Lukas 21

Maraakana wu lawai ɓalu

(Mrk. 12:41-44)

1Ta Ummanai Mori, Yesus na etayi raɗa ata pote ɓaɗa hatamana amaha lar ta hadau maaraka. 2Mana etaɗumoyi wu lawai ɓalu kamilla, ɓana hatamadi maraakana ɗuɗa amaha kaka ta hadau maaraka. 3Malinagei Yesus, “Rangewela: Naɗe lawai ɓalu nahatamana reih buta walta tangngaɗa waɗeka. 4Oro yiɗɗa tangngaɗa ɗayii wal kareih walta ɗauɗa kabuta. Tanyiɗuwe naɗe lawai ɓal loko nyiꞌna kamilla, nayii tangngadi agayi kaɗaana tabarana pahaganana tangngage mourhana.

Yesus nahanewe tutge ɓahamauhage Ummanai Mori

(Mat. 24:1-2; Mrk. 13:1-2)

5Ɗaadi ata kahanewe tutge aganaɗawe dahhage Ummanai Mori ɓahajoro waige wat kadahha, mono waige ngawu pahamaraaka tabarai Alla. Nyiwe malinagei Yesus tabaraɗa, 6“Nim ɗaage rahge, tangngage nna ha etam ɓahamauhage; walaꞌma wu ak wat nehe ka engana haɗogotana ta hadauna!”

Mayilla mono pahamayilla

(Mat. 24:3-14; Mrk. 13:3-13)

7Ana hakodo halole-Na ɗamatutra tabaranai Yesus, “Ama Guru, pirrawe rahge tangngad raɗa ɓana ɗaɗiy, mono agawe tadkage nna ɓana ɗaꞌkawe?”

8Malinagei Yesus, “Ha ategela, ilana ɗikɗalwe mi ɓatipum. Buta ata enga ɗamai waige ngara-Gu, mono liɗage, ‘Nauwaꞌnai Kristus!’ mono ‘Ɗagetanage Rahge.’ Tabolo mi ilam ɗoukad yiɗɗa. 9Lohho ilam madauta ɓam rangewe lii tut hatau mono hagaɓɓa. Tangngage nna naɗaꞌ ulɗahowe. Tabolo wale nyiɗaꞌmahowe rah kaweɗage pan-tana.”

10Mana hangatage hanewenai Yesus, linage, “Wu kaɓihu engage ɓaɗa hatau gaɓɓadi kaɓihu waɗeka, mono wu kalingora raja engage ɓaɗa hatau gaɓɓadi kalingora raja waɗeka. 11Ta gii-gii enga ɗaꞌna ep kalla, kareba kalla mono kapore paɗɗa. Enga naɗaɗiy raɗa hamadauta hadede ɗangadi wul ngih, mono tadka aika anahingna ta langta. 12Tabolo aina ɗaꞌhowe ngaradukage, mi enga yappam mono hamayillam. Enga harehagim ta umma hadau kangote ata Yahudi#21.12 Umma hadau kangote ata Yahudi, yoɗa hadau bahhaɗage Jurata Lii-Kira Kamema, hadau kangote, hadau hanuwa-ha aka mono hadau pohta palakara. mono hatamagim lar ta gall. Mono enga werakagim ta aroɗa raja mono kapang kawahana, oroge ɓam ɗouk-Ga. 13Nyiɗahowe nna mahiggom, ɓam talarage tut hatenami tabarai Yesus. 14Hakulhage atem tannam ilam gelagaga ulka, tutge aganaɗahowe ɓam balehawe tutum. 15Nauwa ɗau enga yiiguge hanewe mono maniwola pahangaɗa, ɗajalage wale wuꞌma walta raɗa muhum kapikna gaɓɓagim waleka kaɓalge agawe nahatakkim. 16Milage enga kalekagim inya-amam, oleɓai ɗaum, ɗuwum mono olem. Kapirrana walta jongami enga ɗahamateyi. 17Tangngana ata engaɗa butgim ate oroge mi ɓam ɗouk-Ga. 18Tanyiɗuwe langka gayiꞌka ro wum walta katakkum enga walna bungaꞌma. 19Ɓam engage tahge mono maloya, mi enga kolemige mourha aikaman dukana.”

