Logo YouVersion
Icona Cerca

Margus 2

2
Iŋir nono gwa kwiji gwina gwaio aŋina nono
1Ma ŋwamun coŋ erna, a Yasuuⓐ uni Kafranaaẖuum manaŋ; aldiŋini darnu gwijo dunu. 2An liji ela ganu, alauradha liduŋw loinyadho, aloinyadhe duna ditel, a kalo erna kour; ŋwulabiŋaijo dhuŋuna dha Kalo. 3Alela dugun, alupini kwijo gweta gwina gwaio aŋina nono, gwapo liji kworoŋo. 4Athilbuthi ŋoma duni dugun no, ŋinena jo liji loinyadho, alwala duna galo gi dhoda; ma lubiro je, aluleje lagram lina lidhirna kwiji gwina gwaio aŋina nono. 5A dina ma Yasuuⓐ aŋa imaan gwegen, ŋwabiŋaijo kwijo gwina gwaio aŋina nono, ŋwaici, Ŋari ŋai, nyi gwimadhudhani ganu ŋidi ŋuŋa ŋina ŋike. 6Abi jathib coŋ jijo mine jina jabiŋinu gi dugor ganu degen, alarnu, 7Kworaŋ abi kwiji ibigwa lo Kaloŋa? Ei gwuthi ŋoma gwadhudhani ganu ŋidi ŋina ŋike? Kalo getipo guthi ŋoma. 8An Yasuuⓐ liŋa gi dhigirim dhuŋun darnu labiŋinu minoŋ, ŋwulothaije galo, ŋwulaici, Kworaŋ athanya babiŋini minoŋ gi dugor ganu dalo? 9Aŋ gwijanu galo edeny dinyabiŋaijo kwijo gwina gwaio aŋina nono, nyaici, Nyi gwimadhudhani ganu ŋidi ŋuŋa ŋina ŋike; i dinyabiŋaijo, ŋaici, Diro, ŋapai lagram luŋa, ŋalela? 10Abi danya liŋa darnu Ŋari ŋa liji ŋuthi ŋoma mina kidhila ŋa dhidhudhani ganu ŋidi ŋina ŋike, (ŋwabiŋaijo kwijo gwina gwaio aŋina nono, ŋwaici,) 11Nyi gwa gwabiŋaijaŋa, ŋaici, Diro, ŋapai lagram luŋa, ŋalela dunu duguŋa. 12Ŋwundira ganu, ŋwapai lagram luŋun, ŋwutu gi je ganu degen peth; a liji peth ali galo dir, almajidhe Kaloŋa, alarnu, Anaŋa lati laŋadhi dhuŋuna dhiro minoŋ gatur no.
Dina ma Yasuuⓐ urnie Laawuŋw
13A muŋwtu manaŋ, ŋwela kimumu ga baẖr; a liji peth ela dugun, ŋwulalimiye. 14Dina idhuŋw, ŋwaŋa Laawuŋw gwina gwiro ŋari ŋa H̱alfa dijalo kalo ga dhimeje, ŋwabiŋaijo, ŋwaici, Gwujiny. Ŋwudire, ŋwugwuje. 15A ma Yasuuⓐ eny gi dunu gwa Laawi, a liji loinyadho lina lathimeje a lina like aljalo ko, liro lirin Yasuuⓐ ŋalai, a calmiz juŋun; liji lijo loinyadho, algwuje. 16Dina ma jathib a Farriisiyiin aŋa dileny liji lai lina lathimeje a lina like, alabiŋaijo calmiz juŋun, allaici, Kworaŋ athilbeny liji lai lina lathimeje a lina like? 17Ma Yasuuⓐ diŋini dhuŋuna ibidhe, ŋwulabiŋaijo, ŋwulaici, Liji lina liŋir nono lati lathibupe ẖakiim no, abi lina luma lathibupe. Nyi gwati gwiludhi durnie lijo lina liŋir no, nyi beladha dinyilurnie lina like dilurle dugore galo ŋidi ŋegen ŋina ŋike.
Othaije galo gwan dhuŋun dha dhijalo jamu
18A calmiz ja Yuuẖanna a ja Farriisiyiin jathijalo jamu ŋwamun ŋwamun; a liji ila di Yasuuⓐ alothaije galo, alaici, Kworaŋ athibi calmiz ja Yuuẖanna a ja Farriisiyiin jalo jamu, athibi calmiz juŋa jalo jamu gatur no? 19Al Yasuuⓐ abiŋaijo, ŋwulaici, Liji la kwoma gwa dhago luthi ŋoma lajalo jamu ŋinena jilo kwoma ŋalai gwa dhago a? Ŋinena jilo kwoma ŋalai gwa dhago, lati luthi ŋoma lajalo jamu no. 20Abi ŋwamun ŋwaji ŋwila ŋwina ŋwadhuŋw ŋwai kwoma gwa dhago upini degen, a liji lajalo jamu gi ŋwamun ibiŋwe. 21Kwiji gwate gwina gwathogira albatha ina iyaŋ gi luga lina lurun no; i albatha ina iyaŋ yathi ŋirithiye kiraŋa gina gurun, athi lubiro je libuthanu. 22A kwiji gwate gwina gwathibuluje ŋau ŋa dugur ŋina ŋiyaŋ gi nyilgu nyina nyurun no. Ada dhuŋun ibidhe dhimaje, athi ŋau ŋa dugur ŋina ŋiyaŋ kie nyilgu, athilbuludhe galo, a nyilgu nyake; abi ŋau ŋa dugur ŋina ŋiyaŋ aram algitini gi nyilgu nyina nyiyaŋ.
Othaije galo gwa dhaŋidhani lamun la Sabith akwai
23Gi lamun la Sabith a Yasuuⓐŋa ela gi dhiruiny ganu dha ŋwon; a dina idhilo athi calmiz juŋun agirthe ŋwona. 24A Farriisiyiin abiŋaijo, alaici, Aŋadhilo, lardhau albapai dhuŋuna gi lamun la Sabith dhina dhati dhaudhi gi dhuŋun dha naamuus no? 25Ŋwulabiŋaijo, ŋwulaici, Nyaŋa lati labiŋaijo dhuŋuna dha Daawud gatur no, ro dilaŋ ithilo jamu ganu liji lai luŋun na? 26Ŋwuni gi dunu gwa Kalo gi ŋwamun ŋwa Abiyaathaar, gwina gwiro kweleny gwa gusus, ŋweny ⓐesh ina yathi liji gitijo Kaloŋa, ina yati yaudhi dileny no, abi yan gusus dogo, ŋwudhedha ŋediŋaije lina lijil lai ko. 27Ŋwulabiŋaijo, ŋwulaici, Lamun la Sabith ligitinijo lijo, athibi liji gitinijo lamun la Sabith no. 28Minoŋ Ŋari ŋa liji ŋiro Kweleny gwa lamun la Sabith ko.

Attualmente Selezionati:

Margus 2: HBN

Evidenziazioni

Condividi

Copia

None

Vuoi avere le tue evidenziazioni salvate su tutti i tuoi dispositivi?Iscriviti o accedi