Matyu 19

For ti Kunggo

1Myan ima Yeso pun lak ti ɗamam mii, unai hon Galili wa ta ta' ti Judya ta fit i Ɗara i Jodan. 2Suɓut i ɗufal si kolfai asussi, unai fas cala ta kyeli.

3Shini Farisiyawa si yes ɓa si mbas. Si lulus nyai, “A kiga' ɓa maɗufal u ngga mbor asus ya, ɓurti shak musut i aɗeng ima ti masi haa?”

4Matussi ni, “Hu mbe' kwani, tasi bya' DeeƁwe a Malan, ai ‘lanus a marei hu mumbori,’#19:4 Ɗing huni hwak: Bya 1:27. 5ni, ‘ɓurti andi, marei ma wa honti dees hu nasus, u te akul hu mborsus, apilali si te ii lo' andek.’#19:5 Ɗing huni hwak: Bya 2:24. 6Yes wei, si wa mute a ɗufal apil kwa, a andek. Ɓurti andi, aɗeng ima DeeƁwe no', ka ɗeng kaarti kwa.”

7Si lul nyai, “Ami kin Mosis lak ni, ɓa maɗufal u fa mborsus kaada i for ti kunggo ɗak wakut i ra ya?”

8Yeso matussi ni, “Mosis honu ɓa hu wak arof amu ii ra, a ɓurti shok na hai amu. Ai, tasi bya' yis andi kwa. 9I ma laksu, shak maɗufal ima wak mborsus ii ra, na wa' a ɓurti si ka'ut ti mafwashi i arak i zuruk kwa, ɗak mas kunggo nin, a mute i zuruk mii hai.”

10Unai fe i ro ames si nyus, “Na angga' ima aɗengi mata saa ti mute i marei hu mbor nai, mbwesh mute kaciwa' kunggo.”

11Yeso matussi ni, “A shak si wa mat ti findel mai kwa, a som ima DeeƁwe masus bum je. 12Shini a ngguryai ɓurti si alus andi, shini a ɗufal si hatus andi, shini a sin si nggwes i masti kunggo ɓurti kaitat i kyel fit. Maɗufal ima ma wa mat ti findel mai u mat.”

13Unai si kolus fe muyayi ɓa u kinus maɗesi, u fwal ɓursus. Fe i ro ames si mbyar som ima si yes ti fei.

14Yeso nyus, “Hon hun fe muyayi si yes kyel amen, ka hu shas kwa, ɓurti kaitat i kyel fit ii musuti mii.”

15Myan ima kinus ra maɗesi hai, ɗak wis ta kyeli.

Zalang Maramwayat

16Ka mana ndai, nin mweni maɗufal nin, yes kyel i Yeso lulus ni, “A makofiti, anggi aɗeng maɗesii i wa masi ɓa i wis mupwet i myan hu myan ya?”

17Yeso matussi ni, “Ami kin ha lulun aɗeng ima mii maɗesi ya? Ma maɗesi ma andek je. Na ha ɓweti ha lang ta mupwet i myan hu myan, unai ha hya anggutati.”

18Maɗufali ni, “Anggi ya?”

Yeso matussi ni, “ ‘Ka ha for maɗufal kwa, ka ha mas arak i zuruk kwa, ka ha shir shir kwa, kan ha vo fai i fyarat kwa, 19Faha dya hu nasa ngye.#19:19 Ɗing huni hwak: Mul 20:12-16; Muh 5:16-20. Ɓweta maɗufal ima hu mute tikul fota haisa.’#19:19 Ɗing huni hwak: Koc 19:18. ”

20Zalangi ni, “Shak ɗamam mii i masus. Ami kat ya?”

21Yeso matussi ni, “Na ha ɓweti ha te nggya-nggya, ɓwa ha pwak sufat ama ya, ha fa som i jyel, ha wa wis ti mal ta fit. Ɗak ayis nai ha yes, ha kolfai asuni.”

22Myan ima zalangi hal mai, wis ti futut. Ɓurti mati sufat fwet.

23Yeso lak fe i ro ames ni, “I ma laksu mwawei, mati shum masufat u lang ta kaitat i kyel fit. 24I muhum laksu i hai nyai, mati mbwesh ɓa rukumi ti lang ta swai i twen wi, hu ima maramwayat u lang ta kaitat i DeeƁwe.”

25Myan ima fe i ro ames si hal mai, si shok na fwai fwet, si lulus si ni, “Na andi, awe ma wa mupwet ya?”

26Yeso ɗingus fo ni, “Ta kyel i maɗufal ma wa mas kwa, ta kyel i DeeƁwe shak ɗamam si wa mas.”

27Pita matussi ni, “Unai ni hon shak ɗamam ni kolfai asai! Ami ni wa wisi ya?”

28Yeso lakus ni, “I ma laksu mwawei, myan i mushen i ɗamam mamwai yes, Al i Maɗufal ma wa mute si kunggul i kaitat ames hai. Hun ima hu kolfai asuni, hu wa mute si kunggwal i kaitat hure mulang apil, hun totti ɓur si gung hure mulang apil i Isar'ila. 29Shak maɗufal ima hon wur, hon nusus, hon tusus, hon dees, hon nasus, hon fe ames, hon yangang ames ɓursun, ma wa mati aɗeng ima ɓin andi mute hyang, ma wa cwai ti kop i mupwet i myan hu myan. 30Shak ta andi, hyang ima si mii bya' si wa mute ii dala, hyang ima si mii dala si wa mute ii bya'.

Attualmente Selezionati:

Matyu 19: AlisIRonNT

Evidenziazioni

Copia