Matyu 20
20
Kaani Si Som i Ro Ta Yang i Mangbu'
1“Kaitat i kyel fit ma fota mayang ima ɗik mulangya tamwen, ɓa u far som ima ɓa si wa si masu ro ta yang i manggɓu' ames. 2Ni ma wa talsus cef ima si talan ti som ro i mufi, unai kolus ta yangi.
3“Myan ima shitam karfu' ti mas, lang ya wis shini sin mute i gbya' ta kyel woor kaciwa' masti ɗama. 4Unai lakus ni, ‘Hun hwak ɓu hu masun ro ta yang, i wa talsu aɗeng ima mandere.’ 5Unai si wa.
“Lang ya sai ren, hum mulangya shitam ataat, har shini som roi hwak. 6Yes shitam hara wis shini sin mangrai hwak. Lul ni, ‘Ami kin hu fi yes ango kaciwa' ro ya?’
7“Si matussi nyai, ‘Ɓurti ɗeng har nin wa ro kwa.’
“Lakus ni, ‘Hun hwak ɓu hu masun ro ta yang.’
8“Myan ima ango ti mas, mayangi lak ma ɗingsus yangi ta ni, ‘Laiya som roi ha talus cef i ro ames, ha tongi tasi ima yes ta dala wa i bya'.’
9“Som ro ima si yes nggas ti myan i muluk, si mat cef i mufi. 10Som ima si tong wa roi, si kin mulut si wa mati aɗeng ima ɓin i anggumi. Sin hwak, si mat a cef i mufi. 11Myan ima si mat si fur rumung si mayangi hai. 12Si ni, ‘Mii somi si yes si mas ro i shitam andek je, ha yes ha tal nin kiga' hu sin, nin ima ni fi ro, ni maɗo ti a o i ɓwe.’
13“Ɗak yis mat andeki ta saa yusti ni, ‘A mwen, ɗingai, yin i muka kwa. Ahun a ha ku ɓeti ɓa ha mas ro fo i cef i mufi kwa waak? 14Zana cef ama ha wa. Ayin i ɓwet ɓa i fa maɗufal ima i zanus ro na dala ɗama andek hu ima i Faha. 15I ndok ɓa i mas aɗeng ima i ɓweti ti cef amen kwa waak? Ahun ha ma nadon ɓurti i cat ra ii ra waak?’
16“I dala si wa mute ii bya', i bya' si wa mute ii dala.”
Yeso Hum Findel Si Mot Ames Hai
17Myan ima Yeso yis muɗuya wa Yerushalima, dul fe i ro ames hure mulang apil si ɓwai nyus, 18“Ka ma muɗuya wa Yerushalima ndai, si wa fati Al i Maɗufal ta ra i mbai i kocokak, hu som kofiti si anggut hai. Si wa lefsus ɓur i mot, 19si fahus ta ra i Ramam, si gbafus ya, si ndashus, si nggwakus tasi shanggam hai. Mwen mutaat, ma wa muluk fit.”
Fwal i Na
20Ka mana ndai, mbor ti Zebedi ti yes kyel i Yeso ti fe amet, ti shu i mafwaran, ti fwalus ɗama nin.
21Yis lulut ni, “Ami shi ɓweti ya?”
Tini, “Hona al amen andek u te ta ra i ucwa ama, andek ta ra i ukutyal ta kaitat ama.”
22Yeso matussi ni, “Hu shang aɗeng ima hu fwali kwa. Hu wa woi ta kwang tima yin i wa woi ta haa?”
Si ni, “Ni wa woi.”
23Yeso lakus ni, “A andi, hu wa woi na cunjo asun. Mute ta ra i ucwa hu ra i ukutyal ayin i fai kwa. Kikyal mii ii som ima Deen benus, masi ɓursus.”
24Myan ima hurei si hal mai aɗengi, si mas futut ti shunus apilal ani. 25Yeso laiyus ta kyel andek nyus, “Hu shangi kaya i Ramam si kofti andok si sin hai, hu mbayai i kunggwal si nggwak ti ajin si sin hai. 26Ma andi si hun hai kwa! Shak maɗufal ima ma ɓweti ɓa u te ii mbai na saa yuti, a kpak u te ii ma masu ro. 27Shak maɗufal ima ma ɓweti ɓa u te i bya', a kpak u te ii yere amu. 28Al i Maɗufal yes ɓa si masus ro kwa, a yis ma wa masti ro, ɓa u dum ɗufal ya hyang.”
Manzyauwau Apil Si Wis Ɗing ti Kyel
29Myan ima Yeso hu fe i ro ames si te honti Yeriko, mbai suɓut i ɗufal si kolfai asussi. 30Manzyauwau apilal sin ta fo i fisel, myan ima si hal Yeso yis musata, si tutol si ni, “A Deembai! Al i Devid, ɗinga shum asinin ni!”
31Suɓut i ɗufali si ti'us ra, si nyus ɓa si te cakat, shak ta andi si cu wei ti tutolat ti njeng sin nyai, “A Deembai! Al i Devid, ɗinga shum a sinin ni!”
32Yeso kat ya laiyus, lulus ni, “Ami hu ɓweti ɓa i masui ya?”
33Si matussi si ni, “A Deembai, ni ɓweti ɓa ni wis ɗing ti kyel.”
34Yeso ɗing shum asussi, nggya' shishat ames. Fo abet si ɗing kyel, si kolfai asussi.
Attualmente Selezionati:
Matyu 20: AlisIRonNT
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© Wycliffe Bible Translators, Inc. and © The Nigeria Bible Translation Trust 2018
