Jean 4
4
Jesus na mugetu muisi Samarie
1Jesus amajaba yiri baJuif abamaba baPharisie bamagulu yiri amavaganga badukitsi nobatisanga bapuela ne uviolila Jean. 2(Tsiri ngensa mu mbari Jesus jaʼ beni asamabatisa batu yika badukitsi bandi abamabatisanga.) 3Mbana Jesus amagusuga o Judee na amagabusila o Galilee. 4Kabogu dimaba yiri vengu ovioyila o yiari yiSamarie.
5Amatola o musiengi umosi uSamarie, diina dimusiengi eni Sychar agumaba bebeli na musiru agu Jacob amavega ombu muana andi Joseph. 6Avana vamaba yileka yiJacob. Jesus anotogulu mu diambu dimuendu amaba atsana va mugula yileka yieni. Dimaba bebeli na diweru dimuangulu.
7Mugetu muisi Samarie amaruga uyitega mamba. Jesus amamuvonda rie: Peyi mamba monu. 8(Yiotsu yina badukitsi baJesus bamawenda o musiengi uyesumba biguji.) 9Mugetu muisi Samarie amawivula Jesus rie: Mu mbari yi ndeʼ aguvu muJuif guipondili mamba? Gugejabi yiri nyiji muisi Samarie?
(BaJuif bagaa na yipoti na bisi Samarie.) 10Jesus amamugabusila rie: Mbe ndeʼ guijabi pegulu Nsambi na jandi oyivosi nagu rie: Peyi mamba! Ndeʼ beni mbe gumuvonda mamba na mbe oguvega mamba mamonyu.
11Mugetu amavosa nandi rie: Mulonsi, gugaa na yima uteyila mamba na yileka yivu yidonga kabogu agunyi gudilila mamba mamonyu? 12Taji etu Jacob amatuvega yileka yieyiyi. Jaʼ beni na baana bandi nesi migamba miandi, botsu bamanuanganga mamba meni. Ndeʼ guiviolili Jacob buneni?
13Jesus amamugabusila rie: Uotsu aguinu mamba memama omuegulu puila; 14tumba jandi ogunu mamba ama nyumuvega agomuegulu puila, via! Mu mbari mamba ama nyumuveganga moba ombu gandi nderi yileka ayivuvingi mamba mamonyu amovega monyu umutubu.
15Mugetu amamuvonda rie: Fumu peyi mamba meni yiri ngomuegulu puila mbana ngomueruga uyitega mamba.
16Jesus amamutsingula rie: Wenda noyenengila mulumi agu, dukatasuna vava.
17Mugetu amamugabusila rie: Ngaa na mulumi.
Jesus amamutsingula rie: Ndeʼ guna ndunga uvosa rie: Ngaa na mulumi. 18Mu mbari gumaleba na balumi baranu na aguna aguvu nagu namunyi agaa mulumi agu. Mu dionyi gutsivosa buranga. 19Mugetu amavosa rie: Mulonsi, nyilabi yiri guji mubiyitsi. 20Bataji betu bamasambililanga Nsambi o julu mukongu egugu tumba jenu baJuif duivosi yiri mbura jiusambilila Nsambi jivu o Jerusalem.
21Jesus amamutsingula rie: Mugetu, payili yitu mu mbari diweru diuruga adi bagomuesambilila Nsambi nesi va julu mukongu egugu nesi o Jemsalem. 22Jenu bisi Samarie duisambili agu dugejabi jetu baJuif tuisambili agu tuijabi; dugobutsu dumaruyila ombu baJuif. 23Tumba di weru diruyi na dimamga kala adi basambilitsi bangensa bosambililanga Taji na murima na ngensa mu mbari abana bavu basambilitsi aba Taji erondi. 24Nsambi Yinyunyi avu na jogu abemusambili bamusambilingi na murima uotsu na ngensa.
25Mugetu amamutsingula rie: Nyijabi Messie oruga (diwendi rie: Christ); ava oruyila otuvindiyila mambu motsu.
26Jesus amamutsingula rie: La menu anyivosi nagu.
27Vana temu eni badukitsi baJesus bamaruga, banolaba Jesus uvosa evosi na mugetu eni bamakambulu. Tumba ne mutu mosi asamawivula mugetu rie: Yi guirondi? Vo rie: Diambu yi guivosili nandi?
