ̀ nyìighnyìg. 14Yeesus lɛ: Ǹkpaa mìni lɛ: Ŋwaà siitòn anɛ à sugtìghà a mɛɛ mii di à ti lɛsaad ɓi mis mɛ Bɛ̀ll à cee lɔŋ Fàrìzyɛŋ; lɛ mum ǹcèm ànɛ à ɓiì ghɛnɛɛ nyimiɗ lɛ, nnyɛɛ teŋmɛɛ, innɛ ɓɛ ri ɓiì sɛɛ̀dii ɓi zi; roànɛ à rì ɓiì sɛɛ̀dii nyimiɗ ɓi zi, innɛ ɓɛ ri ɓiì kìi lɛ a teŋmɛn.

Kìɓan ki ɓɔɔɓɔɓti ɓɛsàg

(Mt. 19:13-15; Mk. 10:13-16)

15Ɓum ɓɛ yuyùghà Yeesus lɛ, rì ɓɔn ɓɛɓwɛ̀ɗ miì lɛ a saagh ɓɔ ɓyàg ɓi nyòò, wɔ̀lɛ, yɛ̀ɛ ɓɛ̀yilàg ɓɛ ghɛngà fɔlɔɔ, ɓɛ nyɛɛdɛ̀n ɓumɓɛ̀n. 16Fɔɔnnɛ Yeesus à kpaaghà ɓɔ lɛ ɓɛɛ reŋiì ɓɔn ɓɛ̀n à ki kpaa ti lɛ: Càrina ɓɔɓti ɓɛsàg ɓɛɛ yu a lɔ̀ŋkɛm̀, kɛ̀ ɓi règ ɓɔ, lɛ kìlɔ̀ŋ ki Bɛ̀ll ki ri ɓisuu rikuu ɗi ɓum ɗi ɗi ri yɛ̀ɛ ɓɔ. 17Ǹkalii mìni saaɗ lɛ, i mum à ghàɓi ɓi kilɔ̀ŋ ki Bɛ̀ll fɛlɛ yɛ̀ɛ maa ŋwɔɓti à yin lɛ à ɗiŋì miì.

Dɛlì ìnɛ ì ɓaghà guŋgum

(Mt. 19:16-30; Mk. 10:17-31)

18Rìfòm ɗidɛŋ ɗi tɔkà Yeesus lɛ: Syeesyee à ǹɗèsàg cɛ kɛɛ̀ki ǹɗì lɛ ǹkì ɓi ɗi lɛ m̀ɓa rì cɛɓ ki fiɗyàɓ fikɔ̀ɔ̀? 19Fɔɔnnɛ Yeesus à tɔkà nyi lɛ: Ɓisuucɛ nnɛ ù reŋii mɛ̀ lɛ syeesyee à ǹɗèsàg? Ŋwaàdɛŋ à yin syeesyee à mum i ki cee ɓi lɛ Bɛ̀ll cɛ̀ncii. 20Ù yii ɓìdɔ̀gsɛna ɓi ɓi ri lɛ: Kɔ̀ɔ kì fisɔ̀mɔ̀g, kɔ̀ɔ wey mum, kɔ̀ɔ yii com ki mum, kɔ̀ɔ pwàà mum kìɓan ɓi nyòò, nyaasi soŋi ɓɛɛ̀ gaa. 21Nni ŋwaànɛ̀n à ɓàkà nyi lɛ. À tumɛ̀n ɓi rìŋwɔɓti ɗyɛ̀m, màa ɓèŋɓèŋ ɓidɔ̀gsɛna ɓiǹ. 22Yɛ̀ɛ Yeesus à wokà rìɓàg ɗii ɗiǹ, nni à kpaaghà nyi lɛ: Com kɛɛ̀ ka kaakaàrɛ̀n wɔ̀ kìfog. Kɛ̀na u kaɓ ɓyom ɓìcèm ɓi ù rì rì ɓyɔ, u kaɓsi mɔ̀ɔ̀ni mɛ miì rì ɓɛ̀soghàsogha, fɔlɔɔ nnɛ ù ɓiì ɓaà rì ìkum aɗyòò, di u yuiy min u nɔɔ̀ti mɛ̀. 23Yɛ̀ɛ ŋwaànɛ̀n à wokà fɔlɔɔ, ǹɗem wii wu ɓeɓtɛ̀n, ɓisuulɛ à ɓaghà rì ìkum lɛɛ̀gwey. 24Yɛ̀ɛ Yeesus à ghɛngà di ǹɗem wu ŋwaànɛ̀n waa ɓeɓtɛn fɔlɔɔ, nni à kpaaghà lɛ: Ki teèsɛɛ lɛɛ̀gwey lɛ ɓɛ̀guŋgum ɓɛɛ ɗiŋi ɓi kìlɔ̀ŋ ki Bɛ̀ll; 25lɛ ki ri lɛ fyɛ̀ɗ lɛ jàɗki yɛ̀ɛ ɗiŋi ɓi ɗyas ɗi bààtà, à cee lɛ guŋgum a ɗiŋi ɓi kìlɔ̀ŋ ki Bɛ̀ll. 26Fɔɔnnɛ ɓumɓɛ ɓɛ wowòkà ɓìtòkì ɓii ɓiǹ, ɓɛ tɔkà nyi lɛ: Nni ghɛn yɛ̀ɛ ri min lɛ à ɓa rì cɛɓ? 27Yeesus à ɓàg lɛ: Com kìcèm ki ɓum ɓɛ yin ri ìtèɗ wulɛ ɓɛ ki, Bɛ̀ll à rì rì ìtèɗ wulɛ à kì kɔ.

