Luka 21
21
Maltǝm Kemʌn Nɔɔkʊlagɨɨ
(Mar 12:41-44)
1Kwama nɨ Yesu a gung dul gǝnɨ, nǝngɔ a kuwo nǝb shilogɔ tal kemʌn jinɔ lɛ a kʌshi yotǝm kemʌn a Kan Kwaamanɨ. 2Nǝngɔ a kuwo nɔɔkʊla nɨ n nǝ bʊnǝnɨ, a bɛ nǝn a gǝnɔ kemʌn sǝlǝnɔ yo ba tal pʌd gwamɨ. 3Nǝngɔ Yesu a sʊwa ji gɔ, “Bɨlǝngǝn mǝ sʊwa jen nɛɨ, nǝtǝm kemʌn nɔɔkʊla nǝ bʊnǝn nɨ a laa a tangǝnɨ. 4A jinɔ, ja nǝ a mʊgɔ nyatǝm jinɔ jǝ nǝngǝn a ladaɨ, a gǝnɔ a nǝ a mʊgɔ bʊnǝn gǝnɔ gǝm, a do jʊ nɨ gǝ nǝnɨ pʌd, nǝngɔ a talɨ.”
Yesu A Sʊwa Kʌbotǝm Nɨ Nya Kan Kwaamanɔ Lɛɨ
(Mat 24:1,2; Mar 13:1,2)
5Kaam bɛtɔ mɛlalɨ gǝnɔ jǝ sʊwa kɛl lɛ a dul Kan Kwaaman gɔ, tatǝn nɨ a bʊma nyɔ ja mɔ kan nɨ nǝnɨ jǝbɔ jʊ nɨ ja fɛka gǝn nǝnɨ. Nǝngɔ Yesu a sʊwa gɔ, 6“Jʊtǝb nɨ jǝ́ kuwo lɛ nyɨɨ, kumɔ bɛ lɛ wo wʊnɨ mɨ tɛl nɨ wo jǝ bǝla lɛ a dʌbʌl kǝgaɨ ja tʊngǝm bɨɨ.”
Nʊngtǝm Gaalantɨn
(Mat 24:3-14; Mar 13:3-13)
7Nǝngɔ ja bʌ gǝn gɔ, “Feyi, jʊ nɨ bwɨ fɨyang? N wɛ nǝ kuwo lɛɨ sǝ nǝ nyǝm kanjǝl nɨ bwɨ bwɨɨ?”
8Nǝngɔ Yesu a sʊwa ji gɔ, “Bɛ jǝ́ nyǝm ka kaa nǝl a swag jen. Nǝbɔ a lada na jǝ bɛ lɛ a mʊgɔ dun mɨɨ. Jǝ sʊwa lɛ gɔ nǝji ji nǝn mɨɨ, dɨltǝm yooligɔ a dwama! Ka jǝ́ bwang jim lɛ. 9Na jǝ́ nyʊwa kɛl tatǝm kun jǝbɔ kɨlantɨnɨ, ka jǝ́ nyʊwa lɛ taal. Kanjǝl nɨ tǝl bwɨ bwɨ dɨn. Dɨltǝmɔ mɨsɔ bɛ lɛ tʌgo a kang.”
10Nǝngɔ a ja kǝga nǝn kɛl gǝnɨ gɔ, “Bǝlǝntǝm jǝbɔ bǝlǝntǝm jǝ ta ta kun. Lɔ fɔlɔn jǝbɔ lɔ fɔlɔn jǝ ta ta kun. 11Jǝ maa maa bwɨlang mǝgatǝm tǝm, jǝbɔ jʊwan bwɨla, jǝbɔ tonʌn bɔɔla a daatɨnɔ gǝm nǝn dʌmʌn. Jǝ kuwo kuwo jǝ taal jǝbɔ kanjǝl laatǝm kang a dʌbʌl.
12“Sǝla kanjǝl nɨ a bwɨ gwam, jǝ taba jen taba, ja nǝ jen gaalan. Jǝ yɔ yɔ nǝn jen a kǝga kantɨn mɛlalɨ sǝ ja maa jem borang. Ja kubʌl jen a lɔsomi. Jǝ yɔ yɔ nǝn jen a kǝga fɔlɔlɔmɨ jǝbɔ kǝga nǝb dʊʊm a kɛl dun mɨ. 13A kwama gɔ jǝ́ yǝlam nǝb nǝtǝm nyiyo a daa ji woi. 14Ka jǝ́ do lɛ bʊʊlalɨ a nǝl jen jengɔ jǝ́ maa nyǝn jǝ́ kʌshi dul jenɔ lɛ dɨsɔ la kanjǝl nɨ a bwɨ nǝn jeni. 15Mǝ nǝ jen nǝ kɛlɔ jǝbɔ yʊlanɔ jǝ́ kʌshi dul jenɔ lɛ nǝnɨ, sǝ a yǝlam mɨ nǝ kii jenɔ nɨ wo nya gola tuwol jenɔ lɛɨ. 16Tɛtǝlam jenɔ, jǝbɔ kɛtǝlam jenɔ, jǝbɔ nanǝgam jenɔ, jǝbɔ fatǝlam jenɔ, jǝ miyo jen miyo, ja jʌbo kaamɨ jenɔ. 17Nǝbɔ kɔ jen kɔ a kɛl dun mɨ. 18N sʊwa jen win a mʊgɔ yitʌn dul jenɔ gǝm mɨsɔ lɛla lɛ. 19Na jǝ́ kʊ nǝlɨ, jǝ́ bʊʊ bʊʊ.
