Luc 14

Yèsu a mbela ndo man goɗa tʼhwaɗ

1Te deɓ nasa, a pats nshèk va, a ndo a gi bi ndohi pharisie ngiɗè, aman a ndi skwi te pa. A ta pu diaʼa. 2A ndo ngiɗè a zhè a sam na, goɗa tʼhwaɗ. 3A Yèsu a hüno man a ngaɗa ta ndohi njèngè ma kita a ndohi pharisie: Amba, aman nga mbél ndo a pats nshèk va dè, ambaɓi dè? 4A ta nza tètè. A Yèsu a ngso riaʼa, a mʼmbelaʼa, a mpraʼa. 5A ngaɗa ta: Te ndev kinè, man kra na, man zlè na, nkala a thal iyam, ko a pats nshèk va a ckoɗauda tsam tsam azɓi wa? 6A ta slaha ta mbeɗa na a ma ɓai.

Ma nfi ndohi a gai

7A ngaɗa ta ndohi man ta baha ta a sam skwi nʼndai, a ngèlègèɗ-ma (te man a rka, ta woya sam nʼnzi mbelaʼa), a ngaɗa ta: 8Aman ta baha ka a sam ngolala nfi ngwoz a gai, ko do a ka nza a sam mbelaʼa ɓai. 9Aman ndo mbiaʼa, man a baha kin cèw a sam ngolala, a gaɗa ka: Va-na sam nʼnzi a ndo sa! – ka dè a sam nʼnzi te deɓaʼa a hori a dai. 10Aman ta baha ka a sam ngolala, ka dè, a ka nzi a sam nʼnzi te deɓa. Aman a shkè, a baha ka, a gaɗa ka: Mandal ga, washkè, a ka nza a ma! Ka ngots nʼnjèlè a sam di ndohi tèlèba, man kinè a sam skwi nʼndi a nda tengaʼa. 11Aman ko wawa man a grè gèɗ na a ri na, ta manda na gèɗ a hai. Ko wawa man a manda gèɗ na a hi a ri na, ta da slambaɗda na gèɗ na.

12A ngaɗa na ndo man a baha na a skwi nʼndai: Aman ka ti skwi nʼndai a géɗ pats, a skwi nʼndi dakwaɗ, ka baha ta mandalahi ngaya ɓai, kramamhi ngaya ɓai, gwoli ngaya ɓai, ndohi mèshèlè a ntamagi ngaya ɓai. Te man tengaʼa ta baha ka zaʼa, a ta pela ka skwi ngaya a vna sa. 13Aman ka ti skwi nʼndai, baha ta ndohi ntawassaʼa, ndohi vedal, ndohi man wuɗi ta azɓai, ndohi mandazlai. 14A mwuffè a zhe a sam ngaya, aman ta ngatsa skwi man ta pela ka a vna ɓai. Zhiklè a da pela ka, a pats man ndohi nzuraʼa ta slambaɗkaɗauda te mʼmetsai.

Ngèlègèɗ-ma a géɗ skwi nʼndi ngolala mbiaʼa

15Aman ndo ngiɗè man ta nza a sam skwi nʼndi a vna, a ntsena ma haha, a ngaɗa na: Mwuffè a sam ndo man a ndi movar te kokwar Bi Zhiklè! 16Aman Yèsu a ngaɗa na: Ndo ngiɗè a zhè, a ntu skwi nʼndi ngolala nengaʼa mbiaʼa, a mbaha ta ndohi kumba. 17Aman nta ma, a nzlinde ta ɓèlèlihi nengaʼa, aman ta gaɗa ta ndohi man a baha ta: Vo-washkè, skwi tèlè ntila ma! 18A ta hüno a ta ngreda ta, staɗ staɗ tèlèba: Nshèlèkuraʼa a ngaɗa: I sum gi dau, anai sèi i da zeɓiaʼa. Ria azbai! 19Ngidè a ngaɗa: I sum zlèhi kula, sèi i dè wèrèʼa. Ria azɓai. 20Mamakaraʼa a ngaɗa: I co ngwoz, i slaha i dè azɓai. 21A ɓèl ndo matsa a mshkè, a mʼmenda na tèlèba a bi nengaʼa. A bi a ngu ndav, a ngaɗa na ɓèl nengaʼa: Do a civèɗ tsam tsam, do a gaba kokwar, a ka helka ta ndohi ntawassaʼa, ndohi vedal, a ndohi man wuɗi ta azɓai, a ndohi mandazlai. 22A ɓèl nengaʼa a ngaɗa: Bai, nga gu arsa, aman sam nʼnzi a zhè genè. 23A bai a ngaɗa na ɓèl nengaʼa: Vo-do a civèɗ, a dal kokwar, va-tétika ta, aman ta shkè, a gi ga a ndhè. 24Aman i gaɗa kinè, to va ndohi man i baha ta nshèlèkuraʼa, ko staɗ a tèr skwi nʼndi ga azɓai.

Skwi man Yèsu a jhèɗè a sam golahi nengaʼa

25A ndohi rèdèdèʼa ta dzodzora, a nengaʼa a nʼngwoda ta ma, a ngaɗa ta:

26Ndo man a shkè a sam ga, a ngwoda na deɓa a bab na, a mam na, a ngwoz na, a wudahi na, a kramamhi na, a demamhi na, a nshèffè nengaʼa tèlèba, azɓai, a slaha man a ngi a gol ga ɓai. 27A ndo man a zhüɓ wof ngézlèl na azɓai, a dzadzar-kayè, a slaha a ngi a gol ga ɓai. 28Te ndev kinè, ndo man a woya a nrèm gi mbiaʼa: a nʼnzi a hi nshèlèkuraʼa azɓi wa, a hér ganiaʼa a skwi tèlèba man a gi gi a vna. 29Man ɓai a hinè verziaʼa, a slaha a nrufa gi bai, tèlèba man ta rkaʼa, ta da ngwossaha, a ta gaɗa: 30Ndo haha a hüno nrèm gai, a slaha man a nrufa ɓai.

31Te ndev bihi man a gi var a bi ngiɗè: a nzi a hi nshèlèkuraʼa azɓi wa, a nhérèʼa: nga ndohi 10.000, nga slaha nga gi var a ndohi 20.000 dè? 32Aman a rka, a slaha ɓai, a zlinde ta ndohi sak na, aman ta mèndè gumi a hai.

33Gar haha kinè lèmèlèmè: ndo man a kwèl skwi nengaʼa tèlèba azɓai, a slaha a ngi a gol ga ɓai.

Boma man a vre ɓai

(Mt. 5,13; Marc 9,50)

34Boma skwi man amba. Aman boma a jén ɓai wurzk-wurzkaʼa, ta da vrè a mè? 35Ko ta pa na a va herkeda ba, ko ta pa na a va ndaderɗa ba, ambaɓi genè, a ta wushedaussa. Ndo man zlembaɗ na a zhè, da tsenaʼa!

Attualmente Selezionati:

Luc 14: MOF89

Evidenziazioni

Copia