Luka 20

Jǝ Nyǝma Fɔlɔn Yesui Lɛ

(Mat 21:23-27; Mar 11:27-33)

1Kaa di Yesu a dɔ Kan Kwaamanɔ, maa mɛlalɨ lɛ, kiyo fulon kɛl lǝmɨgɔ lɛ. Nǝngɔ dʊʊm nǝbkǝlamɔ jǝbɔ nǝb mɛlalɨ diilɔ dakini jǝbɔ nǝb dʊʊmɔ ja bɛ nǝn dɔɔm a daa gǝ woi, 2ja bʌ gǝn gɔ, “Sʊwa nǝn n fɔlɔn woi mʊ maa jǝ laatǝm kang nɨ lɛ nǝnɨ? Nuwo a nǝ ń fɔlɔn nɨɨ?”

3Yesu a jǝla ji gɔ, “Mǝ tǝmɨ mǝ bʌ jen kaa kɛl lɛ. Jǝ́ sʊwa ɨ, 4fɔlɔn yʊtǝm mwɛ sagsag Yohanaɨ a jel a daagɔ Kwaama woi ka? N daagɔ nǝfili woi ka?”

5Nǝngɔ jǝ sʊwaka lɛ a bʊtɔ ji daddad gɔ, “Na bǝ sʊwa bǝngɔ a jel a daa Kwaama woi, sʊwa sʊwa gɔ, ‘N wɛ a bwɨ jǝ́ nǝ bɔ bɨlǝngkɛl nǝn gɨɨ?’ 6Na bǝ sʊwa bǝngɔ a jel a daagɔ nǝfili woi, nǝb nɨ gwam mala bǝn mala nǝn tɛl sǝ ja jʌ bǝn, jʊ a bwɨɨ nǝbɔ gwam a jǝla gɔ Yohana n nǝkuwotǝmkǝga.” 7Nǝngɔ ja jǝla gɔ, “Nǝn nyǝm bɔ daagɔ a jelʌmi.”

8Nǝngɔ Yesu a sʊwa gɔ, “Mǝ tǝmɨ mɨsɔ mǝ sʊwa jen fɔlɔn nʊ nɨ lɛ mǝ maam kanjǝl nɨ lɛ nǝnɨ.”

Mʊsǝn Kɛl A Dul Nǝb Nɨ A Yo Twam Fogfogi Ywatǝmɨ

(Mat 21:33-46; Mar 12:1-12)

9Yesu a sʊwa kaa mʊsǝn kɛl gɔ, “Kaa nǝl wo wʊnɨ a kwal tɔtwam fogfogi gǝnɨ. Nǝngɔ a nǝ kaam nǝb gɔ ya ja jʊng lɛ. A shu a kaa tǝm ya yɨ wo a kʊtaɨ. 10Kwama kwasatǝm tʊʊl tɨyagɔ a laɨ, nǝngɔ a twam bwɛ jwaalɛ gǝnɔ win gɔ a yɔ a daagɔ nǝb nɨ a yo twam ywatǝmɨ sǝ ya yo gǝm a gǝnɔ tʊʊl tɨyagɔ. Nǝb nɨ a yo twam ywatǝmɨ a ta bwɛ jwaalɛ nɨ, ja bʊg gǝn, ja tʊng gǝn kangɔ kwakwa. 11Nǝngɔ a yǝla a twam kaa bwɛ jwaalɛ gǝnɔ tagɨ. Nǝb nɨ a bʊg gǝn, ja tuwola gǝn, ja ywa gǝn kangɔ kwakwa. 12A yǝla a twam bwɛ jwaalɛ na taalɔ. Gǝ tǝgǝn ja nyʊwa gǝm twɨla, ja mal gǝn a yooli.

13“Nǝngɔ nǝ tɔtwamɔ a bʌ dul gǝnɔ gɔ, ‘N wɛ mǝ maa lɛ kǝngkɨɨ? Mǝ twam bʊla mɨ nɨ mǝ swɨ lɛɨ, n nyǝm jǝ nǝ gǝn nǝ dʊʊn.’

14“Nǝb nɨ a yo twam ywatǝmɨ a kuwo gǝn bɛ lɛɨ, nǝngɔ ja sʊwaka a bʊtɔ ji gɔ, ‘Nǝ wɔɔtǝm kʊla twamɔ n wɔ, bǝ jʌm gǝn sǝ kʊlagɔ a yǝlam a bǝn.’ 15Nǝngɔ ja ma gǝn a gul kwalɨ tɔtwam, ya ja jʌ gǝnɨ.

