यूहन्ना 8

व्यभिचारिणी बेटड़ी बै माफ़ी

1पर यीशु होर तेइरै च़ेले जैतूनै री उथड़ी ज़ैगा पैंधै नौठै। 2आगलै रोज़ दोथी ज़ैबै यीशु वापस मन्दिरा न आऐ, बोहू सारै मांहणु यीशु हागै आऐ होर यीशु बैशिया तिन्हां बै उपदेश शूणादै लागै। 3तैबै शास्त्री होर फरीसियै लोकै एक बेटड़ी आंणी ज़ो बूरै कोमा न ढौकी ती। होर तैसा बै बिच़ा न खड़ी केरिया यीशु बै बोलू, 4“ओ गुरू, ऐ बेटड़ी आसै होरी मर्दा सैंघै बुरै कोम केरदी ढौकी सा। 5मूसै रै बिधाना न मूसै आसाबै हुक्म धिना सा कि ऐण्ढी बेटड़ी बै पात्थरै लाईया बाहणी; तैबै तुसै ऐसा बेटड़ी रै बारै न कि बोला सी?” 6तिन्हैं यीशु बै परखणै री तैंईंयैं ऐ गैल बोली ती ताकि तेसा पैंधै दोष लागणै री तैंईंयैं कोई गलती पालै, पर यीशु टुँबड़ै होईया गुठी लाईया ज़मीना पैंधै लिखदै लागै। 7ज़ैबै ते तिन्हां न पुच्छदे रौहै, ता यीशुऐ सीधा होईया ऐ ज़वाब धिना, “तुसा मौन्झा न ज़ुण पापी नी होला, सौहै पैहलै पात्थर मारला।” 8होर फिरी टुँबड़ै होईया ज़मीना पैंधै गुठी लाइया लिखदै लागै। 9पर तैआ ऐ शुणिया बड़ै न लेइया होछ़ै तैंईंयैं एक-एक केरिया निकतै, किबैकि तै ज़ाणा ती कि तै पापी सी, तैबै यीशु तौखै केल्है रौहै, होर बेटड़ी बिच़ा न खड़ी रौही। 10यीशुऐ खड़ै होईया तेसा बै बोलू, “ओ बेटड़ियै, सैभ कौखै बै नौठै? कि कोइयै तौ पैंधै सज़ै री हुक्म नी धिना।” 11तेसै बेटड़ी बोलू, “ओ गुरू, कोइयै नैंई धिनी” यीशुऐ बोलू, “हांऊँ भी तौ पैंधै सज़ा रा हुक्म नी देंदा, ज़ा होर दुजिये पाप हेरी केरदी।”

यीशु दुनिया रा प्याशा सा

12यीशुऐ लोका बै बोलू, “दुनिया रा प्याशा हांऊँ सा, ज़ुण मूँ पिछ़ै औंढा सा सौ निहारै न नी होंदा, पर तेई ज़िन्दगी देणु आल़ा प्याशा पाणा।”

13फरीसियै यीशु बै बोलू, “तू आपणी गुआही आपु देआ सा, तेरी गुआही सच़ी नैंई ऑथि।”

14यीशुऐ तिन्हां बै ज़वाब धिना, “चाऐ हांऊँ आपणी गुआही आपुऐ देआ सा, तैबै भी मेरी गुआही सच़ी सा। किबैकि हांऊँ ज़ाणा सा कि हांऊँ कौखै न आऊ सा होर कौखै बै ज़ा सा? पर तुसै नी ज़ाणदै कि हांऊँ कौखै न एज़ा सा होर कौखै बै ज़ा सा? 15मुँह हेरी न्याय मता केरा, पर ठीक–ठीक न्याय केरा। 16होर अगर हांऊँ न्याय केरनु भी, ता मेरा न्याय सच़ा सा किबैकि हांऊँ केल्हा नैंई होर ज़ुणियै हांऊँ भेजुन्दा सा। 17तुसा रै मूसै रै बिधाना न भी लिखू सा कि दुई मांहणु री गुआही मिलिया सच़ी होआ सा; 18एक ता हांऊँ आपुऐ आपणी गुआही देआ सा, होर बापू परमेश्वर बी मेरी गुआही देआ सा ज़ुणियै हांऊँ भेज़ू सा।”

19तिन्हैं यीशु न पुछ़ु, “तेरा बापू कौखै सा?” यीशुऐ उतर धिना, “न तुसै मुँभै ज़ाणदै ता न मेरै बापू बै अगर तुसै ज़ाणदै ता मेरै बापू बै भी ज़ाणदै।” 20ऐ गैला यीशुऐ मन्दिरा रै ब्राम्दै न उपदेश देंदी घेरै भण्डार घौरा न बोली, होर कोइयै यीशु नैंई ढौकू, किबैकि तिन्हरा दुःख सौहिया मौरनै रा सही बौगत हाज़ी तैंईंयैं नी ती आऊ ऑथि।

