SEEMTIRNAK 23
23
Sarah Hrangah Thlanhmun A Lei
1Sarah cu kum za le kulhluan sarih a nung ih, 2Kanaan ram Hebron (a si lole Kiriath-arba timi) khua ah a thi. Abraham cu a ninghang in Sarah thih cu a ul ih a ṭah.
3Cule a nupi ruak kiang ihsin a tho ih Hit mi pawl hnenah, 4“Kei hi a laangte ih um mikhual le mivai ka si. Ka nupi phumnak dingah nan ram hi malte talin in zorh hram uh,” ti ah a dil. 5Cutikah annih in, 6“Bawipa, kan simmi hi in ngai hram aw; kanmah lakah nang cu a lian zetmi lal na si. Cuhrangah kan neihmi thlaan hmuahhmuah lakih a ṭha bikmi ah na nupi cu phum ko aw. Na nupi phumnak ahcun zohman in kan thlaanhmun kan ui lo ding,” ti ah an ti. 7Cutikah Abraham cu a tho ih an hmaiah a kun ih, 8“Hi ramih ka nupi phum ding nan lung a kim ahcun Hit mi pa Zohar ih fapa Efron in, 9Makpelah lungpuk cu i zorh dingah i dilsak hram uh. A lungpuk cu a loram netnak ah a si. Thlanhmun ka neih thei venak dingah nan zate hmaiah hin a duhzat i ngen in i zorh hram seh,” ti ah a ti.
10Cutiih Hit mi pawl an tonkhawm awknak khuasuah ahcun Efron khal a tel ve hrangah senpi theih-ah Efron in, 11“Bawipa, cuticun si hlah seh, i ngai hrih hram aw; ka ram zate in a lakin ka lo ṭhen ih a sungih ummi lungpuk khal nei cih aw. Ka miphunpi theihhngan ah ka loram cu ka lo ṭhen; na nupi na phumnak dingah,” ti ah a ti. 12Sihmansehla Abraham cu misenpi hmaiah a lu a kun ih, 13senpiih theih dingin Efron hnenah, “Na thinlung ngaingai a si ahcun i ngai hnik aw: na ram zatein ka lo lei pei. A man i la hram aw. Cun ka nupi ka phum ding a si,” a ti. 14Cutikah Efron in Abraham cu, 15“Bawipa, ka loram man cu ngun tangka zali lawng a si ih, nang le kei ih lakah ziangtlakso a si lem! Cunah na nupi cu phum ko aw,” ti ah a ti. 16Cutikah Abraham cu a lung a kim ih Hit mi pawl theih hnganah Efron ih ngun tangka zali a ngenmi cu sumtuahtu pawl ih an hmantlangmi cuai in a khai ih a pek.
17Cutiin Mamre ihsin nisuahnak lam Efron ih Makpelah leiram cu Abraham ih ramah a cangta. A sungih lo le lungpuk le thingkung hmuahhmuah khal a ta an si thluh. 18Cuih an tonkhawm awknak ih a telmi Hit mi hmuahhmuah in Abraham ih ram a si cu an theihpi thluh a si. 19Cutiin Kanaan ram acuih lungpuk ah Abraham in a nupi Sarah cu a phum. 20Cuhrangah Hit mi pawl ih ram a rak si dahmi cuih ram le a sungih a ummi lungpuk pawl cu Abraham ih ramah a rung cang ih thlaanmual ah a tuah.
Attualmente Selezionati:
SEEMTIRNAK 23: FCL
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Falam Bible Revision © Bible Society of Myanmar, 2002.
