Yohana 3

Nikodimu A Bɛ A Daagɔ Yesu Woi

1Kaa bwɛ Farisa wo, dunɔ nǝn Nikodimu. Gǝ na a mʊgɔ mʊrkalɨ nǝb dʊʊm Yahudawagɨɨ. 2Kaa kum a bɛ a daagɔ Yesu woi nǝn kum, nǝngɔ a sʊwa gǝn gɔ, “Feyi, nǝn nyǝm mʊ nǝ mɛlalɨ nɨ Kwaama twamɨ. Mɨ nǝn nʊ nɨ maa jǝ laatǝm kang nɨ mʊ maa lɛɨ, na Kwaama mɨ jǝbɔ gɨɨ.”

3Nǝngɔ Yesu a sʊwa gǝn gɔ, “N bɨlǝngkɛl mǝ sʊwa ń nɛɨ, mɨ nǝn nʊ nɨ kuwo fɔlɔn lɔ Kwaamaɨ lɛ, na ja yǝla bɔ ja bʌ gǝn tʌgoi.”

4Nǝngɔ Nikodimu a bʌ gǝn gɔ, “La jǝ yǝla jǝ bʌ nʊ nɨ a gʌloi nyǝn tag? Dɔ dɔ fʌl nyɨya gɨɨ, sǝla ja yǝla ja bʌ gǝn tʌgo ka?”

5Nǝngɔ Yesu a jǝla gǝn gɔ, “N bɨlǝngkɛl mǝ sʊwa ń nɛɨ, na ja bʌ bɔ nǝl a gola mwɛ jǝbɔ Yʊwa Kwaamaɨ, mɨsɔ dɔ fɔlɔn lɔ Kwaamaɨ lɛ. 6Jʊ nɨ nǝfili a bʌi, n bʊtɔ bǝn. Jʊ nɨ Yʊwa Kwaamaɨ a bʌi, n yʊwa. 7Bɛ ka ń ta lɛ kang a nyiyo mǝ sʊwa ń mǝʊ, ‘Mɨsɔ mʊ kuwo fɔlɔn lɔ Kwaamaɨ lɛɨ na ja yǝla bɔ ja bʌ ń tʌgoi.’ 8Yʊwagɔ gǝ fʌl gǝ yɔ a daa nɨ a swɨɨ, mʊ nyʊwa diil gǝnɔ lɛ, mʊ nyǝm bɔ daagɔ a jelʌmi jǝbɔ daagɔ yilom woi. A na nyɔ dangǝn jǝbɔ nʊ nɨ a nya bʌtʌm Yʊwa Kwaamaɨ.”

9Nǝngɔ Nikodimu a bʌ gɔ, “La jʊ nɨ bwɨ nyǝn?”

10Nǝngɔ Yesu a jǝla gǝn gɔ, “Mʊ gʌleng dʊʊ nǝ mɛlalɨ a mʊgɔ Israila, la mɔ nyǝm bɔ jʊ nɨ ka? 11N bɨlǝngkɛl mǝ sʊwa ń nɛɨ, nǝn sʊwa jʊ nǝn nyǝmɨ, nǝn nǝ nyiyo fulon jʊ nɨ nǝ kuwoi, mɨ nǝn nʊ nɨ a kʊm jen a jǝla nǝn kɛl nǝnɨ. 12Na n sʊwa jen kɛl tǝm nɨɨ jǝ́ jǝla bɔ nǝn, la jǝ́ jǝla nyǝn nǝn kɛl dʌbʌlɔ, na n sʊwa jeni? 13Mɨ nǝn nʊ nɨ wo gwi a yɔ a dʌbʌli, na ke bɔ Bʊla Nǝlɨ, wʊnɨ a gǝla a dʌbʌl a bɛɨ.

14“Kanga Musa a gungʌm sɔɔ maalʊ a swɛ a mʊgɔ kuuli, n kanga jǝ gungʌm Bʊla Nǝlɨ lɛɨ, 15sǝ nʊ nɨ a nǝ bɨlǝngkɛl a daa gǝ woi a nya kʊlɨ nɨ mɨ dɨtǝm woi.”

16Kwaama a swɨ yooli nɨ dangǝn, nǝngɔ a nǝ Bʊla gɔ nɨ win swarɨ, dɨsɔ na nʊ nɨ a nǝ bɨlǝngkɛl a daa gǝ woi, mɨsɔ bʊla lɛ, nya nya kʊlɨ nɨ mɨ dɨtǝm woi. 17Kwaama a twam bɔ Bʊla gɔ a yooli nɨ sǝ a mwatɨ yooli nɨ gǝm borang. A twam gǝn sǝ a bʊʊ nǝn yooligɔ a gola gǝn.