28Mbana mugetu amasila tsuva andi na amayenawenda o musiengi; amatsingula batu rie: 29Ruganu ulaba dibaala aditsinsingula motsu ama nyimavaganga; jandi agoba Christ?
30Bamarambuyila o musiengi na bamawenda ombu Jesus.
31Mu temu eni badukitsi bamagomanga Jesus uji novosa rie: Mulonsi, ji mua biguji.
32Tumba amabatsingula rie: Nyina biguji biuji abi jenu dugejabi. 33Kabogu badukitsi bamawivusana rie: Mutu atsimubeyila biguji?
34Jesus amabatsingula rie: Biguji biami la uvaga duganu dujandi omansindiga nodugusu yisalu yiandi. 35Jenu duivosi rie: Vakivu tsungi jina mbana tutsonsiga tumba nyidutsinguli rie: Labatianu manungi: biguji bimabueji, diweru diutsonsiga dimatola. 36Jandi oyitsonsiyi amakedilila futa andi mu mbari egukiyi dutsonsugu dumutubu. Diwendi rie: Jandi oyivari na jandi oyitsonsiyi bolaba nsangu va mosi. 37Kabogu Bisonu bivu ngensa abisonugu rie: Umosi evari na ususu etsonsiyi 38Nyimadusindiga utsonsiga abi jenu dusamasala; basusu bamasala na jenu dumakusuyila mu yisalu yiogu.
39Bisi Samarie bapuela abamatsana o musiengi eni bamavayila Jesus yitu mu mbari mugetu amavosa rie: Jandi atsinsingula motsu ama nyimavaganga. 40Ava bisi Samarie bamamurasunina bamamuwivula utsana nogu. Amatsana nogu bilumbu bibeji. 41Va julu vana basusu bapuela bamamuvayila yitu ava bamagululu ama jaʼ beni amavosanga. 42Bamavosa na mugetu rie: Tusamamuvayila yitu yika mu mbari gumavosa misamu miandi tumba tumamuvayila yitu mu mbari tumagulu mambu mandi na tuijabi yiri ngensa aji Mugobutsi ubisi bulongu.
Jesus ubelusa ebelusi muana uyivunda yibagora
43Bilumbu bieni bibeji binovioga Jesus amagusuga vana uwenda o Galilee. 44Amavosa rie: Mubiyitsi agegobusu o bulongu buandi. 45Ava amatolila o Galilee bisi Galilee bamamudila na buranga mu mbari ava bamabila o Jerusalem ukelisa feta Paque bamalaba motsu ama amavaga.
46Kabogu amagabusila o Cana o Galilee aguna amakalusila mamba malamu. Va Capernaum vamaba yivunda yibagora bakaga, muana andi amabelanga. 47Anogulu yiri Jesus amaruga o Judee o yiari yiGalilee amawenda ombu gandi na amamuwivula ugabuga o Capernaum uyebelusa muana andi agumaba bebcli nofu. 48Jesus amamuwivula rie: Gugorungula upayila yitu pa gugolaba bimaga na bilimba?
49Yivunda yibagora bakaga amamunengila rie: Mulonsi, ruga muana ami akekefuila.
50Jesus amamutsingula rie: Wenda, muana agu amabeluga. Kabogu amavayila diambu adi Jesus amamutsingula yitu na amayenawenda. 51Ava amawendilanga basalitsi bandi bamaruga umubengusana na bamamubeyila musamu egugu rie: Muana amabeluga.
52Amabawivula diweru dieni adi muana amabeluyila na bamamugabusila rie: Masiga ava murekumunu dibagu ditsisaguyila.
53Taji amajaba la diweru dieni adi Jesus amamutsingulila rie: Muana agu amabeluga. Jandi amavaga yitu va mosi na bisi ndagu andi botsu.
54Yimaga yieyiyi yimaba ayimubeji yiotsu ayi Jesus amaruyila o Judee o yiari yiGalilee.
Attualmente Selezionati:
Jean 4: PUU1992
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
La sainte Bible en langue Yipunu © Alliance Biblique du Cameroun, 1992.
