เห่ขุทวาลู่ 9
9
จอแปแหร่ อ๊อแล อาโหง่ เน๊อ เพโนอาห์
1โทเร๊อ จอแปแหร่ดุ เด๊อะบุ๊ยเด๊อะเตอเรอ เพโนอาห์ เน๊อ อาพู๊เพรคู เต๊เห่ เร๊อ อา เฮ๊ เหย่ซี เน๊อ, “พู๊โอ่โหร่เลอโอ่เอ๊ แลแค เร๊อ โอ่บา ลอ แลแค เด๊อ เห่ขุเออ นี๋.#เห่ขุทวาลู่ ๑:๒๘ 2ล๋อ เตมีเตดอ เด๊อ อา โอ่ เด๊อ เห่ขุ เต๊เห่, ล๋อ ถู่พู๊โหย่พู๊ เด๊อ อา โย เด๊อ ม๊อเล เต๊เห่, ล๋อ เตมีเตดอ เด๊อ อาดุดุ อาปีตี๊ตี๊ เนอเต๊เห่ เน๊อ ล๋อ เต เด๊อ อา โอ่ เด๊อ เทอดุซาวากู ซี เต๊เห่เนอ, อา เก่ ซิอิเชลอ ซีเหล่ ปา, เร๊อ อา เก่ โอ่ลอ เด๊อ ซี เตเป๊อ อาเล ปา. 3ล๋อ เต เด๊อ อาซิปล่อ เซอเพร โอ่ เร๊อ อา กู๊ก่า จว๊าโทจว๊าแล เต๊เห่เนอ, เน เอ่ เหย่ซี แซ่เน๊อ เน เอ่ ส่อตอส่อเหล่ เด๊อ แว เด๊อะตาเหร่อ ซี เนอเต๊เห่ หม่า อา หนิ เฮ๊อ. กู๊แหน่เร๊อ แว เด๊อะเฮ๊อ ซี ปว๋า เต๊อเจ่อ เฮ๊อ.
4“หม่าแน๊เรอ เตเต๊อเจ่อ เด๊อ ซี เอ่หนิ โต่ เนอหม่า หม่าเฮ๊อ เตหย่า เด๊อ สุ่ย โอ่ ปา เด๊อ ลูกู เนอแพ๊. แว เฮ๊ ตาตือ ซี เมเตเฮ๊เร๊อ ซีแหย่โยเซอเพร อาแก่ช๊าแกแร หม่า อาโอ่ เด๊อ สุ่ยลู.#จ๊อบู่จ๊อเบ ๗:๒๖-๒๗, ๑๗:๑๐-๑๔, ๑๙:๒๖, โด่แน ๑๒:๑๖-๒๓, ๑๕:๒๓ 5แกแย เตเพรเพร เก่ จว๊าเมเซอ แกแยเห่ขุพู๊ เฮ๊หม่า, แว เก่ เมจากาคยา อา ปา. เตมีเตดอ โตโดโด เก่ เมเซอ แกแยเห่ขุพู๊ เตเพรเพร เฮ๊เนอ เตมีเตดอ เออโตโด เบ่ เซอเลอ ติ. แกแย เตเพรเพร เก่ เมเซอ แกแย เด๊อ อาโร เตเพรเพร เก่เฮ๊เร๊อ อู เบ่ เมเซอเลอ เกอติ ลู.
