SEEMTIRNAK 24

Isaak Hrangah Nupi An Hawl

1Abraham cu a kum a upa ih a tarzet thlang; Pathian in a tuahmi le a ṭuanmi hmuahhmuah ah a thluasuah. 2Cule Abraham in a thil neihmi hmuahhmuah a kilkhawitu, a hnenum upa bik pa ih hnenah, “Na kut ka cawn karlakah#24.2Cawn karlak timi cu cuih san ahcun thupi ngaingai, zohmanih thleng thei nawn lo dingmi thukamnak an tuah tikah an zahmawh kai tahratin an kam-awk ṭheu ruangah a si. re hram-awla thu i kam aw. 3Van le lei ih Pathian Bawipa ih hmai le ka hnenah, ka fapa Isaak ih nupi dingah ka umnak Kanaan ramih nunau ka la hrimhrim lo pei, ti ah siatserh in thu i tiam aw. 4A hlanih ka rak umnak ka khuaram ah na feh pei ih ka sungkhat pawl sung ihsin ka fapa ih hrangah nupi na va hawl pei,” ti ah a ti. 5Cutikah a hnenum pa in, “Asile cuih nunau nu in i thlun duh loin a innih um duh sawnsehla ziangtinso a si ding? Na fapa sawn na rak umnak na khuaram ahcun ka kirpi sal ding maw?” ti ah a sut.

6Cule Abraham in, “Ka fapa cu kirpi hrimhrim lo dingin ruat cia aw; 7Bawipa vanih Pathian in ka pa ih inn le ka suahkehnak ram ihsin i suahter ih atu hi ram hi, ‘Na tesinfa hnenah ka pe ding,’ ti ah siatserh in i tiamkam ciami a si. Amah Pathian in a vancungmi na hmaiah a fehter ding ih ka fapa hrangih nupi cu na ngah thei ko ding. 8Sikhalsehla nunau in a lo thlun duh lo ngaingai a si ahcun ka hnenih na kammi thutiam-awhnak ihsin na luat ding. Ziang a si khalle, ka fapa cu cutawk ram ahcun na kirpi hrimhrim lo pei,” ti ah a ti. 9Cuticun a hnenum pa cun a bawipa Abraham ih cawn karlakah a kut a ret ih a simmi pawl tuah tengteng dingah siatserh in thu a tiam aw.

10Cun a hnenum pa cun a bawipa ih kalauk rual sungin pahra a lak ih a tim a tuah ih laksawng dingah thilmankhung tampi a keng. Cule Mesopotamia#24.10Mesopotamia timi hi Aram Naharaim an rak ti. ram Nahor umnak khua ah a feh. 11Cuih khua a va thlen tikah hnarpawn ih tikhur kiangah a kalauk pawl cu a bawhter. Zanlam a si zo hrangah khuasungih nunau pawl cu tidai khai dingin an ra. 12Cutikah Abraham ih hnenum pa cu thla a cam ih, “Maw Bawipa, ka bawipa Abraham ih Pathian, ka bawipa hnenih na thukammi kimter in tuihsun tikcu caanah i hlawhtlingter hram aw. 13Hi ka dinnak tikhur ahhin tidai khai dingah khuasung in fala pawl an ra ding. 14Fala pakhat hnenah, ‘Zaangfahte in na tithawl run ṭhum awla tidai ka in ding,’ ti ah ka ti pei ih anih in, ‘In aw, na kalauk pawl khal ti ka tul hai pei,’ ti ah a ti asile cuih fala cu na salpa Isaak hrangih na hrilmi fala si hram seh. Cutiih a can ngaingai le ka bawipa hnenih na thukam na kimter a si, ti ah ka thei ding,” ti ah a ti.

15Cule a thlacam hman a ṭheh hlanah Rebekah an timi fala cu a liang parah tithawl pu tahratin a ra. Rebekah cu Bethuel ih fanu a si. Bethuel cu Milkah ih fapa a si ih Milkah cu Abraham ih unaupa Nahor ih nupi a si. 16Rebekah cu fala himte a si ih a mawizet fawn. Tikhur ahcun a vungṭum ih a tithawl khat ko ti a than hnuah a hung sal. 17Cutikah Abraham ih hnenum pa cu a va tlan ih a hnenah,” Zaangfahte in na tithawl sungih tidai i in ter hram aw,” ti ah a dil. 18Rebekah cun, “Bawipa in aw,” ti ah a ti ih a tithawl cu zamrangte in a liang par ihsin a ṭhum ih tithawl khal cu fektein a kaihsak ih a inter.

19Tidai a inter hnuah Rebekah in, “Na kalauk pawl hrang khalah tidai ka khai pei ih an duhzat in in hai seh,” ti ah a ti. 20Zamrangte in ṭilva tikuang sungah a tidai cu a thlet ta ih kalauk pawl an khawh hlan lo tidai cu a khaisak rero. 21Abraham ih milai pa cun Bawipa in i hlawhtlinter pei maw, ti ah daitein a zoh ringring.

