Lukas 22

Woroge tut hamateyi Yesus

(Mat. 26:1-5; Mrk. 14:1-2; Yoh. 11:45-53)

1Laɗo Rayarame Kababa Aiha Wai Bibit roti ata Yahudi, pahangara ʄala Paskah#22.1 Paskah halinawe: Laɗo Rah Huuɗa ata Israel ɓa atad ta tana Mesir. Ta laɗo neɗo maɗaropoyi bebbe mono yaa waidi kababa aiha wai ragi. ɗaheɓenage rahge, 2raɗa kapala imam#22.2 Imam nyiꞌna ata kaledege Alla mono kaɗaꞌ ata. Kapirrana ha ullaɗahona imam katauna yii maaraka waina ranga hatuun mono hatomage habayangna tut ata waɗeka. mono raɗa gurr agama ata Yahudi tangrana mayegana lara tannam kahamate miꞌhay Yesus, tabolo wale ɗapikuꞌman oro ɓaɗa madautad ata buta.

Yudas kalekani Yesus

(Mat. 26:14-16; Mrk. 14:10-11)

3Maɓeggei kabalka natamani Yudas kangara ʄalana Iskariot, wu ata walta bul ɗuɗa ana hakodo halolenai Yesus. 4Ɓegge kakonage Yudas mono naworo ɗangadi raɗa kapala imam mono kapala kaʄawawe Ummai Mori tut aganaɗawe ɓana harakani Yesus tabaraɗa. 5Yiɗɗa dahhahingwe ateɗa, mono ɗajajge yiin amaha tabarana. 6Yudas nangooge ɓayiin amaha. Nyi namayegana mahiggo aiha tada waiɗa ata buta tannam kag harakani Yesus tabaraɗa, ɓalina.

Ha inyaka tut yaa Paskah

(Mat. 26:17-25; Mrk. 14:12-21; Yoh. 13:21-30)

7Ɗikge rahge Laɗo Rayarame Kababa Aiha Wai Bibit roti ata Yahudi, ta laɗo nna yiɗɗa ɗaropoyi bebbe tut hayaa Paskah. 8Nyiwe Yesus nahalewai Petrus monoi Yohanis, malinage, “Kakomge ha inyakawe hayaa Paskah tutda yitta.”

9Yiɗɗa ɗakanukawe, “Giige Ama habaim ɓama ha inyakawe?”

10Balehanai Yesus, “Mi ɓam tamam ta kota, mi enga taɓokamin wu kaɓaani katangrana ngid yaro wee kapang weena. Kam ɗokuni ta umma hindau tamana. 11Mono kam taknagela naɗa mor umma: linagei Gurr, ‘Gikaꞌge hadau tanga-Gu mono ana hakodo halole-Gu ɓama yaa hayaa Paska?’ 12Naɗa mor umma enga nahatingomige wu koro kamadakka, namaganna kahaɓeyi hatauwai. Kam ha inyakahai neɗo bal.”

13Nyiwe kakoɗage Petrus monoi Yohanis, yiɗɗa ɗa etayi tangngad ɗaad tuɓawe nahataknai Yesus. Maɗa ha inyakayi hayaa Paskah neɗo.

Hadidarawe hakulla gaꞌ kateingna

(Mat. 26:26-30; Mrk. 14:22-26; 1Kor. 11:23-25)

14Kole ɓaɗikge rah yaa hayaa Paskage, Yesus nangoɗo ɗanganadi ana hakodo-halole-Na ta hadau hakulla paha inyakaɓeɗa. 15Lohho linadi tabaraɗa, “Nauwag kamaꞌtakage yaa hayaa Paska ole ɗangagim toma aig mayilla-Wa! 16Lugɗage tabarami: Nauwa waleg hil yaaꞌmad raɗelage kahha ngihge hakulla kateingna ɓahaɗedalage ta rahge Alla ɓanaɓe hareha ɗaꞌ Raja ta pan-tana.”

