རོ་མི། 15
15
བཱརའ་ག་སེམས་ཀ་ཚུད་པ་ཨ་ཉི་ཆོའི།
1ཨའི་ཨའི་ཏེན་ཤ་ ཤོ་ནང་ཕེ་ལེ་གོད་པེ་མང་གི་ཝ་ ཨའི་དད་པ་ག་སྒྲིང་སྒྲིང་ཆོ་ཁཱན་བ་ཀི་ དད་པ་སྒྲིང་སྒྲིང་མ་ཁཱན་བ་ཀབ་ཉི ཐེས་ཉི་ཆོ་ལེ་ཁེ༌ལེ། 2ཨའི་ཐམས་ཅན་གི་ ཨ་ཧ་ནོག་མིན་བ་ ཤོ་ནང་ཕེ་ཝ་ཅོད་པེ་ཁེ༌ལེ། ཉི་ཨ་ཤི་ རོག་ཏེ་བ་ཀ་ ཕཱན་ཏོག་པེ་གོད་པེ་ཁེ༌ལེ། ཨོ་ཐེན་ཨ་ཉི་ ཨ་ཤི་རོག་ཏེ་བ་ དད་པ་ག་ཟོག་པེ་བིན་ཅ་གི༌ལ། 3ཧང་ཡ་དག་ནེ་ལ་ ཁིརིས་གི་ཆང་ རོག་ཏེན་ཤ་ ཐུགས་བཞེས་ལེ་མ་གོད་ཅི། དག་པ་ཀབ་ཉི་ གསུང་རབ་གེ་ཤོན་ཅ་ ན་ཧ་ཏཱན་ མ་གུ་ཝ་ཨ་ཁཱན་བ་ཀི་ ཇ་ག་ཏཱན་ མ་གུ་ཝ་ཨན་ཅ་གི་ལ་#15:3 མགུར་མ་ག་དཔེ་ཆ་ 69:9དག༌ཉི། 4གོ་མ་གེ་རང་ ཨོ་ཐ་བ་ གསུང་རབ་ནང་ཀ་ འབྲི་ཁཱན་ཤོ་ ཨ་ཧ་ཡེ་ལེ་དེན་གེ་གི༌ལ། དཀོན་མཆོག་གི་ དབུ་མནའ་བཞེས་ཁཱན་ག་ བཟོད་པར་སྒོམ་ཉི་ ནོང་ཅ་ཨ་ཉི་ ཨོ་ཐ་གསུང་རབ་གེ་ཤོ་ཁཱན་བ་ཀི་ ཨ་ཧ་རེ་ཆ་དང་ སེམས་གསོ་ཨ་ཉི་ གནང་ཆེན་དག་པ་གི་གི༌ལ།
5ན་ཧ་བ་ཀི་ ཡི་ཤུ་ཁིརིས་ག་ ཕྱག་ཞུན་ཅ་ཨ་ཉི་ བཟོད་པར་དང་ སེམས་གསོ་ཨ་ཉི་གནང་ཁཱན་ དཀོན་མཆོག་གི་ ན་ཧ་བ་རྣམ་ཤེས་ག་ ཐུར་ཅོད་ཉི་གནང་ཆེན། 6ཉི་ཤ་ ན་ཤི་ཀཱན་ཐུར་དང་སེམས་ཐུར་ཨ་ཉི་ ཨ་ཧ་གཙོ་བོ་ ཡི་ཤུ་ཁིརིས་ག་ ཡབ་དཀོན་མཆོག་ག་ བསྟོད་པ་དང་ གཟི་བརྗིད་ཕུལ༌བེ།
7ཨོ་ཉི་ཨ་དེན་གེ་ ཁིརིས་གི་ ན་ཧ་བ་ རོ་ཀ་ཐུགས་ཀ་ ཤོང་ཉི་གནང་མ་པུརུས་ཀིན་ཨ་ཉི་ དཀོན་མཆོག་ག་ གཟི་བརྗིད་ག་དེན་གེ་ ན་ཤི་བུ་ ན་ཧ་བ་ནང་དོ་ ཐུར་དང་ཐུར་ག་སེམས་ཀ་ ཤོང་པེ་ཁེ༌ལེ། 8ཇི་གི་ ན་ཧ་ཡེག་པེ་ དཀོན་མཆོག་གི་ རོག་ཏེ་བ་ཀ་ ཕ་མ་བ་ཀ་ དབུ་མནའ་བཞེས་ཁཱན་ཁེ་པ་ འགྲུབ་ཉི་གནང་མེ་དེན་གེ་ ཁིརིས་ཡ་ཧུ་དི་པ་བ་ཀ་ གཡོག་པ་རི༌ཝ། 9ཉི་ཡ་ཧུ་དི་པ་མང་གི་ཁཱན་བ་ཀི་བུ་ རོ་ཀ་སྙིང་རྗེ་ག་ཡོར་ཀེ་ དཀོན་མཆོག་ག་ གཟི་བརྗིད་ཕུལ་ཆེན་དག་པ་གི་ བྱོན་མ་གི༌ལ། གསུང་རབ་ནང་ཀེ་ཤོན་ཅ་
ཡ་ཧུ་དི་པ་མང་གི་ཁཱན་བ་ཀ་པོང་ཀ་ ཇི་གི་ ན་ག་བསྟོད་པ་ཕུལ༌བེ། ཉི་ཇི་གི་ ན་ག་མཚན་ག་ མགུར་མ་ཕུལ་བེ་#15:9 2 ཤ་མུ་ཨེལ་ག་དཔེ་ཆ་ 22:50; མགུར་མ་ག་དཔེ་ཆ་ 18:49 དག༌ཉི།
10ཉི་ཨོམ་ཆང་རང་
དབའི་ ཡ་ཧུ་དི་པ་མང་གི་ཁཱན་བ་ རོ་ཀ་སོ་ངོ་ ཨིས་རེལ་བ་ཀ་པོང་ཀ་ ཤོ་ནང་ཕེ་#15:10 ཁྲིམས་ལུགས་ག་དཔེ་ཆ་ 32:43 དག་ཉི་
ཤོན༌ཅ། 11ཉི་ཨོམ་ཆང་རང་
ནའི་ཡ་ཧུ་དི་པ་མང་གི་ཁཱན་ ཐམས་ཅན་གི་ གཙོ་བོ་ག་བསྟོད་པ་ཕུལ༌ཤོ། ཉི་ནའི་ འཛམ་གླིང་ག་སོ་ངོ་ ཐམས་ཅན་གི་ རོ་ཀ་བསྟོད་པ་ཕུལ་ཤོ་#15:11 མགུར་མ་ག་དཔེ་ཆ་ 117:1 དག་ཉི་བུ་
གསུང་རབ་གེ་ཤོན༌ཅ། 12ཉི་ལུང་བསྟན་པ་ ཡ་ཤའི་ཡ་གི་བུ་ གསུངས་མ་ཅ་
ཡི་ཤའི་ག་མི་རྒྱུད་ཐུར་བྱོན༌མེ། ཉི་རོག་བྱོན་ཐཱན་ ཡ་ཧུ་དི་པ་མང་གི་ཁཱན་བ་དབང༌པེ། ཉི་རོག་ཏེ་བ་ཀི་ རོ་ཀ་ཐུང་ཀ་རེ་ཆ་ཨ་ལེ་#15:12 ཡ་ཤའི་ཡ་ག་དཔེ་ཆ་ 11:10 དག༌ཉི།
13ན་ཤི་རོ་ཀ་དད་པ་ཨན་ཅ་ཨ་ཉི་ རེ་ཆ་གནང་ཁཱན་ དཀོན་མཆོག་གི་ ན་ཧ་སེམས་ ཤོ་ནང་དང་ སྐྱིད་པུ་གི་ ཕུང་གནང་ཆེན། ཉི་དམ་པའི་ཐུགས་ཉིད་ག་ སྟོབས་དབང་གི་ཨ་ཉི་ ན་ཧ་རེ་ཆ་ཁེ་པ་ ཁཱད་ཀེ་དོང་ ཤ་པ་རིན་ཆེན༎
པ་ཝལ་གི་ཡི་གུ་འབྲི་བེ་ག་དེན་ཐ།
