SEEMTIRNAK 21

Isaak Suahnak

1A tiamcia vekin Bawipa in Sarah cu a thluasuah ih, 2Sarah cu nau a keng ih Abraham tar zawng ah fapa a hring. Pathian ih a sim ciami tikcu a thlen in fapa an nei. 3Abraham in a fapa cu Isaak#21.3Isaak ti mi cu Hebru ṭong in a hni tican a si. ti ah hmin a sak. 4Cule Pathian ih thupek bangtuk in Abraham in Isaak cu ni riat a ti tikah serh a tan. 5Isaak a suah tikah Abraham cu kum zakhat a ti. 6Sarah in, “Pathian in lungawinak le hnihnak i pek a si. Hi thu a theitu hmuahhmuah in in lungawipi ding,” ti ah a ti. 7Cuih tlunah, “Sarah in fapa te hnawi a fawh ding ti ah Abraham hnenah zo tal in an sim dah pei maw? Asinain a tar hnuah amah hrangah fapa ka hring zo,” ti ah Sarah in a ti.

8A fapa cu a ṭhang deuhdeuh ih hnawifawh a baan ni ah Abraham in rawldar puai tumpi a tuah.

Hagar Le Ishmael An Dawi

9Nikhat ah Izipt nu Hagar le Abraham ih an hrinmi Ishmael le Sarah ih fapa Isaak an lek tlang. 10Cumi cu Sarah in a hmuh tikah Abraham hnenah, “Hi salnu le a fapa hi dawi aw. Ka fapa Isaak ih co dingmi na ro hi hih salnu ih fapa in malte hman dai hlah seh,” ti ah a ti. 11Cutikah Abraham cu a thinlung a harzet, ziangahtile Ishmael khal cu a fapa thotho a si. 12Asinain Pathian in Abraham hnenah, “Hi na fapa le a nu Hagar hrangah na don har hlah. Sarah ih a lo sim vekin tuah aw; ziangahtile ka lo kam ciami siar cawk lo na tesinfa pawl cu Isaak sung ihsin an suak ding a si. 13Na salnu ih fapa hnen khalah tefa tampi ka pek ding ih miphun tumpi ah an cang ding. Ziangahtile anih khal na fapa a si ve,” ti ah a ti.

14A thaizing zingpitah Abraham cu a tho ih Hagar hnenah rawl le tidai thawl khat a pek. A fapa Ishmael cu Hagar a pawkter ih a fehter. Cutiin Hagar cu a feh ih Beersheba ramṭhing lakah a vakvai. 15An tidai kenmi a cem tikah a fapa te cu hrambur hnuai ah a ret ih, 16“Ka faate thih lai cu ka zoh thei lo,” a ti ih a feh ih kaih zakhat hlat ah a va to. Cutiih a to phahin a ṭap.

17Cule Pathian in naute ṭah aw khal a thei ih Pathian ih vancungmi cun vancung in a hnenah, “Hagar, ziangah so vansaangin na um? Na thin phang hlah. Pathian in naute aw a thei zo. 18Tho aw; na naute va la awla ngamter-aw. A tefa pawl cu miphun tumpi ah ka tuah hai ding a si,” ti ah a run ti. 19Cutikah Pathian in Hagar mit cu a vangter ih tikhur pakhat a hmu. A va feh ih tithawl khattein ti a than ih a fapa cu tidai a pek. 20Pathian in a umpi ih a fapa cu a ṭhang vivo. Paran ram ramṭhing lakah a um ih amah cu sakapzet ah a cang. 21Cule a nu in nupi ah Izipt nu a ṭhit sak.

Abraham Le Abimelek Lungkimnak

22Culai ahcun Abimelek cu a ralkap uktu bawi Fikol thawn Abraham hnenah a ra ih, “Na thil tuahmi hmuahhmuah ah Pathian in a lo umpi a si. 23Cuti a si ruangah keimah le ka faate pawl le ka tesinfa tla in bum lonak dingah Pathian hmaiah thu i kam aw. Na hnenah zumtlak in ka um zo ih nang khal keimah parah le hi na umnak ram parah zumtlakmi na sinak dingah thukamnak tuah aw,” ti ah a ti. 24Cutikah Abraham in, “Ka kam aw a si,” ti ah a ti.

25Cule Abimelek hnenum pawl ih an lonmi tikhur thu cu Abraham in Abimelek hnenah a hun salhsuah. 26Cutikah Abimelek in, “Hi thu hi ka thei dah lo. Nangmah in i sim dah fawn lo; atu hi hmaisa bik ka theihnak a si,” ti ah a ti. 27Cun Abraham in Abimelek cu tuu le caw a ṭhen ih an pahnih in lungkimnak an tuah. 28Cuih tlunah Abraham in a tuurual sung ihsin tuunu no pasarih a lak ih hmun dangah a ret. 29“Ziangah so hiti in na tuah?” ti ah Abimelek in a sut tikah, 30Abraham in, “Hi tikhur laitu cu nangmah na si ti ih i tinak dingah hi tuunu no pasarih cu i saan a ṭul,” ti ah a sawn. 31Curuangah acuih hmun cu Beersheba#21.31Beersheba: timi cu Hebru ṭong in Thukamnak Tikhur a si lo le Pasar ih Tikhur tican a si. ti ah an ko; ziangahtile an pahnih ih thu an tiam awknak hmun a si.

32Cutiin Beersheba ih lungkimnak an tuah hnuah Abimelek le a ralkap uktu bawi Fikol cu Filistin ramah an kir sal. 33Cuih hnuah Beersheba ah Abraham in thingkung pakhat a phun ih kumkhua ih a nungmi Pathian Bawipa cu a biak. 34Cuticun Filistin ram sungah Abraham cu reipi a um.

Attualmente Selezionati:

SEEMTIRNAK 21: FCL

Evidenziazioni

Copia