28Nni Pyɛɛri à kpaaghà Yeesus lɛ: Ɓìsii caɗkày ɓyom ɓis, tì nɔ̀ɔ̀tì wɔ̀. 29Fɔɔnnɛ Yeesus à ɓàkà ɓɔ lɛ: Ǹkalii mìni ɓi saaɗ lɛ, ŋwaàdɛŋ ànɛ à rì ɓiì càriì mɛɛ mii, à càɗ yì lɛ rì giy, rì ɓɛ̀geni, rì ɓɛ̀yalì ɓii, nsoò lɛ ɓɔn ɓii ɓisuu kilɔ̀ŋ ki Bɛ̀ll, 30à rɔɓ lɛ à fɔ̀ni ɓi à cee lèg ànɛn ɓi cààmɛ̀n ki, à ki fɔ̀ɔ̀di cɛɓ ki fiɗyàɓ fikɔ̀ɔ̀ ɓi mɛ̀ru mɛ mɛ riì, à yin.

Yeesus à ɓùŋdii kìɓan ki riwù ɗii, rì rìghèmɓɛ̀n ɗii

(Mt. 20:17-19; Mk. 10:32-34)

31Yeesus à tekà ɓɛ̀yilàg ɓɛ kintɛ̀ɗ rì ɓɛɓɛɛ̀, à kpaa ɓɔ lɛ: Ti ɓɔɔgh yɛɛ lɛ a Yorisalɛm, wɔɔ nnɛ ɓìɓan ɓìcèm ɓi ɓɛ̀kpaŋzì-ɓìɓan ɓɛ kangà ɓisuu Man à mum ɓi ɓiì ronì. 32Ɓisuulɛ ɓɛ ri nyi ɓiì kàɓi ri ɓumɓɛ ɓɛ yii ɓi Bɛ̀ll ɓɛ̀roɓɛ̀n ɓɛ fengì nyi, ɓɛ ki nyi mɛ̀tɔɓ, ɓɛ tuughì nyi tìtyɛɛ̀. 33Fɔɔnnɛ ɓɛ ri nyi ɓiì wolì di ɓɛ mɛ ka ɓog nyi kìtòn. Fɔlɔɔ nnɛ à ɓiì ghèmɓɛɛ ajɛ̀m ì mɛ̀ru mɛɓɛɛ̀. 34Kìɓan kifog Ɓɛ̀yilàg ɓɛ wokà ɓi com ki à kpaaghà. Azi anɛ ɓi ɓìtòkì ɓiǹ à ɓaghà ɓi lɛ tɛntɛ̀ɛ̀n ɓi mɛ̀reè maa, fɔɔnnɛ ɓɛ wokà ɓi com ki à kɔ̀nkɔ̀ngà lɛ a kpaà.

Yeesus à wɔ̀ɔ̀zii ɗyaŋɗyàŋ a Zyeriko

(Mt. 20:29-34; Mk. 10:46-52)

35Yɛ̀ɛ Yeesus à ɓaghà di à ti ɓiì kpaŋì a Zyeriko, nni ɗyaŋɗyàŋ àdɛŋ à ɓaghà ǹkɔ̀kɔriyɛn ɓi bèn ì bee, à lɔnlɔ̀n ɓum ɓyom. 36Fɔɔnnɛ ŋwaànɛ̀n à wokà di gwìy ì ɓum yɛɛ̀ ghaghaàgh, à tɔg lɛ a yi cɛ kɛɛ ri. 37Nni ɓum ɓɛ kpaaghà nyi lɛ Yeesus ànɛ a Naazarɛt yɛɛ̀ ghaghààgh. 38Fɔɔnnɛ à kpaaghà jɛ̀ɛ̀ aɗyòò lɛ: Yeesus Man à Davit, wogha mɛ̀ nyìighnyìg. 39Ɓumɓɛ ɓɛ ɓaghà beèbɛ̀y ɓɛ kpɔmdɛ̀ngà nyi, ɓɛ kpaa nyi lɛ a maàrɛn, wɔ̀lɛ nyii teŋzìghà tì jɛ̀ɛ̀ à kpaakpàà lɛ: Man à Davit wogha mɛ̀ nyìighnyìg. 40Fɔɔnnɛ Yeesus à rɛlìghà à kpaa lɛ ɓɛɛ yu nyi rì ɗyaŋɗyàŋ ànɛ̀n. Yɛ̀ɛ à kpagà Yeesus jàŋbog, Yeesus à tɔg nyi lɛ: 41U kɔ̀nkɔn lɛ ǹki wɔ̀ cɛ? Ŋwaànɛ̀n à bàg lɛ: Kan, kìya lɛ, ǹghɛnɛ̀n tì. 42Nni Yeesus à kpaaghà min nyi lɛ: Ghɛnɛn tì, rìgherɛ̀n ɗyɔɔ ɗi ghɛɓsii wɔ̀! 43Ŋwaànɛ̀n à ghàs kì ghɛnɛɛ lɔŋ wɔɔ foo, à ki nɔ̀ɔ̀ti Yeesus di a ɓɔɔɓɔgsì Bɛ̀ll. Yɛ̀ɛ ɓum ɓɛ̀cèm ɓɛ ɓɛ ɓaghà wɔɔ ɓɛ ghɛngà kìɓan kiǹ, ɓɛ tumɛ̀n rìɓɔgsì ɗi Bɛ̀ll.

Attualmente Selezionati:

LUKAS 18: BAFNT

Evidenziazioni

Copia