Luc 2
2
Nyi Yèsu
(Mt. 1,18-25)
1A pats nasa Bi Auguste a mbaha ta ndohi tèlèba, aman a nger ta. 2Nʼngér ndo nshèlèluraʼa sa, ta gu te va man Quirinius ngomna te kokwar Syrie. 3A gi a gai tèlèba to do, aman ta nger ta, ngiɗè a kokwar na, ngiɗè a kokwar na.
4A Joseph ba te Galilée, te kokwar Nazareth, a mdo Judée, a kokwar David, man ta baha na Bethléhem, te man nengaʼa te verzi David, 5aman ta da nger ta a Marie, medemi na, kra tʼhwaɗ.
6Aman ta shkè a samaʼa, ki na ma, a nyu kra nengaʼa. 7A nyu tsuvom nengaʼa, kra nguraʼa, a mpaɗda a bomtèrè, a mfeda a torok, te man sam mʼmènè ngiɗè azɓai te gi mbrokihai.
Ndohi mɓer skwai, a golahi Zhiklè
8A ndohi mɓer skwai ta zhè te pa te dak. Ta mana a sam skwi ta. 9A na haha, gol Bi Zhiklè a mshkè a sam tengaʼa, a nʼnjèl Zhiklè a nhela sam cerh-cerhaʼa. A ta gu zlau a vata. 10A gol Zhiklè a ngaɗa ta: Kin gu zlau ɓai! Na haha, i njè kinè ma mbelaʼa a mwuffe mbiaʼa, man a dè wuf-fedè ndohi tèlèba. 11Aman a patsna ta ya kinè te kokwar David ndo mʼmbel ndo, nengaʼa Kristi, Bai. 12Va-suna te skwi malwuɗi haha: Kin ngècè kra, mpaɗaʼa a bomtèrè, mʼmana tʼhai te torok.
13A nasa nasa golahi Zhiklè rèdèdèa ta zhè a sam gol Zhiklè. Ta slébèrdè Zhiklè, a ta gaɗa: 14Nʼnjèlè a sam Zhiklè te géɗèʼa, gumai a herkeda, a sam ndohai man Zhiklè a va ta pombai!
15Aman golahi Zhiklè ta men ta a deɓa a zhiklè, ndohi mɓer skwai ta goɗ a va ta: Ngo-dokona a kokwar Bethléhem, a nga da rka skwi man a gau, man Bi Zhiklè a ngra nga a haha. 16A to do tsam tsam, a ta ngots, Marie a Joseph, a kra mʼmana te torok. 17Mrke na, a ta zlèzlèmè ma kra a ma ma. 18A ndohi tèlèba man ta tsenaʼa, ta hur ma ndohi mɓer skwai, a ta rzl ta. 19A Marie a nʼngheda ma tèlèba a ndav na, a nhérèʼa. 20A ndohi mɓer skwai ta men ta a deɓa, a ta shid gèɗ, a ta slébèrdè Zhiklè, a géɗ skwi tèlèba man ta tsenaʼa, a ta rkaʼa, ara golahi Zhiklè ta ngreda ta.
Ta ngela na ngwon a Yèsu
21Te deɓ mʼmèn tsamakaɗ, aman ta ngela ngwon nengaʼa, ta va na nzlembaɗ na Yèsu, ara man gol Zhiklè a va na, man a tʼhwaɗ di ɓai.
Ta da Yèsu a gi Zhiklè
22Man maudza nʼnga ma, ara man Moise a gaɗa, ta da kra a kokwar Jérusalem, aman ta va na a ri Bi Zhiklè 23(ara man ta Windo te ɗèlèwèr Zhiklè: Wudahi ngurhi tèlèba, tsuvomhi tsumvomhi tèlèba, man ta yiaʼa, wuda nkezlaʼa a sam Bi Zhiklè). 24A ta vi skwi a Bi Zhiklè, a ta pil gèɗèʼa, ara man ma kita Zhiklè a gaɗa: nkuɗhomhai cèw, man ɓai wud ngudokwarhi cèw.