18“Nǝb nɨ a nǝ bɨlǝngkɛl a daagɔ Bwɛ woi, a nǝ ji bɔ bwɨlangkɛl. Nǝb nɨ a nǝ bɔ bɨlǝngkɛlɨ, a kwɛl a nǝ ji bwɨlangkɛl, jʊ a bwɨɨ ja nǝ bɔ bɨlǝngkɛl a dun Bʊla Kwaamaɨ nɨ wini. 19Jʊ wɔ a bwɨ Kwaama a maa jim borangɨ, nyalǝmɔ a bɛ a yooligɔ gǝm, nǝbɔ a swɨ duddugigɔ a laa nyalǝmɔ, jʊ a bwɨɨ maajɨ jinɔ na a bwɨla gwam. 20Nǝb nɨ gwam maa bwɨlang maajɨ lɛ a kɔ nyalǝmɨ, mɨsɔ jǝ bɛ lɛ a daagɔ nyalǝmɔ woi, kage ja nʊng maajɨ jinɔ nyangnyang. 21Nǝb nɨ maa jʊ nɨ lɛ dǝngdǝngɨ, jǝ bɛ lɛ a daagɔ nyalǝmɔ woi, sǝ nyalǝmɔ a nʊng maajɨ nɨ ja maaɨ ja bwangtǝn diil Kwaamaɨ.”

Kɛlɔ Yohana Nǝ Yʊtǝm Mwɛ Sagsagɔ A Sʊwa A Dul Yesui

22A gulɔ gǝmɨ, nǝngɔ Yesu jǝbɔ bɛtɔ mɛlalɨ gǝnɔ ja shu a Yahudiyaɨ. A yɨ bʊd a daagɔ jǝbɔ ji, yʊ nǝbɔ mwɛ sagsag lɛ. 23Yohana tǝgǝn yʊ nǝbɔ mwɛ sagsag lɛ a tuulɔ Ainon, wʊnɨ a kɔtʌgo a Salimaɨ. Jʊ a bwɨɨ mwɛmɔ a lada a daa gɔ. Nǝbɔ bɛ lɛ, yʊ ji mwɛ sagsagɔ lɛ. 24(Kwama jʊ nɨ a bwɨmɨ, na lǝga bɔ ja kubʌl Yohana a mʊgɔ lɔsomi.)

25Nǝngɔ bɛtɔ mɛlalɨ Yohanaɨ ja dɔ bǝngkatǝm kɛl jǝbɔ kaa bwɛ Yahudaɨ a dul jǝfʊlǝn saaltǝm bʊtɔ wʊnɨ gǝ dǝg nǝl lɛ a yǝlam sagsagɨ. 26Nǝngɔ ja yɔ a daagɔ Yohana woi, ya ja bʌ gǝn gɔ, “Nǝ mɛlalɨ, nʊ nɨ mɔ dakini jǝbɔ gɨɨ, a gwanga twal a tiyo Urduni, wʊnɨ mʊ sʊwa kɛl lɛ a dul gǝnɨ, n wɔ kǝngkɔ yʊ nǝbɔ mwɛ sagsag lɛ, nǝbɔ gwam yilo a daa gǝ woi.”

27Nǝngɔ Yohana a jǝla gɔ, “Mɨ nǝn nʊ nɨ nya jǝl lɛ, na ja nǝ gǝn bɔ a dʌbʌli. 28Jen jǝ́ nǝ nǝ nyiyo a dul mɨ, jengɔ n sʊwa mǝʊ, ‘Mǝ ke bɔ Kiristi. Mǝ ja twam ɨ sǝla a bɛ a gul mɨ.’ 29A kangwaal naakan, balɨgɔ nǝn gɔ a naa nɔɔlɨgɨɨ. Fwal balɨ nɨ a naa nɔɔlɨgɨɨ, gǝ yam kɛl nɨ jel lɛ a nyiyo balɨgɨɨ. Gǝ nyʊwa nyʊwa lǝma na a nyʊwa kɛl nɨ a jel a nyiyo balɨgɨɨ. N jʊ a bwɨ mǝ nǝn fulotǝm nǝlɨ. 30Nʊ nɨ nya nya sʊtǝm, mǝ tǝmɨ sǝ ya n nya shigtǝm lɛ.

Nʊ Nɨ A Bɛ A Dʌbʌli

31“Nʊ nɨ a bɛ a dʌbʌli a laa nǝbɔ gwam. Nʊ nɨ a jel a yooli nɨɨ, na a yooli nɨɨ, gǝ sʊwa kɛl gǝnɔ a kanjǝl yooli nɨ. Nʊ nɨ a jel a dʌbʌli a laa nǝbɔ gwam. 32Gǝ nǝ nyiyo a jʊ nɨ ga nyʊwaɨ jǝbɔ jʊ nɨ ga kuwoi sul, mɨ nǝn nʊ nɨ a jǝla nǝn kɛl gǝnɨ. 33Na nʊ nɨ a yo kɛl nɨɨ, a nʊng gɔ Kwaama n nǝ bɨlǝngkɛl. 34Nʊ nɨ Kwaama a twamɨ, gǝ sʊwa kɛl Kwaamaɨ, jʊ a bwɨɨ nǝn Kwaama a nǝ gǝn Yʊwa gǝnɔ mɨ dɨtǝm woi. 35Tɛ bwɛ swɨ Bʊla gɔ lɛ, a nǝ gǝn kanjǝlɔ gwam a mʊgɔ kang gǝn. 36Nʊ nɨ a nǝ bɨlǝngkɛl a daa Bʊla Kwaamaɨ woi, a nya kʊlɨ nɨ mɨ dɨtǝm woi. Nʊ nɨ a kɔ Bʊla Kwaamaɨ, mɨ nǝn kʊlɨ, nabwɨl Kwaamaɨ gǝ na a dul gǝn.”

Attualmente Selezionati:

Yohana 3: DBD

Evidenziazioni

Copia