เห่ขุทวาลู่ 8
8
เทอซิ กาแล
1หม่าแน๊เรอ, เพโนอาห์ เน๊อ ล๋อ เตมีเตดอ เด๊อ อา โอ่เต่อเกอลอ เน๊อ ลู เด๊อ ส่อเกลอดุกู เนอเต๊เห่, อา แปล เบ่เบ่, อา แน เบ่เบ่, จอแปแหร่ โชตาปาแก เน๊อ เหย่ซี โต่. เร๊อ อา ปลวาพอแฮ เก่แลเซ๊ เด๊อ เห่ขุ, เร๊อ เทอ ซิตาแล. 2เออโต๊โผะ เรอ เทอเถ่ขู่กู เด๊อ เห่เล เต๊เห่ เน๊อ เทอกู่ดา เด๊อ ม๊อขุ เต๊เห่ อา บี๊แก ลอเฮ๊อ อาขว่าอาคยา, เก่จือ โงแก เฮ๊อ. 3เร๊อ เทอ เด๊อ เห่ขุเออ ซิโดโด๋ อา ซิตา, เร๊อ อา ซิตาแล งยา โต่เด๊อ อาเนอ เตเย เน๊อ แงเชอ. 4เบ๊อะ โซซว๊าเตเล เนอเตเล, เช๊อโซซว๊าเตอเนอ เนอเตอเนอ เบ๊อะเนอ, ส่อเกลอดุ แลแด่โอ่ เด๊อ โฉ่อารารัต โฉ่ ลู. 5เทอ ซิตา เน๊อ ซิตา โต่ เด๊อ อาเลเช๊อกู, เร๊อ เบ๊อะ อาเลเช๊อ อากู, อาเหร่อเล๊อ เนอเตอเนอเนอ โฉ่กู๊ดือขู่ เต๊เห่ แม๊เถอะ โล ลอเฮ๊อ.
6เบ๊อะ อา ตาลว๊าแฮ โป่ เฮ๊อ อาเนอ ลุยเชอ เบ๊อะเนอ, เพโนอาห์ โบ๊โม กู่ดาพู๊ เด๊อ อา เมโอ่ เกอเร๊อ เด๊อ ส่อเกลอดุกู เนอตูกู, 7เร๊อ อา ปลวาเถ่ โยจว๊า จ๊อเหว่ เต๊เบ่. เร๊อ จ๊อเหว่ เออ เต๊เบ่ อา โยจว๊าโยกา, โยโทโยแล, โยโต่ เจ๊อ เด๊อ เทอซิครา ตาลา โต่เด๊อ เห่ขุ. 8เด๊อคยาเร๊อ, เทอซิครา ตาโต่เฮ๊อ เด๊อ เห่ขุ เฮ๊อ แอ, หม่า โต่ แอเนอ, เพโนอาห์ ซิหยื่อ ซิเง อาขว่าอาคยา, อาปลวา เถ่โยจว๊า โป่ ถู่หลุ่ย เต๊เบ่. 9หม่าแน๊เรอ เทอ ดุบี๊ลอปา เห่ขุเออ แพ๊ อาขว่าอาคยา, ถู่หลุ่ย เออเต๊เบ่เนอ อา แม๊เถอะ อาเหล่ตาโอ่โก๊ โอ่ โตโพ๋ โต่. เร๊อ ถู่หลุ่ย เออเต๊เบ่ โยกาโต คยาแซ๊ เด๊อ เพโนอาห์ อาส่อเกลอดุโอ่. เร๊อ เพโนอาห์ บ๊อเถ่ฉื่อ อากู๊ขู่ เร๊อ อา ปื่อโน คยา ถู่หลุ่ย เออเต๊เบ่ เด๊อ อาส่อเกลอดุกู. 10อา โอ่ป่อ โป่ โซซว๊าเตอเนอ เร๊อ อา ปลวาเถ่ โยจว๊า คยาแซ๊โป่ ถู่หลุ่ย เนอเต๊เบ่. 11เบ๊อะ เหมาะตา เฮ๊อ เบ๊อะเนอ, ถู่หลุ่ย เนอเต๊เบ่ โยกา หนิ โต๊โฉ่เหล่ ซิโซกูยู เต๊เบ่ เร๊อ อา โยกาโต คยา เด๊อ เพโนอาห์ โอ่. เร๊อ เพโนอาห์ ซิเง เฮ๊อ เน๊อ เทอซิตา โต่เฮ๊อ เด๊อ เห่ขุเออ เฮ๊อ. 12โทเร๊อ เพโนอาห์ โอ่ป่อ โป่ โซซว๊าเตอเนอ เร๊อ อา ปลวาโยจว๊า คยา ถู่หลุ่ย เนอเต๊เบ่, เออโต๊โพะ เร๊อ ถู่หลุ่ย เนอเต๊เบ่ กาคยาโต ปา เด๊อ ลูโอ่ โตโพ๊ โต่เฮ๊อ.
