Popodalaina 6
6
Na Popogoso Kolo Lavata
1Ego totonai qai popodalai soku tu lalaodia pa peso sira na tinoni ko qai vaporeria na tudia rereko, 2sa ira na marene tuni Tamasa sa qai batiria qai babata jonga sira na tudia rereko na tinoni, ko qai viledia ko qai tekuni maqotadi sa na tudia rereko na tinoni. 3Poni pira sau si Iahova, <<Na Gagalaqu ara sa minake togasa jola tana tinoni ura na masa gu sisa. Ko na ona rane susuvere sa mina kamua kai gogoto rabeteputa aoro gu,>> sau.
4Ego ira na bubutu tinoni Nepilimi sa qai korapa suvere pa peso pa totoso ira beto vei tugu pa liguna lame totonai ira na marene tuni Tamasa qai tomeria sa na tudia rereko na tinoni beto ko qai vaporeniria na koburu. Ira sira na varene pa moa, na tinoni pore isongodi.
5Ego sa doria i Iahova sa lavata sa na toa lululasana tana tinoni pa peso beto ko doru kobu rorove pa bulona sa na gagale ikerena gu doruna rane. 6Ko sa roqu takulangania i Iahova sa vei isa sa roitinia sa na tinoni pa peso ko sa vitigia tu na bulona. 7Ko pira sau si Iahova, <<Mana tavusu palenia ara pa narena na peso sa na tinoni isa qa vapodakia, podalai tugu tana tinoni ko kamua tadira na mamanugu mamade nenedi beto ira na mamanugu qai gavere pa peso beto ira na mamanugu tatava pa vavagalo eqa, ura qa roqu takulangania ara sa vei qa roitiniria ara sira,>> sau 8Ba i Noa sa sa doro tavaraguania i Iahova.
9Alepi sa na vavakatona i Noa.
I Noa sa kai tinoni tuvisina, kepore sa kai opopu bi tajutunia tadira na sasae tinoni sa suvere tavitiria, beto ko i Noa sa sa rerege tavitia na Tamasa. 10Ego ko sa vaporeria i Noa sa ka ue tuna marene: i Semu, i Gami beto i Japeti.
11Ego na peso sa sa lulasa pa dodogoro tana Tamasa beto sa pugelia na toa vavaikana. 12Na Tamasa sa doria na peso sa lulasa betona tu, ura doru masa toadi sa lulasa betona sa na dia uana pa peso. 13Ko pira saunia Tamasa si Noa, Mana vamanyao beto paleniria ara sa doru masa toadi, ura sa pugele taria na peso sa na dia toa vavaikana ira ko kopira mana piara pale ara sa na peso, sau. 14Ko mu roitinia kai aka pa gou tiki, mu vakoleniria na lose pa leona beto mu pokonia na tita pa leona beto peguruna. 15Pira muna roiti veinia sisa: Na aka sa mina kue gogoto kobu lima na kakasana, lima ngavulu kobu lima na revatana beto uengavulu kobu lima na ululuna.
16Muna roitinia na isuna sa na aka ko na saena sa mina kobu lima koko pa paparana na tinina na vaka. Beto muna vakolenia kai atakamana pa leona na vaka beto muna roitiniria sa ka ue sape susuverena, pa kauruna, pa kokorapana beto pa narena. 17Ara kopira mana vagore tarinia na popogoso kolo ara sa na peso ko mina piararia sa doru masa toadi qai singonia na toa pa kauruna na oka, dodoru vinapodaka pa peso sa mai manyao beto. 18Ba ara sa mana vatoqoa na qua vinaego tamu ko ao sa muna tome pa aka, ao beto vei tugu ira na tumu marene, na maqotamu beto ira ka ue maqotadi ira na tumu marene. 19Beto muna toni tomeniria pa leo aka sa okokoto karu pa doru minete mamanugu toadi, na marene na rereko, ko muna vatoa vasareria. 20Ira okokoto karu pa kai minete mamanugu tatava, pa kai minete mamanugu mamade nenedi, beto doru kai minete mamanugu qai gavere pa peso sa mai tome lame tamu ko mai toa. 21Beto ao sa muna tekuria sa doru kai gagani qai boka tagani ko muna vatana vaikamuniria ko isa sa mina tetekuna tamu beto tadira, saunia.
22Ko i Noa sa roitiniria tugu sa doruna vei puputa sa garununia na Tamasa.
Attualmente Selezionati:
Popodalaina 6: LGA
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2024, Islands Bible Ministries. All rights reserved.
