Luka 10
10
1Neko mere ai Amua a’a mo 70 ie’einave, a’a rere kaupu kaupu U ekaivirinave Una paku ai, oro pai’iri kavakava ikiriane‐iai, iou ai U maura pani anenavailia.
2U erau voa kuruenave, Uru roikia iaki ovara keina kapoi, uru roikia a’a ailapea: ou uku eiai uru roikia Amua nawki‐awkane, U uru roikia a’a aila ekaiviriane‐iai.
3Nomo aki e e noro enara: laikora‐nakine mamoe ukua orau a’uri lekuleku awkono avao ai Nai nakaivirina.
4Moni eria, pu akeke eria ane, rawre are eria ane, noro enara: kapea ai a’a kiripai voa kuruai noro pa pokoiai.
5Marea kavakava noro ikiriakana, pinai erau voa kurura, Ei marea airu mi’inamoki.
6Airu unu a’a i‐pokoiane, nomo airu u upa mere keiakana: u airu a’a peane, nomo airu noro ai vairuakana.
7Kurua marea ai i‐pokoira, peipei na’amakeiakana oro nakuakana: uku iaki a’a ima keina una pei eiai. Marea mere marea ai pa enavai
8Pai’iri kavakava noro ikiriakana, pai’iri a’a umu?-?ainaiakana ane, peipei oro nakuakana, noro na’ara:
9Maia a’a i‐pokoira noro aukariekara, erau voa kuru?-?era ane, Eloi inu eiei ei‐anena noro arekamu ai.
10Pai’iri kavakava noro ikiriakana, pai’iri a’a umu‐ainaiape liane, pai’iri kanikara ai enara, erau voa kurura ane,
11Nomo pai’iri inu ka’e enei paikiakeina, ene mere enei namokina uku makiri‐nakavai: a ei voa virine, Eloi inu eiei ei‐anena noro arekamu ai.
12A Nai kurunaina kapoi, Voa vevea lare ai Sodoma a’a anu oava kavani mau’u keiakana, kurua pai’iri inu oava kavani ovara keiakana,
13Au’a Korasi e! Au’a Betasaida e! Turia ai, Sidona ai ane, iva iaki liaka livilia ni ai liakei’inave, eni pani ai oro lai‐urukiaka, laka, ka’e ane, papa’avaka.
14Voa vevea lare ai Turia, Sidona ane, oava kavani mau’u miakana, oava kavani ovara noro miakana.
15Ni e, Kaperanauma e, Pani muku unu mukua orau ni la‐nikavakeiamau? Ai! ade ai ni vaparia kainikeia?-?kana.
16Kurua a’a navirina u ivirina; kurua a’a lari‐na?-?launa u lari‐ilauna; u ane u lari‐ilauna u lari‐ulauna U ane U ikaivirinave.
17Aivara a’a 70 kopai vairunave, erau voa kurunave ane, Amua e, enei voa kuruane Ni nawi eiai avaea‐lipi kamaia‐akana.
18Satani evao parea orau pani muku mere kaiakeia’ane Nai inamu‐ekimakei’inave.
19Akoi’i, iva Nai nakuane euna paiko, omaina ane, are euniai, mani inu iva iki awkoni‐awkavai: awku eria na’avakeiakana.
20A kopai pa liai uku avaea‐lipi kamaia‐nakana, a kopaili’ine uku nomo nawi kikiriakeina pani muku ai.
21Ei pani ai i Avaea Iaa Iesu kopai evopoakei’inave, erau voa kurunave ane, Mai e, pani muku, pani va’au ane, enu Amua e, Nai kopai‐nikana uku ei awku Ni vaua‐ekava’ane euna lai evera a’a mere, orekeke a’a mere ane, ei awku upi Ni ipekiane euna; lia, uku orau Ni lai veruku keia’ane euna.
22I Na Mai awku uriria ikuakeina: a’a kapeo, Mai e, Mere ipa‐ulauna; orau awku uku Mai, Mere e ipa‐ulauna, u ane Mere ipawkina.
23U urukinave Una aivara ai, vauavaua erau voa kuruenave, Inamu ane oro ei awku inamu‐eina noro inamu‐eina oro kopai‐ekavakeina.
24Uku Nai kurunaina, laikorava a’a aila, amua a’a ane, umuliane euna ei awku inamu‐eiai noro inamu‐eina, oro inamu‐eiape; voa awku viriai noro virina, oro viriape.
25Vupu lai evera a’a monou oinave, ailinave ane, u erau voa kurunave, Amua e, rokoa opai roikiai nai oiamalimau?
26Iesu erau voa veve’enave, Vupu unu kikiria voa oiana? ni oiana‐orai’i?
27U erau voa kurunave, Amua ni Eloi ni umu‐awkavakana ni umu iki, ni imunu iki ane, ni iva iki ane, ni lai iki ane; ni a’a ane, ni nane orau, ni umu‐awkavakana.
28Iesu erau voa kurunave, Voa miki ni kuruane euna: orau li’ine, ni rokoakana ane.
29Uku una nane anana evere’eai u Iesu erau voa veve’enave, Na a’a koana?
30Iesu erau voa kurunave, A’a monou Ierusalema mere Ieriko ai aki‐enamakei’inave; kapea ai i avapu‐no’ovea a’a u au?-?awkuakei’inave, una a’a kape oro kokoranave, oro awkoro‐awkanave, u imua arekamu ai oro ave’enave.
31Omoro a’a monou ou kapea ai kinumakei’inave: u aki a’a inamu‐oiaka’ane, kapea iou ane mekai u awpenave.
32Levi kaupu unu a’a awku u kurua mako ai paiaka’ane, u anenave, aki a’a inamu‐ekinave ane, kapea iou ane mekai awpenave ane.
33Samaria a’a monou u aki‐enamakei’inave, aki a’a anu keia mako ai u anenave; u aki a’a inamu‐oiaka’ane u umu‐awkanave,
34U ai u enanave, una awkoro u mera menamena orekanave, epirinave ane, una asini muri upa mere ai’inave, aki a’a marea ai arekanave, oivirinave ane.
35Namai lare u aki‐enava’ane, u aki a’a marea anu mai‐vaki seleni rere awkunave, erau voa kurunave ane, Ei vaki oivirine; ei moni kavani mau’u keia’ane, nai vairuane kavani miki nai nikuakana.
36Ei a’a rere kaiane ekara vaki ana aki a’a anu a’a kei’inave ou aki a’a eiai u i avapu‐no’ovea a’a awkoro?-?awkavakei’inave?
37U erau voa kurunave, U ane u awkoro vaki umu‐awkanave. Iesu erau voa kurunave. Ni awku enara, orau ni li’ira ane.
38Oro enamakei’inave U pai’iri monou ikirinave; a’e monou nawi Mareta umu‐ai’inave una marea ai.
39Ei a’e aroa a’e miaka nawi Maria oroiakei’inave, u Iesu unu are ai pa’anave, Una ipawkia voa virinave ane.
40Uku pei eveai, iaki e e eiai ane, Mareta lai iakari?-?eakei’inave, u anenave, erau voa kurunave ane, Amua e, Ni lai kukunu peana na aroa a’e ave’i’ina pei oiviriai? awkine u pai’ika’ane‐iai.
41Iesu erau voa kurunave, Mareta e, Mareta e, ni lai iakari, lai kukupuna ane, uku awku aila eiai:
42A awku monou e oea‐rokona kapoi: Maria ima awku ie’eane euna, kurua awku u mere iou‐miakei?-?apea.
Attualmente Selezionati:
Luka 10: IAR1920
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Published by the British and Foreign Bible Society in 1920.
