Jean 3

Jesus na Nicodeme

1Vamaba mutu va gari baJuif abamaba baPharisie, diina diandi Nicodeme, 2amaba yivunda yimosi va gari ogu. Amawenda mukolu mosi ombu Jesus na amamutsingula rie: Mulonsi jetu tuijabi yiri ndeʼ gumaruyila ombu Nsambi mu mbari ne mutu mosi agorungula uvaga bimaga abi ndeʼ guivayi pa Nsambi agaa nandi.

3Jesus amamugabusila rie: Dingensa nyigutsinguli viri pa mutu agoburu duburu dugona agorungula ujaba Durumu duNsambi. 4Nicodeme amamuwivula rie: Tsie mutu omueburulu pa aka yinunu? Omuekota o moji nguji andi nomueburu?

5Jesus amamugabusila rie: Dingensa nyigutsinguli yiri pa mutu agoburu na mamba na Yinyunyi yiNsambi agorungula ujaba Durumu duNsambi. 6Mutu eburi muana tumba yinyunyi yimutu yiburu na Yinyunyi yiNsambi. 7Guyakambulu mu adi nsigutsingula rie: Vengu gumueburu duburu dugona. 8Punga jivepi agu jirondi na guigulu nduku tumba gugejabi agunyi jiruyisini vo agunyi jiwendisini. Divu munongu mosi na mutu agumaburu na Yinyunyi yiNsambi.

9Nicodeme amamuwivula rie: Dionyi tsie diubila?

10Jesus amamugabusila rie: Ndeʼ guji mulonsi uIsrael na gugejabi mambu meni? 11Dingensa nyigutsinguli yiri tuivosi ama tuijabi na tuisingisili bumbeji mu ama tumalaba na dugesingi bumbeji buetu. 12Pa dugevayi yitu ava nyivosili mambu mabutamba nenu tsie duvayila yitu ava nyudutsingulila mambu majulu? 13Mutu asakamata o julu yika Muana Mutu agumasunduyila o julu. 14Nana Moise amanangulila nyoga o kumu munongu mosi Muana Mutu vengu omatusu 15yiri uotsu agumuvayila yitu odila monyu umutubu. 16Nsambi amaronda bisi bulongu puela la dibandu amaveyila Muana andi divingu yiri uotsu oyimuvayili yitu akebungana tumba abi na monyu umutubu. 17Nsambi asamasindiga Muana andi o bulongu uyevega batu mbela tumba yiri batu bogobulu mu diina diandi. 18Oyimuvayili yitu agovegu mbela tumba ogemuvayili yitu amavegu mbela kala mu mbari agaavayila diina diMuana divingu diNsambi yitu. 19Mbela agunyi jiruyisini? Diwendi rie: Yijalala yinoruga o bulongu batu bamaronda pisama uviolila yijalala mu mbari bevayingi mabi. 20Mu mbari oyiduki mabi evini yijalala na agerondi umonutsu mu mbari bisalu biandi bibi bikejabunu. 21Tumba oyiduki ngensa erondi yijalala, diwendi rie: ededili Nsambi na bisalu biandi biujabunu.

Jesus na Jean

22Amana manovioga Jesus amawenda na badukitsi bandi o yiari yiJudee; jandi amatsananga nogu guna na amabatisanga. 23Jean wandi amabatisanga o Enon bebeli na Salim mu mbari aguna umaba mamba mapuela na batu bamawendanga uyebatusu nandi. 24(Jean mbe asakakotusu o tsugu.)

25Kabogu badukitsi baJean bamatsunda na muJuif mu diambu dimuyitsa ogu nana beliomusulu. 26Bamawenda ombu Jean na bamamutsingula rie: Mulonsi, jandi omaleba nagu o disimu diJourdain agu ndeʼ gumavosila bumbeji, laba ebatisi na botsu bewendi ombu gandi.

27Jean amagabusila rie: Mutu orungula udila yika ayimamuvegu na Nsambi. 28Jenu beni duji bambeji bami yiri nyimavosa rie: Menu ngaa Christ tumba nyimasindugu o gusu andi. 29Jandi odila mugetu la yiwela-mugetu tumba mbatsi yiwela-mugetu ojivu vana na oyimukelisi elabi nsangu jineni ava egululu diufi diyiwela-mugetu. Nsangu eni jivu ajiami wandi na jivu jidugu. 30Vengu diduma diandi diunyava na adiami diudiama.

Jandi oyiruyili o julu

31Jandi oyiruyili o julu aji va julu biotsu; jandi ojivu muisi butamba aji agu butamba na jandi evosi nana muisi butamba. Jandi oyimyili o julu aji va julu biotsu; 32na esingisili bumbeji mu ama jandi amalaba nogulu tumba ne mutu mosi agesingi bumbeji buandi. 33Jandi agumasinga bumbeji buandi ejabi yiri Nsambi evosi ngensa. 34Jandi agu Nsambi amasindiga evosi mambu maNsambi mu mbari Nsambi amamubasa de na Yinyunyi yiandi. 35Taji erondi Muana na amamuvega musuga uotsu. 36Jandi oyivayili Muana yitu ana monyu umutubu; jandi oyilensi Muana agodila monyu mu mbari Nsambi ana kabu nandi.

Attualmente Selezionati:

Jean 3: PUU1992

Evidenziazioni

Copia