Luc 15

Ngèlègèɗ-ma a géɗ tambak man a ze na

(Mt. 18,10-14)

1Ndohi ncèkèlè skwai, a ndohi malihai tèlèba ta herda na va, aman ta tsena ma nengaʼa. 2A ndohi pharisie, a malamhai, ta gu ndav, a ta gaɗa: Nengaʼa a ndi skwi nʼndai a nda ndohi malihai.

3A Yèsu a ngaɗa ta a ngèlègèɗ-ma haha: 4Te ndev kinè, ndo man a ngots tambakhi tèmèrè, staɗ te vaʼa a nze na; a njèke ta 99 ngiɗè tʼhèshèkèɗ, a woy tambak man a ze na, ha a nʼngotso, ɓi wa? 5Aman a ngotso, a feda a daʼai, a wuffè. 6Aman a shkè ngwai, a baha ta mandalahi nengaʼa, a nslamagihi nengaʼa, a gaɗa ta: Ngo-wuffokoya, i ngots tambak ga man a ze na, a deɓa.

7I gaɗa kinè. Lèmèlèmè ta wuffè te zhiklè te géɗèʼa, a géɗ ndo mali staɗ, man a ngwèdè ndav na, a fena ndohi 99, man ta gaɗa, nga ndohi nzuraʼa, a ta woya a ta ngwèdè ndav ta ɓai.

Ngèlègèɗ-ma a géɗ sulai man a ze na

8Ngwoz ngiɗè, man a ngots Suli nengaʼa 10, staɗ a nze na, a tiv vogwa azɓi ɗè, a pècè gai, a woyaʼa, ha a nʼngotso. 9Man a ngotso, a baha ta ngwoɗahi na, a nslamagihi na, a ngaɗa ta: Ngo-wuffokoya, i ngots Suli ga, man a ze na, a deɓa! 10I gaɗa kine: Lèmèlèmè golahi Zhiklè ta wuffè a géɗ ndo mali staɗ, man a ngwèdè ndav na.

Ngèlègèɗ-ma kra nguraʼa man a ze na

11Ndo ngiɗè a nʼngots wud ngurhi cèw. 12Ntabawaʼa a ngaɗa na bab na: Bab ga, kezla nga skwi nʼndi gi nga! A bab ta a nkezla ta skwi ta. 13Te deɓa kètè ntabawaʼa a mɓica skwi na tèlèba, a mdo a kokwar ngiɗè dra, a ngu falai, a nʼndeva skwi na tèlèba. 14Aman a nʼndeda skwi nengaʼa a ma, mi a ngu a kokwar matsa, a mi a nʼnga na nengaʼa ba. 15A ndzodzor ndo ngiɗè te kokwar, a nengaʼa a nzlinda a dak, aman a ɓir wodalahai. 16A woya a ndhè hwaɗ na a skwi nʼndi wodalahai. Aman ndohi ta va na ɓai. 17Te deɓaʼa a nhuro, a ngaɗa: Bab ga a nʼngots ndohi mizlinè, tèlèba a ta ngots skwi nʼndi dav-davaʼa, aman iyè i tiɗ ga a mai. 18I woya man i slèmbèɗè, a i dè a sam bab ga, a i gaɗa na: Bab ga, i gu malai a sam Zhiklè, a sam ngaya. 19Anai ka bahayè kra ngaya ɓai! Giyè a ndo mizlinè ngaya! 20A nslambaɗa, a mdo a sam bab na. Aman dra dai, bab nengaʼa a nrkaʼa, a nsu te va, a nha na ma, a nkelawa na ri a daʼai, a mbidèʼa. 21A kra nengaʼa a ngaɗa na: Bab ga, i gu malai a sam Zhiklè, a sam ngaya. Ani haha ka bahayè kra ngaya ɓai! 22Aman bab nengaʼa a ngaɗa ta ɓèlèlihi nengaʼa: Va-ckoɗi maslaka mbelaʼa, va-va na a va. Va-va na tèslri a rai, a kin pa na kotokoroh a sak! 23Va-ckoɗi kra-zlè ngraʼa, va-keɗaʼa, ngo-ndokoya, ngo-wuffokoya! 24Kra ga haha, ara man a mets na ma, a nʼngots nshèffè a deɓa. A nze na ma, a i ngotso. A ta hüno a ta wuffè.

25Aman tsuvomaʼa nte dak. Ndul ndul a ndikkaɗa ngwai, a ntsena nhèzlè-wè ngolala. 26A mbaha na staɗ te va ɓèlèlihi na, a ndzhoɗo: Ta gi haha mè? 27A nengaʼa a ngaɗa na: Kramam ngaya a mshkè ngwai. A bab ngaya a nkeda kra-zlè ngraʼa, te man a ngotso a deɓa, skwa a dza na azɓai. 28A kramam nengaʼa a ngu ndav, a woya a ndè a sama ɓai. A bab nengaʼa a ndo a sam na, a ntsa na rai. 29A nengaʼa a mʼmbeɗa na a ma bab na: Na haha, mvi kumba i gu mizlinè ngaya, i fu gèɗ a ma ngaya pèc pècèk, a ka vay ɓok ɓai, ko staɗ ba, aman i wuffè a nda mandalahi ga. 30Aman antanta kra ngaya a mshkè a deɓa, a nʼndeva skwi na tèlèba a falai, ka keɗa na kra-zlè ngraʼa. 31Aman bab na a ngaɗa na: Kra ga, ka zhè a sam ga pèc pècèk. Skwi ga, skwi ngaya. 32Sèi nga wuffè, a nga gi langlangaʼa, aman kramam ngaya haha ara man a mets na ma, a nʼngots nshèffè a deɓa. A nze na ma, a ta ngots a deɓa.

Attualmente Selezionati:

Luc 15: MOF89

Evidenziazioni

Copia