Yohanna 3

Yesu də Nikodem

1Ɗəf maɓɓan tay səret Farisaɗe, iya nan na Nikodem Daya net mə Yudeɗi. 2Adek aza Yesu də dəfɗa, aɓsən na: Rabbi, məsənək na istə mərbəzəga dəde səza Maŋgəlva, vi ɗəf tay naɗɗa sekeneɗ va kədaɗɗetiŋ an Maŋgəlva tay dəndən ɓa ɓa. 3Yesu azlanəka, aɓsən na: Gesiŋ gesiŋ nədawnah suko: Ɗəf aɓap na ula məlĩ na Maŋgəlva an muwani masula'ən ɓa ɓa. 4Nikodem aɓsən na: An ɗəf agalək na mbari adamsak uwanən əmpa di? Waɓap əmndan addəvət man, kawan masula'ən sa? 5Yesu azlanəka: Gesiŋ gesiŋ nədawnah suko: An muwani ɗəf dit iŋkile gəm də Əmpəs ɓa, aɓap na ətoŋ məlĩ na Maŋgəlva ɓa. 6An muwan də ɗəfa ɗəfi, an muwan də Əmpəsa əmpəsi. 7Kədaggət vi nənah suk na: Aslək dəwəkungən masula'ən ɓa. 8Səmyã tay əɓla a təki məs aŋgəl pak is tat əpprəm ɓaɓəlmani, ya kawsənən na səŋga ade di awaniɓa aŋga adaddan di ɓa. Vaski an muwan də Əmpəsa. 9Nikodem azlanka, aɓsən na: Mbarmbar zəga vas adaɗɗa di? 10Yesu azlanka, aɓsən na: Is mərbəzəga na Israyel na kəsin zəgeɗis ɓa sa? 11Gesiŋ gesiŋ nədawnah suko, nam mənam tat əpel an məsənə, mənam tat əpel aka an məwələ, ya də as pak kətafən əpel nam ɓa. 12An nədawpel sukum wən net zəgeɗ naka dəlvafuŋ ya kətafən ɓa, mbari kədawtafən an nəpel sukumək wən net zəgeɗ na disiŋ di? 13Ɗəf tay dəpeŋ a disiŋ ɓa abbər ki an məs dəprik sə disiŋgi ɓa ɓa, Wətən Ɗəfa.

14 # ƏŊƊ 21:9 Va Moyis alaw dohõ na təbəz a kapta-muyã, vaski adalawən Wətən Ɗəfa. 15Vi ɗəf an dətaf pak dərahgən zeŋgile an faɗə. 16Vi vaski Maŋgəlva aŋgluwək dəlva. Ndəni apsən Wətən an karmalay. Vi ɗəf məs dətaf pak adawza ɓa, dərahgən zeŋgile an faɗə. 17Maŋgəlva dəslən Wətən aka dələv ka dətawgən wən aka dələv ɓa, ya vi dələv dərahgən əkõh dəndəni dərəŋgə.

18Ɗəf məs dətaf pak wən dərma ɓa. Ya ɗəf məs dətaf ɓa wən armak səkay vi dəɗi ətaf nan aka iya na Wətən Maŋgəlva karmalay ɓa. 19Aŋki ətawwən vani: Əkeɗeɗe adek aka dəlva, ya ɗiy naka dələv aŋgluwənək guzli day ki əkeɗeɗe'e vi wəzeɗe net assoŋ mbəreyti. 20Vi ɗəf məgəɗ mambray pak tay əzel əkeɗeɗe'e, ade na ara əkeɗeɗe ɓa, vi wəzeɗe nan adarbaŋ ɓa. 21Ya ɗəf məgəɗ moggon pak tay əzzan ara əkeɗeɗe'e vi wəzeɗe nan dərbaŋgən appaka na də Maŋgəlva aɗɗe.

Yesu də Yohanna məgəɗ Baptem

22Dərɓeget zəgeɗiski, Yesu pay dit gewleɗ nan aka dələv na Yuda. Asanək adak dənɗaŋ, agəɗək baptem sit ɗiyi. 23Yohanna tam agəɗ sitik baptem sit ɗiyi a Aynon, go'o də Salim, vi iŋkile tahəŋ adak diyɗa. Ɗiy tay əmbataŋ azani, tay əgəɗ sit baptem. 24#MAT 14:3; MAR 6:17; LUK 3:19,20Vi mərmani Yohanna a fərsəna tagay ɓa.

25Yaŋ kan əbay ma agəɗək a walaŋgit gewleɗ na Yohanna dit mə Yudeɗ aka wən na əbburo. 26Ndəɗaŋ mbat aza Yohanna, aɓsənən na: Mərbəzəga, ɗəf məs dəsan də is dəgar ki Yurdeŋ məs kəpel wən nan naka, yaŋ na, nan pak tay əɗɗa baptem, ɗiy pak əddoŋ azani. 27Yohanna azlanəka, amna: Zəga tay ɗəf adawrəh təttaka dayday an sə disiŋ məpsən ɓa ɓa. 28#YOH 1:20Munokum sən kikum tə miziwe naw nənah na: Naw Kristu nan ɓa, intə məs məslənu abani. 29Ɗəf məs dəɓel gulku, ndəni zilta. Ya bayna na məs dəɓeli, tay ziwwe əprəmən də ənneke, tay zən nek də wəla məs dəɓeli. Vaski kan ənnek naw gərakə. 30Nan dəɓayə, naw nəmndaw dirɓe.

Ɗəf məs dəde sə disiŋ

31Ɗəf məs dəde sə disiŋ ndəni aka zəga pakə. Ɗəf naka dəlvafuŋ ɗəf na dəlvafuŋgi, wən na dəlvafuŋ adawpele. Ɗəf məs dəde sə disiŋ ndəni aka zəga pakə. 32An məs awələ də an məs aprəmə, anani adawpele, ya ɗəf tay dədawtaf əpel nan ɓa. 33Ɗəf dətaf əpel nan pak asənək na Maŋgəlva gesiŋgi. 34Vi ɗəf an Maŋgəlva aslənə, əpel na Maŋgəlva adawpele vi apsənək Əmpəs nan meza meŋge ɓa. 35#MAT 11:27; LUK 10:22Afən aŋgluwək Wətəni, apsənək zəga pak ammba vani. 36Ɗəf məs dətaf Wətən pak tay də zeŋgile nassa faɗ səkayə. Ɗəf məs dəppan makran sən Wətən ɓa pak, awla na zeŋgile ɓa, ya ədagədəv na Maŋgəlva tay akani.

Attualmente Selezionati:

Yohanna 3: GB

Evidenziazioni

Copia