Lc 16

Yabixal nak mosejal yob

1Max yaltek Jesús jun abix ti' bay eb is cuywom: A ab junel, ay ab jun cham patronej caw wal beyom. Ay ab jun is mayordomo cham. Axa max yabentek cham patronej tu', lanan lajwi el is tzetak yetal cham yuj nak. 2Axa yawten cham nak is mayordomo tu', max yalon cham bay nak axca ti': Ay tzet chi wabaj en, xan a in mulnajil chi wak' el ti', yowalil chak'can ayin, yujtol ok ach wiel yin opiso ti', ẍi cham. 3Axa c'oli naon nak mayordomo tu' axca ti': ¿Tzet ok wun tinani'? Ilab tol ok in yiil in patrón yin wopiso ti', palta c'am chi je' pax wuj junokxa mulnajil. Chin q'uixwi pax wec' k'anoj limosna tilak yatut anima. 4A…, mayal tit yul in c'ul tzet ok wunej, caxc'al c'am in mulnajil, palta ayc'alta' eb ok in chaon bay yatut, ẍi nak. 5Max c'oli yawten eb ay is jec bay is patrón tu' yin junjunal. Max k'anlen bay nak babel max jay axca ti': ¿Jantak a jec bay in patrón? ẍi nak bay. 6100 barril aceite comer in jec bay, ẍi nak. Ta caytu' a jec aceite tu xin, tix jun is valeal a jec ti'. Ayan chotan yin ayman. Cha watx'nen junokxa, asan 50 chot a tz'ibencan oc yin, ẍi nak mayordomo tu' bay. 7Lajwic'al tu', max k'anlen bay junxa: A pax ach, ach ti', ¿jantak a jec? ẍi nak bay. Ayin ti', 100 quintal in jec trigo bay cham, ẍi junxa tu'. Ta caytu xin, tix is valeal a jec tu'. 80 quintalnej cha tz'ibej oc yin, ẍi nak bay. 8Axa yalon cham patronej tu', tol jelan jun mayordomo tu' yin elk'an, xan a eb yet yulyibank'inal ti', yelxac'al wal jelan chi yut ba eb yintak eb ayxa sakk'inalil Dios yin.

9Chi wal ayex, a ch'en tumin, c'unc'al k'anabax ch'en yin yobtakil, palta a beyomalil yinokab watx'ilal che k'anbalnej, yet watx' ay eb ok e yamigonej e ba yetok. Ta caytu' che yut axca tu', a yet ok lajwok yoc yopiso jun ch'en tumin tu' e yuj, ay eb ok chaon e yapni bay ay jun e yatut yin junelnej.

10A mac watx' chi yut ba yetok jabok tzet yetal chi ak'lay bay, ac'ala' watx' ok yut ba ta miman chi ak'lay bay. A pax mac man watx'ok chi yut ba yetok jabok tzet chi ak'lay bay xin, ac'ala' man watx'ok ok yut ba ta miman chi ak'lay bay. 11Xan ta man watx'ok che yut e ba yetok beyomal bay yulyibank'inal ti', ¿xin ta chi ak'laycan jun acaw beyomal ayex? 12Yetok c'apaxok, ta man watx'ok che yut e ba yetok tzet man e yetok, ¿xin ta chi ak'laycan juntzan tzet yetal caw wal e yet ayex?

13C'am junok mactxel chi je' jun lajanc'al yak'on serbil cawanok patrón. Yujtol chi mi yajc'ulnej ba yetok junok, cax chi camc'ulnen ba yetok junokxa. Ay mi junok ay yelapnok yul sat, axa junokxa, c'am mi yelapnok yul sat. Yuj tu' xan c'am chi je' tol jun lajan co camc'ulnen jak'on serbil Dios c'al co camc'ulnen ch'en tumin, ẍi Jesús bay eb.

14Axa yet max yaben eb fariseo tzetak max yal Jesús, max buchwaj eb yin Cham, tutun asan pax yin tumin ayoc nabal eb. 15Axa yalon Cham bay eb axca ti': Ayex ti', asan satak eb anima watx' che yut e ba, palta yojtak Dios tzetbil yili e yanimail. A juntzan tzet miman yelapnok yul sat anima, c'am chi cha' c'ul Dios.

