PALABURU 11
11
Banua Toaya ri Babeli
11:1-9
1Ri uyu-uyunya waʼa banca ri wawo lino seʼi podo mampotumpu sambaʼaja basa pai tau seʼe mampake pau anu siwia-wia. 2Ri anu sangkani sindara tau seʼe melinja-linja tondo ri pebetea, jelamo tau seʼe ri sambaʼa rato anu bangke ri Babilonia, maroo-roomo tau seʼe njairia. 3Napombetoʼoka ntau seʼe, “Iomo tapampowia watu tela nepa tatunju rantani mapeni.” Ewanceʼemo napampatoka ntau seʼe watu tela anu da ndawanguka banua tokamo pai anu da ndapijaka 4Natoʼo ntau seʼe, “Maʼimo tapangawangu sambaʼa kota pai sambaʼa banua toaya anu sawi-sawi ri yangi wumbunya da naka tebambari kita pai bareʼemo da tesebu kita ri sambawo lino.”
5Inceʼe painaka menaʼumo i Pue mempeole kota pai banua toaya anu nawangu ntolino. 6Ndatoʼo, “Tau seʼe seʼi sambaʼa banca pai sambaʼa-mbaʼa basa, pai inceʼe nepa pontepuʼu ntau seʼe da mampowia waʼa tangara ndaya. Bareʼemo masae da nakotomo ntau seʼe mampowia wuwunya anu napokono. 7Moruana menaʼu kita da mampaposisala basa ntau seʼe da naka bareʼe mombeincani basa sambaʼa pai sambaʼa.” 8Ewanceʼemo pampowia i mPue mampaka katebureka tau seʼe ri sambawo lino. Painaka napeʼontoka ntau seʼe mawangu kota setu. 9Inceʼe painaka kota setu ndapapotoʼoka Babeli, maka njairiamo ndapampaposisala i mPue basa pura-pura banca, pai ungka njairia woʼu ndapampaka tebureka mPue tau seʼe ri sambawo lino.
Muli i Semu
11:10-26
(1 Taw. 1:24-27)
10Seʼimo waʼa muli i Semu. Radua ntaʼu ungka ri karoo mpesambori ue, ri tempo tinuwu i Semu 100 ntaʼu, siʼa marata ana tuama sambaʼa toʼonya i Aripakasa. 11Roo setu ntongo tuwupa 500 ntaʼu, pai marata woʼu waʼa ananya anu ntaninya.
12Ri tempo i Aripakasa tinuwu 35 ntaʼu, siʼa maratamo ana tuama toʼonya i Sela. 13Roo setu i Aripakasa ntongo tuwupa 403 ntaʼu, pai siʼa marata woʼu waʼa ananya anu ntaninya.
14Ri tempo i Sela tinuwu 30 ntaʼu, siʼa maratamo ana tuama toʼonya i Eberi. 15Roo setu i Sela ntongo tuwupa 403 ntaʼu, pai siʼa maratapa woʼu waʼa ananya ntaninya. 16Ri tempo i Eberi tinuwu 34 ntaʼu, siʼa maratamo ana tuama toʼonya i Pele. 17Roo setu i Eberi ntongo tuwupa 430 ntaʼu, pai siʼa marata woʼu waʼa ananya anu ntaninya.
18Ri tempo i Pele tinuwu 30 ntaʼu, siʼa maratamo ana tuama toʼonya i Rehu. 19Roo setu i Pele ntongo tuwupa 209 ntau pai siʼa maratapa woʼu waʼa ananya anu ntaninya.
20Ri tempo ri Rehu tinuwu 32 ntaʼu, siʼa maratamo ana tuama toʼonya i Seru. 21Roo setu i Rehu ntongo tuwupa 207 ntaʼu, pai siʼa maratapa woʼu waʼa ananya anu ntaninya.
22Ri tempo i Seru tinuwu 30 ntaʼu, siʼa maratamo ana tuama toʼonya i Nahori. 23Roo setu i Seru ntongo tuwupa 200 ntaʼu, pai siʼa maratapa woʼu waʼa ananya anu ntaninya.
24Ri tempo i Nahori tinuwu 29 ntaʼu, siʼa maratamo ana tuama toʼonya i Tera. 25Roo setu i Nahori ntongo tuwupa 119 ntaʼu, pai maratapa woʼa waʼa ananya anu ntaninya.
26Kagananya 70 ntaʼu tinuwu i Tera, siʼa maratamo tatogo ana tuama inceʼemo i Burahima, i Nahori pai i Harani.
Muli i Tera
11:27-32
27Seʼimo waʼa muli i Tera: I Tera papa i Burahima, i Nahori pai Harani. I Harani mampotumpu ana tuama toʼonya i Loʼoti. 28I Harani mate ri lipu mpearinya, inceʼemo Uri ri tana Babeli, sindara ntongo tuwupa papanya. 29I Burahima mamporongo i Sarai, pai i Nahori mamporongo i Mikali ana i Harani. I Harani reʼepa ananya tuama anu ntaninya toʼonya i Yisika. 30I Sarai setu tau tamana.
31I Tera malai ungka ri kota Uri ri Babeli sangkani-ngkani pai ananya i Burahima, makumpunya i Loʼoti, pai ri Sarai manianya, inceʼemo rongo i Burahima. Tinako ndayanya da njoʼu ri tana Kanaʼa. Paikanya karatanya ri Harani, maroo-roomo njairia tau seʼe. 32Pai njairiamo kamate i nTera 205 ntaʼu tinuwunya.
Attualmente Selezionati:
PALABURU 11: LAIPMF
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
