Yohanna 4

Yesu dət guluk sə Samari

1Adan Yesu asən na Farisaɗe aprəmən na Yesu tay ərəh gewleɗi gəm tay əɗɗa baptem day ki Yohanna, 2gesiŋ nan na, Yesu sən kiyən aɗɗa baptem ɓa, gewleɗ nanəngə, 3ndən zar sə Yude amndan a Galile, 4ya toŋsa də Samari yi.

5 # VAA 33:19; YOS 24:32 Agapək a walaŋgəla-metiŋ na Samari məs adawyaŋ na Sikar, go'o də təki məs Yakob apsən Yosef wətəni. 6Vov net iŋkile na Yakob tay adaka. Yesu ayək də ədaw malaka, ndən ɗew ama vov net iŋkile vani. Wagəɗ aza tataŋ paya.

7Guluk sə Samari pay əmbaɗ iŋkile, Yesu aɓsət na: Avay iŋkile nawsa. 8Vi gewleɗ nan ambataŋgək a walaŋgəla-metiŋ kalbəh zəga nawzəma. 9#EZR 4:1-5; NEH 3:33,34Guluk mə Samariyək vat təɓsən na: Mbari is mə Yuda kədaŋgla iŋkile nawsa avaw in guluk mə Samariyək di? Vi mə Yudeɗ dəŋglaŋ zəga an nawsepet dit mə Samariɗe ɓa. 10Yesu azlani, aɓsət na: Va kəsənək əvəl na Maŋgəlva, gəm ɗəf məzunah suk na avay iŋkile nawsaŋ na, istə dərəŋ kədaŋgla, kəta wapsuk iŋkile na zeŋgile. 11Guluk nak təɓsən na: Daya, zəga nawmbaɗ iŋkile tay avok ɓa, vov net iŋkile van fətəkfətəki; səŋga kan kədawrəh iŋkile na zeŋgile vetis di? 12Hara nok akəsok day ki afəm Yakob məs dəpsəm vov net iŋkile, məs ndən sən kiyən asə səddəvən kirtini gəm zəgeɗ memeyẽɗ nanəŋ sa? 13Yesu azlani, aɓsət na: Ɗəf dəsə iŋkile eŋkiŋki, meme wadannə'e. 14Ya ɗəf dədawsa iŋkile məs nədapsəni meme adanən na kpa' ɓa hã faɗə. Iŋkile məs nədapsəniŋki, wakkpaŋgaŋ heret iŋkile miyma na zeŋgile an faɗ nzõhõ. 15Guluk nak təɓsən na: Daya avay iŋkile vetiski, vi meme adawduwən ɗah əmpa gəm nədazzaw aŋ əmbaɗ iŋkile ɓa.

16Yesu aɓsət na: Dok aya zəlko, Kədegən aŋka. 17Guluk nak təzlanəka, təɓsən na: Zəlu tay ɓa. Yesu aɓsət na: Gesiŋ kənah na zəlu tay ɓaŋka. 18Vi kəgəmək zel sle, an məs kəsok ammban kakaŋkəŋka zəlkuy ɓa. Eske na gesiŋ kənahə. 19Yaŋ guluk nak təɓsən na: Daya, in ulan na məskəleŋ kənani. 20Efiŋgiɗim aka mossorgo metiŋgiŋki agagdakanən Maŋgəlva, ya nokum munokum ənəh na a Yerusalem iyi təki nawgagdakan Maŋgəlva asani. 21Yesu aɓsət na: Ɗakə, arma an nədawnah suko: Pay wade, an məs kəgagdakanən na Maŋgəlva aka mossorgo metiŋgiŋ ɓa, a Yerusalem ɓa. 22Nokum, munokum tat əgagdakan an məs kəsənnən ɓa, ya namə, mənam tat əgagdakan an məs məsənə, vi əkõh səzet mə Yudeɗ ade. 23Ya pay tay əzzani, tay kakaŋ səkay, an məs məgagdakanən Maŋgəlva də təstəs adawgagdakanən Afən addəv Əmpəsa gəm də gegesiŋ. Vi zeŋvit məgagdakanən vas Afən adawkeyeti. 24Maŋgəlva Əmpəsi, ɗiy məgagdakanən dəgagdakanən də Əmpəsa gəm də gegesiŋ.

25Guluk nak təɓsən na: Nəsənka Mesiya wade an məs adawyaŋ na Kristu. An adeke, warban zəga pakə. 26Yesu aɓsət na: Intə məzupel sukuŋka.

