Luc 19

Yèsu a Zachée

1A nengaʼa a mdo, a mbeza a kokwar Jéricho. 2Na haha, ndo ngiɗè a zhè, nzlembaɗ na Zachée, bi ndohi ncèkèlè skwai, ndo mèshèlè. 3A woya man a rka Yèsu a dai, a slaha ɓai, ndohi rèdèdèʼa; nengaʼa kwolèlè. 4A nengaʼa a mhau, a nteva wof kslor, aman ta gaɗa Yèsu a di a bizhè a pa, a woya a rkaʼa. 5Aman a shkè a samaʼa, Yèsu a nrkaʼa, a ngaɗa na: Zachée, sulomkaɗahai tsam tsam, aman a patsna i dè a gi ngaya. 6A nengaʼa a mshkèhi tsam tsam, a nco Yèsu a mwuffè. 7Aman ndohi ngiɗè ta rkaʼa, a ta gu ndav, a ta gaɗa: A ndo a gi ndo mali ngiɗè, aman a nzi a pa. 8Aman Zachée nzlatsa, a ngaɗa na Bai: Na haha, Bai, rèta skwi ga, i da va ta ndohi ntawassaʼa. Man i co skwi ndo ngiɗè a wuɗai, i menda na a deɓa, a gi fad ba. 9A Yèsu a ngaɗa na: A patsna skwi mʼmbel ndo a shkè a gi haha, aman nengaʼa ba, verzi Abraham. 10Kra-ndo a mshkè, a woyaʼa, a mbela skwi man a ze na.

Ngèlègèɗ-ma a géɗ gozhèm kula

11Aman ta tsena ma haha, a ngaɗa ta ngèlègèɗ-ma ngiɗè, te man nengaʼa ndul ndul a ma kokwar Jérusalem, a ta huro, kokwar Bi Zhiklè a shkè a nasa nasa. 12A ngaɗa: Ndo ngiɗè, ndo mbiaʼa, a ndo nshèwèlè a kokwar ngiɗè dra, a ndè, a woya bai. Te deɓaʼa a nhur a shkè a deɓa a ngwai. 13A mbaha ta ɓèlèlihi nengaʼa kula, a mva ta gozhèm kula, a ngaɗa ta: Va-gu mizlinè, ha i shkè. 14Aman ndohi kokwar sa, ta gu shèwa a vna. Ta zlinde ta ndohi sak tengaʼa a verzi na, a ta gaɗa: Nga woya nengaʼa a bi nga ɓai! 15A ta feda a bai, a nengaʼa a nshkè na ngwai. A mbaha ta ɓèlèlihi na, man a mva ta Suli a rai, a woya a nsun skwi man staɗ staɗ a gau, a ta ngotso a vna. 16Ndo nshèlè-kuraʼa a mshkè, a ngaɗa: Bai, a Suli ngaya, i ngots gozhèm kula a vaʼa. 17A nengaʼa a ngaɗa na: Ka gu amba, ka ɓèl nlèɓèslèa! Te man ka lèɓèslè a géɗ skwi nkèshèa; i va ka wuɗi bai a géɗ kokwarhi kula. 18A ndo ngiɗè a mshkè, a ngaɗa: Bai, a Suli ngaya i ngots gozhèm zlam a vaʼa. 19A nengaʼa a ngaɗa na: A ka, i va ka wuɗai a géɗ kokwarhi zlam. 20A ndo ngiɗè a mshkè, a ngaɗa: Bai, na haha Suli ngaya man i ɓür te mpèɗè gèɗ. 21I gu zlau, ka ndo mwuɗitpa, ka cè skwi a sam man ka fa a pa ɓai, ka ɓicè skwi a sam man ka zleka a pa ɓai. 22A nengaʼa a ngaɗa na: I gi kita ngaya, a géɗ ma ngaya, ka ɓèl ambaɓiaʼa! Ka suna, i ndo man wuɗitpa, man i cè skwi a sam man i fa a pa ɓai, i ɓicè skwai a sam man i zleka a pa ɓai. 23Ka va ta Suli a ri a ndohi nhumbèɗè suli ɓi èhèmè? Te deɓaʼa, man i shkè, i jhèɗè a deɓa, a i ngècè mpataka a vaʼa. 24A nengaʼa a ngaɗa ta ndohi man ta zlatsa a pa. Vo-co Suli te ri nengaʼa, a kin va na a vaʼa a ndo man a ngots gozhèm kula. 25A ta gaɗa na: Bai, nengaʼa a ngots gozhèm kula ma! 26I gaɗa kinè: A ndo staɗ staɗ tèlèba, man a ngots skwai, ta va na a vaʼa. Aman a sam ndo man a ngatsa skwa ɓai, ta cèma na, ko skwi man a ngotso ba. 27Aman ndohi mayamhi ga, man ta woy iyè a bi tengaʼa ɓai, va-helka ta, va-zlama ta daʼai a sam di ga!

