Luc 18

Ngèlègèɗ-ma a géɗ ngwoz mazai a ndo kita

1A ngaɗa ta a ngèlègèɗ-ma: Amba aman kin tsi ri pèc pècèk, a kin ngez ɓai!

2A ngaɗa: Ndo kita ngiɗè a zhè te kokwar ngiɗè, man a fi gèɗ a Zhiklè azɓai, man a fi gèɗ a ndo azɓai. 3Ngwoz mazi staɗ a zhè te kokwar matsa, a mshkè a sam na, a ngaɗa: Takahayè a sam mayamhi ga! 4Pèc pècèk a woya ɓai. Aman te deɓaʼa a huro: Aman i gi zlau Zhiklè azɓai, ko i gi hori ndo azɓai, 5i woya man i takaha ngwoz mazi haha, da ngezyè pèc pècèk asaɓai! 6A Bai Yèsu a ngaɗa: Va-tsena ma man ndo kita nzuraʼa ka ɓi haha a ngoɗo. 7A Zhiklè a takaha ta ndohi man a parka ta, azɓi dè, man ta tsi riaʼa a pats a vaɗ? A gi ndawali a ntakaha ta dè? 8I gaɗa kinè, a takaha ta tsam tsam. Aman kra-ndo a shkè, a da ngècè ncè-a-ndav tʼherkeda dè?

Ngèlègèɗ-ma géɗ ndo pharisie a ndo ncèkèlè skwai

9A ngaâa ta ndohi ngiɗè, man ta hur te ndav: nga ndohi nzuraʼa, a ta rka ta ndohi ngiɗè ara ndohi ambalai, ngèlègèɗ-ma haha: 10Ndohi ngiɗè cèw to do a gi Zhi-klè, aman ta tsi rai. Staɗ ndo pharisie, ngiɗè ndo ncèkèlè skwai. 11Ndo pharisie a nzlatsa, a ntsu ri arsa: Zhiklè, i shida ka gèɗ, a géɗ man iyè ara ndohi ngiɗè ka ɓai, ara ndohi nked ndo ka ɓai, ndohi man ta gi zuraʼa azɓi ka ɓai, ndohi mphömè ka ɓai, ara ndo ncèkèlè skwai haha ka ɓai. 12I jèkeda skwi nʼndai tʼhwaɗ luma cèw cèw; te va skwi tèlèba man i ngotso, i cè auda staɗ te va kula, a i va na Zhiklè. 13A ndo ncèkèlè skwai a nzlatsa dra, a woya a nce gèɗ a zhiklè ɓai, a mpeda ri a ndav, a ngaɗa: Zhiklè, i da se ka te va, i ndo malai! 14I gaɗa kinè: Nengaʼa a nʼndo ngwai a ndo nzuraʼa, nara ngiɗè ka ɓai. Ndo man a gre gèɗ na a ri na, ta manda na gèɗ a hai. Ndo man a manda gèɗ na a hai a ri na, ta da slambaɗda na gèɗ.

Yèsu a pshè ta ma wudahai

(Mt. 19,13-15; Marc 10,13-16)

15A ta hulkoɗi wudahi a sam na, aman a lama ta. Aman golahi Yèsu ta rkaʼa, a ta ga ta ndzoan a ndohi nhelka ta wudahai. 16Aman Yèsu a mbaha ta, a ngaɗa: Va-jèk ta wudahai, aman ta shkè a sam ga. Kin gedassa civèɗ tengaʼa ɓai! Aman kokwar Bi Zhiklè a ndohi ara tengaʼa. 17A vava, i gaɗa kinè: Ko wawa man a cè kokwar Bi Zhiklè ara kra azɓai, a dè a pa azɓai.