“N wɛ jǝ́ kuwo lɛ nǝ twam nɨ maa lɛ nǝn nǝb nɨɨ? 16Bɛ ba jʌbom jʌbom nǝb nɨ a yo twam ywatǝmɨ sǝ a nǝ kaam nǝb twam ywatǝmɔ.”

Nǝbɔ a nyʊwa nyɨɨ, nǝngɔ ja sʊwa gɔ, “Bɛ Kwaama a shigʌm.”

17Yesu a dʌng jii, nǝngɔ a bʌ ji gɔ, “Wɛ kɛl Kwaamaɨ nɨ sʊwa lɛɨ?

“ ‘Tɛl nɨ nǝb mɔtǝm kanɔ a kɔɨ,

nǝn gɔ a yǝlam tɛl fʌlʌm kanɨ.’

18Na nʊ nɨ a yal a dʌbʌl tɛl nɨɨ, kǝlala nǝn fǝtǝlag nyɔ. Na tɛl nɨ a yal a dul gǝnɨ, kʊwa gǝn gǝ yǝlam mim.”

19Nǝb mɛlalɨ diilɔ jǝbɔ dʊʊm nǝbkǝlamɔ ja nyǝm Yesu a sʊwa mʊsǝn kɛl nɨ a dul jini, n jʊ a bwɨ jǝ swɨ lɛ ja ta Yesu tʌgo a kangɨ. Ja ta gǝn bɔ jʊ a bwɨɨ jǝ nyʊwa taal nǝbɨɨ lɛ.

Bʌtʌm Kɛl A Dul Ywatǝm Kemʌn Tǝm

(Mat 22:15-22; Mar 12:13-17)

20Nǝngɔ nǝb dʊʊm nɨ a saa gola ja sʌblo Yesu daddadɨ. Ja twam nǝb jatɔlɔ, ja nʊng dul jinɔ maamɔ jǝ nǝb dǝngdǝng. Ja twam ji sǝ ja shi Yesu gǝm kwalɨ nǝn bʌtʌm kɛl nɨ jǝ maa gǝm lɛɨ, sǝ ja yɔ nǝn gɔ a daa nǝb kwaan fɔlɔn gwamnagɨɨ. 21Nǝb jatɔl nɨ ja twamɨ, ja bʌ Yesu gɔ, “Nǝ mɛlalɨ, nǝ nyǝm kɛl mʊnɔ jǝbɔ mɛlalɨ mʊnɔ n bɨlǝngkɛl. Nǝ nyǝm ń bɔ nǝn swɨtǝm dul. Mʊ mɛla gola Kwaamaɨ lɛ a mʊgɔ bɨlǝngkɛl. 22N dǝngdǝng bǝ ywa Kaisar kemʌn tǝm ka? Ka bǝ ywa lɛ ka?”

23A nyǝm yʊlan jinɔ. Nǝngɔ a sʊwa ji gɔ, 24“Jǝ́ nʊng ɨ kemʌnɔ. N duuli woi jǝbɔ dun woi a bʊtɔ gǝnɔ gǝmɨ?” Ja jǝla gǝn gɔ, “Na a Kaisarɨ.”

25A sʊwa ji gɔ, “Jǝ́ nǝ Kaisar jʊ nɨ a yǝlam a Kaisarɨ. Jǝ́ nǝ Kwaama jʊ nɨ a yǝlam a Kwaamaɨ.”

26Ja nya bɔ jʊ nɨ jǝ tam gǝn nɛ nǝn a dul kɛl nɨ a sʊwa a kǝga nǝbɨɨ. Kɛl nɨ ga gar jimi, a yǝlam jim jǝ tatǝm kang a nyiyo. Ja gar bɔ kɛl.

Guntǝm A Bwaa Jǝbɔ Naakan

(Mat 22:23-33; Mar 12:18-27)

