यूहन्ना 7

यीशु होर तेइरै भाई

1इन्हां गैला न बाद यीशु गलील ज़िलै न फिरदै रौहै; होर सौ यहूदिया देशा न ज़ाणा नी ती च़ाँहदै। किबैकि तौखै यहूदी नेता यीशु बै मारनै रा तरकीब सोच़दै लागै ती, तैबै यीशु यहूदिया देशा न ज़ाणा नी ती च़ाँहदै। 2होर यहूदी लोकै रै तोम्बू रा त्यौहार#7:2 ऐ त्यौहार तिन्हां बै ऐ याद दिला ती, कि तिन्हरै बुजुर्ग चाल़ी बौर्षा तक बौणा न रौहै। ऐ त्यौहार फसह रै छौ म्हीनै बाद मना ती, होर औठ म्हीनै तक च़ला ती। नेड़े ती। 3तैबै यीशु रै भाइयै तिन्हां बै बोलू, “औखै मता रुका, यहूदिया देशा रै त्यौहारा बै ज़ा, कि ज़ो चमत्कारा रै कोम तू केरा सा तिन्हां बै तेरै च़ेले भी तौखै हेरलै। 4किबैकि ऐण्ढा कोई नी ऑथि ज़ो मशहूर होंणा चाहा सा, होर गोजुईया कोम केरला। अगर तू ऐ कोम केरा सा, ता आपणै आपा बै दुनिया रै लोका बै रिहा।” 5किबैकि यीशु रै भाई भी तिन्हां पैंधै बशाह नी ती केरदै।

6तैबै यीशुऐ तिन्हां बै बोलू, “मेरा ज़ाणै रा सही बौगत हाज़ी तैंईंयैं नैंई आऊ, पर तुसै ता कैधी भी जाई सका सी। 7ऐ दुनिया रै लोका तुसा सैंघै बैर नैंई केरी सकदै, पर सौ मूँ सैंघै बैर डाआ सा किबैकि हांऊँ तिन्हां बै दसा सा तै बुरै कोम केरा सी। 8तुसै त्यौहारा न ज़ाआत्; मूँ ऐबै त्यौहारा बै नी ज़ाणा, किबैकि हाज़ी तैंईंयैं मेरै ज़ाणै रा सही बौगत नी हुआ।” 9यीशुऐ तिन्हां बै ऐ गैला बोलिया गलील ज़िला न रौहै।

झोंपड़ी रै त्यौहारा न यीशु

10पर ज़ैबै तेइरै भाई त्यौहारा न नौठै ता यीशु भी, सामनै नैंई पर गोजुईया नौठै। 11यहूदी नेता त्यौहारा न यीशु बै ऐ बोलिया तोपदै लागै, “सौ कौखै सा?” 12होर मांहणु मौंझ़ै यीशु रै बारै न शुड्क बोहू गैला हुई, किछ़ बोलदै लागै, “सौ खरा मांहणु सा।” होर किछ़ बोलदै लागै, “नैंई सौ ता मांहणु बै भरमा सा।” 13तैबै भी यहूदी नेतै री डौरै रै मारै कोई मांहणु यीशु रै बारै न शोभली गैला खुलिया नैंई ती बोलदै।

त्यौहारा न यीशु रा उपदेश

14त्यौहारा रै रोज़ा मौंझ़ै नौठा; ता यीशु मन्दिरा रै ब्राम्दै न जाईया वचन शूणान्दै लागै। 15तैबै यहूदी नेतै हैरान होईया बोलू, “ऐईबै बिना पौढ़िआ ऐ पवित्र शास्त्रा री ज्ञान बिद्या कौखै न आई?”

16तैबै यीशुऐ तिन्हां बै ज़वाब धिना, “मेरा उपदेश नैंई, पर मेरै भेजणु आल़ै री सा। 17अगर कोई तेइरी इच्छा पैंधै च़लणा च़ाहला, ता सौ ऐई उपदेशा रै बारै न ज़ाणला कि ऐ परमेश्वरा री तरफा न सा या हांऊँ आपु धिरै न बोला सा। 18ज़ो आपु धिरै न किछ़ बोला सा, सौ आपणी सराउथी केरा सा; पर ज़ो आपणै भेजणु आल़ै री सराउथी केरा सा सौ मांहणु सच़ा सा, होर तेईन कोई पाप नी ऑथि। 19मूसै तुसाबै बिधान धिनु सा, तैबै बी तुसा न कोई बी तेई बिधाना पैंधै नैंई च़लदै। बल्कि तुसै मुँभै मारणा चाहा सी।” 20लोकै ज़वाब धिना, “तौ न कोई बुरी आत्मा सा! कुण तुसाबै मारणा चाहा सी?”

