SEEMTIRNAK 20
20
Abraham Le Abimelek
1Abraham cu Mamre ihsin Negev ramah a ceer ih Kadesh le Shur karlakah a um. Cuih hnu Gerar ih a um laiah, 2Abraham in a nupi Sarah cu ka farnu a si, a ti ruangah Gerar siangpahrang Abimelek in a nupi dingah a lak. 3Cuih zan cu Abimelek ih mangah Pathian a lang ih Pathian in, “Na thi ding, ziangahtile Sarah hi mi nupi a si,” ti ah a ti. 4Asinain Sarah cu Abimelek in a ihpi hrih lo hrangah, “Bawipa, miṭha khal na that ko ding maw? 5Abraham in ka farnu a si a ti ih amah Sarah khal in Abraham cu ka u-pa a si a ti fawn. Curuangah hi thil ka tuahmi hi thinlung thiangte ih ka tuahmi a si; sualnak zianghman ka tuah lo,” ti ah Abimelek in a ti. 6A mang thotho ahcun Pathian in, “Asi, thinlung thiangte in na tuahmi a si ti ka thei; curuangah keimah hmaiih misual na si lonak dingah Sarah ka lo thamter lonak cu a si. 7Sikhalsehla atu ihsin Sarah cu a pasal hnenah fehter aw. A pasal cu Profet a si ih na thih lonak dingah na hrangah thla a lo cam sak ding. Asinain na kirter lo ahcun nangmah le nan sungkurun in nan thi tengteng ding; ralrinnak atu in ka lo pe a si,” ti ah a ti.
8A thaizing zingpitah Abimelek cu a tho ih a hnenum pawl a ko thluh ih acuih thu pawl cu kimtein a sim ṭheh. A hnenum pawl cu an thin a phang ngaingai. 9Cun Abimelek in Abraham cu a ko ih a hnenah, “Kan parih na tuah mi hi ziangvek thil so a si? Ziang sualnak na parih ka tuah ruangah so hi thil ṭihnungza hi keimah le ka ram parah na thlen ter? Ka parih na tuahmi vek hi cu zohman in an tuah dah lo. 10Ziangah so hivek cun na tuah?” ti ah a sut. 11Cutikah Abraham in, “Pathian a ṭihzahtu hi ramah hin an um lo ding ih ka nupi co duh ah in that men ding, ti ah ka ruah ruangah a si. 12Cuih tlunah Sarah hi ka farnu taktak a si ko. Amah cu ka pa ih fanu a si; asinain ka nu ih fanu cu a si lo; curuangah ka ṭhit a si. 13Curuangah Pathian in ka pa ih inn taan tahratin ka thlen dah lonak ramih i thlah tikah, ‘Ka parih zumtlak ngaingai na sinak langter dingah, ka ṭapa a si, ti ah kan fehnak tinah na ti pei,’ tiin Sarah cu ka tiam ciami a si,” ti ah a ti.
14Cutikah Abimelek in Sarah cu Abraham hnenah a pek sal; cuih tlunah tuu le caw le sal tampi tla a pek cih. 15Cule Abraham hnenah, “Hi ram hmuahhmuah hi ka ta a si; na duhnak poh ah um aw,” ti ah a ti. 16Cun Sarah hnenah, “Na ṭapa hnenah ngun tangka thawngkhat ka pek. Himi cu na kiangkapih a ummi minung hmuahhmuah hnenah mawh nei lo na sinak kha langter dingah a si. Mi hmuahhmuah in sualnak zianghman na tuah lo ti an thei ding,” ti ah a ti.
17Abraham nupi Sarah parah cutiih thil an rak tuah ruangah Bawipa in Abimelek innsungih a ummi nunau hmuahhmuah cu faate nei thei lo dingin a tuah hai. 18Asinain Abraham in Abimelek hrangah thla a cam ih Pathian in Abimelek le a nupi le a salnu pawl tla cu a damter thluh ih faate khal an nei thei sal a si.
Attualmente Selezionati:
SEEMTIRNAK 20: FCL
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Falam Bible Revision © Bible Society of Myanmar, 2002.
