SEEMTIRNAK 30
30
1A pasal Jakob hrangih fa pakhat hman a hrin lo cu Rachel in a ruat tikah a u Leah cu a nahsiik zet. Jakob hnenah, “Faate i pe aw; culole ka thi ding,” ti ah a ti. 2Cutikah Jakob cu a thin a heng ih, “Pathian ih ai cu ziangtinso ka awh thei ding? Faate a lo neiterlotu cu amah Pathian a sisi!” ti ah a ti. 3Cule Rachel in, “Asile ka hrangah faate a neih ih cuticun kei khal naute ih nu ka si ve theinak dingah hi ka salnu Bilhah thawn pawl aw uh,” ti ah Jakob cu a ti. 4Cuticun Rachel in a salnu Bilhah cu a pasal hnenah a pek ih a pasal in Bilhah cu a ihpi. 5Bilhah cu nau a keng ih Jakob cu fapa a hrin. 6Cutikah Rachel in, “Pathian cu keimah ih lam ṭangin thu a rel a si. Ka thlacamnak a thei ih fapa i pek,” ti ah a ti ih a hminah Dan#30.6Dan: ti cu Hebru ṭong in ka lamah a ṭang ti thawn a aw suah a bang aw. a sak. 7Cuih hnuah a salnu Bilhah cu nau a keng sal ih Jakob ih fapa pahnihnak a hring. 8Cutikah Rachel in, “Ka u neh dingah nasa zetin ka zuam ih ka neh suak a si,” ti ah a ti ih a hmin ah Naftali#30.8 Naftali ti cu Hebru ṭong in ka zuam ti thawn a aw suah a bang aw. a sak.
9Cun Leah khal in faate a neih sal lohli lo kha a theih awk tikah a salnu Zilpah cu Jakob ih ihpi dingah a pek. 10Cule Zilpah cun fapa a hring. 11Cutikah Leah in, “Ka van a ṭha a si,” a ti ih a hminah Gad#30.11 Gad: ti cu Hebru ṭong in vanṭhat ti can a si. a sak. 12Leah ih salnu Zilpah in fapa a nei sal ih, 13Leah cun, “Ziangtluk in so ka lung a awi. Atu cun nunau hmuahhmuah in mi lungawi ti ah in ko ding,” a ti ih a hminah Asher#30.13Asher: timi cu Hebru ṭong in lungawi tican a si. a sak.
14Cule sangvut lak caanah Reuben cu hramlakah a feh ih lengai rah a hmu ih a nu Leah hnenah a pek. Cutikah Rachel in Leah cu, “Na fapa ih rak kenmi lengai rah cu malte in i ṭhen ve aw,” ti ah a dil. 15Asinain Leah cun, “Ka pasal i lon hi tawk na ti lo maw? Ka fapa ih lengai rah khal maw a lak hrih na tum?” ti ah a ti. Cule Rachel in, “Na fapa ih lengai rah i pek asile tuihzan cu Jakob hnenah na it ding,” ti ah a ti. 16Cuih zanlam ah Jakob cu hramlak in a rung tlun tikah Leah cun a va hmuak ih a hnenah, “Tuihzan cu ka hnenah na ih a ṭul, ziangahtile ka fapa ih lengai rah in Rachel hnen ihsin ka lo saang a si,” ti ah a ti. Cutiin cuihzan cu Leah thawn an pawl aw. 17Cule Pathian in Leah ih thlacamnak cu a theih hrangah fa a vun ih Jakob cu fapa panganak a hrin. 18Cutikah Leah cun, “Ka salnu cu ka pasal hnenih ka pek ruangah Pathian in ka laksawng i pek zo a si,” ti ah a ti. Cuhrangah a fapa cu Issakhar#30.18 Issakhar: ti cu Hebru ṭong in saan man laksawng a um ti thawn a aw suah a bang aw. ti ah hmin a sak. 19Leah cu fa a vun lala ih fapa a paruknak a hring. 20Cutikah Leah cun, “Pathian in laksawng sunglawi i pek. Fapa paruk ka hrin zo hrangah atu cun ka pasal in i duh thlang ding,” ti ah a ti. Cuhrangah a fapa hminah Jebulun#30.20 Zebulun: ti cu Hebru ṭong in laksawng ka co ti thawn a aw suah a bang aw. a sak. 21Cuih hnuah fanu pakhat a nei ih a hminah Dinah a sak.
22Asinain Pathian in Rachel cu a hngilh lo. A thlacamnak a thei ih fa nei thei dingin a tuah. 23Rachel cu fa a vun ih fapa a hring. Cutikah, “Faate nei thei loih ka ningzahnak cu Pathian in i lak sak zo. 24Pathian in fapa dang i pe hrih hram seh,” ti ah a ti ih a hminah Josef#30.24 Josef: timi cu Hebru ṭong in a dang i pe hrih hram seh tile i lak sak ti thawn a aw suah a bang aw. a sak.