आपणै बारै न यीशु रा बोलणा

21यीशुऐ तिन्हां बै भी बोलू, “हांऊँ ज़ा, सा, होर तुसा हांऊँ तोपणा होर आपणै पापा न मौरणा; ज़ौखै हांऊँ ज़ा सा, तौखै तुसै नी एज़ी सकदै।”

22तुंई पैंधै यहूदी नेतै बोलू, “कोइँछ़ै सौ आपु बै ता नैंई मारला, ज़ौखै हांऊँ ज़ा सा तौखै तुसै नी एज़ी सकदै।”

23यीशुऐ तिन्हां बै बोलू, “तुसै ऐसा धौरती रै सी, पर हांऊँ स्वर्गा न आऊ सा। तुसै दुनिया रै सी, हांऊँ दुनिया रा नी ऑथि। 24तैबै मैं तुसाबै बोलू ती, कि तुसै आपणै पापा न मौरणा, किबैकि अगर तुसै बशाह नी केरदै कि हांऊँ सौहै सा ता आपणै पापा न मौरणा।”

25यहूदी नेतै यीशु बै पुछ़ू, “तू कुण सा?” यीशुऐ तिन्हां बै बोलू, सौहै ज़ो शुरू न तुसाबै बोलदा लागा सा। 26“तुसरै बारै न मुँभै बोहू किछ़ बोलणा सा, होर न्याय केरना सा, फिरी भी मेरा भेजणु आल़ा सच़ा सा, होर ज़ो मैं तिन्हां न शुणु सा सौहै दुनिया रै लोका बै बोला सा।”

27तिन्हैं ऐ नी बुझू यीशु तिन्हां सैंघै बापू परमेश्वरा रै बारै न बोला सा। 28तैबै यीशुऐ बोलू, “ज़ैबै तुसै हांऊँ मांहणु रै बेटै बै उथड़ै पैंधै चढ़ालै, ता तुसा ज़ाणना सा कि हांऊँ सौऐ सा, हांऊँ आपणै आपा न किछ़ नी केरदा, पर ज़ैण्ढै मेरै बापूऐ मुँभै सिखाऊंदा सा, तैण्ढै हांऊँ ऐ गैला बोला सा। 29मुँभै भेजणु आल़ा मूँ सैंघै सा, तिन्हैं हांऊँ केल्है नी छ़ौड़ु, किबैकि हांऊँ हमेशा सौऐ केरा सा ज़ुणीन मेरा भेजणु आल़ा खुश होआ सा।” 30ज़ैण्ढै यीशु ऐ गैला बोलदै लागै ती कि कई मांहणुऐ यीशु पैंधै बशाह केरू।

सच़ाई तुसै आज़ाद केरनै

31तैबै यीशुऐ ज़ुणियै पैंधै बशाह केरू ती, तिन्हां यहूदी बै बोलू, “अगर तुसै मेरै बचना रै मुताबक चललै, ता सच़ीऐ तुसै मेरै च़ेले बैणना। 32तुसा सच़ जाण न, होर सच़ा तुसाबै आज़ादी देणी।”

33तिन्हैं यीशु बै बोलू, “आसै ता अब्राहमै रै खानदाना रै सी, होर कैधी भी कोई रै दास नी हुऐ तैबै तू कैण्ढै बोला सा कि तुसै आज़ाद होंणा सा?”

34यीशुऐ तिन्हां बै बोलू, “हांऊँ तुसाबै सच़-सच़ बोला सा कि ज़ो कोई पाप केरा सा सौऐ पापा रा गुलाम सा। 35नोकर हमेशा घौरा नी रौंहदै; बेटा हमेशा रौहा सा। 36तैबै अगर बेटा तुसाबै आज़ाद केरला, ता सच़ा न तुसा आज़ाद होंणा सा। 37हांऊँ ज़ाणा सा कि तुसै अब्राहमा रै खानदाना रै सी, तैबै भी मेरा वचन तुसरै दिला न ज़ैगा नी पाँदा, तैबै तुसै मुँभै मारणा चाहा सी। 38हांऊँ सौहै बोला सा, ज़ैबै हांऊँ आपणै बापू हागै ती, ज़ो गैला मैं हेरी ती, होर तुसै भी सौ ऐ केरा सी ज़ो तुसै आपणै बापू न शुणु सा।” 39तिन्हैं यीशु बै ज़वाब धिना, “आसरा बापू ता अब्राहम सा।” यीशुऐ तिन्हां बै बोलू, “अगर तुसै अब्राहमै री औलाद होंदै, तैबै अब्राहमै रै बराबरा कोम केरदै, 40पर ऐबै तुसै मुँभै मारणा चाहा सी, मैं तुसाबै सच़ा वचन दसु ज़ो मैं परमेश्वरा न शुणु ती। ऐण्ढा ता अब्राहमै नी केरू ती। 41तुसै आपणै बापू रै बराबर कोम केरा सी।” तिन्हैं यीशु बै बोलू, “आसै व्यभिचारा न पैदा नैंई हुऐ सी, आसरा एकै बापू सा मतलब परमेश्वर।”