Yesu A Sʊwa Kʌbotǝm Nɨ Nya Urushalimagɔ Lɛɨ
(Mat 24:15-28; Mar 13:14-23)
20“Na jǝ́ kuwo kʌm sʊwajaamɔ a kang Urushalimagɨɨ, bɛ jǝ́ nyǝm mɨsɔ kʊta lɛ, kʌbotǝm gǝnɔ a dwama. 21A kwama gɔ bɛ nǝb nɨ a Yahudiyaɨ, ja mwala ja gwi yem. Bɛ nǝb nɨ a mʊgɔ tuulɔɨ ja jelʌm. Nǝb nɨ a kuuli, ka ja dɔ lɛ tuulɔngɔ. 22Kɔkɔ mwɛl Urushalimagɨɨ a bɛ, wʊnɨ a yii kanjǝlɔ gwam nǝbkuwotǝmkǝgagɔ a mʊlaɨ. 23Nɔɔtǝmɔ nǝn fʌli, jǝbɔ nɔɔtǝm nabwɛmɔ jǝ nɔɔ nɔɔ gaalan a tǝm Israila. Na nabwɨl Kwaamaɨ a gǝla a dul nǝbɨɨ, jǝ nyʊwa nyʊwa gaalan. 24Jǝ jʌbo jʌbo kaam nǝbɔ nǝn gulʌn. Ja taba kaamɨ tag ja yɔ nǝn ji a jwaalɛn a tǝm Bʌtʌbi gwam. Bʌtʌbɔ fala fala Urushalimagɔ, a yɔ nǝn a kwama dɨltǝm Bʌtʌbi.
Bɛtǝm Bʊla Nǝlɨ
(Mat 24:29-31; Mar 13:24-27)
25“Jǝ́ kuwo kuwo jǝ nʊngtǝm a nu kwama, jǝbɔ bwaala, jǝbɔ nyanyamɨ. Nǝfitʌmɔ a yoolii nyʊwa nyʊwa taal mwɛ wɨma nɨ mʊla lɛ ji kʌbʌl lɛɨ. 26Nǝfitʌmɔ fʌm fʌm nǝn taal, jǝbɔ yalɨ kuli nǝn jʊtǝb nɨ bwɨ lɛ a yooligɔ gǝmɨ. Jǝ mǝg mǝg kanjǝl nɨ a dʌbʌl kwamaɨ. 27A kwama gɔ jǝ kuwo kuwo Bʊla Nǝlɨ bɛ lɛ a mʊgɔ lul, a mʊgɔ kwaan gǝn jǝbɔ gʌleng dʊʊlǝn gǝnɔ. 28Na kanjǝl nɨ a tǝl bwɨ lɛɨ, bɛ jǝ́ gung dul jenɔ, jǝ́ dʌng dʌbʌlɔ, jǝgtǝm jenɔ a dwama.”
Mɛlalɨ A Dul Tɨya Dʌfeng
(Mat 24:32-35; Mar 13:28-31)
29Nǝngɔ Yesu a sʊwa ji mʊsǝn kɛl nɨɨ gɔ, “Jǝ́ dʌng tɨya dʌfengɔ jǝbɔ tangǝn tɨyantɨnɔ. 30Na ja tǝl jǝ to langǝn fɨgɔ lɛɨ, jen nǝn kang jen jǝ́ kuwo, jǝ́ nyǝm shenagɔ a dwama. 31Gǝ na nyɔ na jǝ́ kuwo kanjǝl nɨ bwɨ lɛɨ, bɛ jǝ́ nyǝm fɔlɔn lɔ Kwaamaɨ a dwama.
32“N bɨlǝngkɛl mǝ sʊwa jen nɛɨ, nǝbɔ kal nɨɨ, mɨsɔ jǝ bʊla lɛ, na kanjǝl nɨ gwam a bwɨ bɨɨ. 33Dʌbʌlɔ jǝbɔ tǝmɔ dɨ dɨ. Kɛl mǝndɨ mɨsɔ dɨ lɛ wo.
Gʊtǝm Lɔl Jǝbɔ Yɨm Fɛkalɨ
34“Jǝ́ yɨ nǝn fɛkalɨ. Bɛ ka jǝ́ jǝla lɛ jatǝmɔ, jǝbɔ nɔɔtǝmɔ, jǝbɔ komʌn kanjǝl yooli nɨ a tangǝm nǝn jen a bwangtǝm mɨ, kage kɔkɔgɔ ba do jen nǝn dul 35maa na kwalɨ. Kɔkɔ nɨ bɛ bɛ a dul nǝb nɨ yǝm a yooli nɨ gwamɨ. 36Jǝ́ yɨ nǝn fɛkalɨ. Jǝ́ kela Kwaamagɔ lɛ kwangkwang, sǝ jǝ́ nya kwaan bʊʊtǝm a kanjǝl nɨ bwɨ lɛ a kǝgaɨ, sǝ jǝ́ tɨ nǝn fulotǝm nǝl a kǝga Bʊla Nǝlɨ.”
37Kum jǝbɔ kum Yesu gǝ maa mɛlalɨgɔ a Kan Kwaaman. Na nǝn kwaamɨ, gǝ jel jel a shu a tuli nɨ jǝ jo lɛ gɔ Yem Zaituni, sǝ ya daa wo.
38Nǝbɔ pʌd jǝ bɛ nǝn kumsʌl butʌb, sǝ ba ja nya gǝn a Kan Kwaaman, sǝ ja nyʊwa mɛlalɨ gǝnɔ.
Attualmente Selezionati:
Luka 21: DBD
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
©️2024 Luke Initiative for Scripture Translation
