Matayo 21

Yesu ashika i Yerusalemu, ari ku nyana y’indogoba

1 # Mrk 11:1-10; Luk 19:29-38; Yoh 12:12-19. Bageze hafi y’i Yerusalemu, bashikira i Betifage ku musozi wa Elayono, Yesu atuma abigishwa babiri, 2arababarira, ati Mugende mur’ iriya mihana ir’ imbere yanyu, muca mubona indogoba iziritseho n’inyana yayo; muziziture, muzinzanire. 3#Mat 26:18.Ni hagira ūbabaza, mumubgire, muti Databuja ni we azigomba. Aca azirungika. 4Ivyo vyabayeho ngw ivyavuzwe n’uwavugishwa n’Imana bishike,

5 # Zek 9:9; Yes 62:11. ngo Mubgire umukobga w’i Siyoni,

Muti Rāba, Umwami wawe aje kuri wewe,

Ar’ umutekerezi, agendera ku ndogoba,

Mbere ni ku mukangara, inyana y’indogoba.

6Abigishwa baragenda, babigenza nk’uko Yesu yababgiye, 7bazana indogoba n’inyana yayo, bazisasakw impuzu zabo, yicarako. 8#2 Abam 9:13.Abenshi mw ishengero basasa impuzu zabo mu nzira, abandi baca amashami y’ibiti, bayasasa mu nzira. 9#Zab 118:25, 26; 2 Sam 14:4.Kand’ ishengero rimugiye imbere n’irimukurikiye rirasemerera, riti Hoziyana, mwana wa Dawidi, hashemezwe ūje mw izina ry’Uhoraho, hoziyana mw ijuru. 10Ashitse i Yerusalemu, igisagara cose kirashwabaduka, barabaza, bat’ Uyo ni nde? 11#Mat 21:46.Abo mw ishengero barabishura, bat’ Uyo n’ūvugishwa n’Imana, Yesu w’i Nazareti i Galilaya.

Yesu yirukana abahumanya urusengero

12 # Mrk 11:11-24; Luk 19:45-48; Yoh 2:14-16. Yesu yinjira mu rusengero rw’Imana, ahindira hanze abadandariza mu rusengero n’abaruguriramwo bose, ahenura ameza y’abavunja amahera n’intebe z’abāriko baragurwakw inuma. 13#Yes 56:7; Yer 7:11.Arababgira, ati Handitswe ngw Ingoro yanje izokwitwa inzu yo gusengeramwo, ariko mwebge mwayihinduye nk’isenga ry’abambuzi.

14Maz’ impumyi n’abacumbagira baza kuri we mu rusengero, arabakiza. 15#Zab 118:25.Abaherezi bakuru n’abanyabgenge b’ivyanditswe babonye ibitangaza akoze, n’abana basemererera mu rusengero, ngo Hoziyana mwana wa Dawidi; baritonganya, 16#Zab 8:2.baramubaza, bat’ Urumva ivyo bavuga? Yesu arabishura, at’ Ego me; nta ho murasoma, ngo Mu kanwa k’abana bato n’abonka waroranijemw’ ishimwe? 17Abasigaho, asokoroka mu gisagara, aja i Betaniya, arārayo.

Yesu avuma umusukoni

18Kare mu gatondo arikw arasubira mu gisagara, yumva arashonje. 19#Luk 13:6.Abonye umusukoni ku nzira, arawēgēra, ntiyagira ico awubonako, atar’ amababi gusa, arawubarira, ati Ntugapfe wamye insukoni uhereye ubu ugashitsa ibihe bidashira. Uwo musukoni uca ukabirana uwo mwanya. 20Abigishwa babibonye, baratangara, bati Mbeg’ uyu musukoni uyu mwanya ukabiranijwe n’iki? 21#Mat 17:20.Yesu arabishura, ati Ndababgire ukuri: Iyo muba muri n’ukwizera, mudakekeranya, ntimwokora ic’ uyu musukoni gusa, ariko mwobgira n’uyu musozi, muti Shingūka, utabge mu kiyaga; vyoba ko. 22Kand’ ivyo muzosaba vyose musenze, mwizeye, muzobihabga.