42यीशुऐ तिन्हां बै बोलू, “अगर परमेश्वर तुसरा बापू होंदा ता तुसा मूँ सैंघै झ़ुरी डाहणी ती; किबैकि हांऊँ परमेश्वरै री धिरै न आऊ सा। हांऊँ आपु धिरै न नी आऊ सा, पर तिन्हैं हांऊँ भेज़ू सा। 43तुसै मेरी गैला किबै नैंई बूझदै? किबैकि तुसै मेरै गैला शुणी नैंई सकदै। 44तुसै आपणै बापू शैताना री धिरै न सी, होर आपणै बापू री लालसा बै पूरा केरना चाहा सी। सौ ता पैहलै न ओरै खूनी सा होर सच़ा पैंधै नी टिकू, किबैकि सच़ तेईन नैंई ऑथि। ज़ैबै सौ झूठ बोला सा, ता आपणै आदता सैंघै बोला सा, किबैकि सौ झूठा सा, मतलब झूठा रा बापू सा। 45हांऊँ सच़ बोला सा, तैबै तुसै मूँ पैंधै बशाह नी केरदै। 46तुसा मौंझ़ै कुण मुँभै पापी ठहरा सा? अगर हांऊँ सच़ बोला सा, ता तुसै मेरा बशाह किबै नी केरदै? 47ज़ो कोई परमेश्वरा रा होआ सा, सौ परमेश्वरै री गैला शुणा सा; होर तुसै तैबै नी शुणदै कि तुसै परमेश्वरै री धिरै न नैंई ऑथि।”

यीशु होर अब्राहम

48ऐ शुणिया यहूदी नेतै यीशु बै बोलू, “आसै ठीक बोला सी कि तू सामरी शैहरा रा सा, होर तौ न बुरी आत्मा सा?”

49यीशुऐ ज़वाब धिना, “मूँ न बुरी आत्मा नैंई ऑथि, पर हांऊँ आपणै बापू रा आदर केरा सा। 50पर हांऊँ आपणी सराउथी नैंई च़ाँहदा, हाँ पर एक सा ज़ो मेरी सराउथी चाहा सा, होर सौहै न्याय केरा सा। 51हांऊँ तुसाबै सच़-सच़ बोला सा अगर कोई मांहणु मेरै वचना पैंधै च़ला सा, ता तेई हमेशे री तैंईंयैं मौऊत भी नैंई हेरणी।”

52यहूदियै नेतै यीशु बै बोलू, “ऐबै आसै ज़ाणू कि तौ न बुरी आत्मा सा, अब्राहम मौरूदा सा, होर भविष्यवाणी केरनु आल़ै भी मौरे सी, होर तू बोला सा, ज़ुण मेरै वचना पैंधै च़लला ता तेई कैधी नी मौरना। 53आसरा बापू अब्राहम ता मौरू सा कि तू तेईन भी बड़ा सा? होर भविष्यवाणी केरनु आल़ै भी मौरै सी तू आपणै आपा बै कि बुझा सा?”

54यीशुऐ ज़वाब धिना, “अगर हांऊँ आपणी सराउथी आपुऐ केरनु ता, मेरी किछ़ सराउथी नी ऑथि, पर ज़ो मेरी सराउथी केरनु आल़ै मेरा बापू सा। ज़ौसबै तुसै बोला सी कि सौ तुसरा परमेश्वर सा। 55तुसै ता सौ ज़ाणू नी। पर हांऊँ तेइबै ज़ाणा सा, अगर हांऊँ बोलनू कि हांऊँ तेइबै नी ज़ाणदा ता मुँबी तुसा सांही झ़ूठै बणना, हांऊँ तेइबै ज़ाणा सा होर तेई रै बचना पैंधै च़ला सा। 56तुसरा बुज़ुर्ग अब्राहम मुँभै हेरणै री आशा न बोहू खुश ती, तेइयै हेरू होर खुशी मनाई।”

57यहूदी नेतै यीशु बै बोलू, “हाज़ी तैंईंयैं तू पजाह बौर्षा रा नैंई तैबै भी तैं अब्राहम हेरू सा?”

58यीशुऐ तिन्हां बै बोलू, “हांऊँ तुसाबै सच़-सच़ बोला सा, कि अब्राहम न पैहलै पैदा हुआ हांऊँ ती।” 59तैबै तिन्हैं यीशु बै मारणै री तैंईंयैं पात्थर च़कै, पर यीशु तिन्हरी नज़री न गोजुईया मन्दिरा न निकतै।

Attualmente Selezionati:

यूहन्ना 8: KFX-NT

Evidenziazioni

Copia