Margus 3
3
Iŋir nono gwa kwiji gweta gwina gwaio dhoi nono
1Ŋwuni majmaⓐ manaŋ; a kwiji gweta je mine gwina gwaio dhoi nono. 2Aldima Yasuuⓐuŋw, alari gwalaŋa ada gwimuŋwgeta momaŋ gi lamun la Sabith; dilteje galo. 3Ŋwabiŋaijo kwijo gwina gwaio dhoi nono, ŋwaici, Diro, ŋa dhuna keligeny ganu. 4Ŋwulothaije galo, ŋwulaici, Gwaudhi gi dhuŋun dha naamuus dapai dhuŋuna dhina dhiŋir gi ŋwamun ŋwa Sabith, i dapai dhuŋuna dhina dhike? dimidhiye, i dirinya? Albi jalo jigwoiny. 5Ŋwuldatiŋa galo, gwike dhugore degen, ŋwuke dhugore gi dhuŋun dha dugor degen dina dibur, ŋwabiŋaijo kwijo, ŋwaici, Wuli dhoi ganu; ŋwuwal dhoi ganu, ŋwiŋir nono ŋwuro ŋinena dhoi dhiter. 6An Farriisiyiin ela ganu, alabiŋaijiye liji lai la Hiiruudus, alari gwal rinya.
Ŋwugeta lijo loinyadho liter momaŋ
7Abi Yasuuⓐŋa ela calmiz jai juŋun kimumu ga baẖr; a liji loinyadho la Jaliil a la Yahuudiiya alligwujani. 8A liji loinyadho lina lidhi Urushaliim, a Aduumiiya, a kalo gina gijudhi Urdun kwereny, a S̱uur, a S̱iiduun, dina maldiŋini dhuŋuna dhinaŋ dhina dhapuŋw, alela dugun. 9Ŋwabiŋaijo calmiz juŋun ŋwari ladhuneje felluuka momaŋ gwina gwitiny, ŋinena jo liji loinyadho, ŋwekajo lijo dilupe nono. 10Gwigeto lijo loinyadho momaŋ; a liji peth lina luma athilila aldhithiŋa lijo, alari lal mini. 11Mathi nyuriny aŋa, athilide ŋwora ganu, alure gwula, alaici, Ŋa gwiro Ŋari ŋa Kalo. 12Ŋwulabiŋaijo gwuleny, ŋwulaici, Athinyiluŋio no.
Yasuuⓐ gwuthinu calmiz ganu juŋun jina jiro die‐a‐ram
13A dina udhuŋw len nono, ŋwurnie lijo lina libupuŋwulo; alela dugun. 14Ŋwuluthini ganu, ŋwulago die‐a‐ram, athil gwudhie, athuŋwul ukeje dabiŋaijo lijo dhuŋuna dha Kalo. 15Aluthi ŋelenya ŋa dhigeta lijo momaŋ lina luthi gumiye gitigiter, a ŋa dhiteye nyurinya. 16Ŋwudhedha Simⓐaanuŋw jiriny jan Buṯrus. 17Ŋwudhedha Yaⓐguubuŋw gwina gwiro ŋari ŋa Zabadi, a Yuuẖanna gwina gwiro megen gwa Yaⓐguubŋa; ŋwuldhedha jiriny jan Buwaanarjis, jina juthi maⓐna jan Keleŋa ga Lirainy. 18A Andaraawus, a Fiilibbus, a Barthuulamaawus, a Matta, a Tuuma, a Yaⓐguub gwina gwiro ŋari ŋa H̱alfa, a Taddaawus, a Simⓐaan gwina gwiro kwiji gwa Kanⓐaan. 19A Yahuudha al Iskharyuuṯi, gwina gwimaji ŋwunugejie; aluni gi dunu gweta.
Al Yasuuⓐ abiŋaijo, ŋwulaici, Nyaŋa larnu nyi gwiteyo nyurinya ŋoma ŋai ŋa Ibliis
20A liji loinyadho auradha liduŋw manaŋ, athil uthi ŋoma leny no. 21A dina ma limedhigen diŋini, alela alari gwalmutha; ŋinena alarnu, Gwirero. 22A jathib jina jidhi Urushaliim alarnu, Gwuthi Baⓐlazabuul, ŋwuteye nyurinya ŋoma ŋai ŋa kweleny gwa nyuriny. 23Ŋwulurnie ŋwari lela dugun, ŋwulodaijo, ŋwulaici, Sheṯaan gwuthi ŋoma gwateye Sheṯaanuŋw akwai? 24A ada gidhila geta gimorlaiji ganu, a gidhila ibige gati gaje no. 25A ada liji la dunu gweta limorlaiji ganu, a dunu ibigwe gwati gwaje no. 26A ada Sheṯaan gwimorlani ganu gwidom gwuŋun, ŋwuruje ganu ram, gwati gwuthi ŋoma duŋwje no, abi gwaji gwerna. 27Kwiji gwati gwuthi ŋoma gwuni gi dunu gwa kwiji gwina gwibur nono, ŋwapai ŋida ŋuŋun ŋwuramai no, ada gwati gwimuŋwguke kwereny no; ada gwimuŋwguke kwereny gwuthi ŋoma gwapai ŋida ŋuŋun ŋwuramai. 28Titiganu nyi gwa gwacaijinu, Ŋidi peth ŋina ŋike ŋadhudhanini ganu di keleŋa ga liji, a dhuŋun dha dhilo dhina dhathil dhilo. 29Abi ada kwiji gweta gwimalo Dhigirima dhina Dhiŋir gwati gwuthi dhudhanuŋw ganu gatur no, abi gwaje githo gi ẖukm gwina gwaji gwaje gwortal. 30Ŋinena alarnu, Gwuthi ŋurinya.
Limaguri titiganu
31A limegen a nana gwuŋun alila, aldhuna por, alukeje gweta dugun duŋwurnia. 32A liji loinyadho urejo galo, alabiŋaijo, alaici, Aŋadhi, nana gwuŋa a limagalo lo por, libupaŋa. 33Ŋwulabiŋaijo, ŋwulaici, Eibi gwiro nana gwiny a limaguri? 34Ŋwudatiŋa galo lina lurejo galo, ŋwarnu, Aŋadhul, nana gwiny gwiro ibigwa a limaguri. 35Gwina gwathapai dhuŋuna dhina dhibupo Kalo, ŋeda gwiro maguri gwina gwiro kwoma, a gwina gwiro ŋera, a nana gwiny.
Attualmente Selezionati:
Margus 3: HBN
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
First published by the British and Foreign Bible Society in 1966.