21यीशुऐ तिन्हां बै बोलू, “मैं एक कोम केरू, होर तुसै सारै हैरान होआ सी। 22तैबै मूसै बै खतना केरनै री हुक्म धिनी सा (ऐ न कि सौ मूसा री धिरै न सा, पर ऐ हुक्म पिछ़ै न आऊ सा), होर तुसै बशाँ रै ध्याड़ै मांहणु रा खतना केरा सी। 23ज़ैबै बशाँ रै ध्याड़ै न मांहणु रा खतना केरा सी, तैबै मूसै रै बिधाना रा हुक्म खत्म नी होली, ता तुसै मूँ पैंधै किबै तैबै मिश केरा सी कि मैं बशाँ रै ध्याड़ै एक मांहणु खरी तैरहै ठीक केरू? 24मुँह हेरी न्याय मता केरा, पर ठीक–ठीक न्याय केरा।”

कि यीशु ही मसीह सा?

25तैबै किछ़ यरूश्लेम शैहरा न रौहणु आल़ै लोका बोल्दै लागै, “कि ऐ सौऐ नी ऑथि ज़ुणिबै मारणै री कोशिश केरनी लाई सा? 26पर हेरा, सौ ता सैभी रै सामने गैला केरदा लागा सा होर कोई अधिकारी तेइबै किछ़ निसी रै बोली कि तिन्हें सच़-सच़ ज़ाणू सा कि ऐही मसीह सा? 27ऐ मसीह कैण्ढै होई सका सा? किबैकि आसै ज़ाणा सी कि सौ कौखला सा, पर मसीह ज़ैबै एला ता कोई नी ज़ाणना कि सौ कौखला सा।”

28तैबै यीशु मन्दिरा रै ब्राम्दै न उपदेश देंदी घेरै ज़ोरै सैंघै बोलू, “तुसै मुँभै ज़ाणा सी कि हांऊँ कौखला सा? हांऊँ आपुऐ नैंई आऊ, पर मेरा भेजणु आल़ा सच़ा सा, तेइबै तुसै नी ज़ाणदै। 29पर हांऊँ तेइबै ज़ाणा सा किबैकि हांऊँ तेइरी धिरै न सा होर तेइयै हांऊँ भेज़ु सा।”

30यहूदी नेता यीशु बै ढौकणा चाहा ती, पर कोई यीशु बै ढौकि नी सके किबैकि तेइरै मौरनै रा बौगत हाज़ी नी ती आऊ ऑथि 31तैबै भी भिड़ा न बोहू मांहणुऐ यीशु पैंधै बशाह केरू, होर बोल्दै लागै, “मसीह ज़ैबै एला, ता कि ऐईन भी चमत्कारा रै कोम रिहाणै ज़ो ऐईयै रिहाऐ?”

यीशु बै ढोकणै री कोशिश

32फरीसियै लोका यीशु रै बारै न ऐ गैला चु़पचाप केरदै शुणै, होर मुख्यपुरोहिते होर फरीसियै यीशु बै ढौकणै री तैंईंयैं सपाई भेज़ै।

33तैबै यीशुऐ बोलू, “हांऊँ थोड़ी देरी तैंईंयैं तुसा सैंघै सा फिरी आपणै भेजणु आल़ै हागै बै वापस ज़ाणा। 34तुसा हांऊँ तोपणा, पर नी पाणा, होर ज़ौखै हांऊँ सा, तौखै तुसै नी एज़ी सकदै।”

35यहूदी नेतै आपु न एकी दूज़ै सैंघै ढूणिदै लागै, “ऐई कौखै ज़ाणा कि आसाबै नैंई मिलणा? कि सौ तिन्हां यहूदी लोका हागै बै जाला ज़ो यूनानी शैहरा न लग-लग होईया रौहा सी, होर तिन्हां बै भी सिखाणा चाहा सा? 36ऐथा रा कि मतलब सा ज़ो गैला तेइयै बोली, कि तुसा हांऊँ तोपणा पर नी पाणा, होर ज़ौखै हांऊँ सा, तौखै तुसै नी एज़ी सकदै?”