Abaherezi bakuru babaza Yesu ububasha bgiwe

23 # Yoh 2:18. Yinjiye mu rusengero, arikw arigisha, abaherezi bakuru n’abashingantahe b’ubgo bgoko baza kuri we, baramubaza, bati N’ububasha ki bugutera gukora ivyo? Kandi ni nde yaguhaye ubgo bubasha?#Mrk 11:27-33; Luk 20:1-8. 24Yesu arabishura, ati Nanje hinge ndababaze ijambo rimwe; ni mwarinyishura nanje mpeze ndababarire ububasha bunkoresha ivyo. 25Non’ ukubatiza kwa Yohana kwaturutse hehe? Ni mw ijuru, canke ni mu bantu? Bībūranya muri bo, bati Ni twavuga tuti Ni mw ijuru; ahava atubaza, ati N’iki cababujije kumwemera? 26#Mat 14:5.Kandi ni twavuga tuti Ni mu bantu; n’uko dutinya ishengero, kuko bose bavuga yuko Yohana yar’ ūvugishwa n’Imana. 27Bishura Yesu, bati Ntituhazi. Na we ati Nuko rero nanje simbabgira ububasha bunkoresha ivyo.

Umugani w’abahungu babiri

28Mugira ngw iki? Hābaye umuntu yar’ afise abahungu babiri: aragenda abarira umukuru, ati Genda, mwana wanje, uyu musi uje gukora mu ruzabibu. 29#Mat 7:21.Aramwishura, at’ Eka singenda. Maze hanyuma aririmbura, aragenda. 30Aja ku wa kabiri, amubgira kuno. Aramwishura, ati Ndagiye muvyeyi; ntiyajayo. 31#Luk 18:14.None mur’ abo bompi n’uwuhe yakoze ivyo se agomba? Baramwishura, bati N’uwa mbere. Yesu arababgira, ati Ndababgira ukuri yukw abatozakori n’abasambanyikazi babatanga kwinjira mu bgami bg’Imana. 32#Luk 7:29.Kuko Yohana yaje muri mwebge agendera mu nzira yo kugororoka, kandi ntimwamwemera. Arikw abatozakori n’abasambanyikazi baramwemeye. Namwe mubibonye, no hanyuma ntimwirimbura ngo mumwemere.

Umugani w’abarimyi b’abagarariji

33 # Mat 25:14; Yes 5:1, 2. Ni mwumvīre uwundi mugani: Hābaye nyen’ urugo yateye uruzabibu; aruzitirira uruzitiro, yimbamw’ ubgato bg’ikinogo, yubakamw’ umutara, arusigarana abarimyi, aja mu mahanga.#Mrk 12:1-12; Luk 20:9-19. 34Nukw igihe c’iyera kigomba kugera, atuma abakozi biwe kuri ba barimyi ngo babahe inzabibu ziwe. 35Maz’ abo barimyi bafata ba bakozi biwe, umwe baramushishagura, uwundi baramwica, uwundi bamutera amabuye. 36Yongera gutuma abandi bakozi barengeye aba mbere; babagira kuno. 37Hanyuma abatumak’ umwana wiwe, ati Bazosonera umwana wanje. 38#Mat 27:18.Abo barimyi babonye wa mwana wiwe, baravugana, bat’ Urya ni we samuragwa: ni muze tumwice, tuze twegukire umwandu wiwe. 39Baramufata bamuhindira inyuma y’uruzabibu, baramwica. 40None nyen’ uruzabibu ni yiyizira azobagira ate, abo barimyi? 41Baramwishura, bat’ Abo babi azobica rubi, uruzabibu arusigarane abandi barimyi, bazohora bamuha inzabibu igihe cazo.

42Yesu arababaza, ati Nta ho murasoma mu vyanditswe,

ngw Ibuye abubatsi bāgaye

Ni ryo ryahindutse irigumya imfuruka:

Ivyo vyavuye k’Uhoraho,

Kandi n’igitangaza mu maso yacu?#Zab 118:22, 23; Ivyak 4:11; Rom 9:33; 1 Pet 2:6-8.

43Ni co gitumye mbabgira yuk’ ubgami bg’Imana muzobgakwa, bugahabga ihanga ryama imbuto zabgo. 44#Dan 2:34, 35, 44, 45.Arik’ ūzogwa kur’ iryo buye azovunagurika; arik’ uwo rizogwako rizomuvungura.

45Maz’ abaherezi bakuru n’Abafarisayo bumvise iyo migani yiwe, bamenya kw ari bo avuga. 46Barondeye ingene bomufata, batinya abantu, kuko bamwiyumvira kw ar’ ūvugishwa n’Imana.

Attualmente Selezionati:

Matayo 21: RUN1967

Evidenziazioni

Copia