14ཇ་ག་ཡུང་ཟི་བ་ ན་ཧ་བ་ལེག་པུ་གི་ ཕུང་མ་ཅ་དག་ཉི་ ཇི་གི་མིན༌ཅ། ན་ཤི་ཨོ་ཐ་ཀོར་གེ་ ཐམས་ཅན་རང་ སེ་ཝ་ཨ་དེན་གེ་ བཱརའ་ག་བུ་ ཡེན་བི་ལེ་རེ་ཅ་དག་ཉི་ ཇི་གི་སེན༌ཅ། 15ཨོ་ཉེ་རང་གི་ནེ་བུ་ ཨོ་ཐ་བ་ཀ་ཀོར་གེ་ ན་སྒྲིང་སྒྲིང་ཨ་ཉི་ འབྲི་བེ་དེན་ཐ་ཤོ་ ཨོ་ཐ་ཀོར་གེ་ ཡིད་ཀ་མ་མི་དག་ཉི་ ན་ཧ་ལོག་ཉི་རང་ ཡེག་པེ་དེན་གེ་ འབྲི་བ་གི༌ལ། ཧང་ཡ་དག་ནེ་ལ་ དཀོན་མཆོག་གི་ ཇ་ག་ཐུགས་རྗེ་གཟིགས་གནང་ཉི་ 16ཇང་ཤོ་ ནའི་ཡ་ཧུ་དི་པ་ མང་གི་ཁཱན་བ་ཀ་པོང་ཀ་ ལའི་ཨ་ཁཱན་ ཁིརིས་ཡི་ཤུ་ག་ གཡོག་པ་གི༌ལ། དམ་པའི་ཐུགས་ཉིད་གི་ མཆོད་པ་ཙང་མ་ཅོད་ཉི་ གནང་མ་ཨ་དེན་གེ་ དཀོན་མཆོག་ག་ ཐུགས་ཀ་ཚུད་ཁཱན་ མཆོད་པ་རིན་ཆེན་དག་པ་གི་ ཇི་གི་ན་ཧ་ འཐེན་ལེག་པུ་བཤད༌ཅ། 17ཨོ་ཐེན་ཨ་ཉི་ ཁིརིས་ཡི་ཤུ་ག་ཐུང་ཀེ་ཨ་ཉི་ ཇི་གི་དཀོན་མཆོག་ག་ ཕྱག་ཞུན་ཅ་ཨ་ཉི་ ཇང་ངལ་རངས་པེ་རེ་ཆེན། 18ཡ་ཧུ་དི་པ་མང་གི་ཁཱན་བ་ དཀོན་མཆོག་ག་ ཆ་གནས་ཐ་ཁཱན་ རི་ལེ་དེན་གེ་ ཇི་གི་ཡེག་ཁཱན་དང་ ཨ་ཁཱན་ག་ཐུང་ཀེ་ཨ་ཉི་ ཁིརིས་གི་ ཧང་ད་བུ་མཛད་གནང་མ་གི་ལ་སྨོ་ ཨོ་ཉ་ཀོར་གེ་ཤ་མ་ཏོག་པ་ བཱརའ་ཀོར་གེ་ ཇི་གི་ཏི་ངེ་རང་ ཁམ་མ་ཙོང༌མ། 19རྫུ་འཕྲུལ་དང་ རྟགས་མཚན་ག་ སྟོབས་དབང་དང་ ཐུགས་ཉིད་ག་ སྟོབས་དབང་གི་ཨ་ཉི་ རོག་ཏེ་བ་ཕ་ཝ་གི༌ལ། ཨོ་ཐེན་ཨ་ཉི་ ཡ་རུ་ཤ་ལེམ་གེ་གོ་ཙུག་ཉི་ ཨིལ་ལུ་རི་ཀཱན་སག་པུ་རང་ ཇི་གི་ ཐམས་ཅན་ག་ ཆ་པ་ཨ་ཉི་རང་ ཁིརིས་ག་ཀོར་གེ་ འཐེན་ལེག་པུ་བཤད༌པ།