A is ley Moisés

16A ley Moisés c'al tzet tz'ibbilcan yuj eb chekbej Dios payxa, ocnak yopiso masantac'al yet jaynak Juan, cham ak'om bautismo. Axa tinani' xin, yettaxc'al max jay Juan tu', max el yich yal-lay el watx' abix, yin tzetbil chi yun yoc eb anima yul k'ab Dios. Yuj tu', chi yak' eb yip masanil yoc yul k'ab.

17Caxc'al a satcan c'al sat tx'otx' ti', ok lajwok ec'ok, a pax jun ley tu' tamwal junok is letrail tol man ok yun tzet chi yala'.

Yalnaktek Jesús yuj eb chi pojlej ba yetok yetbi

(Mt 19.1-12; Mc 10.1-12)

18Ta ay junok winak chi pojlej ba yetok yetbi, cax chi yion junokxa ix, mul chi yun jun winak tu' axca tu'. Ac'ala' junok winak chi ion junok ix ix pojlejnak ba yetok yichamil, mul chi yun c'apaxok.

Yabixal jun beyom yetok nak Lázaro

19A yet junel, ay jun winak caw wal beyom. A pichilej caw wal can tojol chi yaocok. Watx'c'al tzet chi lo' junjun c'u. 20Ay pax jun winak chi yik Lázaro, caw wal meba'. Ay juntzan mimek yabil ayiltek yin. Asanc'al ti yatut jun beyom tu' chi bet ay chotanok. 21Chi c'oli yochen octok c'ajil loj chi ayc'ay yalan is meẍa jun beyom tu'. Axa juntzan no tx'i chi jayocok, chi ul lek'on no' sat juntzan yabil ayiltek yin tu'. 22Max jay c'ual cam nak xin, max ul ilaytok pixan nak yuj eb ángel. Max apni oc nak c'atan Abraham. Ac'ala' max jay c'apax c'ual cam jun beyom tu'. Axa mukay tu'.

23Palta a is pixan, a tu' max apni bay ay is pixan eb camnak. Axa yet lanan yaben yail bay max apni tu', max aj t'ananok, najattac'al max yiltok yin Abraham, c'al Lázaro tol ayic' yetok. 24Axa yaj yaw tu', max yalon axca ti': Mamin Abraham, c'am mi chi ok'tek a c'ul win. Cha chektek Lázaro ayin in k'ana'. Matawal chi laaytok junok yiximal k'ab yul a', cax chi ul yaon oc jabok yin txam wak' ti', yujtol c'am chi techaj waben yail xol k'ak' ti', ẍi cham. 25Axa yalontek Abraham tu' bay cham axca ti': Ach anima, natek tol caw wal watx' max ec' yulyibank'inal oj, a pax Lázaro ti xin, caw c'am jabok watx'il max ec' yila'. Axa tinani', lanan chaon mimanil is c'ul cayti'. Achxa lanan aben yail tinani'. 26Yetok c'apaxok, ay wal jun miman xab olan aycan co nan co xol etok. Yuj tu', caxc'al ay eb ayic' cayti' chi yochej chi toj ayex tu', c'am chi je' k'axpoj ec' eb. Yetok ex c'apaxok, c'am chi je' e k'axpoj ec'tek cayti', ẍi Abraham tu'. 27Ta caytu xin, mamin Abraham, c'am mi chi je' cha chektok Lázaro tu' bay yatut in mam, 28bay ayic' owan wuẍtak. Chi toj yalon yab eb, yet watx' c'am chi jay eb wetok xol yailal bay ayin ec' ti', ẍi cham. 29Palta a eb oẍtak tu', ayic' tzet max tz'ibejcan Moisés, c'al tzet max tz'ibejcan eb chekbej Dios bay eb. Yacbajokab eb txiquin bay k'anej tz'ibbilcan tu', ẍi Abraham. 30Yel ton mamin Abraham, palta ta chi yil eb yictzoj aj junok mactxel xol eb camnak, ok na ba eb yin is yobtakil, ẍi cham. 31Ta c'am chi yacbaj eb txiquin yin tzet tz'ibbilcan yuj Moisés tu', c'al tzet tz'ibbilcan yuj eb chekbej Dios, caxc'al ay junok mactxel chi ictzoj aj xol eb camnak, majc'alta' yaoc eb yin c'ul, ẍi Abraham bay cham, ẍi Jesús.

Attualmente Selezionati:

Lc 16: ATBYK89

Evidenziazioni

Copia