Yohanna 17

Yesu tay əkkam viyit gewleɗ nani

1Adan Yesu apel vaska, aslan haran a disiŋ, amna: Aw Afəni, pay agapka. Agagdakan Wətuko vi Wətən dəgagdakokgəni. 2Va kəpsən gbogboŋ aket ɗiy pakə, vi dəpsitigən zeŋgile an faɗ sit ɗiy məs kəpsin pakə. 3Zeŋgile an faɗə, ndəni dəsənkungən na istə kaka' Maŋgəlva an gesiŋ gəm Yesu Kristu məs kəslənə. 4Naw nəgagdakokuk aka dəlvafuŋ, nəggrakək wəza məs kəvay naɗɗa vi nəɗɗagəni. 5Kakaŋ na, is Afəni, agagdakaw abok də gagdak məs nəsaw dəndən abok tak dələv dəsangəni.

6Nərbanək iya nok azet ɗiy məs kəvay səka dəlva, nokuŋgə lahəŋka yaŋ kepsiwe, armanənək əpel noko. 7Kakaŋ asənənək na, an kəvay pak səzok ade. 8Vi nəpsitik əpel məs kəvayə, atafənka. Asənənək gesiŋ na səzok nəde, atafənək na istə kəslənwa.

9Naw viyit nədakkama, vi dələv nəkkam ɓa, viyit ɗiy məs kəvayə, vi nokuŋgə. 10En naw pak nokəŋ, nok pak nawəŋ, məgagdakawi dənɗaŋ. 11Intat aka dələv əmpa ɓa, ya neti tahəŋ aka dəlva. Naw in tat əmbat azoko. Aw Afən salala, age addəv iya nok məs kəvayə, vi dəssoŋgən taka va məsam taka. 12#GLƊ 41:10; YOH 13:18Aka nədawsaw dənɗaŋ, nəgek də iya nok məs kəvayə. Nətərike, tay dəzə səret abbər ki wətən əza ɓa, vi an Əver apel dəgəɗgəni. 13Kakaŋka in tat əmbat azoko, in tat əpel wənəs aka dəlva, vi ənnek naw dəsangən məknahən addəvti. 14Naw nəpsitik əpel noko, yaŋ dələv ezele, vi naka dəlvəŋgə ɓa, va naw naka dələv nan ɓa. 15Nəkkam na vi kəndegin səka dələv ɓa, vi kəgegin səza Mbərayən. 16Naka dəlvəŋ ɓa, va naw naka dələv nan ɓa. 17Akkpeŋget salala də gegesiŋ, əpel noki gegesiŋ. 18Va kəslənu aka dəlva, in tat əslinit aka dələva. 19Nəppanək zu suk ammbeti vi dəsoŋgən məppanən zit suk ammba gegesiŋ.

20Viti nəkkam kaka ɓa, in tat əkkama'e viyit ɗiy məs dədawtafwən də əpel neti, 21vi pakgit dəssoŋgən taka, va is Afən kəsok addəvwa gəm in addəvko, ka net pak dəssoŋgən addəvmə, vi dələv dətafgən na, istə kəslənwa. 22Naw nəpsitik gagdak məs kəvayə, vi dəssoŋgən taka, va nam məsam taka. 23In addivti is addəvwa, vi dəssoŋgən əsap taka lewlewi. Vi dələv dəsəngən na istə kəslənwa, kəŋgluwik va kəŋgluwa.

24Aw Afəni, en məs kəvayə, nəŋgəl na a təki naw nəsawa, net pak dəssoŋgən də iyna, vi dulanəngən gagdak naw məs kəvayə, vi kəŋgluwək tak əɗi gabba dəlva. 25Aw Afən məs təstəsə, dələv dəsənuk ɓa, ya naw nəsənkuko, ya ɗiy en asənənək na istə kəslənwa. 26Nərban sitik iya noko, wanərban siti'e, vi əŋgla məs kəŋgəluwəŋ dəsangən addəvti, va nəsaw addəvti.

Attualmente Selezionati:

Yohanna 17: GB

Evidenziazioni

Copia