Lc 15

Yabixal jun calnel c'aylejnaktok

(Mt 18.10-14)

1Masanil eb tekom el tojlabal, yetok juntzanxa eb yob is beybal satak anima, max jayoc eb bay Jesús abxalwok. 2Yuj tu' xan max tit yowal eb fariseo c'al eb meẍtol yin ley Moisés, max yalon eb axca ti':

—A jun winak ti', chic'al cha' jay eb yob is beybal c'atan. Ilab chi low yetok eb, ẍi eb.

3Yuj tu' xan max yal Jesús jun abix tx'oxbanil el cuybanilej bay eb: 4K'inalok ay junok winak e xol, ay junok 100 is calnel. Ta chi c'aytok junok, chi yacan nak no' 99 etbiej tu' bay is lobal tu', cax chi toj nak sayon ec' no' max c'aytok tu', masantac'al chi yal yilchaj yuj. 5Axa yet chi ilchaj no', chi lacontek, chi tit yin tzalojc'ulal. 6Axa yet chi jay bay yatut, chi wajban oc eb is yamigo, c'al eb cajan is cawilal, cax chi yalon bay eb axca ti': Tzalojanek wetok; mayal ilchaj jun in calnel max c'aylejtok, ẍi bay eb. 7K'inalok ta ay c'apax junok 99 anima, watx' is nabal naoni, cax man yowalilok chi na ba c'ul eb yin is yobtakil naoni, c'am mac chi tzaloj satcan yuj eb. Palta chi wal ayex, ta ay junok mactxel yob is beybal chi na ba yin is yobtakil, ay mimek tzalojc'ulal yuj jun chi na ba c'ul tu' satcan.

Yabixal jun ch'en tumin c'aylejnaktok

8K'inalok ay junok ix, ay lajonebok ch'en is tumin. Ta chi c'aytok junok yuj, chi yaoc is tzektebal, cax chi q'uison yin c'ojanc'ulalil yul yatut. Chi c'oli sayoni, masantac'al chi yal yilchaj yuj. 9Axa yet chi ilchaj yuj, chi yawtej eb is yamigo, c'al eb cajan is cawilal cax chi yalon bay eb axca ti': Tzalojanek wetok, mayal ilchaj jun in tumin max c'aylejtok, ẍi bay eb. 10Xan chi wal ayex, ta ay junok mactxel yob is beybal chi na ba c'ul yin is yobtakil tu', caw wal chi tzaloj eb yángel Dios yuj, ẍi Jesús.

Yabixal jun nak c'ajolej c'aylejnaktok

11Max yal c'apaxtek Jesús jun abix ti': Ay ab jun winak ay cawan is c'ajol. 12Max ab yal nak tzunan unin bay is mam axca ti': Mam, ak' in satak t'inan ta' wioni, ẍi ab nak. Axa pojon ec' cham mamej tu' is tzetak yetal xol eb cawanil. 13Jayebixto c'u tu', axa txononcan el nak tzunan unin tu' masanil tzet max ak'lay bay yuj is mam tu'. Axa toj nak bay jun conob caw wal najat tu'. A yet max apni nak bay jun conob tu', max toj nak yin yobtakil, amanc'uan max lajwi el is tumin nak. 14C'uxan wal lajwi el is tumin nak tu', max jay jun miman wajil bay jun conob bay ayic'ok. C'amxa tzet chi lo nak. 15Axa toj nak k'anon is mulnajil bay jun cham aj conob bay tu', cax max ak'lay is mulnajil nak. Max cheklaytok iloj txitam yuj cham bay jun is c'ultak. 16Tx'okxa chi tit wajil nak bay tu'. Chi yochejxac'al nak chi lo jabok tzet chi lo no txitam tu', palta c'am mac chi ak'on jabok yet. 17Catatu' bian, max naon ba c'ul nak axca ti': ¿Tzet yuj xan caytu' chi wut in ba? Manxam jantakok eb majan in mam tinani'. Chi yak' sobra tzet chi lo' eb, axa ayin paxok, lanan wak'on cam in ba yuj wajil cayti'. 18Yel mi watx' ok in pax bay in mam tu', cax ok walon bay axca ti': Mam, caw wal max oc in mul bay Dios, cax max oc c'apax in mul ayach. 19Manxa in mojok chin aloc a c'ajolok. Ut in axca junok eb a mulnajwom ti', quin chi ok walon bay. 20Axa meltzoj nak bay yatut is mam tu'.