13เบ๊อะ เล เถ่เหร่อเล๊อ เตเล, อาเหร่อเล๊อ เตอเนอ, เพโนอาห์ หน่าโอ่เฮ๊อ อาเยโซซว๊า เน๊อ ต๊าหน่า เบ๊อะเนอ, เทอซิครา ตาโต่เฮ๊อ เด๊อ เห่ขุ เฮ๊อ. เร๊อ เพโนอาห์ เมโมตาแก ส่อเกลอดุ อากู่กล๊อขู่ เร๊อ อา แม๊เถอะ เน๊อ เห่ขุเออ อา คราลอ เฮ๊อ. 14เบ๊อะ เนอเล เตเล, เนอเช๊อ เน๊อ โซซว๊าเตอเนอ เบ๊อะเนอ, เห่ขุเออ ครากาดี๊ ลอหล่าตี๊กลิ แก เฮ๊อ.
15เออโตโพ๊ เร๊อ จอแปแหร่ดุ เฮ๊ เพโนอาห์ เน๊อ, 16“เก๋อ โนอาห์, เอ๊หนิ เนเม, เนพู๊เพรคูซี เน๊อ เนแด่ซี เนอเต๊เห่ เร๊อ เถ่ลอ มอ เด๊อ ส่อเกลอดุ อากลอ เนอ. 17ล๋อ เตเบ่แบ๊ เด๊อ อา โอ่เต่อ เน๊อ เน หม่าดื่อเฮ๊อ ถู่พู๊โหย่พู๊, เตมีเตแหม่, เน๊อ เตมีเตดอ เด๊อ อาดุดุ อาปีตี๊ตี๊ เนอเต๊เห่ ล๋อ ปลี, แซ่ฮู๊ อา เก่ พู๊เพ๊แถ่เอ๊ แลแค, เร๊อ โอ่บา จว๊าปีซี จว๊าลอ เห่ขุเออ อาเงเนอ, ปลวาเถ่ลอ มอ เหย่ซี เนอ.”
18ฮู๊เนออาขว่าอาคยา, เพโนอาห์ เอ๊หนิ อาเม, อาพู๊เพรคูซี เน๊อ อาแด่ซี เต๊เห่ เร๊อ อา เถ่แก ลอ เด๊อ ส่อเกลอดุกลอ. 19โทเร๊อ ล๋อ เตมีเตดอ เด๊อ อาดุดุ อาปีตี๊ตี๊ เน๊อ ล๋อ ถู่พู๊โหย่พู๊ เน๊อ เตมีเตแหม่, เตมีเตดอ โอ่ เด๊อ เห่ขุ เออ เต๊เห่ ล๋อ ปลี โอ่ลอ เด๊อ ส่อเกลอดุกู เร๊อ เถ่ แลแค ตู๊หมู่ โท ตู๊หมู่.
เพโนอาห์ ชื๊อ หลู่แตแถ่ อาเตหลู่แต
20โทเร๊อ เพโนอาห์ ต่าแถ่ เตหลู่แตเหร่ เด๊อ จอแปแหร่ ตูจูเพร อาเง เตเม, โทเร๊อ อาพย๊า เตมีเตดอ เน๊อ ถู่ เด๊อ อาโพ๊แปละ เร๊อ อาโต หลู่แต แถ่เน๊อ จอแปแหร่ดุ เนอเต๊เห่, เร๊อ อา แด่แถ่ เด๊อ เตหลู่แตเหร่ขุ เร๊อ อา ชื๊ออือ หลู่แตแถ่ เน๊อ จอแปแหร่. 21เบ๊อ จอแปแหร่ ตูจูเพร โนหวิเบ่ เตหลู่แตแถ่ อาเตโนมื๊อโนชือ อาโข่เออ เบ๊อะเนอ, เร๊อ โมโส่โมเซ๊ แหน่เจ๊อ ลูซิปล่อ, เร๊อ อา แด่แลเฮ๊อ อาซิปล่อ เร๊อ อา เฮ๊ เน๊อ, “เด๊อโหน่ เด๊อคยาคย๋า หม่า แว ซิเง เจ๊อ เน๊อ แกแยเห่ขุพู๊ เต๊เห่ เตเน เจ๊อ เตมู๊แหม่รีแจ่ ่ เต๊เห่ เด๊อ อาเป๊เจ่เค ปาเจ๊อ เบ่เบ่, เด๊อ เหย่ซี เตซื๊อ อาขว่าอาคยา, แว อิชอฮา ปา เห่ขุ โต่ เฮ๊อ. ฮู๊ แว เม โทเฮ๊อ กู๊แหน่เออ, เด๊อโหน่เด๊อคยาคย๋า หม่า แว เมเซอเมเหม่ ปา ล๋อ เตเบ่แบ๊ เด๊อ อาซิปล่อเซอเพร โอ่ เออเต๊เห่ โต่ เฮ๊อ.
22เห่ขุเออ ด๋า โอ่ตื๊อดื่อ ปา เฮ๊หม่า,
เตอิช๊ออิปลือ อาค๊าอาขิ เน๊อ เตเก๊ดว๊าปอดว๊า อาค๊าอาขิ,
เก่เตอเจ๊อ เน๊อ เก่กู่,
เก่กู่เค เน๊อ เก่โหร่เค,
เหมาะคี๊ เน๊อ เหมาะเชเกล,
เก่ โอ่ เป่แฮ ตื๊อดื่อ ดื่อปา นี๋.”
Attualmente Selezionati:
เห่ขุทวาลู่ 8: EKTNTGEN
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