Ndo mèshèlè

(Mt. 19,16-30; Marc 10,17-31)

18A ndo mbia ngiɗè a ndzhoɗo, a ngaɗa: Ndo njèngè ma man amba, i gi be kè, aman i ngècè nshèffè a mèdèp? 19Yèsu a ngaɗa na: Ka bahayè man amba èhè-mè? Ndo man amba azɓai, sèi Zhiklè staɗgenè. 20Ka sun ma nkwèr Zhiklè: Ka gu mphömè ɓai, ka kuɗ ndo ɓai, ka gu metsar ɓai, ka gu malwuɗi ncèkèlma ɓai, slubordo bab ngaya a mam ngaya! 21A nengaʼa a ngaɗa na: I goko skwi haha tèlèba daga kra. 22A Yèsu a ntsena ma nengaʼa, a ngaɗa na: Njèkaʼa a sam ngaya skwi staɗ: Preda skwi ngaya tèlèba a ma, kezla ta ndohi ntawassaʼa, a ka ngècè skwi mèshèlè te zhiklè te géɗèʼa; a ka shkè, dzadzarkayè! 23Aman a ntsena ma haha, a ndza na a ndav kumba, aman skwi nengaʼa a a zhè a vata.

24Aman Yèsu a rkaʼa, ndav nengaʼa a kuɗai, a ngaɗa: Wuɗitpa a ndohi man skwi tengaʼa a zhè a vata, man ta dè a kokwar Bi Zhiklè. 25Dara zlugumai a bizhè a vèvèɗ lèpèr, a gèɗ ndo mèshèiè man a dè a kokwar Bi Zhiklè. 26A ndohi man ta tsenaʼa, ta gaɗa: Nslaha man a mbél wa? 27A nengaʼa a ngaɗa ta: Skwi man ndohi ta slaha ɓai, Zhiklè a slaha.

28A Pierre a ngaɗa: Na haha, nga jèkeda skwi nga tèlèba, a nga dzadzar ka. 29Yèsu a ngaɗa ta: A vava, i gaɗa kinè, ndo azɓai, man a njèkeda gi na, a bab na, a mam na, a kramamhi na, a ngwoz na, a wudahi na, a gèɗ kokwar Bi Zhiklè, 30man a ngècè skwi kumba a deɓa azɓai, tʼherkeda antanta, te deɓaʼa a pats man a di a shkè, nshèffè a mèdèp.

Yèsu a hodko mʼmetsi nengaʼa mamakaraʼa

(Mt. 20,17-19; Marc 10,32-34)

31Te deɓaʼa a nhel ta 12 a sam na, a ngaɗa ta: Na haha, nga dè a kokwar Jérusalem, a skwi tèlèba man ndohi nhadka ma ta Windo a géɗ kra-ndo, a da gai. 32Aman ta da va na a ri a ndohi herkeda, ta da ngwossaha kiɗè-kiɗèʼa, a ta dirɗèʼa, a ta jfa na slèslèɓ a dai; 33ta ndèhaʼa a mènèwèɗ, te deɓaʼa ta da keɗaʼa. Aman a pats mamakaraʼa a da slambaɗkaɗauda te mʼmetsai. 34A golahi nengaʼa ta tsena ma haha ɓai. Ma haha nʼngheda a sam ta, a ta tsena ngèɗè nengaʼa ɓai.

Yèsu a mbel mandazlai a ma kokwar Jéricho

(Mt. 20,29-34; Marc 10,46-52)

35Te deɓ nasa, Yèsu a mdo a kokwar Jéricho. A ndo mandazlai ngiɗè a nʼnza a civèɗ, aman a jhèdè skwai. 36Aman a tsena ndohi rèdèdèa, man ta beza a pa, a ndzhoɗo: Mbeza a haha wa? 37A ta gaɗa na: Yèsu, ndo Nazareth a bizhè a pa. 38A nengaʼa a ngaɗa: Yèsu, kra David, i da se ka te va! 39A ndohi ngiɗè ta ga na ndzoan, aman a nzi tètè. Aman nengaʼa a mboho a wuɗi holholaʼa: Kra David, i da se ka te va! 40A Yèsu a nzlatsa a pa, a ngoɗa, aman ta ckoɗa a sam na. Aman a herda na va, 41a ndzhoɗo: Ka woya man a i ga ka mè? Bai, i woya man i ngècè di ga, a i rkaʼa. 42A Yèsu a ngaɗa na: Di ngaya da rka! Aman ncè-a-ndav ngaya a mbel ka ma! 43A nasa nasa a nʼngots di na, a rka dai, a ndzodzor Yèsu, a nslubordo Zhiklè. A ndohi tèlèba man ta rkaʼa, ta shida na gèɗ a Zhiklè.

Attualmente Selezionati:

Luc 18: MOF89

Evidenziazioni

Copia