Popodalaina 7
7
I Noa beto Nona Tatamana Qai Tome pa Aka
1Ego pira saunia i Iahova si Noa, <<Mu tome lao pa leo aka, ao beto na mua tatamana doruna, ura ao gu sa qa batia ara na tinoni tuvisimu pa sasae tinoni alepi. 2Pana doru kai okokoto mamanugu mamade nenena liosona mu tekua karu minete vitu, na marene beto na kalena rereko, beto pa doru kai okokoto mamanugu mamade nenena nake liosona mu tekua karu, na marene beto na kalena rereko, 3beto vei tugu pa doru kai okokoto manugu tatatava pa vavagalo eqa mu tekua karu minete vitu, okokoto kai marene na rereko, ko mai aru jokelia na kikona na toa pa arena doru eqa pa peso. 4Ka vitu rane gu sa kole beto ara mana vagoreni okoro ara sa pa peso pa leona ka made ngavuluputa rane beto ka made ngavuluputa bongi, ko mana tavusu paleria ara pa arena na peso sa doru sakasava toadi qa roitiniria,>> saunia.
5Ko i Noa sa roitiniria sa doruna vei sa garununia i Iahova.
6Ego i Noa sa ka vonomo gogoto aorona sa totonai sa gorea na popogoso kolo sa na peso. 7Ko i Noa, ira na tuna marene, na maqotana beto ka ue roana sa qai lao tome pa aka ko qai ukunia sa na popogoso kolo. 8Pana mamanugu mamade nenedi liosodi beto pa mamanugu mamade nenedi nake liosodi, beto pa mamanugu tatava beto pa doru mamanugu qai gavere pa are peso 9sa qai okokoto kakaru, kai marene beto kai rereko, sa qai tome tutia i Noa pa aka tutia tugu isa vei na Tamasa sa garununia i Noa. 10Ego ko sa jola gu ka vitu rane poni sa sa gorea na popogoso kolo sa na peso.
11Ego ko pa vinavonomo gogoto aorona na toa tai Noa, ko na vinarua popu ko vinamanoga vitu rane pa popu isa na rane isa sa doru vuvuguna na kuta kolo lilisina sa qai pujaka pisiri votu beto na toba pie pa oka sa qai taporaka. 12Ko na okoro sa gorea sa na peso pa ka made ngavuluputa rane beto ka made ngavuluputa bongi.
13Na vavagila ranena tugu isa sa sa tomea i Noa sa na aka beto vei tugu ira na tuna marene, i Semu, i Gami, beto i Japeti, na maqotana beto ira ka ue roana rereko. 14Qai toni tome tavitiniria tugu vei sa doru okokoto mamanugu mamade nene pirudi, doru okokoto mamanugu mamade nene papausu, doru okokoto mamanugu gagavere pa peso, doru okokoto mamanugu tatava, beto doru manugu pore babanadi. 15Ko qai lame tai Noa ko qai lao tome pa aka sa doru mamanugu toadi vaikaledi qai singonia na toa. 16Ira na mamanugu mamade nenedi qai tome lao sa na marene na rereko pa doru mamanugu isa tugu vei sa garununia i Noa na Tamasa. Beto sa sa patei taria i Iahova si Noa.
17Ego ko ka made ngavuluputa rane sa sa iolo vaituti pa are peso sa na popogoso kolo ko totonai sa mota na kolo poni sa ovulia ko sa vaiolia pa arena na peso sa na aka. 18Ego ko sa vaituti neqi na ovuluna sa na kolo ko sa pugele vadururia sa na are peso ko na aka sa alea na vulitina na kolo. 19Ko na vaituti neqina na ovuluna na kolo pa are peso sa lavata vaivagabara ko sa amuria sa doru kubo ululudi pa kauruna na oka doruna. 20Na iolo saena na ovuluna kolo sa papada manogalima kobu lima sa amuria sa na batudi na kubo. 21Ko doru masa toadi qai gaveria na peso sa qai manyao beto- na mamanugu tatatava, mamanugu papausu, na mamanugu pirudi beto doruna na mamanugu qai miminetia na are peso, beto ko doru na tinoni. 22Doruna qai singonia na toa pa ia pidilina sa qai mate. 23Ko sa tavusu paleria i Iahova sa doru sakasa toadi qai kole pa are peso, na tinoni, na mamanugu mamade nenedi, na mamanugu gavere beto na mamanugu tatava pa vavagalo eqa, ko qai tatavusu pale pa peso sa aipira. I Noa gu mekana beto ira qai koi tavitia pa aka sa qai tavasare.
24Ko na vaituti neqina na ovuluna na kolo pa are peso sa sa sake tatana gore kai gogoto lima ngavuluputa rane.
Attualmente Selezionati:
Popodalaina 7: LGA
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2024, Islands Bible Ministries. All rights reserved.