6แกแยเห่ขุพู๊เออ จอแปแหร่ แบ๊แล แซ่เน๊อ อาเหน่ อาขว่าอาคยา,
อูเปเป๋ เบ่เบ่ เด๊อ อา เมเซอ แกแยเห่ขุพู๊เออ เตเพรเพร เนอ,
แกแย เด๊อ อาโร เตเพรเพร
เบ่ เมเซอเลอ เกอติ ลู ปา.#เถ่จว๊าแลเปล๊ ๒๐:๑๓, เห่ขุทวาลู่ ๑:๒๖
7ซี เกอติ เร๊อ, พู๊โอ่โหร่เลอโอ่เอ๊ แลแค เร๊อ โอ่ปลู่โอ่เผ่ โอ่บาลอ แลแค เน๊อ เห่ขุเออ เร๊อ โอ่ปีชีจว๊า ลอดื่อ แลแค เด๊อ เหล่โอ่ ปว๊า โต๊โผะ นี๋.”#เห่ขุทวาลู่ ๑:๒๘
8โทเร๊อ จอแปแหร่ เฮ๊ เพโนอาห์ เน๊อ อาพู๊เพรคู เต๊เห่ เน๊อ, 9“แว เร๊อ, แว เอ่หม่าเอ่กลอ เฮ๊อ แว เตอ๊อแล เน๊อ ซี เน๊อ ซีกลุยซีแล ตากาแล เด๊อคยา เต๊เห่, 10เน๊อ เตมีเตดอ เด๊อ อา โอ่ เกอเน๊อ ซี เด๊อ ส่อเกลอดุกู เร๊อ อา เถ่ผรว่า เกอ เน๊อ ซี หม่าดื่อ, ถู่พู๊โหย่พู๊ เต๊เห่, เตมี เตดอ ซีเต๊เห่ ลอปลี, เน๊อ ล๋อ เตมีเตดอ เด๊อ อู แบ๊ตา อา เร๊อ อา โอ่เซอเพร เด๊อ เห่ขุเออ ปว๋า เต๊อเจ่อ เฮ๊อ. 11แว เอ่หม่าเอ่กลอ เฮ๊อ แว เตอ๊อแลเออ เน๊อ ซี เน๊อ เด๊อโหน่เด๊อคยา ปาป๋า หม่า แว นอ ดุเซอ ปา เตแบ๊ เด๊อ อาซิปล่อเซอเพร โอ่ เนอเต๊เห่ เน๊อ เทอ โต่ เฮ๊อ. เด๊อโหน่ เด๊อคยาคย๋า หม่า แว นอ ดุปย๊าแก ปา เห่ขุ เน๊อ เทอ โต่ เฮ๊อเฮ๊อ.”
12โทเร๊อ จอแปแหร่ เฮ๊ เน๊อ, “แว เก่ เมแก เตอ๊อแล อาเตม๊าเตแด เต๊อเจ่อ. เตม๊าเตแด เออ อา เก่ ทวา เป่ แว เน๊อ ซี เน๊อ ล๋อ อาซิปล่อเซอเพร โอ่ ซีเต๊เห่ เน๊อ เนกลุยเนแล ตากาแล เด๊อ คยา ตือทือ เต๊เห่ อา เตข่าเฮ๊โล เด๊อ อาจอกู. 13แว นอ โอ่โลแถ่ เทอหล่อโบโอ๊ เด๊อ อ๊อโหล่เกล เทอหล่อโบโอ๊เออเนอหม่า หม่าเฮ๊อ แวเตอ๊อแล อาม๊าอาแด เน๊อ ซี เน๊อ เห่ขุ เออเนอ เฮ๊อ. 14แว นอแถ่เฮ๊อ อ๊อโหล่ เด๊อ ม๊อเล เน๊อ เทอหล่อโบโอ๊ เด๊อ อ๊อโหล่เกล เบ๊อะเกเต๋ เบ่เบ่เนอ, 15แว เก่ ซิเหน่แถ่โต่ แวเตอ๊อแล เด๊อ แว เน๊อ ซี อาเปล่กู เน๊อ เตมีเตดอ เมวเจ่อ ลอปลีเออ เนอปา. เด๊อโหน่เด๊อคยาคย๋า หม่า แว นอดุเซอ ปา ล๋อ เต เด๊อ อาซิปล่อเซอเพร โอ่ เนอ เต๊เห่ เน๊อ เทอ โต่ เฮ๊อ. 16แว แม๊เถอะ เทอหล่อโบโอ๊ โอ่โลแถ่ เด๊อ อ๊อโหล่เกล บ๊อเคเต๋ เบ่เบ่, แว เก่ ซิเหน่แถ่โต่ คยาดื่อ แวเตอ๊อแล ตูจูเพร เน๊อ อาซิปล่อเซอเพร โอ่ ปว๊าเมวปว๊าเจ่อ เด๊อ เห่ขุ เออเนอเต๊เห่ ปา.”
17โทเร๊อ จอแปแหร่ เฮ๊ เพโนอาห์ เน๊อ, “เทอหล่อโบโอ๊ เออหม่า หม่าเฮ๊อ เตเมม๊าเมแด เต๊อเจ่อ เด๊อ แว เม เตอ๊อแล เน๊อ อาซิปล่อเซอเพร โอ่ ปว๊าเมวปว๊าเจ่อ เด๊อ เห่ขุ เออเนอ เต๊เห่ เฮ๊อ.”