17Ɓe neꞌgei Yesus nakeketayi koɓa kangihna wee anggur, manahabayang wai linage tabaranai Alla, malinage, “Ngalawe nne, mono kam ɓawewe ta jongam; 18lugɗage tabarami: wal nna ɓatauge Nauwa enga waleg hil enuꞌmage nne wee anggur, kahhay Alla ɓana hakakowe hareha ɗaꞌ Rajana ta pan-tana.”

19Ɓe neꞌgei Yesus nangalai kababa, manahabayang wai linage tabaranai Alla. Nyi nahiɓi-hiɓiyi waid limma-Na mono nayiid tabaraɗa, malinad, “Nne nyiwe tauwu-Gu [hayii tutumi. Rayigelage kam apewai-Ga.” 20Tauɗa ʄalage ɓaɗa ɓe hayaa mana ngalaliy koɓa kapang wee anggurna mana yiiy tabaraɗa mono nahanewe, “Naɗe koɓa wee anggur nyiꞌna hakira-jajnai Alla kaberu, pahamado waige raa-Gu, raa kamajoku tutum.”]

21“Tabolo rangewela! Ata kakaleka-Ga ɗaan nehe ole-Ga! 22Ana-Na Kaɗaꞌ Ata namateɗaho ɗoukge hapohtanai Alla, tanyiɗuwe lilokoɗaho ata kakaleka-Ni!”

23Nyiwe maɗa matutra wikna ɗiha-ɗiha, ɓa iyayi walta jongaɗa karayige nna katauɗana.

Pahibatana tutge ɓa iyayi kahadda madakka

24Ta jongaɗa ana hakodo halolenai Yesus natumwe pahibatana tutge ɓa iyayi walta jongaɗa kareih madakka. 25Yesus nahanewe tabaraɗa, “Raɗa raja bangsa aika tadai Alla ɗahamayillayi ana-harehaɗa, mono raɗa kanarona kawaha kapiꞌhayi ana-harehaɗa tanyiɗuwe ɗahangara wikɗa ‘kahamawodi.’ 26Tabolo mige ila tauɗamiǃ Ata kahadda madakka ta jongam, nyina ɗaꞌɗaho katauna kahadda marraha. Mono ka ɓaige naɗaꞌɗaho katuʄana kahaneitna. 27Ma iayi kareih madakka: ata kangoɗo yaa ta meja, waleka naɗe ata kahanetin? Ɓaɗoukage naɗe ata kangoɗo yaa ta meja. Tanyiɗuwe Nauwa ɗaaga ta jongam tuʄay kahaneitna.

28Ta ngaradukage mayilla-Gu, mi ɗaa hakitagim ole-Ga. 29Oro ɓatauɗage, Nauwa enga yiiguge kawaha tabaram tut hareha, kataunai Ama ɓana yiiwe tabara-Gu kawaha tut hareha. 30Nyiɓatauɗage mi enga yaa-enu ɗangaga Nauwa waina lagahara ɓaɗikge rahge ɓag ɗaꞌ Raja. Mono mi enga ngoɗom ta kabul ɗuɗa hadau ngoɗo raja tannam kaharehayi kabul ɗuɗa kaɓih Israel.”

Yesus natakwe, nim Petrus enga nakaɓallin

(Mat. 26:31-35; Mrk. 14:27-31; Yoh. 13:36-38)

31Maɓeggei Yesus linage tabarai Simon Petrus, “Simon, Simon, kamrangewe! Kabalka yiiɓen mahiggo kaɓagim kam hawattena wal tabara-Gu, katauna gandum pahawatte walta kaluppa tannam kadahha nahawattena wal aika dahha. 32Tabolo Nauwa habayangɓeg, Simon, tannam hatenam ilana takogowe. Mono ɓam hatena haggaɗuwu tabara-Gu, yaum hakulha ɗahoɗad ateɗa raɗa ole ata hatenam.”

33Nabalehawei Petrus, “Mori, nauwag auɗawa tama ta gall mono mate ole ɗanga-Gu!”

34Malinagei Yesus, “Hatenawela Petrus, aina kukhoy manu nehe laɗo, yau hadal wudaɓemuga ɓam kaɓall-Ga.”

Kaleku bak, kaleku magowo waleka kito

35Kole neꞌge linagei Yesus tabaraɗa, “Nuthona kole ɓag halewam aig pahaigim ngid kaleku bak, kaleku magowo mono kopa leɗu, aganaɗawe ɗaa kadaɓogim?”