ज़िन्दगी री पाणी री नौई

37त्यौहारा रा आखरी रोज़ ज़ो खास रोज़ होआ ती। तेई रोज़ यीशु खड़ा हुआ होर जौरे सैंघै बोलू, “अगर कोई शौखा सा ता मूँ हागै एज़िया पिया। 38ज़ो मूँ पैंधै बशाह केरला, ज़ैण्ढा पवित्र शास्त्रा न लिखुंदा सा, तेई रै दिला न ज़िन्दगी देणु आल़ी पाणी री नोई बौहन्दी रौहणा।” 39यीशुऐ ऐ गैला पवित्र आत्मा रै बारै न बोलू ती, ज़ो तेई पैंधै बशाह केरनु आल़ै पाणु आल़ै ती। किबैकि आत्मा हाज़ी तैंईंयैं कोई पैंधै नी उतरी ती, किबैकि यीशु हाज़ी तैंईंयैं आपणी महिमा तैंईंयैं नी पूज़ै ती। 40तैबै भिड़ा न कोई-कोइयै ऐ गैला शुणिया बोलू, “सच़िऐ ऐ मांहणु सौ भविष्यवाणी केरनु आल़ा सा।” ज़ुणिरै ऐणै रा आसै इंतज़ार केरदै लागै सी। 41होरी लोकै बोलू, “ऐ ता मसीह सा।” पर कोइयै बोलू, “मसीह कि गलील ज़िलै न ऐणा?” 42कि पबित्र शास्त्रा न लिखुन्दा सा, कि मसीह दाऊदै रै खानदाना न होर बैतलैहम ग्राँ न ऐणा, ज़ौखै दाऊद रौहा ती? 43इन्हां गैला री बजहा सैंघै लोका मौंझ़ै लड़ाई पौई। 44तिन्हां न किछ़ यीशु बै ढौकणा चाहा ती, पर कोइयै तिन्हां बै हौथ नी लाऊ।

यहूदी मुख्य रा बशाह नैंई केरना

45तैबै सपाई मुख्यपुरोहिते होर फरीसी हागै बै वापस आऐ तिन्हैं सपाई बै बोलू “तुसै सौ किबै नी ढौकु?” 46सपाईए ज़वाब धिना, “कोई मांहणुऐ कैधी ऐण्ढी नौखी गैला नी केरी।” 47फरीसियै तिन्हां बै ज़वाब धिना, “कि तुसै भी भरमाउन्दै सी। 48कि यहूदी मुखिया होर फरीसी अधिकारी मौंझ़ै न कोई ऐ तेई पैंधै बशाह केरू सा? 49पर ऐ लोका ज़ो मूसै रा बिधान नी ज़ाणदै, सौहै यीशु पैंधै बशाह केरा सी। परमेश्वरा रा श्राप इन्हां लोका पैंधै सा।” 50निकुदेमुसऐ, ज़ो पैहलै तेई हागै आऊ ती होर ज़ो फरीसी मौंझ़ै एक ती, तेइयै बोलू, 51“कि आसरा यहूदी बिधान कोई मांहणु बै, ज़ाँ तैंईंयैं पैहलै तेइरी शुणीयां ज़ाणी नी लेंन्दे कि सौ कि केरा सा, सज़ा देआ सा?” 52तिन्हैं तेइबै ज़वाब धिनु, “कि तू भी गलील ज़िलै रा सा? पवित्र शास्त्रा न जाईया तोप होर तैबै तौभै लागणा कि गलील ज़िलै न कोई भविष्यवाणी केरनु आल़ा प्रकट नैंई होंणा।” 53तैबै सैभ कोई आपणै-आपणै घौरा बै नौठै।

Attualmente Selezionati:

यूहन्ना 7: KFX-NT

Evidenziazioni

Copia