yuwana 15

asa 15

gwaɽe gwun gwiro gi ḏuɽuṯ na dɩrna

1nyi gwiro gwaɽe gwerkwe gwun gwiro gi ḏuɽuṯ, na baba gwinyi gwiro gwun gwaṯɩkade gi jaɽe. 2na dɩrna wei dun daṯɩje lugwi dun date daṯɩɽe no, duɽəga, na ḏɩrna wei dun ḏaṯiɽe dulmuje, kani ŋwuɽe nyaɽe nyutəno. 3nya liŋir nanu gwunnɩno ŋuɽun ŋe ŋun ŋuməḏɩjejɩŋe. 4jəḏəṯɩl lugwi, namɩni nyi gwajaḏaṯa lagalo. gwiro gi ḏɩrna ḏate ḏəṯi ŋɩma ḏaɽe kaja guŋun no, ḏa ḏate ḏimajaḏaṯa kwaɽe no, na nyaŋa dino ḏa nya late lɩmajaḏaṯa lugwi no. 5nyi gwiro gwaɽe gwun gwiro gi ḏuɽuṯ; na nyaŋa liro ḏɩrna. gwun gwajaḏaṯa lugwi na nyi gwajaḏaṯa lugwun, kweno gwaṯɩɽe nyaɽe nyutu, gi gwune ḏa nyalmouɽuni lugwi nya late ləṯi ŋɩma lape ŋɩdio ŋədi no. 6ḏa gwiji gwate majaḏaṯa lugwi no, ŋu gwawinini kaja gi ḏɩrna na gwuḏe; nalɩwəɽeice ldu nalɩgele kigo nalnuni. 7ḏa nyalmajaḏaṯa lugwi, na ŋuɽun ŋinyi ŋajaḏaṯa lagalo, bunyil lugwi ŋɩdio ŋun ŋɩbunyanyalo ŋajilərrɩjo. 8ḏa nyalmaṯɩɽe nyaɽe nyutu baba gwinyi mutəne ḏoɽeḏa ga, na dino nyalaro calɩmis jinyi. 9gi gwune əmɩnyi baba gwi, na dino nyi gwajəmɩnyi. jəḏəṯɩl gi ḏəmɩnyo ḏinyi. 10ḏa nyalmadɩme ŋuɽuna ŋinyi nyalajaḏaṯa gi ḏəmɩnyo ḏinyi, gwiro gi gwune nyi gwɩdɩmiḏi ŋuɽuna ŋeḏi baba gwinyi nijaḏaṯa gi ḏəmɩnyo ḏuŋun. 11nyi majuməḏɩjo ŋuɽuna ŋeno kani a ḏidila ganu ḏinyi je lagalo, na kani a ḏidila ganu ḏalo enyeḏe. 12ŋeno ŋiro ŋuɽun ŋinyi, nyaləmɩnyɩḏe lagaloŋu ŋɩmaga gi gwune əmɩnyeje. 13gwiji gwate gwede gwəṯi ḏəmɩnyo ḏutəno kworo kwe ḏa gwete mai gwan lɩmeḏin no. 14nyalaro lɩmaḏəri ḏa nyalmarre ŋuɽuna ŋun ŋuməḏɩjejɩŋe. 15nyi gwate gwaɽeico lɩwainy mɩna gwunnɩno no, gi gwune wainy gwate gwilɩŋiḏi ŋuɽuna ŋun ŋapɩlo gwele gwuŋun no; namɩni nyi gwaɽeico lɩmaḏəri, gi gwune nyi majaŋijo ŋuɽuna wei ŋun ŋidiŋɩnɩlo ḏi baba gwinyi. 16nyaŋa lədu liro lɩməṯɩnyi no, namɩni nyi gwiro gwun məṯaje na nyi gwajigɩḏi nyalwele nyalaɽe, na nyi məṯaje na nyi gwajigɩḏi kani a nyaɽe nyalo nyajaḏaṯa, na kani ŋuɽun wei ŋun ŋanyaŋɽoṯəḏɩjo babaŋ jiri je jinyi ŋajɩlḏəḏə. 17nyi gwuməḏɩjaje ŋuɽuna ŋeno kani nyəmɩnyɩḏa lagaloŋu ŋɩmaga.

gɩḏilio na gwuɽɩwə gwun gwiro gwerkwe

18ḏa gɩḏilio gɩmajidonye, nyamɩni lɩŋe gidonyiŋi gwerre gate gɩmajidonye no. 19ḏa nya leḏi gɩḏilio liro, na ŋaŋal gɩḏilio əmɩnyi. namɩni gi gwune nyaŋa lədu leḏi gɩḏilio no, namɩni nyiməṯaje kɩḏilio na dino gɩḏilio gajidonye. 20aḏɩŋanɩl ŋuɽuna ŋun ŋuməḏɩjejɩlo, wainy gwate gwiro gwubuṯano kwele gwuŋun no. ḏa lɩmiŋinḏagɩɽini, na lajɩnḏagɩɽini dino; na ḏa lɩmadɩme ŋuɽuna ŋinyi, na ŋalɩdɩme ŋalo dino. 21na ŋeno wei ŋajilərrɩjo gi jiri jinyi, gi gwune gwate gwilɩŋiḏɩlo gwun gwuwəjɩŋi no. 22ḏa nyi gwate gwumila niluməḏɩjo no, late laŋəṯi ŋuɽuna ŋun ŋɩki no, namɩni gwunnɩno late ləṯi gwaŋ gwəkɩɽɩbə ŋuɽuna ŋagin ŋun ŋɩki no. 23gwun gwinyidonye gwadonye babaŋ gwinyi dino. 24na ḏa nyi gwate manduji ŋɩru kɩlɩgi ganu lagin ŋun ŋate ŋɩmani gwiji ape gwiro kaja no, late ləṯi ŋuɽuna ŋɩki no; namɩni gwunnɩno lɩmaŋu nalmɩnyidonye na baba gwinyi dino. 25namɩni kani a ŋuɽun ṯɩmi ŋun ŋulinu ŋuɽun ŋagin ŋun ŋigelijɩlo elo musaŋ, luŋa linyidonye jai ŋuɽun ŋate ŋədi no.

26namɩni gwune nuwila gwun gwaṯɩmoɽe ganu gwun gwajiwəḏɩjo ḏi baba, gwuɽɩwə gwun gwiro gwerkwe gwun gwəduḏa ḏi baba ŋu gwinyiteije ga; 27na nyilteijo ga nyaŋa dino gi gwune iljo uro gwerre.

Attualmente Selezionati:

yuwana 15: OTR1966

Evidenziazioni

Copia