Maliɗage ɓaɗa baleha, “Walaꞌma!”

36Malinagei Yesus, “Tabolo nna ɓatauge, iyayi kapang kaleku bakna, waleka kaleku magowo nangid ɗahoy. Mono iyayi ai kapang kitona, namalaja ɗahoge kalabbe madakkana kana hii kito. 37Lugɗage tabaramu, ɗaage mata Jurata Ɓiha kalinaɗana, ‘Nyi yapgaun wu ata japata,’#Yesaya 53ː12 naɗaꞌ ɗahowe ta tau-Gu. Agawe kamatulhaɓe lar ta Jurata Ɓiha tutu-Gu, ɗaꞌɓenage ɓatauge.”

38Maliɗage ana hakodo halole-Na, “Mori, torroy, raɗe ɗaadi ɗo gayi kito.”

Balehawei Yesus, “Tutɓewe, ilam hil takkayi raɗo!”

Yesus nahabayang ta analete Saitun

(Mat. 26:36-46; Mrk. 14:32-42)

39Yesus na ijakage kota mono nakako ta analete Saitun katauna kakaldamma, mono ana hakodo halole-Na ɗakako ɗanga ʄala-Ni. 40Kole ɓaɗa ɗik neɗo, Yesus nahanewe tabaraɗa, “Habayangna tannam kana kulhawe hatenam, ɓana kaɓagim kabalka.”

41Ma nakako marau hoꞌ wal tabaraɗa, ɓakatutkawe wu wat ɓa tukkuy marauge, manatakod kuddona mono habayangna. 42Naɗage, “Ama, ɓana moɗahewe, pahilpagage wal tabara-Gu mayilla hapaɗa ɗaho-Gu. Tabolo ilam ɗoukagage habai-Gu, tanyiɗuwe ɗoukge habaim Ama.” [43Wu malaikat namai tabara-Na mono nahakulha-Yi. 44Yesus namayilla hingwe atena ɗajalage mana kii-kii hakulhawe habayangna. Wee ɓutta-Na meranage raa kateheka ta tana.]

45Ɓewe habayang, Yesus hagganage ta ana hakodo halole-Na. Naɗikkidi ɓatangra duraɗa oro maraɓeha ateɗa. 46Malinage tabaraɗa, “Ahha mi mamdura? Kaɗege mono habayangna tannam kana kulhawe hatenam, ɓana kaɓagim kabalka.”

Yesus ɓayapayi

(Mat. 26:47-56; Mrk. 14:43-50; Yoh. 18:3-11)

47Tangranai Yesus ɓana hanewe, amid kalibbo ata, hakodonai Yudas. Naɗai Yudas ɗiha wui ata walta ana hakodo halolenai Yesus. Ɓegge Yudas nakako tabaranai Yesus lohho nangaꞌha-Yi. 48Taboloi Yesus nahanewe tabarana, “Taa... Yudas, waimuge hangaꞌha ɓam harakani Ana-Na Kaɗaꞌ Ata?”

49Ana hakodo halolenai Yesus waɗeka kaɗaana neɗo etawe agawe kaɗaꞌ, yiɗɗa liɗage, “Nami kaduka waikaꞌmodi kito, Mori!” 50Lohho wu wal tabaraɗa lakatay ata pahalewana imam madakka waina kito, nyiwe mana bohta katil kawanana.

51Taboloi Yesus linage, “Nyammaꞌge!” Lohho na naronani katilna naɗa ata manahaɗuw hagga.

52Ɓegge, Yesus linage tabaraɗa kapala imam, raɗa kapala kaʄawawe Ummanai Mori mono raɗa ngora ata Yahudi kamai yappai Yesus, “Nauwa nne Ata japatai limga, ɗajalage mam mai waina kito mono pal todo tut yappa-Wa? 53Ɗiha laɗo ɗiha laɗo Nauwa ɗaaga olegim ta Ummai Mori, mi walem yappaꞌma-Wa. Tabolo ɓatauge rahnage ɓamrayige, rahnage kawaha kapagtana ɓa hakakowe.”