25A na haha, te kokwar Jérusalem, ndo ngiɗè a zhè, nzlembaɗ na Siméon. Nengaʼa ndo nzuraʼa, a woy Zhiklè, a zhèr skwi mbid Israel, a Mèzhèɓ Zhiklè nkezlaʼa a zhè a géɗ nengaʼa. 26Mèzhèɓ Zhiklè nkezlaʼa a ngaɗa na: Ka da rka Kristi, Bi dai, ga ka metsi ngaya. 27A Mèzhèɓ Zhiklè a ndaʼa a gi Zhiklè. Aman Marie a Joseph ta cko kra ta, Yèsu, aman ta gia ara man ma Zhiklè a gaɗa, 28nenga ba a nhumbatda a rai, a nslubordo Zhiklè, a ngaɗa: 29Bai, anai ka da jèkeda ɓèl ngaya, aman a dè vèvèɗ a gumai, ara ma ngaya a gaɗa. 30Aman i rka skwi mʼmbel ndo ngaya a di ga ma, 31skwi mʼmbel ndo man ka tila a sam di ndohi herkeda tèlèba; 32skwi nhél sam man a ngreda ta civèɗ a ndohi herkeda tèlèba; nʼnjèlè a sam Israel, ndohi ngaya.
33Nda bab na a mam na ta rzl ta a géɗ ma man a goɗ a géɗèʼa. 34A Siméon a mpshè ta ma, a ngaɗa na Marie, mam na: Na haha, ta vau, aman ndohi kumba te Israel — ngiɗè a kèlèhai, ngiɗè a slèmbèɗè. Ta vau a skwi malwuɗai, man ta ndèvèɗ ma a géɗèʼa. 35Skwi a tezama ka ndav, ara kafahi gwèsh, a skwi man ndohi kumba ta gshè te ndav, a ngrédè auda.
36Ngwoz nhadka ma ngiɗè a zhè, nzlembaɗ na Anne, dem Phanuel, te verzi Aser. Nhala ma. Te dalai ta nza a baki na, mvi tsaraɗ. 37A nʼnde na a ngwoz mazai, ani mvi na 84 ma. A njèka gi Zhi-klè ɓai, ko a pats, ko a vaɗ, a ngu mizlinè Zhiklè a njèkeda skwi nʼndai, a ntsi rai. 38A pats nasa a mshkè, a nshid gèɗ a Zhiklè, a ngoɗ ma a gèɗ nengaʼa a sam ndohi tèlèba, man ta zhor skwi mʼmbel Jérusalem.
Mshkè a deda a kokwar Nazareth
39Aman ta ndeva skwi tèlèba ma, ara ma Bi Zhiklè a gaɗa, to do a deɓa a kokwar Galilée, a Nazareth, kokwar ta.
40A kra a grè, a grè, a nʼngots wuɗai, a gèɗ nengaʼa nʼndha a maya, a pombi Zhiklè a zhè a gèɗ nengaʼa.
Yèsu man kra te gi Zhiklè
41A mvi a mvai bab a mam Yèsu ta dè a ngolala Pâque a kokwar Jérusalem.
42Aman mvi Yèsu 12, to do Jérusalem, ara man ndohi Juif ta giaʼa pèc pècèk. 43Aman ngolala klèng ma, to do ta a ngwai. Yèsu a nʼnza na a deɓa, a bab na a mam na ta senaha ɓai. 44Ta huro, ta a nda mandalahi tengaʼa. Aman to do mʼmèn staɗ, ta woyaʼa te va mandalahi ta, te va gwoli ta. 45Aman ta ngatsa ɓai, to do a deɓa a kokwar Jérusalem, a ta woyaʼa. 46Te deɓ mʼmèn makar ta ngotso te gi Zhiklè, nʼnza te ndev ndohi njèngè ma Zhiklè, a nfi zlembaɗ a ma ta, a ndzhad ta. 47A ndohi tèlèba man ta tsenaʼa, ta rzl ta a géɗ ma nengaʼa, a maya nengaʼa. 48Aman bab a mam Yèsu ta rkaʼa, ta hur a vata. A mam na a ngaɗa na: Kra ga, ka ge nga ar haha èhèmè? Na haha, nga a bab ngaya nga has ka, a ndav nga mʼmbeɗ na. 49A Yèsu a ngaɗa ta: Kin woyè èhèmè? Kin sun ɓi ɗè, aman i gi sèi skwi Bab ga? 50Ta tsena ma nengaʼa ɓai. 51A Yèsu a mdo a nda tengaʼa, a kokwar Nazareth, a nfu gèɗ a ma ta. A mam na a nʼngheda ma haha tèlèba a ndav na.
52A Yèsu a ngrè a ma ma, a maya, a mvi a mvai, a pombai, a sam Zhiklè, a sam ndohai.
Attualmente Selezionati:
Luc 2: MOF89
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Alliance Biblique du Cameroun 1989