22Cun kalauk pawl cu Rebekah in ti a pek ṭheh hnuah Abraham ih hnenum pa cun a man a khung zetmi sui hnarthlaih a vun suah ih a hnar ah a thlaih; cun sui faute tumzet pahnih a lak ih a kutah a hruk. 23Cule, “Zo fanu so na si? Na pa ih inn ah kan hrangah riahnak khaan a um pei maw?” ti ah a sut. 24Rebekah in, “Nahor le Milkah ih fapa Bethuel ih fanu ka si. 25Na ṭilva hrangah hrampi le rawl tampi kan nei ih nan riahnak dingah khaan khal a um,” ti ah a ti. 26Cutikah Abraham ih hnenum pa cun lukuun in, Bawipa Pathian cu a biak ih, 27“Ka Bawipa Abraham ih Pathian, Bawipa cu thangṭhat in um seh. Amah in ka bawipa Abraham hnenih a thukamnak le rintlak a sinak cu a kimter zo. Ka bawipa Abraham ih unau inn ah Pathian in i thlengter a si,” ti ah a ti.

28Falanu cu a nu hnenah a tlan ih cuih thuhla hmuahhmuah cu a sim. 29Cutikah Rebekah ih ṭapa Laban in cuih thuhla cu a thei ih, 30Rebekah ih hnarthlaih le a ngeel parih faute tla a hmuh tikah tikhur lamah a va tlan ih Abraham ih hnenum pa cu tikhur kiangah a kalauk pawl thawn an rak din kha a va hmu. 31Cutikah Laban in, “Kan inn ah ra aw, Bawipa ih thlawsuahmi na si. Ziangah so khawlengah na din? Kan inn cu nan riahnak dingah ka simsial zo ih na kalauk pawl hrang khalah hmun a um a si,” ti ah a ti. 32Cuticun Laban in an inn ah a luhpi hai ih kalauk parih thil pawl cu a ṭhum thluh ih hrampi le rawl tla a pek. Cutiin Abraham ih hnenum le a minung pawl ke kholhnak dingah tidai a rak keng. 33Cun zanriah ei an tuah tikah Abraham ih hnenum pa in, “Ka thusim duhmi ka sim hlan cu rawl ka ei hrih lo ding,” ti ah a ti. Cule Laban in, “Na sim duhmi cu sim aw,” ti ah a ti.

34A thu cu a vun thok ih, “Kei cu Abraham ih hnenum ka si. 35Pathian in ka bawipa cu tlamtling zetin bawngmal a sawm ih milianzet ah a tuah. Bawipa in tuu le me le caw a rualrual in a pek ih sui le ngun, salnu le salpa, kalauk le laak tampi tla a pek. 36Cule ka bawipa ih nupi Sarah in a tar hnuah fapa a hring. Ka bawipa in a neihmi thil hmuahhmuah cu a fapa a pek thluh. 37Ka bawipa in, ‘Ka fapa Isaak ih nupi dingah atu ka umnak Kanaan ramih fala pawl sung ihsin na hril lo pei. 38Ka pa ih miphun le ka laicin pawl hnenah ka fapa hrangah nupi na va hawl lo ahcun na parah siatserhnak thleng seh,’ ti ah a hmai rori ah thutiamnak i tuahter. 39Cule ka bawipa ih hnenah, ‘Cuih nunau nu in i thlun duh lo sehla ziangtinso a si ding?’ tiih ka suh tikah, 40ka bawipa in, ‘A thu ka thlun ringringmi Pathian in a vancungmi na hnenah a thlah ding ih a lo hlawhtlinter ding. Ka pa ih sungkhat le ka laicin sung ihsin ka fapa nupi cu na ṭhi tengteng ding. 41Cutiih na tuah asile ka siatserhnak sungin na luat ding; cun ka laicin hnenah na feh ih an lo el a si ahcun ka siatserhnak sungin na luat ding,’ ti ah i ti.