Yèsu a dè a kokwar Jérusalem ara Bai

(Mt. 21,1-11; Marc 11,1-11; Jean 12,12-19)

28Aman a ngoɗ ma haha a mdo a ma tengaʼa a kokwar Jérusalem. 29Aman ndul ndul a kokwar Beth-phagé a Béthanie, a der za man ta baha na oliviers, a nzlinde ta golahi nengaʼa cèw, a ngaɗa: 30Vo-do a kokwar a ma kinè. Aman kin dè a pa, kin ngècè gol kɗèh, mʼmanaʼa, ndo a nʼnza a deɓ nengaʼa di ɓai. Va-prokoɗai, a kin ckoyè! 31Aman ndo ngiɗè a dzhaɗ kinè: Kin prokodi èhèmè? Kin gaɗa na: Bai a woyaʼa.

32A golahi man a zlinde ta, to do, a ta ngotso, ara man a gaɗa ta. 33Aman ta prokodi gol kɗèh, babhi kɗèh ta gaɗa ta: Kin prokodi gol kɗèh èhèmè? 34A ta gaâa: Bai a woyaʼa. 35A ta ckoɗa a sam Yèsu. A ta va na maslaka ta a deɓ kɗèh, a Yèsu a nʼnza a pa. 36Aman a ndo a civèɗ, ndohi ta wuzheda maslaka tengaʼa a civèɗ. 37Aman a zhe ndul ndul a der za oliviers, golahi nengaʼa rèdèdèa tèlèba ta hüno a ta wuffè, a ta slébèrdè Zhiklè a géɗ nrkedi tèlèba, man ta rkaʼa, a ta gaɗa:

38Nga slébèrdè nengaʼa man a shkè haha a nzlembaɗ Bi Zhiklè! Gumai a nʼnjèlè te zhiklè te géɗèʼa!

39A ndohi pharisie ngiɗè te ndev ndohi rèdèdèʼa ta gaɗa na: Ndo njèngè ma, ga ta ndzoan a golahi ngaya! 40A nengaʼa a mʼmbeɗa ta a ma: A vava, i gaɗa kinè, man agassa tengahi ta nze tètè, ar kwahi ta hèzlèwè, a ta gèɗè a wuɗai. 41Aman a zhè ndul ndul a ma kokwar, a mpu di a kokwar, a kuɗai a géɗ nengaʼa, 42a ngaɗa: A woy ka ba, ka sun skwi man a va ka gumai! Ko a patsna! Aman antanta nʼngheda a sam di ngaya. 43Aman pats a di a shkè, aman mayamhi ngaya ta tèuda ka a pa, ta ɗaka a gèɗ, a ta ndeɗats ka, 44a ta ɓazl kinè a nda wudahi ngaya, ko kwa staɗ a nzi a géɗ ngiɗè azɓai; te man a pats man Zhiklè a ndo a sam ngaya, ka sun ɓai.

Yèsu a til gi Zhiklè

(Mt. 21,12-17; Marc 11,15-19; Jean 2,13-22)

45Aman a mdo a gi Zhiklè, a hüno a ndzar ta ndohi mprè skwai auda, 46a ngaɗa ta: Ta Windo te ɗèlèwèr Zhiklè: gi ga, gi ntsi rai. Aman kinè, kin ndeda a gi ndohi metsar.

47A Yèsu a njè ta te gi Zhiklè pèc pècèk, a ndohi mvi skwi a Zhiklè mbibihiaʼa, a malamhai, a tsuvom ndohai, ta woy a ta keɗaʼa. 48Aman ta ngatsa maya ɓai. Ndohi tèlèba ta dzodzora, aman ta tsun ma nengaʼa.

Attualmente Selezionati:

Luc 19: MOF89

Evidenziazioni

Copia