A yet najattoc'al chi tita', max il-laytok yin yuj cham mamej tu'. Caw wal max ok' is c'ul cham yin, xan max toj cham chaoni. Yanej cham toji, max apnic'al oc cham c'atan, max lak'ontek cham, axa tz'ubon el cham is ti' tu' yuj camc'ulal. 21Axa yalon nak bay is mam tu' axca ti': Mam, caw wal max oc in mul bay Dios, cax max oc c'apax in mul ayach. A tinani' manxa in mojok chin aloc a c'ajolok, ẍi nak bay is mam tu'. 22Axa yalon cham mamej tu' bay eb nak mosejal axca ti': Asek yin aymanil. Iektek an pichilej caw wal watx', cax che yaon oc an yin jun in c'ajol ti'. Che yaoc is colk'ab nak, cax che yaon oc is xanab nak. 23Chi lajwi tu', chi toj e yion no wacax caw wal bak'ech, cax che yak'on cam no'. Tol ok co watx'nej wal junok miman loj, cax ok co chaon junok miman k'in. 24Yujtol a jun in c'ajol ti', tol camnakxa ta' waloni, palta a tinani', axca tol max ictzoj pax ajok. Max c'aylejcantok, palta mayal jay paxok, ẍi cham mamej tu'. Axa yaon oc eb jun miman k'in tu'.

25Axa nak babel winak xin, aytok nak mulnajil. Axa yet max jayoc nak cawilal na tu', max yaben nak, tol ayoc son, lanan yoc canal. 26Xan max yawtejtok nak jun majan is mam c'atan. Max k'anlen el nak bay: ¿Tzet yuj xan ayoc jun k'in ti'? ẍi nak bay. 27Ax pax yuj nak oẍtak max jayi. Max chekon a mam yak'lay cam no' ach'ej bak'ech wacax, yujtol a nak oẍtak tu', c'am tzet max on nak. Watx' c'ul yet max jayi, ẍi nak majan tu' bay nak. 28Axa tit yowal nak sic'libil tu'. Majxa yal c'ul nak max oc yul na. Max eltek cham mamej, cax max bet tewok cham bay tol chi oc nak yul na. 29Palta max yal nak bay is mam tu' axca ti': Ojtak, mimanxa tiempoc'al ach wak'on serbil. C'am junelok c'am chi wikej bay chala'. Tok yuj tu' cax ayxa bay chak' junok in chiwo in chi' yetok eb wamigo yin junok in k'in. 30Palta a jun a c'ajol ti', max bet yak'can lajwok el a tumin yin yobtakil yetok eb ix ajmul ix. Axalaj yet chi jay nak, cax chak'on yak'lay cam no wacax caw bak'ech, ẍi nak bay is mam tu'.

31Axa yalon cham mamej tu' bay nak axca ti': C'ajol, ach ti' ayachc'alta' ec' wetok masanil tiempo. A masanil tzet ay ayin, etc'alta' yayji wetok. 32Palta tinani', moj yoc jun k'in ti', cax chon tzaloji, yujtol a jun oẍtak ti', tol camnakxa ta' waloni; axa pax tinani', axca tol max ictzojajok. C'aylejnak ton tok, palta mayal jay pax ocok, ẍi is mam nak tu' bay, ẍi jun abix ti', ẍi Jesús.

Attualmente Selezionati:

Lc 15: ATBYK89

Evidenziazioni

Copia