Luc 3

Njè-ma Jean Baptiste

(Mt. 3,1-12; Marc 1,1-8; Jean 1,19-28)

1Aman Tibère, bi mbiaʼa, a ngu bi mvi 15 ma, Ponce Pilate, ngomna te kokwar Judée, Hérode bi te kokwar Galilée, a Philippe, kramam na, ɓi te kokwar Iturée tʼherkeda Trachonite, a Lysanias bi te kokwar Abilène. 2Te ndev nasa Anne a Caiphe, ndohi mvi skwi a Zhiklè mbibihiaʼa. A Zhiklè a ngaɗa na Jean, kra Zacharie, tʼhèshèkèɗ.

3A Jean a mdo a sam tèlèba a ma woyam Jourdain, a nju ma baptême, aman ndohi ta ngwèdè ndav ta, a mali tengaʼa a mprè, 4ara man ta Windo te ɗèlèwèr ma Esaie, ndo nhadka ma, man a gaɗa: Ngèɗè ndo ngiɗè man a bèhè tʼhèshèkèɗ: Va-tila civèɗ Bi Zhiklè, va-ga civèɗ nengaʼa saraʼa! 5Nkulgodokihai tèlèba ta da ɗaɗal ta, za a ngègèɗhi tèlèba ta da mbeɗkaɗ ta a hai, a skwi ndzaraʼa a gi a civèɗ saraʼa, a kurzlazli kwahai ta da ndedahai, 6a ndohi tèlèba ta da rka skwi mʼmbel ndo Zhiklè.

7A nengaʼa a ngaɗa ta ndohi rèdèdèa, man ta dè a sam na, aman a ga ta baptême: Kin wud tsebarhai! Nʼngreda kinè wa, aman kin slaha a kin hi kinè a ndav Zhiklè man a di a shkè? 8Va-ngreda auda zuraʼa, ara man kin ngwoda ndav kinè. Kin hur ɓai a kin gaɗa, Abraham bab nga. Aman i gaɗa kinè, Zhiklè a slaha a nyoko na wudahi a Abraham te kwahi haha. 9Antanta, dzana a nʼnza te verzi wof. Wof staɗ staɗ tèlèba man a yi wuda zuraʼa azɓai, ta ngélèʼa, a ta kalda a vogwa.

10A ndohi rèdèdèa ta dzhoɗo, a ta gaɗa na: Nga da gi mè kè? 11A nengaʼa a mʼmbeɗa ta a ma: Ndo man a ngots maslaka cèw, da va na ndo man maslaka na azɓai. Ndo man a ngots skwi nʼndai, da gu lèmèlèmè arsa.

12A ndohi ncèkèlè skwai ta shkè, aman a nga ta baptême. 13A ta gaɗa na: Ndo njèngè ma, nga gi ke? A nengaʼa a ngaɗa ta: Kin dzhoɗo skwi ngiɗè a vaʼa ɓai, sèi skwi man ma kita a gaɗa kine.

14A sojèhi ba ta shkè, a ta jhèɗèʼa: Nga, nga gi kè? A nengaʼa a ngaɗa ta: Kin pra na zlau a va a ndo ɓai, kin ngwoda ta ma a gèɗ a ndohi ɓai, Suli mizlinè kinè da dèʼa kinè!

15Aman ndohi ta zhoro, a ta hur a géɗ Jean: Wa ngiɗè ba Kristi ɗè? 16A Jean a mʼmbeɗa ta a ma a ndohi tèlèba: Iyè, i ga kinè baptême a iyam. Aman ndo ngiɗè a di a shkè, man a fena wuɗi ga, nengaʼa a da ga kinè baptême a Mèzhèɓ Zhiklè nkezlaʼa, a vogwa. I gi huyokokoʼa, i slaha a i gshè kotokoroh nengaʼa a ri ɓai. 17Kokwi te ri na, aman a pèvè dau a hedak nengaʼa tèlèba. Dau a da ɓicè a wov nengaʼa, topok dau, a fa na vogwa man a mbècè azɓai.

18Aman Jean a mfa ta ma tsaɗ tsaɗ a gèɗ, a njè ta ma mbelaʼa a ndohai. 19A nʼngra na mali a Hérode, bai, a géɗ Hérodias, ngwoz kramam na. A sam skwi ambaɓiaʼa tèlèba man Hérode a gau, 20a ngu mali a vaʼa, aman a mfeda Jean a gi dangai.

Baptême Yèsu

(Mt. 3,13-17; Marc 1,9-11)

21Te deɓaʼa nʼnga ar haha: Aman Jean a ga ta baptême a ndohi tèlèba, a nʼnga na baptême a Yèsu. Aman Yèsu a ntsu rai, a giɗfèk a mwin na. 22Mèzhèɓ Zhiklè nkezlaʼa a mshkèhai a géɗ nengaʼa, ara nkuɗhom. A ta tsena ngèɗè staɗ te zhiklè te géɗèʼa, man a gaɗa: Ka kra ga man i woy ka a ndav ga. Ndav ga a wuffè kumba a géɗ ngaya.

Verzi Yèsu

(Mt. 1,1-17)

23Mvi Yèsu 30, man a hin mizlinè nengaʼa. A sam di ndohai, kra Joseph, kra Héli, 24nengaʼa a Matthat, a Lévi, a Melchi, a Jannai, a Joseph, 25nengaʼa a Mattathias, a Amos, a Nahum, a Esli, a Naggai, 26nengaʼa a Maath, a Mattathias, a Sémei, a Josech, a Joda, 27nengaʼa a Joanan, a Rhésa, a Zorobabel, a Salathiel, a Néri, 28nengaʼa a Melchi, a Addi, a Kosam, a Elmadam, a Er, 29nengaʼa a Jé-sus, a Eliézer, a Jorim, a Matthat, a Lévi, 30nengaʼa a Siméon, a Juda, a Joseph, a Jonam, a Eliakim, 31nengaʼa a Méléa, a Menna, a Mattatha, a Nathan, a David, 32nengaʼa a Isaie, a Jobed, a Booz, a Salmon, a Naason, 33nengaʼa a Aminadab, a Admin, a Ami, a Esrom, a Pharès, a Juda, 34nengaʼa a Jacob, a Isaac, a Abraham, a Thara, a Nachor, 35nengaʼa a Seruch, a Ragau, a Phalek, a Eber, a Sala, 36nengaʼa a Kainam, a Arphaxad, a Sem, a Noé, a Lamech, 37nengaʼa a Mathusala, a Enoch, a Jared, a Maléléel, a Kainan, 38nengaʼa a Enos, a Seth, a Adam, nengaʼa man Zhiklè a ngau.

Attualmente Selezionati:

Luc 3: MOF89

Evidenziazioni

Copia