Popodalaina 22
22
Na Tamasa sa podekia si Ebarahami
1Ego kai totoso pa liguna na sakasa aipira, sa na Tamasa sa podekia si Ebarahami, pira saunia, <<Ebarahami,>> sau.
Poni sa oe si Ebarahami, <<Api sara,>> sau.
2Poni sa paranga na Tamasa, pira sau, <<Mu tekua na tumu marene, isa kai memeka tumu marene qu roroqua i Aisake ko mu lao pa pikata ia pa Moraea. Mu vavakukuvunia ketakoi sisa pa kai kukubo isa mana ule vanigo ara,>> saunia.
3Ego sa turu na vuvugei jonga si Ebarahami ko sa vatanai sa nona dongiki beto sa toniria sa karu nona nabulu beto i Aisake na tuna marene. Sa ivala vatanai na iuku vavakukuvu beto sa paja ko sa riu sa pa ia sa ule vania na Tamasa. 4Na vinaue rane sa enga sae si Ebarahami sa batia sa na ia pa souna. 5Sa pojaniria sa karu nona nabulu, <<Mu suvere lani tavitiria na dongiki goto ara beto na koburu me gogojo sae paponi. Mene vatarasae beto mene mule lagere kamugou,>> sau.
6Ego ko sa tekuria i Ebarahami sa na iuku vavakukuvu ko sa vasugarania si Aisake na tuna marene goto mekana sa pogosia sa na iku beto na lida beto qai mekarai riu sira karu. 7Poni sa paranga lao tai Ebarahami na tamana si Aisake, pira sau, Tamaqu, sau. Sa oe si Ebarahami, Ai vei qugu tuqu? saunia.
Sa paranga si Aisake tai Ebarahami na tamana, pira sau, <<Tamaqu?>> sau, Sa oe si Ebarahami, <<Avei qugu tuqu?>> sau. Poni pira sau si Aisake, <<Na iku beto na iuku sa pira goto pai sa na tuni lami tana vavakukuvunia?>> saunia.
8Poni sa oe lao si Ebarahami, <<Na Tamasa tu mina doria mekana sa na tuni lami tana vavakukuvunia tuqu,>> saunia.
Beto qai mekarai riu sira karu.
9Totonai qai kamu pa ia na Tamasa sa ule vania poni, sa roitinia ketakoi sa kai ia vavakukuvuna si Ebarahami beto sa vamakele vatanaria sa na iuku. Beto ko sa piua si Aisake na tuna ko sa vakolea pa are iuku pa arena na ia vavakukuvuna. 10Ego beto sa kaqamania i Ebarahami sa na limana ko sa tekua sa na lida ko mi vamatea sa na tuna sau. 11Poni sa kuku koko vei pa noka tu sa na mateana tai Tamasa pira sau, Ebarahami! Ebarahami, saunia.
Sa oe sisa, Api sara, sau.
12Pira sau sa na mateana, <<Muke avangania na limamu ao sa na koburu>> ina beto <<muke roitinia kai sa tana. Ura kopira qa gigilai ara sa ao sa qu matagutunia na Tamasa beto quke aru mulenia pana taqu sa kai memeka tumu marene,>> sau sisa.
13Poni sa enga sau si Ebarahami sa batia sa kai rami sa marakapisi na keuna pa vaikamu gogou ikikete. Ko sa lao si Ebarahami ko sa tekua sa na rami beto ko sa vavakukuvunia beina na tuna. 14Ko sa vakukunia i Ebarahami I Iahova mina doria sa na ia isa. Ko kamu tugu pa rane pa ngeni alepi sa na paranga pira sasau, Pa kubo tai Iahova sa kode i Iahova mina doria, sau.
15Beto sa kuku ligua mule vinarua totoso na mateana tai Iahova koko pa noka si Ebarahami 16pira sau, <<Qa maulu mulenisiu mekaqu sara sau si Iahova ura qu roitinia ao sa na sakasava alepi ko quke aru mulenia ao sa kai memeka tumu marene, 17Ko Sosoto jola mana mana vatatalenigo ara sao beto mana vavovonua ara sa tutimu ao ko mai mota vei na seru pa nulu beto mai vei na nagasa pa poanana. Ira na tutimu ao sa mai teku isongia sira na gugugusu lalavata tadira na dia kana, 18beto pa tutimu ao sa mai tamana sa doru pupuku tinoni pa abana, ura qu vatabesiu ara sao,>> sau sisa.
19Beto poni sa gabala mule kamuria nona nabulu si Ebarahami ko qai mekarai rerege mule pa Biaseba ko sa suvere ketakoi sisa.
Ira Na Tuna Marene i Naho
20Pa liguna na sakasa aipira sa qai vavakato vania si Ebarahami pira qarigu, <<I Milika sa vapodo vania boko koburu marene si Naho na tasimu; 21I Uzu pa moa, beto i Buzu na tasina, i Kemuele (na tamana i Aramu), 22i Kesedi, i Hazo, i Pilidasi, i Jidilapi beto i Betueli,>> qarigunia. 23I Betueli qi vaporea si Ribeka. I Milika sa vapodo vania i Naho na tasina marene i Ebarahami sira ka vesu koburu marene aipira. 24Kai goto maqotana nisongona i Reuma ba qi pore tuna marene tugu; i Teba, i Qahami, i Tahasi beto i Maka.
Attualmente Selezionati:
Popodalaina 22: LGA
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2024, Islands Bible Ministries. All rights reserved.