เพโนอาห์ เน๊อ อาพู๊เพรคู เต๊เห่
18เพโนอาห์ อาพู๊เพรคูเต๊เห่ เด๊อ อา เถ่ผรว่า เกอ เน๊อ อาเพ เด๊อ ส่อเกลอดุกู เต๊เห่ เนอหม่า คูเซม, คูฮาม เน๊อ คูยาเฟท ซี เออเนอ เฮ๊อ, เร๊อ คูฮาม หม่า คูคานาอัน อาเพ. 19แกแยเห่ขุพู๊ ลอปลี เด๊อ อา โอ่ปีชีจว๊า ลอ เด๊อ เห่ขุ เออเต๊เห่ หม่า อากลุยอาลุ๊ย ตากาแล ลอปลี เฮ๊อ เด๊อ เพโนอาห์ อาพู๊เพรคู เนอซิโซ เฮ๊อ.
20เทอซิตา โทเฮ๊อ เร๊อ, เพโนอาห์ หม่า เพร เมเพร๊เมแหล่ เตเพร เร๊อ อา หม่า เพร เด๊อ อา ช๊อ เหร่อเล๊อ แท๊ทือเหมาะ เตเพร. 21เตอเนอเค เพโนอาห์ โอมือ แท๊ทือเส่เทอแย เร๊อ ก่าโกลโกล๋ อา โอ่เมอโอ่ เด๊อ อา เหล่สื่อกู. 22คูคานาอัน อาเพ เพฮาม โนแม๊เถอะ เน๊อ อาเพ โอ่เมอ ก่าโกล เร๊อ อา เถ่เฮ๊โฉ่ เป่ เน๊อ อาแหม่ เนอซิเนอ. 23เออโตโพ๊ เร๊อ คูเซม เน๊อ คูยาเฟท อิท๊อแถ่ อิเก เด๊อ อาปลาขุ โทเร๊อ อา จว๊ากาคยา กาโน เด๊อ เหล่สื่อกู เร๊อ อา โนอิท๊อบี๊ เน๊อ อาเพ. เหย่ซี แม๊โค๊ จว๊ากาโน แลแค แพ๊ อาขว่าอาคยา, อา แม๊เถอะ แลแค อาเพ โอ่เมอ ก่าโกล โต่.
24เบ๊อะ เพโนอาห์ โอมือปลว่าเฮ๊อ เทอ อาเค อาพู๊แกแน๊ คูฮาม เมแคร๊ ลู ฮู๊เตเนอ อา ซิเง เกอเร๊อ, 25เร๊อ อา อิชอฮาแก เพฮาม อาพู๊ คูคานาอัน เน๊อ,
“คูคานาอัน เก่ ข่าเบ่ เตอิชอฮา ปา,
อา เก่ ทวาดื่อ อาแหม่ ซี อาหลู่ เต๊เห่ อาหลู่ ปา นี๋.”
26โทเร๊อ อาเฮ๊ โป่ เน๊อ,
“เก๋อ จอแปแหร่ ตูจูเพร, คูเซม อาจอแปแหร่ดุ, อู เก่ ถู่เซ๊แถ่ หนิดื่อ เน นี๋.
คูคานาอัน เก่ ทวาดื่อ คูเซม อาหลู่ ปา นี๋.
27จอแปแหร่ดุ เก่ เมแหล่แถ่ หนิเป่ดื่อ คูยาเฟท อาเหล่โอ่ ปา นี๋,
เร๊อ คูยาเฟท อากลุยอาลุ๊ย เต๊เห่ เก่ โอ่เต่อ เกอดื่อ เน๊อ คูเซม อากลุยอาลุ๊ย เต๊เห่ ปา นี๋,
เร๊อ คูคานาอัน เก่ ทวาดื่อ คูยาเฟท อาหลู่ ปา นี๋.”
28เป๊อแถ่ เบ๊อะ เทอ ดุบี๊ โทเฮ๊อ เห่ขุ เบ๊อะเนอ, เพโนอาห์ โอ่เซอเพร หนิ โป่ อาหน่า โซเย เน๊อ แงเชอ. 29เร๊อ เพโนอาห์ เซอแก เบ๊อะ อาหน่า โอ่ ลุยซว๊าเตเย เน๊อ แงเชอ เบ๊อะเนอ.
Attualmente Selezionati:
เห่ขุทวาลู่ 9: EKTNTGEN
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
