Popodalaina 23
23
Na Mate Ti Sera
1Ego na kakasana na toa tai Sera sa sa kamua kai gogoto rabete vitu aorona. 2Beto sa mate sisa pa Kiriati Aba (isa pa Heboroni) pa ia pa Kenani, ko i Ebarahami sa takulanga ko sa lao lukania si Sera.
3Beto poni sa sa turu loai na kokobu tinina na maqotana si Ebarahami ko sa parangaria sira na tinoni Hitai, Pira sau, 4<<Na tinoni karovoqu ko na tinoni kamu suverequ gu tamugou sara. Ko bu vanisiu tu kai ia vavaigolomona tamugou ko ma golomo vapaea na maqotaqu,>> sauniria.
5Poini qai oea ira tinoni Hitai si Ebarahami, pira qarigu, 6<<Iviva, Mu nongorogei agei. Na tuni bangara tuti Tamasa qu suvere pa vaikorapaimei agei sao. Mu vilea kai bevi vavaguana jola qu batia pa doru bevi tamigei inara ko ketakoi mu vapaea sa na maqotamu. Kepore kame agei mina rutinigo ketakoi muna vakolenia na maqotamu ao,>> qarigunia.
7Poni sa turu si Ebarahami beto sa titi opo gore pa moedi ira na tinoni poredia ia, na bubutu tinoni Hitai. 8Beto pira sauniria, <<Vei muna vajonganai agou ko mana vapaea na maqotaqu sa, mu nongorosiu ko mu paranga vanisiu si Eporoni na tuna marene i Zoha 9ko bi vavai lamenia taqu sa na bevi tana pa Makapela pa uquna nona ia. Mu nanasia ko na vai okotona na bevi sa bi vavai lamenia taqu ko isa sa bi juki ia vavaigolomona taqu pa ia tamugou,>> sau sisa.
10Ego i Eporoni na tinoni Hitai sa korapa tugu toqona pa vaikorapaidi ira na tinoni Hitai ko sa oea gu i Eporoni si Ebarahami pa talingidi ira doru tinoni Hitai qai kamu pa vavaikamuna pa totomena na gusu lavata isa, pira sau, 11<<Dai, iviva, Mu nongorosiu; Qa vanigo ao sa na kobu ia ko na bevi sa kole pa leona na ia isa sa qa vanigo tugu. Pa matadi ira na qua tinoni qa vanigo ao sisa. Mu vapaea gu na maqotamu,>> saunia.
12Poni sa kai titi opo gore mutu si Ebarahami pa moedi ira na tinoni poredia ia 13beto sa pojania si Eporoni pa talingidi ira na tinoni poredia ia, pira sau, Mavo tu! <<Bu nongorosiu tu ara ao. Ara ma vainia na poata sa na kobu ia Ko ao mu teku vakarovia taqu sa na poata vaina na ia ko ma vapaea na magotaqu ketakoi,>> sau sisa.
14Sa oea i Eporoni si Ebarahami, pira saunia 15<<Iviva, mu nongorosiu. Na kobu peso sa ka made gogoto siliva na padana, ba pana tadagita karu sa kepore laona sina. Mu golomia gu na maqotamu ao,>> saunia.
16Poni sa vaegoa i Ebarahami si Eporoni ko sa pada vania i Eporoni sa na poata isa vei sa pojai pa talingidi ira tinoni Hitai: ka made gogoto siliva, tutia tugu na pada poata qai varoitia tonai.
17Ko na kobu ia ti Eporoni pa Makapela tata pa Mamiri- na kobu ia beto na bevi sa kole pa leona beto doru gogou pa leo volosona vailivutaina na kobu ia isa- doru isisongo aipira sa qai tavatoqo mauru vania, 18i Ebarahami pa matadi ira doru tinoni Hitai qai lame pa vavaikamuna pa totomena na gusu lavata. 19Beto pa liguna api sa vapaea i Ebarahami si Sera na maqotana pa bevi pa leona na kobu ia pa Makapela tata pa Mamiri (isa pa Heboroni) pa peso pa Kenani. 20Ko na kobu ia beto na bevi sa kole pa leona isa sa qai tavatoqo mauru vania i Ebarahami ko jukini ia vavaigolomona isa pa ia tadira na tinoni Hitai.
Attualmente Selezionati:
Popodalaina 23: LGA
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2024, Islands Bible Ministries. All rights reserved.