Jakob Le Laban Thu An El Aw
25Josef suah hnuah Jakob in Laban hnenah, “I thlah thlang aw, ka khua le ka ram ah kir ka duh thlang. 26Ka nupi pawl le ka faate pawl tla cu i pe awla ka tlung ding; anmah co duh ah ziangtlukin na hna ṭhatein ka ṭuan ti cu na thei ko,” ti ah a ti. 27Cutikah Laban in, “Thusimnak tikcu i pe hram aw! Nangmah ka hnenih na um ruangah Bawipa in thlawsuah vanluh i pek ih ka ṭhangso tihi tinzohnak in ka thei a si. 28Cuti a si ruangah na hlawhman i sim awla ka lo pe ding,” ti ah a ti. 29Cule Jakob cun, “Ziangtluk in na hna ka ṭuan ih na ṭilva pawl ka khalh sungah ziangtlukin an pungzai ti cu na thei thluh ko. 30Na hnenih ka thlen pekte ih malte lawng na neihmi atu-ah siar cawk lo an si thlang. Keimah ruangah Bawipa cun thlawsuah vanluh a lo pe taktak a si. Atu cu keimah ih hrang ka ruah caan a si ve thlang,” ti ah a ti.
31Cutikah Laban cun, “Cuti asile ziangso ka lo pek ding?” ti ah a sut. Jakob in, “Hlawhman zianghman ka duh lo. Ka lo ngenmi i pek ding asile na ṭilva pawl hi ka kilkhawi hrih ding. Ka lo ngen mi cu: 32tuihsun ah na ṭilva pawl lakah ka vak ding ih tuu note a dummi hmuahhmuah le a ṭialmi tuu pohpoh ṭialcip ih a ṭialmi siseh, ṭialkau ih a ṭialmi siseh - ka lak ding. Cule a ṭialmi me pohpoh ṭialcip ih a ṭialmi siseh, ṭialkau ih a ṭialmi siseh - ka lak ding. Cuvial cu ka hlawhman ah ka duhmi a si. 33Cuticun ka fel le fel lo hmailamah na thei ding. Ka hlawhman cu na thei fel duh ih na zingzoi tikah tuu a dum lomi le me a ṭial lomi ka neih na hmuh asile a rukih rukmi a si ti ah na thei ding,” ti ah a ti. 34Cutikah Laban in, “A ṭha a si, na sim vekin ka tuah pei,” a ti. 35Sikhalsehla acuih sun rori ah Laban cun mecang ṭialcip le ṭialkau ih a ṭialmi le mepi ṭialcip le ṭialkau ih a ṭialmi pohpoh, a si lole a raangin a ṭialmi hmuahhmuah le tuu a dummi hmuahhmuah tla a lak thluh ih a fapa pawl ih khalh dingin a ret. 36Cule Jakob ih umnak ihsin ni thum ban ah a fehpi hai. Cun a taangmi Laban ih tuu le me pawl cu Jakob in a run khal.
37Cule Jakob cun ṭhil, ṭhuang le hriang kungih a ṭeek pawl a lak ih a hawng a hrekin a hawk ih funghreu ṭial ah a tuah. 38Cuih funghreu ṭial pawl cu ṭilva pawl ih tidai innak tikuang sungah atung in ṭilva pawl hoih in a ret. Ziangah hiti in a ret tile tidai in dingih ṭilva pawl an rat tikah an pawl-awk ṭheu ruangah a si. 39Cuticun funghreu ṭial hmaiah me pawl cu an raih-aw vivo ih faate an hrinmi pawl cu a ṭialmi ṭialngaan, ṭialcip le ṭialkau mi - lawnglawng an si. 40Cun Jakob in Laban ih tunu pawl cu a dan ih a pa thawn a dangah a ret; cu ṭheh in Jakob ih tuucang ṭial le a dum pawl thawn lawngin a pawl awkter. Cuticun Laban ih tuurual sung ihsin Jakob cun a tuurual kha a zaiter vivo a si. 41Cule ṭilva lakih a harhdammi le a cakmi an pawl-awk tikah fa ṭial an vun theinak dingah a funghreu ṭial pawl cu tikuang sungah an hmai hoih in a ret. 42Asinain ṭilva ṭawnṭai pawl an pawl-awk tikah funghreu ṭial cu a ret lo. Curuangah ṭilva ṭawnṭai pawl cu Laban ih ta ah an cang ih a cak deuh pawl hmuahhmuah cu Jakob ih ta ah an cang. 43Cutiin a rei hlanah Jakob cu milianzet ah a cang. Ṭilva tampi, salnu salpa le kalauk le laak tampi a nei.
Attualmente Selezionati:
SEEMTIRNAK 30: FCL
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Falam Bible Revision © Bible Society of Myanmar, 2002.