27Aka əpeləski gewleɗ nan agapaŋgə. Aggətaŋka vi awlanən əpel dət gulku. Də as pak ɗəf dənah na: Mi kədawkayan di awaniɓa aka mi kədawpel dəndət di ɓa?

28Guluk nak mbagən hinziw nata, təmbat a walaŋgəla-metiŋ, tənah sit ɗiy na: 29Məde, mula ɗəf yana məs dənah su zəgeɗ an məs nəgəɗ pakə. Kristu yi soko? 30Ɗiy agulyoŋguk sə walaŋgəla-metiŋ, ambataŋgək azani.

31Pay nani gewleɗ tay əzəmaŋ sahã ammban dawnah sən na: Mərbəzəga, azəmə. 32Yaŋ aɓsit na: Naw, in tat də way nawzəm məs nokum kəsənnən ɓa. 33Ndəni gewleɗ anahaŋ a walaŋ zit kan na: Ɗəf tay dəki sən əzəm sa? 34Yesu aɓsit na: Way nawa, ndəni əɗɗa əŋgla na məs dəslənwa gəm əɗɗa wəza nani. 35Mənokum vat kawnahaŋ na, apələk təla poɗo əmpa əbəl dəgapgəni ɓa sa? Yaŋ na, naw in tat ənah sukum, məslan horokum, mule gulyeŋge barəŋ nawtaw səkay. 36Məzubəl tay ərəh əfaɗ nani, tay əkkalan zəga na mabardaw na zeŋgile nasa faɗə, vi məzəslga də məzubəla wannekenən zit matakə. 37Vi an adawnahaŋgən na gesiŋ: Məzəslga temme, məzəkkalan temme. 38Naw nəslənkumək əbəl an məs dəyokum ɓa, ɗiy mbirit dəyaŋgə ya nokum addəv iya net nak kədawndəreheŋgi.

39Mə Samari na walaŋgəla-metiŋ van diyɗa atafənək Yesu. Vi əpel nat guluk nak məs tənah na: Anah suwək an məs nəgəɗ farfar pakə. 40Adan mə Samari vet azzoŋ aza Yesu, assohõnənək dəsangən dənɗaŋ. Yaŋ asan adak pay sula. 41Ɗiy vadaysa əmpa atafənək Yesu vi əpel nani. 42Aɓsətən guluk nak na: Sən əpel noki kaka mətaf ɓa, vi məprəmək əpel nan mənam sən kiymə, məsənək na, ndəni məkõhgən dələv gesiŋ.

Yesu tay əmbəlgən wətən ɗəf gagdaka

43Dərɓaga əvoŋ sula na, Yesu vit sədak al a Galile. 44#MAT 13:57; MAR 6:4; LUK 4:24Yesu sən kiyən anahək na: Məskəleŋ awrah gagdak aka dələv nan ɓa. 45#YOH 2:23Adan agap a Galile, ɗiy nadak atafənək moggoni, vi awlanənək an məs agəɗ a Yerusalem pay wəzləra, vi net pak addoŋguk a wəzləra vani.

46 # YOH 2:1-11 Yaŋ Yesu amil a Kana na Galile, a təki akkpaŋget iŋkile ka mbazla. Ɗəf gagdak na məlĩ tay adak məs wətən gbəgba' a Kafarnahum. 47Adan aprəm na Yesu adek sə Yude a Galile, ndən tek azani, akkaman dəprikgin əmbəlgən wətən məs ama əmta. 48Yesu aɓsən na: An kulaŋ zəga naggət akan gəm sekene kpak ɓa na, kawtafaŋ ɓa. 49Ɗəf gagdak nak aɓsən na: Daya aprik tak wətu dəmtə ɓa. 50Yesu aɓsən na: Doko, wətuk madarani. Ɗəf nak atafək əpel məs Yesu anah səni, ndən tive gəmə. 51Aka adawpirken əmilyeni, belemɗe nan pay ələm sən dawnah sən na wətən madarani. 52Yaŋ assohẽt pay an məs arah dəɗah akani, aɓsənən kan na: Nafɗaŋga də pay vuroki gamba appani. 53Yaŋ afən aɗɗumon na, aka pay vanəski Yesu anah sən na: Wətuk madarani naka. Ndəni ataf Yesu də gəla nan pakə.

54Ndəni sekene masula'ən məs Yesu agəɗ səza agil sə Yude hã gap a Galile.

Attualmente Selezionati:

Yohanna 4: GB

Evidenziazioni

Copia