27Kaam nǝbɔ Sadukiyaɨ nɨ a sʊwa gɔ mɨ guntǝm wo a bwaaɨ, ja bɛ a daa Yesu woi nǝn bʌtʌm kɛl. 28Ja bʌ gǝn gɔ, “Feyi, Musa a mʊla nǝm gɔ, na kɨla nǝlɨ a bʊla a bǝla nwala gɔ mɨ nǝn bwɛɨ, bɛ kɨla gɔ a naa nɔɔlɨ gɔ sǝ a bʌ kɨla gɔ gǝm bɛtɨ. 29Kaam kɛb batǝn wo jǝ nʌbʌl. Bwɛ tɨkǝgagɔ a naa nɔɔlɨ, nǝngɔ a bʊlaɨ, a bʌ bɔ bwɛ. 30Bwɛ na yogɔ 31jǝbɔ bwɛ na taalɔ ja naa gǝn. Gwam jinɔ jǝ nʌbʌl nɨ ja naa gǝn, ja bʊlala, ja bʌ bɔ bwɛ. 32A gulɔ gǝm, nǝngɔ nɔɔlɨ nɨ a bʊlaɨ. 33Yǝlam nwala woi a kɔkɔ guntǝmɔ a bwaaɨ? N wɔ gwam jinɔ nʌbʌli ja naa gǝn wo.”

34Yesu a jǝla ji gɔ, “Nǝbɔ a kal nɨ kǝngkɨɨ naaka lɛ, jǝ nǝbka naakanɔ lɛ. 35Nǝb nɨ Kwaama a kuwo ja la nyɔ jǝ la jol gɔ lɛ a guntǝm nǝn kʊlɨ a bwaaɨ, mɨ naakan wo. 36Mɨsɔ jǝ bʊla bwaa lɛ wo tag, jǝ dǝngdǝng jǝbɔ bɛtɔ twama Kwaamaɨ, n bɛtɔ lɔ Kwaamaɨ, kanga nɨ ja gun a bwaaɨ. 37A nǝtǝm fulon kɛl twɨtǝm kʊm tɨya, Musa a nʊng gɔ nǝb nɨ a bʊlaɨ, a gun, kanga nɨ Musa a jo Tɛlalɔ gɔ, ‘Kwaama Ibrahimi jǝbɔ Kwaama Ishakui jǝbɔ Kwaama Yakubui.’ 38Kwaama ke bɔ Kwaama nǝb nɨ a bʊla bʊlaɨ. N Kwaama nǝb nɨ nǝn kʊlɨɨ. A daa Kwaama woi nǝbam gǝnɔ a na nǝn kʊlɨ.”

39Tangǝn nǝb mɛlalɨ diilɔ a gar gǝm gɔ, “Nǝ mɛlalɨ, ń jǝla a bʊm.” 40Mɨ nʊ nɨ wo tag a nya kwaan nɨ bʌ gǝn kɛl lɛ tagɨ.

Bʌtʌm Kɛl A Dul Bʊla Daudaɨ

(Mat 22:41-46; Mar 12:35-37)

41Nǝngɔ Yesu a sʊwa ji gɔ, “Wɛ a bwɨ ja sʊwa gɔ Kiristi nǝn bʊla Daudaɨ? 42Dauda nǝn kang gǝn a sʊwa a langǝn bwangǝn Zaburaɨ gɔ,

“ ‘Tɛlalɔ a sʊwa Tɛlalɔ mɨ gɔ,

“Yɨ fɔ a kang jajǝng mɨ,

43ba la nǝn kwama nɨ mǝ dǝg

nǝb kiim mʊnɔ lɛ ja yǝlam,

daa fatǝm naa mʊnɨ.” ’

44Dauda a jo gǝn gɔ, ‘Tɛlalɔ.’ A maa nyǝn la a yǝlam bʊla gɔ tagɨ?”

Yesu A Jǝg Duul Nǝb Mɛlalɨ Diilɔ

(Mat 23:1-36; Mar 12:38-40)

45A sʊwa bɛtɔ mɛlalɨ gǝnɔ a kǝga nǝbɨɨ gwam gɔ, 46“Bɛ jǝ́ nyǝm nǝb mɛlalɨ diilɔ. Jǝ swɨ maltǝm bɛllɛ dʊʊntɨn sǝ ya ja bola lɛ nǝn. Jǝ swɨ lɛ ya ja yal ji lɛ a gamdʌbo. Jǝ swɨ lɛ ya ja yɨ lɛ a daa nyan a kantɨn mɛlalɨ jǝbɔ daa yɨm nyan a lɔ kangwaal. 47N nǝbɔ ja kʊla nɔɔtǝmkʊlabɨ lɛɨ. Jǝ maa keligɔ a som nyɔ sǝ nǝbɔ a sʊwa gɔ jǝ nǝb sagsag. N nǝbɔ jǝ mwɛ ji lɛ a bʊwa a shiloi.”

Attualmente Selezionati:

Luka 20: DBD

Evidenziazioni

Copia