42“Tuihsun tikhur kiangih ka ra thlen tikah ka thlacammi cu, ‘Bawipa, ka bawipa Abraham ih Pathian, ka thil tuahmi parah hlawhtlinnak i pe hram aw. 43Zohhnik, tikhur kiangih ka din laiah tidai khai dingih falanu a rat tikah a hnenah, na tithawl sungih tidai i pe hram aw ti ah ka ti pei ih, 44falanu in, in aw, na kalauk tla tidai ka pe hai ding, a ti a si ahcun cuih fala cu ka bawipa fapa ih nupi dingah Bawipa in a hrilmi siseh,’ ti ah ka ti. 45Cutiin daitein thla ka cam ih ka thlacam hman ka ṭheh hlanah Rebekah in a liangah tithawl pu in a ra ih tikhur ah tidai a vung khai. Cule a hnenah, ‘Zaangfahte in tidai i pe aw,’ ti ah ka ti. 46Zamrangte in a liangih a tithawl cu a ṭhum ih, ‘In aw; na kalauk pawl khal ti ka pe hai ding,’ ti ah i ti. Cuticun a tidai cu ka in ih ka kalauk pawl khal tidai a pek. 47‘Na pa zoso a si?’ tiih ka suh tikah, ‘Nahor le Milkah ih fapa Bethuel ih fanu ka si,’ ti ah i ti. Cutikah a hnar ah hnarthlaih ka thlaih, a ngeel ah faute ka hruk. 48Cun ka lu ka kun ih ka bawipa Abraham ih Pathian, ka lam tluangzet ih i hruaitu Bawipa cu ka biak ih ka thangṭhat a si. Pathian in ka bawipa ih unau hnenah i thlenpi; cule ka bawipa fapa ih nupi hrangah a fanu ka tong zo. 49Cutiin a si ih ka bawipa ih hrangah thuṭha nan ruat thei ih rem nan ti a si ahcun atu-ah i hliah hram uh. Kan thuhla a rem thiam lo nan ti a si khalle i sim uhla hmun dang ah feh ka tum pei,” ti ah a ti.

50Cutikah Laban le Bethuel in a hnenah, “Hi thu cu Bawipa ih hnen ihsin a rami a si hrangah kannih relcat ding a si lo. 51Cuhrangah hinah Rebekah a um; hruai awla fehpi ko aw. Bawipa amah ih a sim zo vekin na bawipa fapa ih nupi-ah si ko seh,” ti ah an ti. 52Cuih thu a theih tikah Abraham ih hnenum pa cu Bawipa Pathian hmaiah leilung dai in a lu a kun ih lungawi thu a sim. 53Cule sui le ngun hlawnthil le thilthuam tla a suah ih Rebekah cu a pek; a ṭapa le a nu khal thil mankhung zetzet a ṭhen hai.

54Cuticun Abraham hnenum le a milai pawl cu rawl ei le in in cuih zan cu an riak. A thaizing an thawh tikah, “Ka bawipa ih hnenah i kirter hram uh,” ti ah a ti. 55Asinain a nu le a ṭapa in, “Kan fala cu kan hnenah ni malte, nihra tluk talin um hrih seh; cuih hnuah a feh leh ding,” ti ah an ti. 56Anih in, “In kai hram hlah uh; Bawipa in ka lamzin a tluanter zo. Curuangah ka bawipa ih hnenah i kirter ko uh,” ti ah a dil hai. 57Cule annih in, “Kan falanu kan ko pei ih amah kan sut pei, ziangtin a ruat pei maw,” an ti. 58Rebekah cu an ko ih, “Hi pa thawn feh dingah na lung a kim maw?” ti ah an sut. Rebekah in, “Ka lung a kim,” ti ah a ti. 59Curuangah an farnu Rebekah cu amah a rak umtu nunau pakhat thawn Abraham ih hnenum pa le a milai pawl hnenah an fehter. 60Cun Rebekah cu hiti in thlaza an camsak:

“Kan farnu, mi thawng tampi ih

nu ah cang hram aw,

Na tefa pawl in an raal ih

khawpi pawl neh thluh hram hai seh,” ti ah an ti.

61Cule Rebekah le a hnenum nunau pawl cu kalauk parah an to ih Abraham ih hnenum pa cu an thlun. Hnenum pa in a hruai hai ih an fehta.

62Culai ah Isaak cu, “Beer-lahai-roi” timi ihsin a ra thawn ih Negev ramah a um. 63Nikhat siimlam ah Isaak cu lam a leng ih kalauk pawl an ra rero kha a hmu. 64Cule Rebekah khalin Isaak cu a hmu ih a kalauk parin a ṭum lohli. 65Abraham ih hnenum pa hnenah, “Hramlakih kanmah tong dingah a ra rero mi pa khi zoso a si?” ti ah a sut. Hnenum pa in, “Ka bawipa a si,” ti ah a ti. Cutikah Rebekah in a hmaikhuhnak puanpaate cu a lak ih a hmai a khuh aw. 66Cule hnenum pa in a tawlrelmi thu le hla hmuahhmuah cu Isaak hnenah a sim thluh. 67Cule Isaak in Rebekah cu a nu Sarah rak umnak puanthlam ah a hruai ih a nupi ah a cang. Isaak in Rebekah cu a duhdawt ih a nu Sarah thih hnuah amah hnemtu ah a cang.

Attualmente Selezionati:

SEEMTIRNAK 24: FCL

Evidenziazioni

Copia