20བཱརའ་གི་རྨང་ཆེ་ཉི་ ཐ་ཁཱན་ག་ཐུང་ཀ་ཅོད་པེ་ག་ ཇ་ག་སེམས་ མ་པ་གེ་རང་མཱན་ཆི། ཨོ་ཉི་ཨ་དེན་གེ་ ཁིརིས་ག་ཀོར་གེ་ ཧ་ལ་རང་ ན་མ་ཐ་ཁཱན་ས་ཆ་ག་ འཐེན་ལེག་པུ་བཤད་པེ་ག་ ཇ་ག་མིག་པ་ཆོ༌ཝ། 21གསུང་རབ་གེ་བུ་ ཨོ་ཐེན་ཤོན་ཅ་
རོ་ཀ་ཀོར་གེ་ མ་ཡེག་ཁཱན་ སོ་ངོ་བ་ཀི་ རོག་མཇལ༌བེ། ཉི་རོ་ཀ་ཀོར་གེ་ ཧ་ལ་རང་ ན་མ་ཐ་ཁཱན་བ་ཀི་ ཧ་གོ་ལེ་#15:21 ཡ་ཤའི་ཡ་ག་དཔེ་ཆ་ 52:15 དག༌ཉི།
22ཇང་ན་ཧ་བ་བཱརང་ཀ་ ཨོ་ཕེ་ཅམ་པ་ཀབ་ཉི་ ཤེབ་མང་པུ་ཐུར་ ཨོ་ཕེ་མར་ཁཱན་ཤོ་ ཨོ་ཐ་ས་ཆ་ཁོན་ གསུང་བཤད་པེ་ཁེ་ཝ་ ཨ་དེན་གེ་གི༌ལ༎
པ་ཝལ་བྱོན་མེ་ག་འཆར་གཞི།
23དག་པ་ཀབ་ཉི་ ཨོམ་གི་ནེ་ལ་ ཨོ་ཐ་ས་ཆ་ཁོན་ ཇི་གི་ཨ་ལེ་ཁེ་ཝ་ག་ལའི་ མ་ལུས་པ་ཨ་དེན་གེ་ ཇང་ན་ཧ་བཱརང་ཀ་ ཨོ་ཕེ་དག་ཉི་ མི་ཝ༌ཅ། ན་ཧ་བ་ རུ་མེ་ག་ལམ་ཉི་ ཉིང་མང་པུ་ཐུར་དི༌ཝ། 24ཇང་ཨིས་པེན་ག་ དི་ལེ་ག་འཆར་གཞི༌ཅ། ཉི་ཨུ་ཉུ་གང་ཀ་ ཇང་ན་ཧ་ཉ་ ཤོ་ལེ་དག་ཉི་མི་ཝ༌ཅ། ཇང་ན་ཧ་བ་ཀབ་ཉི་ ད་སུར་ཆོ་དེན་གེ་ ཇང་ཉ་གེ་དི་ལ་ཀབ་ཉི་ ན་ཤི་ཇ་ག་ཇ་རོ་ཨ་ཉི་གེ།
25དག་པ་ཀབ་ཉི་ ཨོ་མ་ཤོ་ ཇང་ཡ་རུ་ཤ་ལེམ་ག་ཏཱན་ ཉ་ག་ཆོ་ཁཱན་ ཡི་ཤུ་པ་བ་ཀ་ ཇ་རོ་ཨ་ལེ་ག་དིན༌ཅ། 26ཧང་ཡ་དག་ནེ་ལ་ ཨ་ཁའི་ཡ་དང་ མ་ཀེ་དོ་ནི་ཡ་ག་ ཡི་ཤུ་པ་བ་ཀི་ ཡ་རུ་ཤ་ལེམ་ག་ དུག་པུ་ཆོ་ཁཱན་ ཡི་ཤུ་པ་བ་ཀ་དེན་གེ་ སྙན་དར་དུས་ཐཱན་ ཀུན་ཏི་ཝ༌ཅ། 27རོག་ཏེ་བ་ཀི་ ཡ་རུ་ཤ་ལེམ་ག་ ཡི་ཤུ་པ་བ་ཀ་ རུམ་པེ་ཁེ་ལེ་དག་ མི་ཝ་ཨ་དེན་གེ་ རོག་ཏེ་བ་ གནམ་མེད་ས་མེད་ ཤོ་ནང་ཕེ་ཉི་ ཨོ་ཐ་སྙན་དར་ཁེ་པ་ ཀུན་ཏི་ཝ་གི༌ལ། ཡ་ཧུ་དི་པ་མང་གི་ཁཱན་བ་ཀི་ ཡ་ཧུ་དི་པ་བ་ཀེ་ ཐུགས་ཉིད་ག་ བྱིན་རླབས་ཉོང་པ་ཨ་དེན་གེ་ རོག་ཏེ་བ་ཀི་ ཡ་ཧུ་དི་པ་བ་ཀ་ རྒྱུ་ཅ་ལ་ག་ བྱིན་རླབས་བོང་མེ་ཁེ༌ལེ། 28ཇི་གི་ཨོ་ཐ་སྙན་དར་ཁེ་པ་ ཐམས་ཅན་རང་ རོག་ཏེ་བ་ཀ་བིན་ཐཱན་ ཇ་ག་ལའི་ཆུམ་དེན་གེ་ ཇང་ཨིས་པེན་ག་ཏཱན་དི༌ལེ། ཉི་ཨིས་པེན་ག་དི་ཝ་ཡོར་ཀ་ ན་ཧ་བ་ཆོ་ས་ག་ཤོ༌ལེ། 29ཇང་ན་ཧ་བཱརང་ཀ་ ཨོ་ཕ་ཀབ་ཉི་ ཁིརིས་གི་ཇ་ག་ ན་ཧ་དེན་གེ་ བྱིན་རླབས་ཆི་ལུ་གནང་མེ་དག་ཉི་ ཇི་གི་སེན༌ཅ།
30ཇ་ག་ཡུང་ཟི་བ་ ཨ་ཧ་གཙོ་བོ་ ཡི་ཤུ་ཁིརིས་ག་མཚན་ག་ ཇི་གི་ན་ཧ་ཡེག་ཅ་ ན་ཤི་ཇ་ག་དེན་གེ་ དཀོན་མཆོག་ག་ སྨོན་ལམ་ཏབ་ཉི་ ཇང་ཀབ་ཉི་དཀའ་ཝ་ཅཱད༌ཅོ། དམ་པའི་ཐུགས་ཉིད་གི་ ན་ཧ་ཏཱན་ ཇ་ག་དེན་གེ་ སྙིང་རྗེ་གནང་མ་དང་ཏུ་ཉི་ ན་ཤི་ཨ་ལེ་ཁེ༌ལེ། 31ཡ་ཧུ་དི་ཡ་ག་ དད་པ་མ་ཨ་ཁཱན་བ་ཀེ་ ཇ་ག་སྐྱབས་ཨ་ཉི་གནང་ཆེན། ཉི་ཡ་རུ་ཤ་ལེམ་ག་ ཡི་ཤུ་པ་བ་ཀི་ ཇི་གི་ཕ་ཁཱན་སྙན་དར་ཁེ་པ་ དོག་ཅེན་དག་ཉི་ ན་ཤི་ཇ་ག་དེན་གེ་ སྨོན་ལམ་ཏབ༌ཅོ། 32ཉི་དཀོན་མཆོག་ག་ ཐུགས་བཞེད་དང་ཏུ་ཉི་ ཇང་ན་ཧ་བཱརང་ཀ་ ཤོ་ནང་ཕེ་ཉི་ ཨོ་ཕེ་རེ་ཆེན། ཉི་ཨ་ཤི་ ཐུར་གི་ཐུར་ག་ སེམས་གསོ་ཨ་ལེ་རེ་ཆེན།
33སྐྱིད་པུ་གནང་ཁཱན་ དཀོན་མཆོག་ ནའི་ཐམས་ཅན་ཀབ་ཉི་ བཞུགས་གནང་ཆེན། ཨ་མེན༎
Attualmente Selezionati:
རོ་མི། 15: TNTB
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Tshangla New Testament
© 2023, The Bible Society of India
all rights reserved