Petrus nakaɓallini Yesus

(Mat. 26:57-58, 69-75; Mrk. 14:53-54, 66-72; Yoh. 18:12-18, 25-27)

54Yiɗɗa ɗayappayi Yesus mono ɗangidi-Yi ta ummanai imam madakka. Petrus naɗouk dikorau-Ni. 55Kole ɓaɗa ɗik ta ummana imam madakka, Petrus nakako ngoɗo ole ɗangadi raɗa ata, kangoɗo kilorage na latti paharewoɓeɗa ta til natara. 56Wu lawai haneitna etai Petrus ngoɗo ta nir latti; lohho nahamatarani Petrus, ɓegge malinage, “Naɗe ata na ole ʄalani Yesus!”

57Taboloi Petrus nakaɓall, malinage, “Nauwa waleg tada memaꞌmay naɗo ata!”

58Wale moʄahoge, wu ata heka etai Petrus mono linage, “Yau ɗiha wu ʄalaw ata kaɗokuni Yesus!”

Taboloi Petrus nabaleha, “Waleꞌma!”

59Ɓakatutkawe ɗaa ɗiha jamge tabaalge, wu ata hekawali nawadge hanewena linage, “Tena takkawe naɗe ata olenani Yesus, oroge nyi ata Galilea ʄalayi!”

60Taboloi Petrus nabaleha, “Nauwa waleg tadaꞌmawe agawe hatakkim!”

Nna memaʄala, tangrana hanewei Petrus, kuknad manu. 61Yesus nagilaka mono natorroyi Petrus. Nyiɗawei Petrus mana apewe agawe hataknai Mori tabarana, kalinana, “Aina kukhoy manu nehe laɗo, yau hadal wudaɓega kaɓallga Nauwa.” 62Nyiwei Petrus manahuuna wal neɗo mono ngoyi-ngoyi ɓana hoo.

Yesus ɗamalengo waini mono ɗapaluyi

(Mat. 26:67-68; Mrk. 14:65)

63Raɗa ata katangrana ʄawai Yesus, ɗamalengo waini mono ɗapalu-Yi. 64Yiɗɗa ɗakaboronadi mata-Na mono ɗakanuka tabara-Na, “Kamage takwe iyai naꞌ kapalu-Wu?” 65Buta ɗummohoyi hanewe mapadda paha aroɗa tabara-Na.

Yesus ta aroɗa ɓai ata Yahudi kapohta palakara

(Mat. 26:59-66; Mrk. 14:55-64; Yoh. 18:19-24)

66Ɗammahegetana kokoka, ɓai ata Yahudi yiɗɗaꞌnaː ngora ata Yahudi, kapala imam mono gurr agama ata Yahudi ɗamakahha tut pohtawe palakara.#22.66 Jurata Ɓiha ta hanewe ʄawa waige hanewe Mahkama Agama.Nne nyiwe kalibbo kapohta palakara kahadda madehta ata Yahudi, kapit kabul ngora atana mono hapalana Imam Madakka. Maɓegge raɗa tentara Roma ɗangidiyi Yesus ta aroɗa raɗa ɓai ata Yahudi. 67Maliɗage tabara-Na, “Takmage tabarama, Yau takkaꞌna Raja kahatoulka-manemara?”

Balehanai Yesus, “Nyiɓa lugkage tabarami, mi enga walem hatenaꞌmawe. 68Mono ɓag kanukawe tabarami, mi enga walem balehaꞌmawe. 69Tabolo wal ɓatauge, Ana-Na Kaɗaꞌ Ata enga ngoɗo tabbara kawananai Alla kahadda ɓiꞌta-pareha-Na.”

70Yiɗɗa tangngaɗa liɗage, “Nyiɓatauɗage, Yau nne Anai Alla?”

Balehanai Yesus, “Tauɗage hatakimi.”

71Nyiwe maliɗage, “Ilada hil waikana ata heka ɓada hajalayi! Oroge darange ɗauɓewe walta ɓaa-Na.”

Attualmente Selezionati:

Lukas 22: lmy

Evidenziazioni

Copia