SEEMTIRNAK 29

Jakob Cu Laban Ih Inn A Thleng

1Cun Jakob cu a pok sal ih nisuahlam mi pawl ih ram lamah cun a feh. 2Cule rin lopi in hramlakih tikhur pakhat ah a va thleng ih a kiangkapah tuurual rual thum an bok kha a hmu. Cuih tikhur ihsin tuu pawl cu tidai an inter ṭheu. Tikhursin lungpher cu a tum ngaingai. 3Tuu hmuahhmuah an thlen kim tikah tuukhal pawl in lungpherpi cu an ṭhawn ih an tuu pawl cu ti an inter ṭheu. An in ṭheh hnuah tikhur cu an sin sal ṭheu.

4Cutikah Jakob in an hnenah, “Rualle uh, khuitawk in nan ra?” ti ah a sut ih annih in, “Haran khua in,” ti ah an ti. 5“Nahor ih fapa Laban nan thei maw?” ti ah a suh tikah, “Asi, kan thei,” ti ah an ti. 6“A dam maw?” tiih a suh sal tikah, “Asi, a dam; zohhnik, a fanu Rachel cu a pa ih tuurual thawn a rat khi!” ti ah an ti. 7Cule Jakob in, “Ni a saanglai ih tuu pawl tlun a cu hrih lo hrangah ziangah so nan tuu pawl ti tulh in nan tlanter sal lo?” ti ah a ti. 8Annih in, “Cuticun a si lo ding; tuurual pawl an thlen kim tikah lungpherpi hi kan ṭhawn hmaisa ding; cuih hnu lawngah ti kan ṭul ding,” ti ah an ti.

9Cutiih Jakob le tuukhal pawl an biak-awk rero laifangah Rachel cu a pa ih tuurual thawn a ra thleng. A pa ih tuukhal cu amah Rachel cu a si. 10Cun a pu Laban ih tuurual thawn Rachel a rat cu Jakob in a hmuh tikah tikhur ah a va feh ih lungpherpi cu a ṭhawn ih, a nu ih ṭa-pa, a pu Laban ih tuurual cu tidai a pek. 11Cule Rachel cu a hnam ih aw-ring in a ṭap. 12A hnenah, “Na pa ih farnu Rebekah ih fapa ka si,” ti ah a sim. Cutikah Rachel cu zamrangin a tlan ih a pa a va sim. 13A pa Laban cu a tupa Jakob ih thuhla a theih tikah hmuak dingah a tlan ih a ton tikah a pom ih a hnam. Cule a inn ah a hruai. Cun Jakob in a thuhla hmuahhmuah cu a pu Laban hnenah kimtein a sim. 14Laban in, “Ka thi le ka sa ngaingai na si,” ti ah a ti. Cutiin Jakob cu a pu hnenah thla khat pum a um.

Jakob In Laban Ih Hna A ṭuan

15Laban in Jakob hnenah, “Ka sungkhat na si ruangah a lakin ka hna na ṭuan rero ding cu a cang thei lo. Ziangzat so hlawhman ka lo pek ding?” ti ah a sut. 16A pu Laban cu fanu pahnih a nei; a fanu upa deuh ih hmin cu Leah a si ih a nauta deuh cu Rachel a si.

17Leah cu a mit a mawi;#29.17 a mit a mawi timi hi Hebru ih tican a fiang lo. A mit a cak lo tikhal a si thei. Rachel cu a ruangrai a ṭha ih a hmel khal a ṭha. 18Jakob in Rachel cu a duh ruangah a pu Laban hnenah, “Na fanu nauta Rachel co dingah na hna kum sarih sung ka ṭuan ding,” ti ah a ti. 19Cutikah Laban in, “A rem ko ding, ka hnenah um aw. Midang hnenih ka fanu umter hnakin na hnenih umter ka duh sawn lo maw,” ti ah a ti. 20Curuangah Jakob cu Rachel co dingah kum sarih sung hna a ṭuan; asinain Rachel a duhzet ruangah kum sarih cu caan tawite vekin a thei.

21Cule Jakob in Laban hnenah, “Kan ni tiammi a kim zo ih ka nupi si dingah na fanu cu i ṭhiter thlang aw,” ti ah a dil. 22Cuhrangah Laban in ṭhit awknak puai a tuah sak ih an khuasung mi zatein an sawm ṭheh. 23Asinain cuih zanah Rachel si loin Leah sawn cu a pa in Jakob hnenah a pek ih Jakob in Leah cu a ihpi. 24Laban in a fanu Leah kilkhawitu dingah a salnu Zilpah cu Leah hnenah a pek. 25A thaizing lawngah Leah a si ti kha Jakob in a thei. Cutikah Jakob in Laban cu, “Ka parah zianghrangah hivek na tuah? Rachel co dingah na hna ka ṭuan a si lo maw? Ziangah so hiti in i bum?” ti ah a ti. 26Cule Laban in, “Kan ramah fanu upa pasal neih hlanah fanu nauta sawn pasal neih daan a si lo. 27A dang kum sarih sung ka hna na ṭuan hrih ding asile mopuai zarh khat sung hi hngak awla Rachel cu ka lo pe ding,” ti ah a ti. 28Cumi cu Jakob a lung a kim ih zarh khat sung ṭhit awknak puai a cem tikah Laban in a fanu Rachel cu Jakob ih nupi dingah a pek. 29Rachel kilkhawitu dingah a salnu Bilhah khal Rachel hnenah a pek. 30Cun Jakob in Rachel khal cu a ihpi ih Rachel cu Leah hnakin a duh sawn. Cuticun Laban ih hna ṭuan in a dang kum sarih a um sal.

Jakob Ih Faale Pawl

31Jakob in Leah cu a duh deuh lo ti kha Bawipa Pathian ih a hmuh tikah faate a neihter, asinain Rachel cu fa nei loin a um. 32Leah cu fa a vun ih fapa a hring. Cule, “Bawipa in ka zonzaih zia a hmu zo; atu cu ka pasal in i duh thlang ding,” ti ah a ti ih a fapa hminah Reuben #29.32 Reuben: ti cu Hebru ṭong in ka zonzaihnak i hmu ti thawn a aw suah a bang aw ih, i hmu, fapa tican a si. ti ah a sak. 33Cun fa a vun sal ih fapa a nei. Cule Leah in, “Pasal ih duh lomi ka si hi Bawipa in i thei; curuangah fapa i pe a si,” a ti ih a fapa hmin ah Simeon #29.33 Simeon ti cu Hebru ṭong in i thei ti thawn a aw suah a bang aw. a sak. 34Fa a vun sal ih fapa a nei lala. Cutikah, “Fapa pathum ka hrin zo ruangah ka pasal cu ka hnenah a kop deuh thlang ding,” ti ah a ti ih a fapa hmin ah Levi#29.34 Levi ti cu Hebru ṭong in kop ti thawn a aw suah a bang aw. a sak. 35Cuih hnuah fa a vun sal lala ih fapa dang pakhat a nei lala. “Atu cu Bawipa ka thangṭhat ding,” a ti ih a hminah Judah #29.35 Judah ti cu Hebru ṭong in thangṭhat ti thawn a aw suah a bang aw. a sak. Cuih hnu cun faate a nei nawn lo.

Attualmente Selezionati:

SEEMTIRNAK 29: FCL

Evidenziazioni

Copia