Yesus nahanewe tut mauhage Yerusalem

(Mat. 24:15-21; Mrk. 13:14-19)

20“Ɓam etawe Yerusalem ɓaɗa kapoungge tentara, milage engam tadawe neꞌ kota ɓa aina hil moʄage ɓahamauhage. 21Nyiwe neɗo ata kaɗaana ta tana Yudea ɗamalai ɗaho ta letena. Yiɗɗa kaɗaana lar ta kota tanna ɗahoge kota, mono yiɗɗa kaɗaana ta bal kota ilaɗa tama ta kota. 22Oro ta laɗo neɗola, ‘Laɗo Rahnage Alla ɓana ɗolge Houkna’, tannam kana ban-ge agawe kamatulhaɓe lar ta Jurata Ɓiha. 23Ohaɗugeǃ Ta rah neɗo lawai katangrana hatii mono katangrana pahuh lakawa bila hadda mayillayi. Tangngana ata ta tana Israel enga koleɗage mayilla kahadda ɓiꞌta, oroi Alla enga houknad tangngaɗa. 24Ɗaadi hamate wai kito, ɗaa ɗummodi hayappa mono ngidiyi ta tana ata. Mono kota Yerusalem enga ɗaage ta kab kawahaɗa ata aika tadayi Alla, kahha ɓaɗikkin rahge pahatutnai Mori tabaraɗa.”

Rah maina Ana-Na Kaɗaꞌ Ata

(Mat. 24:29-31; Mrk. 13:24-27)

25“Nimlage ta matalaɗo, wulla, mono maduu enga etayi tadka. Tangkahage ata ta pan-tana, enga ɗamadauta mono kabarre ɓa aroge kabuukage mono hangalungge ban. 26Kaɗaꞌ ata wale anaꞌmanage madautaɗa aroge ɓa agawe kaɗaꞌ ta hagala pan-tana nne. Oronagei Alla nahadaadkad matalaɗo, wula mono raɗa maduu ka kawahage langta. 27Ta rahi neɗo tangngaɗa ata enga ɗa etayi Ana-Na Kaɗaꞌ Ata ɓana mai lar ta karabba, waige kawaha mono manadana kamadakka. 28Nyiɓana ɗaꞌkai tangngadi, kaɗewu mono keketawe katakum, oroge hoꞌmowe mi enga hatoulkam.”

Hanuwa walta pu yay kapullota

(Mat. 24:32-35; Mrk. 13:28-31)

29Lohho Yesus nahalarawe tabaraɗa naɗe lii-hatuʄa, “Hamataran pu kapullota#21.29 “Pu yay kapullota” halinawe nehe, nahagaikel ta pu yay arakatum ta tana Israel. mono tangngad pu yay waɗeka. 30Kole ɓa etayi kalungadi mi enga tadamige ɓahoꞌmowe martana. 31Tauɗa ʄalage, mi ɓam etayi tangngad raɗa kaɗaꞌ, mi enga tadamige Alla hagehanage hareha ɗaꞌ Raja.

32Lugɗage tabaramu! Wal raɗa ata kamourha ta dalara ɓatauge, ɗaadi ata aika mateho, kole ɓana ɗaɗiyi tangngad raɗa. 33Langta mono tana enga bungage, tabolo hatakki-Gu engage kahha ana muri ana muri.”

Payah wikda tut mainai Yesus

34“Payah wikim, ilam karingaka ɗalka woleka mono en ha en kabaan. Ilam alpu hamaromatage mourham ta pan-tana, ɗajalage mi walem ha inyaꞌma kole laɗonai Mori ɓana tum hayaɗawe. 35Oroge laɗonai Mori enga amini yannay tangngana ata ta pan-tana. 36Hakitana payah wikim mono habayang, tannam kam kulha aroge tangngadi kaɗaꞌ, mono ilam makkem ta arona Ana-Na Kaɗaꞌ Ata.”

37Ɓana laɗoge Yesus nayii lii-hanuwana ta Ummanai Mori, mono ɓana gaꞌkage kakonage lo dura ta lete Saitun. 38Nahwe kokoka tangngana ata ɗamai ta Ummanai Mori tut rangeyi Yesus ɓana yii lii-hanuwana.

Attualmente Selezionati:

Lukas 21: lmy

Evidenziazioni

Copia